1. Gini regbo mbedimbedi aKristano dunduko nika du ngbangbaturũ yo?

 DUNGU agarã kusayo, ga Yekova aboro aabakabangiriyo nga, ‘Gini regbo i nika roga mbedimbedi aKristano ku ngbangbaturũ yo?’ Ani anaaberã gupai mbata nga bete kura mbedimbedi aKristano nika raka araka auru kpotosende rogo Paradizo tipa bete regbo tingbafuo Aramegido. Ono rogo gu Ngbaõbambu Sinziri nangia ga Bamburu 1, 2013, ani awiriki gupai nga i nika zingisa gu mbedimbedi aKristano du kindi auru kpotosende ku ngbangbaturũ yo mbata fu gu vura nga Aramegido tona.​—Mt. 24:31.

2. Gini sanahe rengbe ka kura, na ginipai ani nika sakapai tipa ha rogo gi kekeapai re?

² Ono tie, gu sanahe rengbe ka kura nga: Ginipai nika manga tipa ga Kristo “kura akandoro” nga aguyo nikaa iriso Yekova ni ruruyo auru kpotosende ti regbo “bakere gberãngbi”? (Yo. 10:16; Mt. 24:21) Bete kura akandoro ima rengba ka bakabangiriyo nga, i ainongo ginipai si nika ida i mangihe tingbafuo i rogo agi awirinayo re ku ngbangbaturũ yo te. Ani sakingo pai tipa apangbanga rogo Baibiri yo ue nga gu rengbe ka sayo i berẽ ngba gi gene re. Tingbafuo gure, ani nika sakapai tipa gu nduapai si aidanga ani bakibangirani ti ni ya.

GINIPAI NIKAA MANGANGA YA?

3-4. Ginipai rengbe kura aboro ka bakabangiriyo tipaha, na tipagine?

³ Kura aboro ima rengba ka bakabangiriyo tipa gupai nga kura akandoro ima rengba ka mbu iriso Yekova ti gu regbo gu mbedimbedi awirina du rogo Riigbu Bipasunge nikaa dunga ho ka fu rugapai fuyo ya. I ima rengba kaa berã ngba gi gene re mbiko pa kura apangbanga du rogo Baibiri yo. Ani sakingo pai tipa akpiapai ue. Gu bambataha nabipa gu Gbiamotumo nangia Yoyada. Ko angia ga Mbori ruru moyambu. Ko na diako nangia Yosabata, abanda tooni wiri kumbagude rimoko angia Yoasa na ki undo ko tipa ko da ni wene ruru bakindo. Ti gu regbo Yoyada adu ni ungako, Yoasa airisi Yekova na ki mangi agu apai naadu  ni wenehe. Ono fuo Yoyada kpi, Yoasa atona ka manga gupai naadu ni gbegberẽhe. Ko adegetuko fu gbegberẽ abazogo na ki mbu iriso Yekova.​—2 Peka 24:2, 15-19.

⁴ Gu ue kpiapai nga ga agu aKristano nadu rogo ue sakama agarã. Gu yangada mokedi nakpi angia Yoane, ti agu aregbo dunduko ko adu ni ungako, ko aima undo dungu aKristano i nye ni ruruyo. (3 Yo. 4) Wakina gupai kura ga Yesu amokedi amangihe, Yoane amangi ome nyanyaki tipa ka undo adungurati be ai gu boro narengbe ka yugo iraira yugopai watadu mangapai. (1 Yo. 2:18; 2 Tesa. 2:7) Ono tingbafuo kpio Yoane, badungu aboro rogo dungurati apekefuo agu ayugopai nangia ga abasamungu. Rogo agu agarã nangbefuo ho, agi abasamungu re aayugo iraira aberãpai na ki mbu gbegberẽ mangaapai si nimangi rogo adungurati dunduko.

5. Gini digisopai si aidanga ani da kutini nibipa agu akpiapai du ue re ya?

⁵ Ya mo agi akpiapai re nayugo gupai nga tingbafuo i rogo mbedimbedi aKristano ku ngbangbaturũ yo, ga Yesu kura akandoro ima rengba ka tona manga gupai du ni gbegberẽhe wa Yoasa amangihe watadu ka da ni abasamungu wagu badungu aboro amangihe tingbafuo kpio amokedi? Karagapai nga wagusa te! Ani ima rengba kadu na gu kido nga ho mbedimbedi aKristano nikaa dunga ni auru kpotosende ane ya, kura akandoro nikaa ndu kindi kumbatayo kaa iriso Yekova ngba ruru gene na ko nikaa ndu kindi kumbatayo kaa ngerafuo yo. Tipagine rengbe ani kadu na gu kido re ti ni?

PAI HO NIKA GBARASAPA ZIAZIA IRISOMBORI TE

6. Gini aregbo biata ani nika sakapai tipa ha tipa wiri bete regbo?

⁶ Tipagine rengbe ani kadu na gu kido ti ni nga pai ho nika gbarasa ziazia irisombori te, zavura ti gu kere kpakarakpakara aregbo naye kumbatayo re ya? Bambiko Baibiri nasaka gupai nga gu regbo ani araka ti ni awere kia ti gu regbo aYisaraere aaraka ti ni na gu nadu tingbafuo kpio amokedi. Sidu, ani wisigingo pai tipa agi aregbo du biata re nga: (1) Gu regbo nangia ga agu aYisaraere naadu mbata, (2) gu regbo nadu tingbafuo kpio amokedi, na (3) gaani regbo ti, “rago mbakada arago dũ.”​—Amo. 3:21.

7. Tipagine si aaidanga agu aYisaraere nadu ni ruruyo zanga gayo maabangirise ti ni ho abakindo na kura aboro asia ka manga gupai ni nadu ni gbegberẽhe ya?

⁷ Gu regbo nangia ga agu aYisaraere naadu mbata. Ngbutuko mbata fu Moize kpi, ko ape gupai fu aYisaraere nga: “Mi ini he nga fuo kpiore oni kpakaya awási tironi awasi, ki sa tironi ku bani ti gu pai rugu mi roni na ni.” (Pa Rug. 31:29) Moize afu zahe a nga ka aYisaraere samungu, i nika keda yo ni zizi aboro kurogo kura ringara. (Pa Rug. 28:35, 36) Ya mo agu afugo re ada ti rengo? Ii. Tipa kama agarã, badungu abakindo amangi gupai nadu ni gbigbitaha bangiri Yekova na aboro kini pekefuo yo kaa iriso kungbo ambori. Mbiko gipai re, Yekova afu mbusa fu gu gbegberẽ rikaaboro nangia aYisaraere na ko aaidanga ha berewe fu agu abakindo nangia aYisaraere i naazogarago te. (Yeze. 21:25-27) Ho i abi gupai ni nga gupai Mbori apehe ima manga, si afu ngarã fuyo tipa i naandu kumbatayo kaa iriso Yekova ni ruru yo.​—Yes. 55:10, 11.

8. Ya mo si naida ngbarani zere ka ino gupai nga gu dungurati nangia ga aKristano nadu rogo ue sa kama agarã aamanga gupai nadu ni gbegberẽhe? Oni sakingo rogoyo.

⁸ Gu regbo nadu tingbafuo kpio amokedi. Ya mo si naida ngbarani zere mbiko ino gupai nga gu dungurati naadu rogo ue sakama agarã aamanga gupai nadu ni gbegberẽhe? Wagusa te. Yesu aima pe gupai nga dungu abasamungu nika kura. (Mt. 7:21-23; 13:24-30, 36-43) Agu amokedi nangia Pauro, Petero, na Yoane aima  pe gupai nga agu asangbaanebi Yesu agumbaha aima tona ka digiso tihe rogo bambata sakama agarã. (2 Tesa. 2:3, 7; 2 Pet. 2:1; 1 Yo. 2:18) Ngbutuko tingbafuo kpio amokedi, agu aKristano nasatiyo ni abasamungu ada ni papara Babera du ni bakerehe nga bariwara ngbi ziree pambori. Berewe, gupai Yesu aima gumbaha adigisitihe.

9. Waigu du gu regbo ani araka ti ni awere kia ti gu regbo agu aYisaraere nadu mbata araki ti ni na gu regbo agu aKristano nadu rogo gu dungurati nadu rogo ue sakama agarã araki ti ni?

⁹ “Rago mbakada arago dũ.” Gu regbo ani araka ti ni awere kia ti gu regbo agu aYisaraere nadumbata araki ti ni na gu regbo bakere samungu amangi ti ni rogo ue kama agarã Fuo Batikayo Kristo. I nayamba gi gaani regbo re nga gine? Ani nayamba gi gaani regbo ani araka ti ni re nga “kusa rago” nga ga gi gbegberẽ sino raka re. (2 Tim. 3:1) Baibiri nayugo gupai a nga bakere regbo nga gu du ni gbangaha atona kina ti gu bangisa regbo re. Si nika ndu da ku ho i nika sigira gu Kindo ni nga ga Masiya nga gu nika sa aboro i du ni rengberengbe yo na ki sa kpotosende ni Paradizo. I nayamba gi regbo re nga “rago mbakada arago dũ.” (Amo. 3:21) Gi regbo re atona rogo 1914. Ginihe tie du i akaragaha kubaha ti gu regbo re? I amoi Yesu ni Bakindo ngbangbaturũ yo. Sidu, Yekova adu berewe na bazogo nga gu ni naaru kubako ki ngia tita gu ruru Bakindo nangia Davide. Ono tie, anga gu zogarago re nga gu yangarapai Yekova akaragaha kubaha te. Ngbutuko tingbafuo gure, Yekova aundo gako amoyambu auru kpotosende ni yangadaha tipa i naairisoko berewe ngba gu gene ko aida i irisiko ngbaha! (Yes. 2:2-4; Yeze. 11:17-20) Ya mo i agbarasapa ha berewe?

10. (a) Ginipai Baibiri agumbaha tipa ziazia irisombori nibipa gi gaani regbo re? (Yesaya 54:17) (b) Tipagine ngbatunga agu asangbaanebi re afu kido ti ni?

¹⁰ Oni gedi Yesaya 54:17. Oni berẽnga pa gu sangbanebi re: ‘Gu ũvura i ka mbakada ha kuti ro si adía nga be ro wa sa te!’ Agu afugo ga Mbori toro adu kugiipa kehe re nadigisotihe areme. Agu afugo wasa ngbefuo gure nabipa gu regbo abi a du ani ti ni: “Awiro dunduko kina re nikayugo pai fu yo, ga awiro wenepía adú ni bakere he. I anyákasa ro ni rurupai. . . . Bambiko mo agúnde nga te; gbudagbuda ki turũ na mo, bambiko si ayé nga mbembedi sa ro te.” (Yes. 54:13, 14) Zavura “mbori gi zegino re,” nga Satana nitiko, arengbanga ka rugusa gu sunge yugopai ga Yekova aboro amangaha te. (2 Kor. 4:4) I ima karaga ziazia irisombori kubaha, na i agbarasanga ha berewe te. Si nika nyeanye kindi. Ũvura ho sa i nika tumbaha kuti rani nika du na diabese te!

 GINIPAI NIKA MANGA?

11. Ginipai nasarani ani du na gu kido nga, i ambunga ngerafuo bakere rimbasa aboro ti gu regbo mbedimbedi aKristano nika ga ku ngbangbaturũ yo te?

¹¹ Ginipai nika manga ho mbedimbedi aKristano nika ga ni ku ngbangbaturũ yo? Oni tingidi gupai nga, Yesu nga gaani babanda akandoro. Ko nga rii gu dungurati nga ga aKristano. Yesu ape gupai ziazia nga: “Bambiko kina Kristo sa nga bairaroni.” (Mt. 23:10) Yesu nga gu ko nazogarago ngbangbaturũ yo nikaa ngera angera kindi fuo apefuoko. Mbiko wa Kristo nikaa ngbe fuyo kumbatayo, pai adunga ho apefuo Kristo auru kpotosende ane nikaa gunde behe te. Rengo nga ha nga, ani ainongo gu futufutuapai dunduko tipa wai Yesu nikaa ngbe kumbatayo fu gako aboro ti gu regbo re te. Sidu, ani wisigingo bete agu akpiapai nga ga Baibiri nga gu rengbe kafu kido furani.

12. Waigu Yekova angerefuo gako aboro (a) tingbafuo kpio Moize? (b) tingbafuo Eriya gbia gu kura vovo sunge? (Oni bi sura a.)

¹² Moize akpi mbata fu aYisaraere rimi ku rogo Ringara Mokido. Ginipai namangi tipa ga Mbori aboro? Ya mo Yekova ambu undo gako aboro tingbafuo kpio gi ruru kumba re? Wagusa te. Kina wai i aanidu ni ruruyo fu Yekova, kina wo a ko anaaundo yo. Mbata fu kpi Moize, Yekova ape gupai fuko nga ko sia Yosua ko ngbembatayo fu gako aboro. Moize aima digo niraba Yosua tipa dungu agarã. (Gate 33:11; Pa Rug. 34:9) Kurigure, badungu akumba naadu ho naima rẽ ka ngbembatayo​—abarutiri aboro nga ga akutu yo, nga ga akama yo, nga ga abisue bawe yo, na zavura nga ga abawe yo. (Pa Rug. 1:15) I aima ngera wenengai fuo ga Mbori aboro. Ani nabi kina gi bangisa kpiapai re ti Eriya. Ko aima mangasunge nyanyaki tipa badungu agarã ka undo aYisaraere i niirisi Yekova. Ono kusa, Yekova akedi ko ko ndu ka mangasunge Yuda yo ku sudiyo yo. (2 Aba. 2:1; 2 Peka 21:12) Ya mo i agindigo gu ruru aboro naadu rogo gu kindo nangia ga aYisaraere naadu na angbatunga bawe? Wagusa te. Eriya aima digo niraba Erisa tipa dungu agarã. Berewe a, “awiri anebi” adu kinaho nga aguyo i aima rabayo. (2 Aba. 2:7) Sidu, dungu ruru akumba adu kinaho tipa ka undo ka ngbe kumbatayo fu ga Mbori aboro. Yekova aandu kumbatayo kindi kaa digiso gako ringbisapai, na kaa ngerafuo ruru airisiko.

13. Ginipai Yekova akido rani na paha rogo AEbere 13:5b? (Oni bi sura a.)

¹³ Na agu akpiapai re riroyo, ginipai mo aberãha nga si nika manga tingbafuo yangara mbedimbedi aKristano ga ku ngbangbaturũ  yo? Si aidanga ani bakibangirani te. Baibiri nafu gu kido furani ngba taata gene nga: Yekova ambunga gako aboro auru kpotosende wa sa te. (Oni gedi AEbere 13:5b.) Wakina aMoize na Eriya, gu umba badona nga ga mbedimbedi aKristano nga aguyo nangbembatayo areme ima rugatiyo na pa nyakapa raba kura aboro. Tipa badungu agarã, agi awirina du rogo Riigbu Bipasunge re aima digo nifu rabahe fu akumba dagba kura akandoro tipa i naangbembatayo. Ni kpiapai, i ima mbakada dungu asukuru tipa ka raba abaakumba, agu ababiapai ninaata ata, agu awirina du rogo gu Rondo nga ga Be Basunge, ababiapai Betere yo, amokedi, gbiati kura aboro. Agu awirina du rogo Riigbu Bipasunge aima digo nifu rabahe fu amoundo nga ga gu dungu arondo du rogo Riigbu Bipasunge. Agi amoundo re awere namanga dungu asunge rogo ga Yekova riigbu ni ruruyo. I ima mbakada tiyo wenengai tipa kaa ndu kumbatayo kaa ngerafuo ga Kristo akandoro.

14. Gini memepai du rogo gi sakapai re?

¹⁴ Gaani memepai rogo gi sakapai re gi du ane: Ho i nika roga yangada mbedimbedi aKristano ni ku ngbangbaturũ yo bara ti digido bakere gberãngbi, airisimbori nikaa ndu kindi kumbatayo kaa irisoko ni ruruyo tii gu pagbia nga ga Kristo. Ani ima ino gupai nga ti gu regbo re, dunguradungura aringara Baibiri ayambaha nga Gogo boro Magogo nika zubo ga Mbori aboro. (Yeze. 38:18-20) Ono gi gayo zubohe nika du tipa wiri bete regbo re adunga na diabese te, si arugusa nga ga Mbori aboro ti irisoko te. Ko nika batasa yo abatasa nirengo! Rogo yuguyugupai yo, gu mokedi nangia Yoane abi “bakere rimbasa aboro” nga ga Kristo kura akandoro. I ape gupai fu Yoane nga, gi “bakere rimbasa aboro” re, nga agu yo “naakuru rogo bakere gberãngbi.” (Yugo. 7:9, 14) Sidu, ani ima inoho nirengo nga Yekova nika batasa yo abatasa!

15-16. Ringbisihe kuti Yugoti 17:14, ginipai mbedimbedi aKristano nika mangaha ti regbo Aramegido, na tipagine du gipai re ti ni nipa ngarasaro?

¹⁵ Wa vura duhe wo, bete kura aboro ima rengba ka bakabangiriyo nga: Ono ginipai mbedimbedi aKristano nikaa mangaha tingbafuo i ga ku ngbangbaturũ yo? Baibiri nafu karagapai  afu kuti gu sanahe re. Si nafura tipa azogarago nga ga gi zegino re nga si “nikaso vura kuti Wiri Kandoro.” Nirengo, i adunga na diabese te. Ani nageda gupai nga: “Wiri Kandoro nikadia be yo.” Ono ada nika undo ko? Gu veresi re nakaragapai kuti ni. I nga “agu yo i ayambu yo,” “du ni siasia yo,” na “ni kangarã yo.” (Oni gedi Yugoti 17:14.) Ada du nga agi aboro re? Gu mbedimbedi aKristano nga agu yo i nika zingisa yo be kpio! Sidu, ho i nika roga gu yangada mbedimbedi aKristano du auru kpotosende ane ni ku ngbangbaturũ yo mbembedi na digido bakere gberãngbi, gayo bambata sunge nika ngia ka sovura. Nairiwo gu riko nyanyakipa sunge re! Kura mbedimbedi aKristano kinaho naasovura aso mbata fu i da ni aDezire Yekova. Zavura bete aguyo kinaho nadu adu ni abanzengere. Ono kusa, i ada ni aKristano na ki wiriki wai ka raka zezeredi na kura aboro. (Gara. 5:22; 2 Tesa. 3:16) I ambu songoda pa sovura. Ono tie, tingbafuo i zingisi yo ku ngbangbaturũ yo, i nika mangasunge wa sa na Kristo gbiati gako ziazia amaraika ka so yangada vura kuti avura Mbori.

¹⁶ Mo berẽnga kurii gipai re! Auru kpotosende, kura mbedimbedi aKristano kinaho du ni gbinza yo na kidu kpokorokpokoro. Ono bara sa kindi i nika zingisa yo ku ngbangbaturũ yo, i nika du ni agu atoro du na ome tiyo, na i nika fu gu sunge fuyo nga i sovura wa sa na Bakindo-Basovura, nga Yesu Kristo. Tingbafuo i so gu vura nga Aramegido, i nika mangasunge na Yesu tipa ka undo aboro i da ni rengberengbe yo. Zanga kapa, i nika du na rengba ka undo agu awirinayo i naima kpinyemuyo gbe du auru kpotosende kisusi wai i aaundo yo ho i adu ni ni kpakpa aboro!

17. Waigu ani aino gupai nga ga Mbori amoyambu dunduko nika du ni bandabanda yo ti regbo gu vura nga Aramegido?

¹⁷ Ya mo mo nga boro sa dagba kura akandoro? Ka si duwo, ginipai si nika ida mo mangihe ti gu regbo gu nyanyakipa vura nga Aramegido nika tona ti ni? Gupai gbua si nika idaha nga: Mo kido kuti Yekova na ki pekefuo gako rugapai. Ginipai rengbe gupai re ka kodaha? Baibiri nafu wasa nipe gupai nga: “Oni rími ku rogo gaoni abambu, ki kisi gaoni angbadimo fuo roni, oni óko tironi ngbutuko toni daho pa imisiri ngbaduse ka susa ni.” (Yes. 26:20) Ga Mbori ruru amoyambu dunduko, ngbangbaturũ yo na auru kpotosende nika du ni bandabanda yo ti gu regbo re. Wakina gu mokedi nangia Pauro, ani na gu kido nga, singia ‘angbi, na agu apai du awere, na agu apai nikaye . . . a kpara nga rani ti ga Mbori nyemuse te.’ (Rom. 8:38, 39) Mo nitingidi gupai ti aregbo dunduko nga: Yekova ima kpinyemuro, na ko ambunga ro wa sa te!