1. Ginihe nga gu paradizo nga ga toro, na ginipai si aida ani diberã ka mangaha?

 PARADIZO kinaho nga gu narukuba kurapai areme auru kpotosende nga gu niima hi be aboro nga aguyo namanga weneapai. Si na dungu mirioni aboro rogoyo nga aguyo nagbia ngbarago ti ndikidi zereda. Agu aboro niima du rogo gi paradizo re ima diaberã nga i aida nga ka kura rogoho te. Na i naida dungu aboro ye ka kodatiyo na yo rogo gi wenepai re. Ginipa du ngaha? Gu paradizo nga ga toro! a

2. Ginipai du ni iiriwoho tipa gu paradizo nga ga toro?

² Ngba iiriwo gene, Yekova ima mbakada ba nga gu narukuba kurapai kia nga gu du gako aboro rogoyo rogo zereda na ni kodikodi yo wa vura duhe vurũ nga i naraka rogo gi gbegberẽ zegino nga ga Satana aboro asoga akurayo rogoho re. (1 Yo. 5:19; Yugo. 12:12) Gaani Mbori nyemuse nabi wai abi gi sino raka re aimisa aboro ono ko sa gako amoyambu ba yo du wenengai tipa wa ka i aandu kindi kumbatayo kaa irisoko na ngbarago. Fugoko nasakapai tipa gi paradizo nga ga toro re nga, si wa “bagbuko” na “tuditudi ati.” (Yes. 4:6; 58:11) Mbiko ga Yekova amaku, agu aboro naraka rogo gi paradizo re na ngbarago na ni bandabanda yo rogo gi kere kpakarakpakara aregbo nga ga yangara arame re.​—Yes. 54:14; 2 Tim. 3:1.

3. Waigu gu sangbaanebi i akehe rogo Yesaya kapita 65 adigisitihe mbata kusayo?

³ Vurube gu nebi nangia Yesaya, Yekova asakipai tipa wai raka  nika du fu agu aboro nikaa raka rogo gu paradizo nga ga toro. Oni rengbe ka bi gi sakapai re rogo Yesaya kapita 65, nga gu nadu na bambata digisidigisi sangbaha rogo 537 Mbata fu Batikayo Kristo. Ti gu regbo re, i akusi agu aYudo nasa berãyo tii sunge zio Babera yo na i ki karagatiyo ku rogo gayo ringara. Yekova afu maku fu gako aboro na ki undo yo i mbakadi Yerusarema nga gu bagbata i agbarasihe si da ni bawene ba berewe na ki mbakadi gaha yekaru nangia gu ba nadu tipa ndikidi irisombori Yisaraere yo.​—Yes. 51:11; Zek. 8:3.

4. Waigu gu sangbaanebi du ni kekehe rogo Yesaya 65 adigiso tihe areme?

⁴ Gu ue digisidigisi gu sangbaanebi nga ga Yesaya atona rogo 1919 Fuo Batikayo Kristo, ho agu airisi Yekova du ti gi gaani regbo re akuru ni ti gu sunge zio nga ga Babera Duna Bakere Ome Ti Ni. Tingbafuo gure, gu paradizo nga ga toro ki tona ka sona na kini gbandaka rogo zegino dunduko. Agu abatungusipa Kindo nadu zaaza akusi dungu adungurati na kini yugu agu asino nga ga aKristano. Agu akumba na adee naanamangapai mbata na zinga na kini mangi wasiwasi apai “ki ukadi gu vovo boro, fu yo ni ku sangba Mbori yo.” (Ef. 4:24) Kina rengo ngaha nga, dungu agu amaku i nasakipai tipaha rogo Yesaya nika digiso tihe rogo gu vovo zegino du kumbatayo. Ono zavura kina awere, ani nagbia dungu weneapai mbiko pa du ani rogo gu paradizo narukuba kurapai kia. Ani nika sakapai awere tipa wai du gi paradizo nga ga toro re na ome kuriirani na ndu gupai si aidanga ani mbuhe ti ni ya.

ASINO AGU ABORO DU ROGO GU PARADIZO NGA GA TORO

5. A wa i nakido paha rogo Yesaya 65:13, ginihe ani agbia ngbarago ti ni rogo gu paradizo nga ga toro?

⁵ I nariga yo wenengai na kpotoyo kidu wenengai. Gu sangbaanebi nga ga Yesaya ayugu gu kparakparapai du dagba agu aboro du rogo gu paradizo nga ga toro na agu aboro adunga rogoho ya. (Oni gedi Yesaya 65:13.) Yekova nafu ai guhe fu airisiko nga gu i aida na ni tipa i nye mbembedi na ko. Ko ima fu gako ziazia toro, Fugoko, na agu awaraga du mburuhe rii Ziazia Kekeapai tipa gupai nga ani rengbe ka “rihe, . . . Ki mbirihe, . . . [na] kini ngi.” (Oni ringbisinga ha na Yugoti 22:17.) Ni gupai du kia ti gure, agu aboro adunga rogo gu paradizo nga ga toro ya na “gomoro . . . , gomoro ime . . . , [na] kidu na zee.” I na pagume dagbayo na Mbori te.​—Amosa 8:11.

6. Waigu Yoere 2:21-24 asakapai tipa bete agu agamahe Yekova afuhe furani, na waigu rengbe ani ka gbia undo ti ni?

⁶ Rogo gu sangbabeni nga ga Yoere, ko amangisunge na agu ahe du wa zende ahe, imekakue, na nzeme ka yugo gupai nga Yekova nafu ahe kpaima fu Gako aboro, kodihe na agu ariahe nga ga toro. (Yoe. 2:21-24) Ko namanga gipai re vurube Baibiri, gu gaani awaraga du mburuhe rii Baibiri, gaani bangiriba nga ga internet, vurube gaani adunguratise, na bakere adunguratise. Ani ima rengba ka gbia undo ti agi ambakadapai re na aˈuru dunduko na ni sangbanaha, ani nika mbika na kpotorani kidu wenengai.

7. Ginipai “nasa ngbarago kpotorani yo”? (Yesaya 65:14)

⁷ Du na ngbarago na kidu na rengbabepai. Ga Mbori aboro ima rengba ka ‘bi bia na ngbarago’ bambiko i na bakere tambuahe fu Yekova. (Oni gedi Yesaya 65:14.) Agu arengo na gu maabangirise nga gu nafu wasa du rogo Fugo Mbori yo nga gu du mburuhe rii gu motumo tumori nga ga Yesu “nasa ngbarago kpotoraniyo.” Ho ani afura ni tipa agi apai re na agu awirinarani nga aidipase, si nasarani ani du na ngbarago nzunzu!​—Tam. 34:8; 133:1-3.

8. Gini nyanyakipa asino ue du rogo gu paradizo nga ga toro?

⁸ Gu nyemuse na gu kodatise du dagba ga Yekova aboro nga gu nyanyakipa asino ue nga  ga gu paradizo nga ga toro. Gi “ũvodatise” re nayugo kpia wai furani raka nika du rogo vovo zegino, yo ga Yekova amoyambu nika du ni na bakere nyemuse na ni kodikodi yo susi wai duhe areme. (Koro. 3:14) Wirina sa ni dee asakipai tipa gupai ri abihe ti ga Yekova aboro ti gu bambata regbo ri abiyo, ri aya: “Mi aainongo wai kadu na ngbarago te zavura dagba gimi aborokporo. Gu bambata regbo nga gu mi abi aboro i niyugu nyemuse fu akurayo angia gu regbo mi agbia aDezire Yekova.” Ai gu boro naida kadu na ngbarago nzunzu na rengbabepai, si naida ni du rogo gu paradizo nga ga toro. Ka agu aboro du rogo gi zegino re vura kaa berã kina ginipai tipa ga Yekova amoyambu vurũ, i na wene rimo na Yekova gbiati agu aboro dunduko nairisoko.​—Yes. 65:15.

9. Ginipai Yesaya 65:16, 17 akidopaha nibipa agu apai nasarani ani du na igirã gbiati rungo awere?

⁹ I na zereda. Yesaya 65:14 nape gupai nga agu aboro sia ka zanga du rogo gu paradizo nga ga toro ‘akpára kpe mbiko rungo kpotoyo yo, [na] ayóra wawa mbiko gu fudifudipai nga ga toro.’ Ono na ginipai tigaha du tipa agu apai sa ga Mbori aboro i du rogo igirã na arungo? Ni yangaraha, ‘bangirise ago ti gu fudifudiapai naadu mbata [na si nika du] ni okooko ho ti bangiri [Mbori].’ (Oni gedi Yesaya 65:16, 17.) Yekova nika dia gaani akpakarapai kusayo na ni yangaraha, ani atingidangapa wai agu apai re asarani ani du te.

10. Tipagine mo abihe ti ni nipa momu kadu dagba awirinamo nga aKristano? (Oni bi sura a.)

¹⁰ Zavura kina awere, ani nagbia zereda ho du ani ni ba gaani adunguratise yo nga ga aKristano, nga gu ba ani agbia zereda rogoho na ki zanga kaa maa berãrani tipa agu akpakarapai narungosi rani rogo gi gbegberẽ zegino re ya. Ani naundo awirinarani a tipa i du zezeredi ho ani ayugo nyemuse, ngbarago, zereda, weneringise, na zera ni nga agu apai du dagba ga Mbori zuzu toro yo. (Gara. 5:22, 23) Si nipa ngbarago furani kadu dagba agu aboro yo du rogo ga Mbori riigbu! Agu aboro nika nye rogo gu paradizo nga ga toro re, nika bi wai ga Mbori akidohe nika digisotihe nga ga “vovo angbangbaturũ na vovo kpotosende.”

11. Ringbisihe kuti Yesaya 65:18, 19, gini ome si aida gu paradizo nga ga toro nga gu Yekova nambakadihe du na ni kuriirani?

¹¹ Du na tambuahe na ngbarago. Yesaya andu kumbatayo ka saka ndu gupai si aida ani du ti ni “na ngbarago ki ningi” rogo gu paradizo nga ga toro. Yekova du nambakadi gi paradizo narukuba kurapai re. (Oni gedi Yesaya 65:18, 19.) Si airiwongo tie tirani ka bi gupai nga Yekova namangasunge na ani ka undo aboro i mbu agu  ariigbu nga ga gi zegino re nga gu ayugongo rengo tipa Mbori ya na ki undo yo i du ni papara gi gaani bawene paradizo nga gu narukuba kurapai re! Ani na bakere ngbarago tipa agi amaku re na ani nagbia ngbarago tipa kadu rogo rengo yo, na ani na bakere nyemu ka pepaha fu kura aboro.​—Yere. 31:12.

12. Waigu agu akidohe i nasakipai tipaha rogo Yesaya 65:20-24 asa ro mo du na tipagine?

¹² Ani a na bakere tambuahe na ngbarago tipa gu maabangirise du ani na ni bambiko gu wene pagume du dagbarani na Yekova. Mo berẽnga kina pa agu apai ani nika bihe na ki mangihe rogo ga Mbori vovo zegino! Baibiri nakidohe nga: “Fogo gude adú nga yo . . . nikaima ngbutuko berewe te, na gbinza boro atá digisa nga gani arame rengbe a ya.” Ani “adúdua abambu ki niraki rogo [na ani] arũka bakakue aati yo ki niri zuzuhe.” Ani “amánga nga sunge gbua te” bambiko ani nika du ni “aboro maku nga ga Yekova yo.” Ko nakido rani na pa wene raka nga gu ani nika du ni bandabanda rani rogoho na kidu na ndikidi maabangirise rogo raka yo. “Mbata i nikayamba he,” ko akaragapai kuti gayo nyemupai na “ki nimbisi gu nyemuhe nga ga unga ahe dunduko.”​—Yes. 65:20-24; Tam. 145:16.

13. Waigu Yesaya 65:25 asakapai tipa agu aˈariapai aboro amangaha rogo gayo raka yo ho i atona kaa iriso Yekova ni?

¹³ Zereda na ngbabase. Mbiko gu undo nga ga ga Mbori toro, dungu agu aboro nanaamangapai nizuu, kidu ni kere zingizingi aboro watadu naanamanga irairaapai ima manga bakere aˈariapai rogo gayo raka yo. (Oni gedi Yesaya 65:25.) I ima manga bakere ome ka mbu gu gbegberẽ asino re. (Rom. 12:2; Ef. 4:22-24) Ono gu rengo tie duho nga, ga Mbori aboro kindi nga kpakpa aboro, ani nikaa ndu kindi kumbatayo kaa manga aingahe. Ono tie, Yekova ima ye na “aboro dunduko” nga aguyo nakpinyemuko na kini kpinyemu akurayo, na ni sangbanaha, i na ndikidi zereda na kodatise. (Tito 2:11) Gere nga gu iiriwopai kina gu Mbori duna tanduapai dũ narengbe ka mangaha!

14. Waigu gupai du rogo Yesaya 65:25 nada ti rengo nibipa gupai nadu tipa kura wirina sa?

¹⁴ Ya mo aboro rengbe ka aria asino yo nzunzu? Oni berẽnga kurii gi kpiapai re. Paranga i amoi ko ku bambukiso yo bara dunguhe du garãko nga 20 aaraka wasiwasi raka na ki ngia boro zuu. I aziko ku bambukiso yo tipa di tarambiri, di gu kura ahe, gbiati kura gbegberẽ apai ko amangihe. Ko aniidu regerege ti aregbo dunduko ka ta kpata. Gu bambata regbo ko agi gu rengo nga ga Baibiri na ki tona nduge tipa adunguratise nga ga aDezire Yekova, ko aima inoho nirengo nga ko ima gbia bawene raka​—gu paradizo nga ga toro. Tingbafuo ko zi bapatiza na ki da ni Dezire Yekova, ko atona ka berãpa wai gu veresi du rogo Yesaya 65:25 aringbisitihe kuti ko. Ko aima aria tiko ti du wa bahu, ki mbu zizinga na ki da zezeredi wakina kandoro.

15. Tipagine ani aida ka yamba kura aboro ti ni i ye kadu na ani rogo gu paradizo nga ga toro, na waigu rengbe ani ka manga gipai re?

¹⁵ Yesaya 65:13 tona na agu afugo nga: “Ya Gbia Mbori wẽ.” Na Veresi 25 digi na agu afugo nga “wo poi Yekova.” Gako akidohe ti aregbo dunduko ni naada ada ti rengo. (Yes. 55:10, 11) Gu paradizo nga ga toro kinaho awere. Yekova ima kusa agu aborokporo nga aguyo nairisoko na gipai re nzunzu nga gupai du kia. Ani na bakere zereda awere na kini bi tirani nga ba rani gu ngba angba bambiko ani nga papara agi aborokporo re. (Tam. 72:7) Tipa agi anduapai re, ani naida ka undo badungu aboro wa rengbe ome rani na ni tipa i ye kadu ni awirinarani aKristano. Ani rengbe ka manga gipai re ka si dunga ani namaaberã rani tipa ka sa aboro ni abawiriki.​—Mt. 28:19, 20.

 WAI KA UNDO KURA ABORO TIPA I YE FUO RANI KU ROGO GU PARADIZO YO NGA GA TORO

16. Ginipai rengbe ka undo aboro i du na nyemu ka ye ku rogo gu paradizo nga ga toro?

¹⁶ Ani dunduko ni basasa ima rengba ka mangapai ka sa gu paradizo nga ga toro tipa si ngba ti kura aboro. Tipa ka manga gipai re, si naida ani wiriki Yekova. Ko asanga aboro ngba ome tipa i da ni papara gako riigbu te. Kuba gure, ko na “gbe” aboro koyo du ko ni ngba zezeredi gene. (Yo. 6:44; Yere. 31:3) Agu aboro du na wene ngbaduyo yo nga aguyo nawirikapai tipa ga Yekova nyemuse na wene asino naye koyo du ko ni. Waigu gaani wene asino na mangaapai narengbe ka gbe aboro i ye ku rogo gu paradizo nga ga toro?

17. Waigu rengbe ani ka sa gu paradizo nga ga toro si ngba ti kura aboro?

¹⁷ Gene sa rengbe ani ka sa gu kura aboro i du na nyemu ka ye fuorani ku rogo gu paradizo nga ga toro ngbaha nga, nimanga ani pai na agu awirinarani nga airisi Yekova rogo nyemuse yo na weneringise. Ho vovo aboro aye ni tipa gaani adunguratise nga ga adungurati, ani naida i da kuti gu digisopai nga gu nangia ga agu aidipase naye tipa adunguratise rogo gu Korinda nadu mbata. I aima du na rengba ka pe gupai nga: “Mbori du dagba roni yo nirengo.” (1 Kor. 14:24, 25; Zek. 8:23) Sidu, si naida ani naandu kindi kumbatayo kaa mangapai kuti gu zinahe nga “oni dú na zereda dagba roni yo.”​—1 Tesa. 5:13.

18. Ginipai rengbe ka ba nyemu gaani riigbu ti kura aboro?

¹⁸ Si naida ani naabi agu awirinarani nga aKristano dedede kina wai Yekova abi yo. Ani namanga gipai re ni maa ani berãrani kuti wene asinoyo, angianga kina kuti gayo azangarengba nga gu nika go ago kusayo ya. Ani rengbe ka nyasa riipa gaani azangagiatise rogo nyemuse yo ka si dunga ‘ringirani ngbá angba fu akuarani,  yee kpotorani yo, ki nivú akuarani avu.’ (Ef. 4:32) Sidu, agu aboro nakpinyemu i naamangapai na yo a rogo nyemuse yo nika duadu na nyemu kada ni papara gu paradizo nga ga toro. b

ONI NYE ROGO GU PARADIZO NGA GA TORO

19. (a) A wa i nayuguhe rogo gu sanduki nga “ I Ambuhe na Ki Karagatiyo,” ginipai kura aboro napehe tifuo karagayo tiyo ku rogo gu paradizo nga ga toro? (b) Ginipai si aida si du ni gaani diaberã? (Oni bi sura a.)

¹⁹ Ani na bakere tambuahe tipa gu gaani paradizo nga ga toro! Si nangba kina kumbatayo susi gu nidu mbata, na dungu airisi Yekova du rogo yo. Ani naandunga andu kindi kumbatayo kaadu na bakere tambuahe tipa gu paradizo nga ga toro Yekova nambakadihe furani. Ai gu boro naida kadu wenengai, kidu na rengbabepai, kidu zezeredi, na kidu ni bandabanda ni, du wa ka ni nye ku rogo gu paradizo nga ga toro na ki zanga kura rogoho! Ono si naida ani du na bakere rubangirise bambiko Satana namanga apai dunduko tipa ka nanga rani ani kuru rogo gu paradizo nga ga toro. (1 Pet. 5:8; Yugo. 12:9) Si aidanga ani mbu ko ko du na diabese te. Si naida ani mangi ome nyanyaki tipa ka bandapa gu ngbanya, padu ziazia, na gu zereda nga ga gu paradizo nga ga toro.