1. Tipagine du Tingidapa Pakpio Yesu ti ni ninyanyakipa pai rogo garã yo? (Ruka 22:19, 20)

 TIPA ga Yekova aboro, Tingidapa Kpio Yesu, nga nyanyakipa uru fuyo rogo garã yo. Si nga gu yangarapai Yesu afu zinahe fu gako abawiriki i naamangaha. (Oni gedi Ruka 22:19, 20.) Ani namaa bangirani tipa Tingidapa Pakpio Yesu tipa dungu nduapai. Ani wisigingo betehe.

2. Gini bete nduapai duho ani namaa bangirani ti ni tipa Tingida Pakpio Yesu?

² Tingidapa Kpio Yesu naundo rani ani berẽkuriipa wai nyakipa gu motumo tumorii Yesu afuhe, na agu amaku ani nika gbiaha mbikoho. Si natingida rani na pa agu agene rengbe ani ngbaha ka yugo gaani tambuahe tipa ga Yesu motumo. (2 Kor. 5:14, 15) Si nafu mamu a furani tipa “ani mongo wasa” ka ngarasa tirani na awirinarani. (Rom. 1:12) Rogo agarã yo nibasasa, dungu agu awirinarani nga aguyo naima mbu ye tipa adunguratise ni naaye aye kadu pati Tingidapa Kpio Yesu. Dungu yo ninaadia berã ka karagatiyo fuo Yekova mbiko wai i naamanga pai na yo rogo nyemuse yo. Na kina iriworago ninaati ti dungu gu vovo aboro ninaaye tipa Tingida Pakpio Yesu be gupai i naabihe na kini gihe na si ki sayo i idi ka tona wirika Baibiri. Agi apai re dunduko na sa gupai nga Tingida Pakpio Yesu du na nyanyakipaha furani!

3. Waigu Tingida Pakpio Yesu akoda rani rogo zegino dunduko? (Oni bi sura a.)

³ Oni berẽnga pa wai a Tingida Pakpio Yesu akoda rani rogo zegino dunduko. ADezire Yekova ninaadungura tiyo rogo apapara zegino dunduko a wa uru ninaandu kaa ti rogo apapara zegino dunduko. Ani dunduko naagia gu gumbapai nga gu ninaanyakasa pa nyakapa motumo tumorii. Ani ninaabi abia ue nga ga tambuahe, kpakuto na imekakue ki ta dagba aboro, na ani ki pe gupai na ngbadurani yo dunduko nga “amina” kuti akparakpee  biama. Vuru asa yo 24, adungurati dunduko ninaamanga gi bangisapai re. Mo berẽnga pa gu ngbarago du aYekova na Yesu na ni nga ani ni kodikodi rani na kini irisi yo rogo zegino dunduko ngba gi gene re.

4. Gini apai ani nika sakapai tipaha rogo gi kekeapai re?

⁴ Rogo gi kekeapai re, ani nika sakapai tipa agi asanahe re: Waigu rengbe ani ka mbakada kpotorani yo tipa Tingida Pakpio Yesu? Waigu rengbe ani ka undo kura aboro tipa i gbia undo ti gi mbakadapai re? Waigu rengbe ani ka undo agu awirina naima zera rogo toro yo? Akaragapai kuti agi asanahe re nika undo rani ani du regerege tipa gi ziazia pai re.

WAIGU RENGBE ANI KA MBAKADA KPOTORANI YO TIPA TINGIDAPA KPIO YESU?

5. (a) Tipagine si aida ani berẽ ti ni kuriipa nyakapa ga Yesu motumo? (Atambuahe 49:7, 8) (b) Ginipai mo awirikihe rogo gu vidio nga Tipagine Yesu Akpi ti Ni?

⁵ Gu nyanyakipa gene sa rengbe ani ngbaha ka mbakada kpotoraniyo tipa Tingida Pakpio Yesu ngbaha nga ni berã ani kuriipa nyakapa ga Yesu Kristo motumo tumorii. Pai ho ka ani amangihe ka batasa tirani be ingapai na kpio te. (Oni gedi Atambuahe 49:7, 8; oni bi gu vidio a nga Tipagine Yesu Akpi ti Ni?) a Sidu, Yekova amangi mbakadapai tipa Yesu fu ungako ka batasa rani. AYekova na Yesu dunduko amangi nyanyakipa pai tipa rani. (Rom. 6:23) Kina wai ani nikaa berãkurii gupai aYekova na Yesu amangihe tipa rani, kina wo a ani nika du na tambuahe tipa ga Yesu motumo. Ani nika sakapai tipa bete gu kpakarakpakaraapai aYekova na Yesu adu regerege ka mangaha tipa rani. Ni bambataha, gu motumo tumorii re aakoda ginihe?

6. Ginihe motumo tumorii aakodaha?

⁶ Motumo tumorii nga gu marã i atumoho tipa ka ngbe guhe na ingi. Gu bambata kumba nangia Adamu adu ni rengberengbe ko ho i akusi ko ni. Ho ko amangi ingapai ni, ko azanga gu mamu nga ga raka nyeanye kindi angianga kina tipa tiko sa ya ono zavura awiriko a. Tipa ka ngbe guhe paha agberẽ be Adamu, Yesu afu rengberengbe unga ko ni motumo. Rogo ga Yesu raka naabaha auru kpotosende, ko ‘aamanganga gbegberẽpai te, i aabi nga biriki ngbako yo te.’ (1 Pet. 2:22) Ho Yesu akpi ni, ko adu ni rengberengbe ko kina wai Adamu adu ho ko aamanganga ingapai ni ya. Sidu, ni fu Yesu ungako ni motumo, ko arengbe ka ngbe guhe paha agberẽ be Adamu.​—1 Kor. 15:45; 1 Tim. 2:6.

7. Gini bete aˈasada Yesu agbiatiko na ni ho ko adu ni auru kpotosende?

⁷ Ho Yesu adu ni auru kpotosende, ko agisangba Yekova rogo apai yo dunduko zavura ho si adu ni ni kpakarakpakaraha ka mangaha. Yesu angia rengberengbe gude na avunguko angia kpakpa aboro, ono ko aagiasangba yo agia. (Rk. 2:51) Ho ko adu ni ni paranga gude, si aaida ko ká soapai nga ga agu aboro naaida ko basasangba avunguko watadu ka ko du nga ni ruruko fu Yekova ya. Na ho Yesu adu ni nisosono boro, ko aká ga Satana Bakitingbanga pai, nga gu ko naya fuko gbaiga ka ko du nga ni ruruko fu Yekova ya. (Mt. 4:1-11) Satana aima diaberã tipa ka sa Yesu ko mangi ingapai tipa ka ko du nga na rengba kafu motumo tumorii ya.

8. Gini kura aˈasada Yesu ahi he?

⁸ Ho Yesu aatungusapai ni auru kpotosende, ko ahi gu kura aˈasada berewe. Avurako arungosiko na i aˈasadi ka imo ko. (Rk. 4:28, 29; 13:31) Ko ahi agu azangarengba nga ga apefuoko. (Mk. 9:33, 34) Ho i aasarangbanga ko ni, i arungosiko na kini sawia ko. Na i aimi ko na ko kidu rogo kere igirã. (Eb. 12:1-3) Na si aaida ko hi yangada papara gako asada nitiko zanga ga Yekova bandahe. b​—Mt. 27:46.

9. Waigu ani abi agu apai Yesu amangihe tipa rani? (1 Petero 1:8)

 ⁹ Si tie ziazia nga, Yesu ahi dungu apai tipa kafu motumo tumorii. Ho ani aberã ni kurii agu akpakarapai Yesu asusi rogoyo tipa rani, si nasa rani ani du na bakere nyemuse tipa ko.​—Oni gedi 1 Petero 1:8.

10. Ginihe Yekova ambupaha tipa motumo tumorii?

¹⁰ Na ginipai tigaha du tipa Yekova? Ginihe Yekova ambupaha na ngbadukoyo dunduko tipa wa ka Yesu fu motumo tumorii? AYekova na Yesu adu na mbembedi pagume dagbayo nga gu du dagba bagude na wirini. (Snz. 8:30) Mo berẽnga pa wai Yekova adu ho ko aabi Yesu ni ko ni hi dungu aˈasada ho ko adu ni auru kpotosende. Zanga kapa, Yekova aima du na bakere gberãrago ka bi Wiriko i nirungosi ko, i ni ká ko, na kini asadi ko.

11. Oni fu nga kpiapai ka yugo wai Yekova adu ho i aaimo Yesu ni.

¹¹ Gu vungu gude zanga wirini rogo kpio yo ima ino pa gu imisiri si aye na ni. Ani ima du na nyanyaki idapase kuti zingabekpio, ono ho gu boro akpi ni ani akpinyemu ni, gipai re na imisa rani ni bakerehe gbe. Gi kpiapai re naundo rani ani rugutirani na pa wai Yekova adu ho ko abi bangisa Wiriko ni nga gu ko ko akpinyemu ko i nirungosi ko na ko ki kpi rogo gu garã nangia 33 Fuo Batikayo Kristo. c​—Mt. 3:17.

12. Ginipai rengbe ani ka mangaha rogo agu aposo du mbata fu Tingida Pakpio Yesu?

¹² Tona awere kuti gu regbo nga ga Tingida Pakpio Yesu, mo asadi ka wirikapai tipa motumo tumorii ti regbo gamo wisigopai nisase watadu ti regbo Gu Irisombori Nga ga Aborokporo. Mo mangisunge na gu buku nga Research Guide for Jehovah’s Witnesses (ka si du rogo fugoro yo) watadu gu kura awaraga du mburuhe rii Baibiri tipa ka ino dungu futufutuapai tipa motumo tumorii. d Berewe a, si naida oni pekefuo gu mbakadapai nga ga Geda Ziazia Kekeapai Kini Tingidi Pakpio Yesu du rogo Gaani Raka Nga ga AKristano na Gaani Sunge​—Waraga Dunguratise. Na ka bangironi gonga ti bi gu kparakpara Irisombori nga ga wiso nika du rogo gu uru nga ga Tingida Pakpio Yesu ya. Ho ani ambakada kpotoraniyo ni tipa Tingida Pakpio Yesu, ani nika du na rengba tipa ka undo kura aboro i gbia undo a.​—Eza. 7:10.

ONI UNDO KURA ABORO TIPA I GBIA UNDO

13. Gini bambatapai rengbe ani ka mangaha ka undo agu aboro nika ye tipa Tingida Pakpio Yesu?

¹³ Waigu rengbe ani ka undo kura aboro i gbia undo ti Tingida Pakpio Yesu? Sidu, gu bambata  diandue rengbe ani ka mangaha nga ka yamba aboro. Kupati gu nga ka yamba agu aboro ani naagbia yo dedede gene tungusapai yo, ani ima rengba ka keka rimo agu aboro ani aida ka yamba yo a. Agi aboro re ima rengba ka koda agumerani, agu aboro ani amangasunge na yo, akuarani sukuru yo, na gu kura aboro ani naini yo. Ka si vura du nga ani na waraga yamba aboro berani rengbearengba te, ani ima rengba ka keda gu fuyo nga ga erekturoni. Kina ngbarani rengbe ka zera ka bi agu aboro rengbe ka ye tipa Tingidapa Pakpio Yesu!​—Batu. 11:6.

14. Oni funga kpiapai tipa gu ome du waraga yambahe na ni.

¹⁴ Ho mo ayamba boro ni tipa niye tipa Tingida Pakpio Yesu, ni ima rengba ka bi he nga si naida ni ndu andu tipaha. Kina ngba gu kura wirina sa nazere ho kumbari ape gupai ni furi nga, i nika ndu na ri tipa Tingida Pakpio Yesu. Tipagine ngbari azere ti ni? Bambiko ri aima sana ko bara dunguhe kusayo tipa ko du pati ni, ono ka ko andunga ya. Ginipai na aria berãko ti gi regbo re? Ko aya, “I afu waraga yambahe fere,” ko ape gupai nga bakumba sa rogo gu dagbarago re nga gu ko i aima inido tiyo na ko ayambuko. Kumbari andu tipa Tingida Pakpio Yesu rogo gu garã re na ko aandu andu a tipaha vuru gu dungu agarã yo nadu kusa.

15. Ginipai si aida ani moihe ku berãrani yo ho ani ayamba aboro ni tipa Tingida Pakpio Yesu?

¹⁵ Oni moi gupai ku berãroni yo nga, agu aboro ani ayamba yo ima rengba kadu na asasanahe​—gbe ka si du nga i aadunga pati gaani adunguratise mbata te. Ani ima rengba ka berãpa agu asanahe rengbe yo ka sanaha na ki mbakadi tirani tipa ka karagapai. (Koro. 4:6) Ni kpiapai, kura aboro ima rengba ka bakabangiriyo nga: ‘Ginipai nika manga yo?’ ‘Si nika manga tipa bagizo regbo wai?’ ‘Gini ngbatunga roko si aida mi voho?’ ‘Ya mo si naida mi tumo marã atumo tipa ka rimo?’ ‘Ya mo si nika ida mi tumo marã atumo ho mi nika du ni dimoyo?’ Ho ani ayamba boro ni tipa Tingida Pakpio Yesu, ani ima rengba ka sana ni nga, “Ya mo sanahe ho ngbaro?” na tingbafuoho, ani ki karagapai kuti gani sanahe. Ani ima rengba ka mangasunge a na agu avidio nga, Tingida Pakpio Yesu gbiati gu nga Ginipai Ninaamanga Bambu Kindo Yo? tipa ka undo aboro i ini wai ani naamanga gaani adunguratise. Na wirikapai nga ga  28 rogo gu buku nga Mo Raki Nyeanye Kindi na Ngbarago! na dungu wene apai nga gu rengbe ani ka fura tipaha.

16. Gini kura asanahe rengbe agu aboro du pati Tingida Pakpio Yesu ka sanaha?

¹⁶ Tingbafuo vovo aboro du pati Tingida Pakpio Yesu, i ima rengba kadu na gu kura asanahe. I ima rengba kaa bakabangiriyo nga, tipagine boro ninaaringa kpakuto na ki mbiri imekakue ti ni ya, watadu tipagine kina bete aboro ni ri kpakuto na ki mbiri imekakue ti ni (ka si du nga boro ho ni rihe). I ima rengba ka bakabangiriyo a tipa bara wai ani naamanga Tingida Pakpio Yesu. Na i ima rengba ka asada ka ino singia i naamanga gu kura adunguratise nga ga aDezire Yekova kina ngba gi bangisa gene re a. Wa vura duhe nga dungu agi apai re i naasakapai tipaha ti regbo gu gumbapai nga ga Tingida Pakpio Yesu, vovo aboro ima rengba ka ida gupai nga i sakihe fuyo futufutu berewe. Gu kekeapai du rogo gaani bangiriba nga ga jw.org du riihe nga, “Tipagine ADezire Yekova Amanga Tingida Pakpio Yesu ti ni Kia ti gu Gene Kura Apambori Amangaha Ngbaha?” ima rengba ka undo ro mo karagapai kuti gayo asanahe. Ani naida ka manga ai gupai rengbe ani ka mangaha​—mbata fu Tingida Pakpio Yesu, ti regboho, na tingbafuoho​—tipa ka undo “agu yo i aima ringbisa yo” watadu agu aboro du na ruru ngbaduyo yo nga aguyo si aida i gbia undo ti Tingida Pakpio Yesu.​—Amo. 13:48.

ONI UNDO AGU ABORO NAIMA ZERA ROGO TORO YO

17. Waigu rengbe abaakumba ka undo agu aboro naima zera rogo toro yo? (Yezekere 34:12, 16)

¹⁷ Ti agu aregbo nandu kuti Tingida Pakpio Yesu, waigu rengbe abaakumba ka undo agu aboro naima zera rogo toro yo? Oni yugu gupai fuyo nga oni naberã payo aberã. (Oni gedi Yezekere 34:12, 16.) Mbata fu Tingida Pakpio Yesu, oni mangi ome ka yamba dungu agu aboro naima zera rogo toro yo. Oni pe gupai fuyo nga oni naida ka undo yo ngba ai gu gene rengbe oni ka undo yo ngbaha. Oni yambu yo tipa Tingida Pakpio Yesu. Ka i ye, oni di yo kugume esuesu. Tingbafuo Tingida Pakpio Yesu, oni naandu kindi kumbatayo kaa bi agi awirina re, na kini fu gu undo fuyo i aida na ni tipa ka karagatiyo fuo Yekova.​—1 Pet. 2:25.

18. Waigu rengbe ani dunduko ka undo agu aboro naima zera rogo toro yo? (ARomo 12:10)

 ¹⁸ Aboro dunduko rogo dungurati rengbe ka undo agu aboro zere rogo toro yo nga aguyo ye tipa Tingida Pakpio Yesu. Ngba gini gene? Ni manga ani pai na yo rogo nyemuse yo, weneringise na irisa. (Oni gedi ARomo 12:10.) Oni tingidi gupai nga si ima rengba kadu ni kpakarakpakaraha fu agi awirina re tipa i ye tipa adunguratise. Si ima rengba kadu nga i nagunde agunde tipa gupai aboro narengbe ka pehe fuyo rogo dungurati watadu tipa yo. e Sidu, ka oni sananga yo na gu sanahe rengbe ka ba zee tiyo watadu ka pe gupai nga gu rengbe ka imisa yo ya. (1 Tesa. 5:11) Agi awirina re nga awirinarani rogo idapase yo. Ani na ngbarago ka irisombori berewe na yo wa sa!​—Tam. 119:176; Amo. 20:35.

19. Gini aundo naye mbiko du ani pati Tingida Pakpio Yesu?

¹⁹ Ani na bakere tambuahe nga Yesu ape gupai furani nga ani ni Tingidi Pakpio ko rogo garã yo bara sa na ani ima rugatirani na ndu gupai nyakipaha ti ni wo. Ho ani andu ni tipa Tingida Pakpio Yesu, ani nagbia undo ni tirani, na ki undo kura aboro ngba dungu agene. (Yes. 48:17, 18) Gaani nyemuse nasona tipa Yekova na Yesu. Ani nayugoho nga ani na bakere tambuahe tipa gupai i nayuguhe furani. Ani nadu mbembedi na awirinarani aidipase. Na ani ima rengba ka undo gu kura aboro a tipa i wiriki wai rengbe yo ka gbia ngbarago ti agu amaku naye mbiko motumo tumorii. Sidu tie, ani mangingo gupai amanga nga gu rengbe ani ka mangaha wadu ani dunduko tipa kadu regerege kadu pati gu Tingida Pakpio Yesu du rogo gi garã re​—nga nyanyakipa uru kisusi rogo gi garã re!