1. Ginipai Yekova aidaha berani?

 PAI SA dagba agu apai yo ni naafu bakere ngbarago fu arogotise nga ho i avunga wiriyo ni. Wa vura duhe nga avungu gu gude re ima kpinyemu ru, i aidanga u nye ni kina fogo ru kindi te. Nirengo, i ima rengba kadu na bakere bakabangirise ka si dunga gu wiriyo re asonanga te. Wakina gure a, wa vura duhe nga Yekova na ngbarago ho ani atona wirikapai ni tipa ko, ko aidanga ani nye kaa wirika kina pai sa te. (1 Kor. 3:1) Kuba gure, ko naida ani “dú ni sosono aboro” watadu agu aKristano niima nyaka rogo toro yo.​—1 Kor. 14:20.

2. Ginipai ani nika sakapai tipaha rogo gi kekeapai re?

² Waigu gu Kristano niima nyaka rogo toroyo aberã na kini mangipai? Ginipai si aida ani mangihe tipa ka da ni agu aKristano niima nyaka rogo toroyo? Waigu pa wisigo ani gu dudunguro arengo nga ga Baibiri aundo gaani pagume na Yekova tipa si sono? Na tipagine si aidanga ani naaberã gupai ti ni nga ani ima nyaka rogo toro yo na ndupai ho tipa ani naamanga ome kindi kaa nyakasa gaani pagume na Yekova ya te? Ani nika gbia akaragapai kuti agi asanahe re rogo gi kekeapai re.

ROGO GUPAI YO NGA KADA NI GU KRISTANO NIIMA NYAKA ROGO TORO YO NGA GINE?

3. Rogo gupai yo nga kadu ni nyanyaki Kristano rogo toroyo nga gine?

³ Rogo Baibiri yo, gu pa-Giriki i asaha nga “sosono aboro” ima rengba kadu nga “kuru aboro.” a (1 Kor. 2:6) Sidu, kina wai tooni gude ninaasona daho ni nika da ni nikuru boro, ani a ima rengba kaa sonakumbatayo rogo gaani pagume na Yekova. Rogo gu gene re, ani ki da ni agu aKristano niima nyaka rogo toro yo. Rengo ngaha nga, zavura tingbafuo ani nyaki rogo toro yo, si aidanga  ani mbu sonakumbatayo te. (1 Tim. 4:15) Ani dunduko, kodihe na paranga aboro, ima rengba kadu ni nyanyaki aboro rogo toroyo. Ono ginipai nayugoho nga Kristano ima nyaka rogo toroyo?

4. Waigu rengbe mo ka sakapai tipa gu Kristano niima nyaka rogo toroyo?

⁴ Gu Kristano niima nyaka rogo toroyo namanga agu apai dunduko Yekova aida ni mangihe. Ni aidanga ka manga kina agu apai nangba tini te. Kina rengo ngaha nga, wangia ni kpakpa boro, ni nikaa manga aingahe amanga. Ono rogo aˈuru ni basasa, ni namanga ome kaa berã na kini mangipai ngba gu gene Yekova aida na ni. Ni na ukadi vovo borose na ki nye ka aasada tini kindi kaa berã wa gu Yekova aberã. (Ef. 4:22-24) Ni ima raba tini ka manga agu adiaberã nga ga tatamana du mburuhe rii ga Yekova andiko na arugute, sidu, ni aidanga na dungu arugute tipa si pe gupai funi si aida ni mangihe te. Ho ni amanga diaberã ni, ni namanga ome nyanyaki tipa ka manga gupai ni nadiberã tipaha re.​—1 Kor. 9:26, 27.

5. Ginipai rengbe ka manga fu gu Kristano anyaka nga rogo toroyo ya? (AEfeso 4:14, 15)

⁵ Ono tipa agu aKristano nye zanga nyaka rogo toroyo, si taata tipa i “biriki” yo na ki “nangi yo.” Ni ima rengba ka ida kuti gu ziree apangbanga nagbandaka na agu aziree du rogo internet. Watadu abasamungu kuti ndikidi pambori ima rengba ka nanga ni. b (Oni gedi AEfeso 4:14, 15.) Ni ima rengba kaa kpi kura aboro, kadu na tagbagapai dagba ni na kura aboro, watadu rago ima rengba kaa gberã tini ni ipo. Dedede, ni ima rengba ka manga gupai du ni irairaha ho ka ni gbia tini ni na asada.​—1 Kor. 3:3.

6. Waigu rengbe ani ka ringbisa pa wai ani asona rogo toroyo kuti wai gude naasona? (Oni bi sura a.)

⁶ A wa ani ni sakipai tipaha kusayo, Ziazia Kekeapai naringbisapa wai boro asona rogo toroyo kuti wai boro naasona kada ni kuru boro. Badungu apai duho gude naainongo pai tipaha ya, sidu, si naida sosono boro du aduho ka banda ni na ka ngbembatayo funi. Tipa ka yugoho na kpiapai, nagude ima rengba ka sana wiiri tipa ri zadi beri ho i agu ni rii gene. Wa gi degude re nikaa sona, nari ima rengba ka mbu gene furi tipa ri naagu rii gene nisari, ono ri ima rengba ka tingida ri na gupai nga si naida ri ngere kubani na kubani tipa ka bi gupai nga atarambiri ho naye  te. Ho gu gude re ada ni ni sosono boro, ri nane ngbatunga gi kereapai re nitiri. Kina wai rukutu agude ni naida na undo be sosono aboro tipa ka ne kerepai, dedede, agu aKristano ata nyakanga rogo toroyo ya ni naida na undo be agu aKristano niima nyaka rogo toroyo tipa ka ne gu kereapai rengbe ka gbarasa gayo pagume na Yekova na tipa ka manga agu adiaberã nga ga tatamana. Ono tie, ho agu aKristano niima nyaka rogo toroyo ni aida ka manga diaberã ni, i naberã dudunguro kurii gupai Baibiri apehe tipa wa ka i rengbe ka bi ga Yekova berãpai tipa gupai re, fuoho, i ki mangi gupai du ni ruruhe.

7. Ya mo agu aKristano niima nyaka rogo toroyo naida aida na undo be kura aboro?

⁷ Ya mo gere nayugo gupai nga gu wirina niima nyaka rogo toroyo aidanga na undo be ai boro te? Oó. Ti kura aregbo, agu aboro niima nyaka rogo toroyo ima rengba ka sanahe tipa undo. Ono gu boro nasona kindi rogo toroyo ima rengba ka sana kura aboro tipa i pe gupai funi si aida ni mangihe watadu i mangi gu diaberã funi si aida kina boro ni mangihe nitini. Gu kparakparapai du tipa gu Kristano niima nyaka rogo toroyo nga, ni nasana kura aboro tipa undo nga aguyo du na tatamana na ki ima manga ngbatunga agu adiaberã re, kini ini gupai nga ni du nika manga diaberã ni tini na ki inihe nga ni nika “kpida kina gani pai.”​—Gara. 6:5.

8. Ngba gini agene du agu awirina niima nyaka rogo toroyo ni bakiakia ti akurayo?

⁸ Kina wai sosono aboro ni naangera nga dunduko kina sa ya, agu aKristano niima nyaka rogo toroyo na asinoyo a ni bakiakia. Ni kpiapai, bete agu yo ima rengba kadu ni airatatamana, agu akurayo kidu na wingbaduse. Aguyo ima rengba kadu ni aboro gamahe na agu yo kidu na bakere nunga. Kurii gure, ho nyanyaki aKristano ue rogo toroyo agbiatiyo ni na bangisapai, i ima rengba ka manga agu adiaberã du ni bakiakia ono nga gu du mburuhe kina rii Ziazia Kekeapai. Dedede, gipai re ninaamanga ho si aida aKristano mangi diaberã ni nibipa gayo sangbakpotoseyo. Sidu, i asapanga ngbanga akurayo ka si du nga gayo adiaberã ni bakiakia te. Kuba gure, i nagbeberãyo kurii gupai nika sayo i nye ni kodikodi yo.​—Rom. 14:10; 1 Kor. 1:10.

GINIPAI SI AIDA ANI MANGIHE TIPA KADA NI AGU AKRISTANO NAIMA NYAKA ROGO TOROYO?

9. Ya mo ani rengbe ka sona rogo toroyo zanga ani mangi ome amanga tipa ka sona? Oni sakingo rogoyo.

⁹ Gude ima rengba kaa sona wa regbo nikaa susa, ono boro ho rengbe ka sonosa gani pagume na Yekova zanga ni mangi ome amanga tipa ka sonosaha te. Ni kpiapai, agu awirina naadu Korinda yo aidi wene pangbanga, ki zi bapatiza, ki gbia ziazia toro, na ki wiriki dungu apai ti agu apai gu mokedi nangia Pauro ayuguhe fu yo. (Amo. 18:8-11) Ono tie, bete agarã kusa tingbafuo zio yo bapatiza, badunguyo aanyakanga kindi rogo toroyo te. (1 Kor. 3:2) Waigu rengbe ani ka sa gupai nga ka gipai re mangingo rani ya?

10. Ginipai du wa ka ani mangihe tipa ka nyaka rogo toroyo? (Yuda 20)

¹⁰ Tipa ka nyaka rogo toroyo, ani duwa ka ani sonosi nyemu ka sona rogo toroyo. Agu aboro nakpinyemu ka du ni “azangainahe,” na naida ka nye ni agude rogo toroyo, amanganga sonakumbatayo te. (Snz. 1:22) Ani aidanga kadu wa agu aboro niima sona ono kini ndu kumbatayo kindi kaa kido kuti avunguyo i naamanga adiaberã fuyo te. Kuba gure, gaani sunge du ngaha tipa ka manga sonakumbatayo rogo toroyo. (Oni gedi Yuda 20.) Ka si dunga mo namanga ome kindi ka nyaka rogo toroyo, mo kpari fu Yekova ko “fu nyemupai na ome foro tipa mo mangipai.”​—Frp. 2:13.

11. Ginihe Yekova nafuhe furani tipa ka undo rani ani nyaki rogo toroyo? (AEfeso 4:11-13)

¹¹ Yekova aidanga gupai berani nga ani mangi sonakumbatayo rogo toroyo kina nisarani te.  Ko ima fu ababanda akandoro na abayugupai rogo dungurati nga agu yo naundo rani ani da ni agu aboro ‘niima nyaka’ rogo toroyo kidu na nyanyaki pagume na Yekova, “sa rengba na sona gu hibepai nga ga Kristo.” (Oni gedi AEfeso 4:11-13.) Yekova ima fu gako ziazia toro a tipa si undo rani ani du “na ga Kristo berã ti rani.” (1 Kor. 2:14-16) Kurii gure, Mbori afu agu aKitabu Wene Pangbanga du biama tipa si yugu wai furani Yesu aaberã, kini fura, na kini mangipai ho ko adu ni auru kpotosende ane. Ni wirika mo gu gene Yesu aaberã ngbaha na kini mangipai, mo ima rengba kada ti gu gamo sasa nga ga du ni gu Kristano niima nyaka rogo toroyo.

GUPAI GU NYANYAKI RIAHE NGA GA TORO AMANGAHA

12. Ginihe nga “bambata tonatona apai nga ga Kristo”?

¹² Tipa gupai nga ani nyaki rogo toroyo, ani du wa ka ani “mbú gumba pai tie tipa bambata tonatona apai nga ga Kristo,” nga gu bangua ayugopai nga ga aKristano. Akpiapai nga ga gu bangua ayugopai re nakoda saberã, idapase, bapatiza, na zingabekpio. (Eb. 6:1, 2) Gere nga bete gu bangua ayugopai aKristano dunduko naidi kutini. Sidu, ho Petero atungusipai ni fu aboro ti regbo Pendekote, ko afura fuyo tipa agi apai re. (Amo. 2:32-35, 38) Ani du wa ka ani idi kuti gi tonatona yugopai re tipa kada ni ga Kristo abawiriki. Ni kpiapai, Pauro ayuguhe nga ka ani aidanga kuti zingabekpio ya, ani arengbanga ka ya ani nga ndikidi aKristano te. (1 Kor. 15:12-14) Ono tie, ani du wa ka ani du na nyemu ka wirika dungu apai susi gi tonatona ayugopai re tipa ka da ni agu aKristano niima nyaka rogo toroyo.

13. Ginipai du wa ka ani mangihe ka ani aida ka gbia undo ti gu nyanyaki riahe nga ga toro i nafura tipa rogo AEbere 5:14? (Oni bi sura a.)

¹³ Ni gupai du kia ti tonatona yugopai, nyanyaki riahe nga ga toro akodanga kina ga Yekova arugute sa te, ono si nakoda gako abangua arengo nga gu naundo rani ani rugutirani na gako aberã. Tipa ka gbia undo ti gu riahe re, ani du wa ka ani wisigipai, kini berẽkuriihe, na kini mangi ome ka mangapai kuti gupai ani nawirikihe. Wa ani nikaa mangaha wo, ani nika raba tirani ka manga agu adiaberã nasa ngbarago ti Yekova. c​—Oni gedi AEbere 5:14.

14. Waigu Pauro aundo agu aKristano nadu Korinda yo tipa i nyaki rogo toroyo?

 ¹⁴ Si ni kpakarakpakaraha fu agu aKristano anyakanga rogo toroyo ya tipa i mangi ruru diaberã ho duhe ni nga rugute ho rogo Baibiri yo nafura tipaha te. Ho adunga ndiko ni rogo Baibiri yo tipa pai ya, kura aboro ima rengba ka berãha nga i ima rengba ka manga ai gupai i aidaha. Kura aboro ima rengba ka sanahe tipa ndiko ho si aidanga ni na ndiko ya. Ni kpiapai, si nawiraha nga agu aKristano nadu Korinda yo asana Pauro tipa ndiko nibipa singia si naida i ri gu riahe i anaatumo na ni fu kpiahe. Kuba gupai nga Pauro pe gupai si aaida i mangihe, ko aundo yo tipa i mangisunge na gayo sangbakpotoseyo na ki pe gu rengo fuyo nga ai boro du na gani “raniri.” Ko afura tipa bete bangua arengo nga ga Baibiri nga gu narengbe ka sa gayo sangbakpotoseyo si du ni gigirihe gbiati gu narengbe ka zanga kotosa kura aboro. (1 Kor. 8:4, 7-9) Pauro aayugopai fu aKorindo tipa i mangisunge na Ziazia Kekeapai ka manga adiaberã ni tiyo kuba gupai nga kaa kido kuti kura aboro watadu kaa ngera tipa andiko, ngba gi gene re, ko aˈasadi ka undo yo tipa i nyaki rogo toroyo.

15. Waigu Pauro aundo agu aKristano nangia aEbere tipa i sono rogo toroyo?

¹⁵ Ani nawirika nyanyakipa pai ti gupai Pauro akehe fu agu aKristano nangia aEbere. Bete kura aboro ambu gayo pagume na Yekova tipa ka si sononga ya; i ‘akpi kina nyemu momunya, ka i akpi nga nyemu nyanyaki riahe [nga ga toro] ya’ (Eb. 5:12) I aawirikanga pai na ki di gu vovo apai Yekova aayugoho fuyo te. (Snz. 4:18) Ni kpiapai, badungu agu abayugupai nangia ga aYudo yo aaka kuti ga Moize aNdiko kindi wa si avura dunga i aima rugusaha agarã wa 30 kusayo rii mburu gu motumo nangia ga Yesu. (Rom. 10:4; Tito 1:10) Agu agarã 30 re aima fu bakere regbo fu aKristano tipa i rugutiyo na gupai nga si aidanga i naapekafuo ga Moize aNdiko berewe te! Sidu, Pauro aˈasada awere ka undo yo tipa i idi kuti gu dudunguro arengo ko aayugoho fuyo. Gako waraga aundo yo tipa i bi gu vovo gene iriso Yekova Yesu amangihe nga si ni bawenehe kisusi na si afu ngarã fuyo tipa i naandu kindi kumbatayo kaa tungusapai i ki vura kaa gbiatiyo na rungosiro be aYudo.​—Eb. 10:19-23.

 ANI MBU DU NA BAKERE KIDO KUTI TIRANI

16. Kupati gupai nga ka manga ome ka nyaka rogo toroyo, ginipai du wa ka ani mangihe?

¹⁶ Si naida ani mangi nyanyaki asadatise tipa ka nyaka rogo toroyo na ki bandaha. Sidu, si naida ani du na rubangirise ka zanga berã gupai nga ani ima nyaka rogo toroyo na ndupai ho si aida ani nye kindi ti ni kaa nyakasa gaani pagume na Yekova ya te. (1 Kor. 10:12) Si naida ani ‘naawísigo tirani’ ka inoho singia ani namanga sonakumbatayo.​—2 Kor. 13:5.

17. Waigu gu ga Pauro waraga ko akehe fu aKorosaio ayugo gupai nga si naida ani nye nyanyaki rogo toroyo?

¹⁷ Rogo gu ga Pauro waraga yo ko akehe fu aKorosaio, ko angarasi yo berewe tipa i nye nyanyaki rogo toroyo. Wa si avura dunga agu aKristano nadu Korosai yo re aima nyaka rogo toroyo, Pauro ape gupai fuyo nga si naida i du na rubangirise ka zanga mbu berãpai nga ga aboro zegino si nangi yo. (Koro. 2:6-10) Na Epafura, nga guko naima ino agu aboro naadu rogo gu dungurati re wenengai aakpara dedede nga i rengbe na “ru ziazia teketeke,” watadu nyanyaki rogo toroyo. (Koro. 4:12) Ginipai rengbe ani ka wirikaha ti gipai re? APauro na Epafura aima rugatiyo na gupai nga, ani naida aida na ga Mbori undo tipa ka nye nyanyaki rogo toroyo, ono si naida aida a ani bi gupai nga gaani pagume na ko nasona kina kumbatayo. I aaida agu awirina nadu Korosai yo nye nyanyaki rogo toroyo i ki vura kaa gbiatiyo na aˈasada vurũ.

18. Ginipai naima rengba ka manga gu Kristano niima nyaka rogo toroyo? (Oni bi sura a.)

¹⁸ Ga Pauro zahe fu aEbere nayugo gupai nga, ka gu Kristano niima nyaka rogo toroyo adunga na rubangirise ya, Mbori ima rengba ka ká ni nyeanye kindi. Ka si dunga ni naká ka giasangba Yekova, ni ima rengba ka turo tiko si ki da nga ni arengba ka sa berãni na ki gbia ga Mbori mbupai te. Si ni wenepai tie nga, agu aKristano nangia aEbere re aadanga wa gure te. (Eb. 6:4-9) Na ginipai du tipa agu aboro areme na zera rogo toroyo watadu i akusayo na i ki sa berãyo kusa? Ka i du na umbasitise ki saberãyo, i nayugo na ni nga, i wa agu aboro Pauro afura tipa yo nga aguyo Mbori nasogo gayopai nyeanye kindi ya te. Wa vura duhe wo, ho i akaragatiyo ni fuo Yekova, i naida na gu undo ko afuhe. (Yeze. 34:15, 16) Abaakumba ima rengba ka manga mbakadapai tipa gu wirina niima nyaka rogo toroyo undo yo tipa i mbakadi gayo pagume na Yekova berewe.

19. Gini sasa si aida ani moihe?

¹⁹ Ka si dunga mo namanga ome tipa kada ni gu Kristano niima nyaka rogo toroyo, mo ima rengba kada ti gu gamo sasa re! Mo naandu kindi kumbatayo kaa wirika dudunguro arengo nga ga Baibiri na kini berẽ wagu Yekova aberã. Na ka si dunga mo ima nyaka rogo toroyo, mo mangi gupai rengbe na omero dunduko tipa ka nye wo awere na nyeanye kindi.