1-2. (a) Gini apai si aida agu aKristano ata manganga rogatise ya berẽkuriihe wenengai mbata fu i tona mbakadapa rogatise? (b) Ginipai ani aida ka pehe ho ani ape pa “mbakadapa rogatise” ni? (Oni bi gu kekeapai nga “Sakarogopai Yo.”)

 YA MO mo nakpinyemu ka manga rogatise? Wa vura duhe nga si aidanga boro mangi kina rogatise mbata ni nika du na ngbarago te, dungu agu aKristano ata manganga rogatise ya singia paranga yo watadu sosono yo, nangera angera kumbatayo tipa kadu na badiarogatise. Ono tie, mbata fu boro tona mbakadapa rogatise, si naida ni du na nyanyaki pagume dagba ni na Yekova, ni ini tini wenengai, na ni kidu na rengba ka mangapai kuti agu atindiro nga ga marã nga gu naye mbiko manga rogatise. a (1 Kor. 7:36) Ka mo mangi agi apai re, si nawiraha wa mo nika duadu na ngbarago rogo gamo rogatise yo.

² Ono tie, si naadunga taata ti aregbo dunduko ka gbia wene badiarogatise te. (Snz. 31:10) Na zavura ho mo nagbia gu boro ni mo aida ka ino ni wenengai, si ima rengba ka zanga du taata ka tona mbakadapa rogatise. Rogo gi kekeapai re, ani nika sakapai tipa gupai rengbe ka undo agu aKristano ata manganga rogatise ya tipa i gbia gu boro i abihe nga ni ima rengba kadu ni wene badiarogatise na i ki tona mbakadapa rogatise. b Ani nika wirikapai a tipa wai rengbe gu kura aboro rogo dungurati ka songoda agu aboro naida ka manga rogatise.

 GINIPAI RENGBE KA UNDO RO MO GBIA WENE BADIAROGATISE?

3. Gini apai si aida gu Kristano ata manganga rogatise ya berẽkuriihe mbata fu ni tona ngera tipa badiarogatise?

³ Ka mo aida ka manga rogatise, si ni wenepai tipa mo ini gini ngbatunga asino mo aidaha rogo gu boro yo mo aida ni du ni gamo badiarogatise mbata fu mo tona mbakadapa rogatise. Ka si adunga wo ya, mo ima rengba ka zanga bi gu boro rengbe kadu ni wene badiarogatise watadu mo ima rengba ka tona mbakadapa rogatise na gu boro angianga wene badiarogatise foro ya. Rengo ngaha nga, si naida ai gu boro mo aida ka manga rogatise na ni ngia gu Kristano niima zio bapatiza. (1 Kor. 7:39) Ono anga ai gu boro niima zio bapatiza nika ngia wene badiarogatise foro te. Sidu, mo ima rengba ka sana tiro nga: ‘Gimi asasa nga gine rogo raka yo? Gini asino mi abihe na nyanyakipaha rogo badiarogatise yo? Ya mo agu apai mi amaabangire tipaha ruaru?’

4. Gini apai kura aboro namangi kparakpee tipaha nibipa gbia badiarogatise?

⁴ Ka si du nga mo naida ka manga rogatise, si nirengo nga, mo ima manga kparakpee tipa ha. (Frp. 4:6) Ono Yekova akidongo he ka fu badiarogatise fu ai boro te. Ono ko naberãpa gamo nyemupai gbiati gamo biapai aberã na ko ima rengba ka undo ro ho mo aˈasada ni ka gbia badiarogatise. Sidu, mo naandu kindi kumbatayo kaa pe pa gamo nyemuapai gbiati abipai fuko. (Tam. 62:8) Mo mangi kparakpee tipa hipai gbiati tatamana. (Yak. 1:5) John, c nga bakuparanga Amerika yo asakipai tipa gupai ko ninaakodaha ku rogo gako akparakpee yo, ko aya: “Mi naape pa agu asino fu Yekova mi akpinyemuhe rogo badiarogatise yo. Mi naamanga kparakpee tipa agu amomu rengbe ka sa re mi gbia wene badiarogatise. Mi naasana Yekova a ko undo re mi sonosi agu asino nika sa re mi du ni wene kumbakudee.” Tanya, nga wirina ni dee du rogo gu ringara nga Sri Lanka, aya: “Wa mi angera tipa wene  badiarogatise, mi naasana Yekova ko undo re mi nye niruru re fuko na kidu na ngbarago.” Zavura ka mo aavuranga gbia badiarogatise awere ya, Yekova kidohe tipa kaa ndu kumbatayo kindi kaa ngerafuo gamo azingo nga ga borose gbiati gamo nyemu apai.​—Tam. 55:22.

5. Gini amomu du be agu aKristano ata manganga rogatise ya i gbia gu boro kpinyemu Yekova? (1 AKorindo 15:58) (Oni bi sura a.)

⁵ Baibiri nangarasa rani nga ani “nimángi ga Gbia sunge zaza dedede.” (Oni gedi 1 AKorindo 15:58.) Wa mo nikaa dia regbo kuti ngba ga Yekova sunge na kini di regbo na dungu awirina ni bakiakia, anga kina gupai sa mo nika gbia ngbarago ti ni nga gu wene kodatise nga ga awirina te, ono mo nika du a na momu ka gbia gu kura aboro ata manganga rogatise ya nga aguyo namaaberã yo wakina ro kuti mangasunge fu Yekova. Na wa mo nikaa manga ome kaa sa ngbarago ti Yekova, mo nika gbia ndikidi ngbarago.

6. Ho agu aKristano ata manganga rogatise ni ya angera ni tipa badiarogatise, ginipai si aida i tingidihe?

⁶ Ono mo du na rubangirise tie ka zanga mbu gupai nga ga gbata badiarogatise si da ni nyanyakipa pai kisusi rogo gamo raka yo. (Frp. 1:10) Ndikidi ngbarago arunga riipa manga mo rogatise watadu pa zanga mo manga rogatise ya te, ono si naru riipa gamo pagume na Yekova. (Mt. 5:3) Na ho mo ata manganga rogatise ni ya, mo ima rengba kadu na bakere ranirii bero ka kiiso gamo sunge tungusapai. (1 Kor. 7:32, 33) Mo mangisunge wenengai na gi regbo re. Jessica, nga wirina ni dee Amerika yo nga gu ri namangi rogatise ho garãri aima mbeda ni kuti 40 aya, “Mbata fu mi mangi rogatise, mi amaaberã re gbe kuti sunge tungusapai, gipai re aundo re mi gbia rengbabepai si ki vura du vurũ nga mi aaida aida ka manga rogatise.”

MO DI REGBO KA INOPAI TIPA GU KURA BORO

7. Tipagine duhe ti ni ni wenepai ka wisigo gu boro mo abihe nga mo rengbe ka manga rogatise na ni tipa bete regbo mbata fu mo pepa gamo nyemupai fu ni? (Asanza 13:16)

⁷ Ginipai rengbe ka manga ka si du nga mo berẽ gupai nga gu kura boro ima rengba kadu ni wene badiarogatise foro? Ya mo si naida mo pepa gamo nyemupai niipo fu gu boro re? Baibiri nape gupai nga, boro tatamana nagbia inohe mbata fu ni mangipai. (Oni gedi Asanza 13:16.) Sidu, si ni patatamana ka wisigo gu boro re wenengai tipa bete regbo mbata fu mo pepa gamo nyemupai fu ni. Aschwin nga wirina ni kumba Netherlands yo aya, “Nyemupai ima rengba ka sono niipo ono si ima rengba a ka gbandaka niipo. Sidu, ni dia mo regbo ka wisigo boro wenengai, mo atonanga mbakadapa rogatise riimburu gu nyemupai naye kini go niipo te.” Kurii gure, wa mo nikaa wisigo gu boro re, mo ima rengba ka ye ka bi gupai nga gu boro re arengbanga kadu ni wene badiarogatise foro te.

8. Waigu rengbe gu boro ata manganga rogatise ya ka wisigo gu boro ni abihe nga ni rengbe ka manga rogatise na ni? (Oni bi sura a.)

⁸ Waigu rengbe mo kaa wisigo gu kura boro ni tatamana? Ti regbo adunguratise watadu ti regbo asungo, mo ima rengba ka bi agu apai du tipa wai du gu boro re rogo toroyo, asino ni, na gani mangaapai. Ada nga abakureani na gini apai ni afura tipaha? (Rk. 6:45) Ya mo gani asasa nandu sa na gamo? Mo ima rengba ka sana agu abaakumba du rogo gani dungurati watadu gu kura nyanyaki aKristano nga aguyo ini ni wenengai. (Snz. 20:18) Mo ima rengba ka sanahe tipa wai du rimo ni dagba aboro gbiati asino ni. (Ruta 2:11) Wa mo nikaa wisigo gi boro re, mo ne gupai nga ka sa ni ka ni dunga wenengai ya. Mo du na irisa tipa gani abipai ki zanga ka ida ka ino gani wiri futufutuapai dunduko.

9. Mbata fu mo fura na gu boro mo abihe nga mo rengbe ka manga rogatise na ni, ginipai si aida mo du na kido tipaha?

⁹ Bagizo regbo wai rengbe mo ka wisigo boro mbata fu mo pepa gamo nyemupai fu ni? Ka mo fura na boro tipa rogatise ni kina wiri ipo, ni ima rengba ka berã gupai nga mo aberãnga wenengai kuriipai mbata fu mo mangi adiaberã te. (Snz. 29:20) Ono tie, ka gu kura boro re bihe nga  mo na nyemupai koyo du ni ni, na mo ki ni di bakere regbo ka zanga pehe fu ni, ni ima rengba ka berẽ gupai nga mo na bakere kapa mbata fu mo mangi adiaberã. (Batu. 11:4) Mo tingidi gupai nga, mbata fu mo fura na boro tipa rogatise, si aidanga mo du na gu kido nga mo nika dia gu boro re adia te. Ono si naida mo du na gu kido nga mo ima du regerege tipa rogatise na gu boro re ima du ni gu boro mo aberãha nga ni ima rengba kadu ni wene badiarogatise foro.

10. Ginipai rengbe mo ka mangaha ka mo bi gupai nga boro na nyemupai koyo du mo ni ono mo akpingo nyemu oni mbakadi pa rogatise na ni te?

¹⁰ Ginipai tie rengbe mo ka mangaha ka mo bihe nga kura boro naida ka ino ro wenengai? Ka si du nga nyemu gupai nga oni inidi tironi wenengai tiro te, mo asadi ka yugoho gbaiga rogo gamo mangaapai yo. Si arengbanga kadu wenengai tipa mo sa gu boro re ni berẽ gupai nga mo ima rengba kadu na nyemu oni tona mbakadapa rogatise baraho adunga mo ni na nyemuhe ya te.​—1 Kor. 10:24; Ef. 4:25.

11. Ka si du nga si naida mo mangi mbakadapai nga ga rogatise fu aboro, gini apai si aida mo berẽkuriihe wenengai?

¹¹ Rogo gu kura aringara, avunguagude du watadu gu kura sosono aboro nasia badiarogatise fu agu agumeyo ata manganga rogatise ya. Rogo kura aringara, agume watadu abakure du nagbata badiarogatise fu gu boro ata manganga rogatise ya watadu abakure namanga mbakadapai tipa agu aboro ata manganga rogatise ya gbiatiyo na ki bihe singia i rengbe ka tona pabakure nga ga rogatise. Ka si du nga i sana ro mo mangi mbakadapai nga ga rogatise dagba agu aboro ata manganga rogatise ya, mo berẽpa gupai gu kumba re na gu dee re nakpinyemuhe na ki idi na ni. Ka si du nga mo naberãha nga gu kura boro ima rengba kadu ni wene badiarogatise fu bakureamo watadu gumero, mo asadi ka ino gu boro re wenengai, mo asadi ka ino asino ni, na gu nyakipaha gbe nga mo asadi ka inoho singia gu boro re na mbembedi pagume na Yekova. Du na mbembedi pagume na Yekova nyakipaha gbe kisusi marã, wirikapai, watadu gani bangiriba. Ono tie, mo tingidi gupai nga, gu bakuparanga re watadu nakuparanga re du si aida i mangi yangara diaberã singia i naida ka manga rogatise.​—Gara. 6:5.

WAIGU RENGBE MO KA TONA MBAKADAPA ROGATISE?

12. Waigu rengbe mo ka pe gupai fu boro nga mo nakpinyemu oni mbakadi pa rogatise na ni?

¹² Ka si du nga mo nakpinyemu ka tona mbakadapa rogatise na boro, waigu rengbe mo ka pehe  fu ni? d Mo ima rengba ka manga mbakadapai tipa ka fura na gu boro re, singia rogo gu ba du aboro adu rogoho watadu rogo terefuni. Mo pe gupai fu ni gbaiga nga mo ima kpinyemu ni na mo naida oni inidi tironi wenengai. (1 Kor. 14:9) Mo fu regbo fu gu boro re ni berẽkurii wai ni nika karagapai ka si aaidaha wo. (Snz. 15:28) Na ka gu boro re aakpingo nyemu oni mbakadi pa rogatise na ni ya, mo du na irisa tipa gani bipai.

13. Ginipai rengbe mo ka mangaha ka boro yugu nyemupai nga ga rogatise koyo du mo ni? (AKorosaio 4:6)

¹³ Na ka si du nga boro yugu nyemupai nga ga rogatise koyo du mo ni? Si nawiraha wa gu boro re ima du na wingbaduse tipa ka pehe foro, sidu, si naida mo yugu wenesino na kidu na irisa. (Oni gedi AKorosaio 4:6.) Ka si du nga mo naida regbo tipa ka berãkuriihe singia mo naida ka tona mbakadapa rogatise, mo pehe fu gu boro re. Ono tie, si naida mo asadi ka karagapai fu ni ni ipiipihe. (Snz. 13:12) Ka si du nga nyemu mbakadapa rogatise tiro na gu boro re te, mo pehe fu ni ngba wene gene na gbaiga. Oni bingo wai Hans, nga wirina ni kumba rogo gu ringara nga Austria, akaragapai ho wirina nga dee asana ko ni tipa rogatise, ko aya: “Mi apepa gimi diaberã furi ngba wene gene ono mi kidu adu gbaiga. Mi apepa gimi diaberã fu ri niipo mbiko mi aaidanga ri berẽ gupai nga ani ima rengba ka tona mbakadapa rogatise na ri rogo gu kura uru te. Mbiko gi ndupai re, mi adu na rubangirise ka zanga pe gupai watadu ka manga gupai nika sa ri ri berẽ gupai nga mi ima rengba ka aria gimi diaberã.” Ono tie, ka mo aida ka ino boro wenengai, mo pehe funi na oni ki saki gupai kina sa oni aida si mangi ti regbo gaoni mbakadapa rogatise. Agu apai mo aberãha ima rengba kadu kia ti gu gu kura boro aberãha, nibipa gaoni sino mangapai watadu kura andu-apai.

WAIGU RENGBE KURA ABORO KA UNDO AGU AKRISTANO ATA MANGANGA ROGATISE YA?

14. Waigu rengbe ani ka undo agu aKristano ata manganga rogatise ya na gaani afugo?

¹⁴ Waigu rengbe ani dunduko ka undo agu aKristano ata manganga rogatise ya nga aguyo naida ka mangaha? Gene sa dagba agu akuraha yo rengbe ani ka mangaha ngbaha nga, ni du ani na rubangirise nibipa gupai ani apehe. (Ef. 4:29) Ani ima rengba ka sana tirani nga: ‘Ya mo mi naape agu apai naimisa boro rogo wia yo fu gu boro ata manganga rogatise ya? Ho mi naabi agu awirina ni nga abakuparanga na anakuparanga i ni fura, ya mo mi naaberã gupai nga i ima tona du na nyemuse nga ga rogatise dagba yo?’ (1 Tim. 5:13) Kurii gure, si aidanga ani sa agu awirina ata manganga rogatise ya i naaberã gupai nga gbegberẽpai  kina tiyo watadu payo kusende te. Hans, i nipe pa ko kusayo aya: “Gu kura awirina ni naape gupai nga, ‘Tipagine mo amanganga rogatise ti ni ya? Tooni gude nga mo berewe te.’ Ngbatunga agu afugo re nasa agu aboro ata manganga rogatise ya i naabi tiyo nga aboro abingo yo na kikiipa yo te na si kini sa gupai nga i berẽpa manga rogatise ni ipiipihe be soapai.” Na ngba wai duhe ni wenepai tipa kaa ngera tipa amomu ka tambua agu aKristano ata manganga rogatise ya!​—1 Tesa. 5:11.

15. (a) Ringbisihe kuti gu rugute du rogo ARomo 15:2, ginipai si aida ani berẽkuriihe mbata fu ani undo boro ni gbia badiarogatise? (Oni bi sura a.) (b) Gini nyanyakipa apai mo nawirikihe rogo vidio? (Oni bi rukutu kekeapai.)

¹⁵ Na ka si du nga ani berẽ gupai nga gu kura wirina nga kumba na gu kura wirina nga dee ima rengba kadu ni wene arogotise? Baibiri nape gupai furani nga ani berẽpa ga akuarani bipai. (Oni gedi ARomo 15:2.) Dungu agu aboro ata manganga rogatise ya aidanga gupai nga i yugu yo fu gu kura boro nga gu ni i abihe nga i ima rengba kadu ni badiarogatise te, na si naida ani yugu irisa tipa gupai i akpinyemuhe. (2 Tesa. 3:11) Agu akurayo ima rengba ka ida na undo, ono si aidanga ani tona undo yo mbata fu i sana rani tipa undo te. e (Snz. 3:27) Gu kura aboro aidanga i yugu yo fu gu kura boro gbaiga te. Lydia, nga wirina ni dee Germany yo ata manganga rogatise ya, aya: “Mo ima rengba ka dungura agu awirina nga akumba na adee nga aguyo ata manganga rogatise ya kurogo bakiki badona. Gipai re nafu momu fuyo i di regbo kina sa na ki mbuyo i mangi diaberã tipa gupai i aida ka mangaha.”

16. Ginipai si aida agu aKristano ata manganga rogatise ya tingidihe?

¹⁶ Ani dunduko​—agu aboro ata manganga rogatise ya na agu aboro niima manga rogatise​—ima rengba ka raka na ngbarago! (Tam. 128:1) Sidu, ka si du nga mo nakpinyemu ka manga rogatise ono mo ata bingo gu boro ka mo mangi rogatise na ni kindi te, mo naandu kindi kumbatayo kaa maaberã ro kuti gamo sunge fu Yekova. Wirina rogo gu ringara nga Macao du rimo ri nga Sin Yi aya: Mo ima rengba ka ringbisa gu regbo mo nika diaha na gamo badiarogatise Paradizo yo kuti gu wiri bete regbo mo adiaha awere ni bakuparanga watadu nakuparanga. Mo gbia ngbarago ti gu regbo re, na ki mangisunge na ni wenengai.” Ono na ka si du nga mo ima gbia boro na oni ki ima tona mbakadapa rogatise? Rogo gu kekeapai ngbefuo gere, ani nika sakapai tipa wai rengbe mo ka mbakadapa rogatise nga gu nika undo ro mo mangi agu adiaberã nga ga tatamana.