I asonosi agu akurayo rogo gu sino mangaapai badungu akumba abi adee na payo kusende. Ni kpiapai, Hans nga babi adungurati Bolivia yo, ape gupai nga i asonosi kura akumba rogo gu sino ngbatunga naangarasa akumba tipa i naamangapai na bakere rukö. Agi akumba re idi kuti gupai nga payo ima nyaka kisusi ga adee na i namangapai dedede na adee rogo zanga irisa yo. Shengxian nga bakumba Taiwan yo ape gupai nga: “Rogo gu rago mi araka rogoho, badungu akumba nabihe nga si aidanga adee fu berãpai fu akumba te. Ka kumba pepa ga dee berãpai tipa kurapai dagba akurako, i ima rengba ka zanga irisako.” Kura akumba nayugo gayo iraira bipai tipa adee ngba kura dungu agene. Ni kpiapai, i ima rengba kaa ba gbegberẽ awia tipa adee.

Si nipa ngbarago nga, ka si vura dunga i asonosi kumba kina rogo gini ngbatunga sino raka vurũ, ni ima rengba ka manga ariapai. Ko ima rengba ka wirika gupai nga akumba na adee dunduko kina sa. (Ef. 4:22-24) Ani rengbe ka manga gipai re ni wirika ani gu kpiapai nga ga Yekova. Rogo gi kekeapai re, ani nika sakapai tipa wai Yekova amangapai na adee, wai rengbe agu awirina nga akumba ka mangapai wagu Yekova amangapai na adee, na wai rengbe abaakumba ka ngbe mbatayo rogo yugo irisa fu agu awirina nga adee.

WAIGU YEKOVA AMANGAPAI NA ADEE?

Yekova ima maa bawene kpiapai nibipa wai ka mangapai na adee. Ko nga gu Barani nga boro nunga na ko ima kpinyemu awiriko dunduko. (Yo. 3:16) Na agu awirina nga adee du niruru yo fuko wakina gu bawene awiriko nga adegude. Mo bingo agu agene Yekova ayugoho ngbaha nga ko nakpinyemuyo na kini irisiyo.

Ko abingo yo na payo kusende te. Yekova akusi akumba na adee ni kpiako. (Bam. P. 1:27) Ko aakusanga akumba na bakere inohe kisusi ga adee  te watadu na bakere biri mangapai susi ga adee te; gu susi asusa gbe nga ko abingo ho nga pa akumba ima nyaka kisusi ga adee te. (2 Peka. 19:7) Ko akusi akumba na adee na kina bangisa rengbanapai ka gia rogo agu arengo yo nga ga Baibiri na ki wiriki gako bawene asino. Yekova nabi agu akumba na adee du na idapase kuti ko kina sa. Ko ima fu maabangirise fuyo dunduko tipa i raki nyeanye kindi auru kpotosende watadu gu maabangirise nga ga du ni abakindo na ni aboromotumo ngbangbaturũ yo. (2 Pet. 1:1) Si tie ziazia nga, Yekova abingo adee na pa yo kusende te.

Ko nadegatuko adega fuyo. Yekova ima ino pa agu apai dunduko adee asusa rogoho na agu akpakarapai i agbiatiyo na ni. Ni kpiapai, ko aima degatuko na ki mangipai kuti agu akparakpee nangia ga Raere na Ana. (Bam. P. 30:22; 1 Sam. 1:10, 11, 19, 20) Yekova aima mangasunge a na gako ziazia toro tipa abake Baibiri ke pa agu apangbanga nga ga agu akumba nadegetuyo fu adee. Ni kpiapai, Abarayama aima pekafuo ga Yekova rugapai nangia ko degetuko fu diako nangia Sara. (Bam. P. 21:12-14) Bakindo Davide adegetuko fu Abigaira. Nirengo, ko abihe nga Yekova du nakedi ri tipa ri ye ka gbiako. (1 Sam. 25:32-35) Yesu nga guko naima yugo asino Bako ngba rengberengbe gene, aima degatuko fu nako nangia Maria. (Yo. 2:3-10) Agi akpiapai re nayugo gupai nga gene sa Yekova ayugoho ngbaha nga ko nayugo irisa tipa adee nga ni dega ko tuko fuyo.

Ko nakido akido kuti yo. Ni kpiapai, Yekova aima du na kido kuti Eva nga ri nika undo aundo ka ngerafuo kpotosende. (Bam. P. 1:28) Pa manga ko ho wo ayugu gupai nga, ko aabingo ho nga kumbari nangia Adamu pa ko anyaki kisusi gari te ono ri angia moundo fuko. Yekova aima du na kido kuti gu denebi nangia Debora na Uruda tipa i naaruga ga Yekova aboro, kodihe na basapungbanga gbiati bakindo. (Abasa. 4:4-9; 2 Aba. 22:14-20) Areme, Yekova ima du na kido kuti agu aKristano nga adee ni fuko gako sunge fuyo i naamangaha. Gi ruru adawirani re namangasunge ni abatungusipai, abazakigene, na ni amokedi. I naundo ka gbaka kpia abambu Kindo gbiati abe-basunge, ka mehe, na ka bandaha. Agu akurayo namangasunge Betere yo; agu yo kini mangisunge rogo abasafugo. Agi adawirani re wakina bakere rimbasa aboro Yekova amangasunge na yo tipa i mangi gako sunge. (Tam. 68:11) Nirengo, Yekova abingo adee wa rurungbura aboro watadu agu aboro kaa manganga pai ya te.

WAIGU RENGBE AGU AWIRINA NGA AKUMBA KA WIRIKA WAI KAA MANGAPAI NA ADEE WAGU YEKOVA AMANGAHA?

Awirina, tipa ka inoho singia ani namangapai na agu aKristano nga adee wagu Yekova amangaha, si naida ani pe kina boro rengo fu tirani nibipa wai ani aberã na kini mangipai na yo. Ani naida na undo tipa gupai re. Munganga ni namangasunge na aũsunge tipa ka inoho singia bágundá boro wenengai watadu si na woka awoka. Wakina gure a, wene abakure gbiati Fugo Mbori ima rengba ka undo rani ani ini singia gaani bipai tipa yo nasa ngbarago ti Yekova. Ginipai rengbe ani ka mangaha tipa ka gbia gu undo re?

Mo sana bawene bakureamo. (Snz. 18:17) Ani ima rengba ka sana gu bakurearani ani akido akido kuti ni, nga gu ni du na weneringise na kidu na ruru berã na gu sanahe nga: “Waigu mo aberãha nga mi namangapai na adee? Ya mo i nabihe nga mi nairisa yo? Ya mo pai ho ka mi mangihe tipa kaa mangapai na yo wenengai?” Ka gu bakureamo re yugu abangiriba foro si aida mo mangi aˈariapai rogoho, ka mo fuku nga kina ndu apai ya. Kuba gure, mo du na ngbarago ka manga aˈariapai.

Mo wisigi Fugo Mbori. Gu bawene gene rengbe ani ka inoho ngbaha singia ani namangapai na adee ngba wene gene nga, ka mangasunge na Fugo Mbori tipa ka wisigo gaani aberã na mangaapai. (Eb. 4:12) Wa ani nikaa wisigo Baibiri, ani nika wirikapai tipa agu akumba namangipai ngba wene gene na adee na agu yo naamanganga pai wenengai ya. Ani nika du na rengba ka ringbisa agi akpiapai re kuti gu gene ani amangapai ngbaha na adee. Si naida agu awirina nga akumba du na rubangirise tipa ka zanga mangasunge na bangisa veresi nga ga Baibiri ka songoda gayo gbegberẽ bipai tipa adee. Kuba gure, si naida i mangisunge na dungu averesi nga ga Baibiri nga gu nasakapai tipa wai si aida kumba mangipai na dee. Ngba gi gene re, i ima rengba ka rugatiyo na wai Mbori abi adee. Ni kpiapai, ringbisihe kuti 1 Petero 3:7, si naida  kumba “nifu irisa fu de wa arengba nga ome de na ga kumba ya.” b Ya mo gipai re nayugo gupai nga pa dee anyakanga te​—gari abiri na rengbanapai kusende​—ti ga kumba? Wagusa te! Ani ringbisinga afugo Petero na gupai AGaratio 3:26-29 ayugoho nga, Yekova ima sia adee wa sa na akumba tipa i zogorago na Yesu ngbangbaturũ yo. Ho ani awisigo Fugo Mbori ni na ki sana wene bakurearani tipa gani berãpai nibipa wai ani amangapai na adee, ani ima rengba ka wirika wai ka yugo irisa fuyo.

WAIGU ABAAKUMBA AYUGO IRISA TIPA AGU AWIRINA NGA ADEE?

Agu awirina nga akumba rogo dungurati ima rengba a ka wirika wai ka mangapai na agu awirina nga adee ni peka yo fuo gu kpiapai nga ga agu abaakumba du na nyemuse. Waigu abaakumba angbe kumbatayo rogo yugo irisa fu agu awirina nga adee? Ani sakingo pai tipa bete kparakpara agene i ayugoho ngbaha.

I natambua agu awirina nga adee. Gu mokedi nangia Pauro aima maa wene kpiapai tipa abaakumba wirikihe. Ko aatambua agu awirina nga adee gbaiga rogo gu waraga yo ko akehe fu gu dungurati nadu Roma yo. (Rom. 16:12) Mo berẽnga pa gu ngbarago i adu na ni ho i agedi gu waraga ni Pauro akehe fu dungurati. Wakina gure a, abaakumba na ngbarago kaa tambua agu awirina nga adee tipa gu wene asino na nyanyaki sunge i amangaha fu Yekova. Gipai re naundo yo tipa i inipa wai agu awirina du rogo dungurati airisa yo na kini biyo na nyanyaki payo. Agu afugo ngarasaro nga ga abaakumba ima rengba kadu nga kina boro gupai agi awirani nga adee re aida na ni tipa kaa iriso Yekova ni ruruyo.​—Snz. 15:23.

Ho abaakumba atambua agu awirina nga adee ni, i nape kina boro rengo na ndikidi gupai i atambua yo ti ni. Tipagine? Wirina du rimo ri nga Jessica ape gupai nga: “Si ima ngba ho agu awirina nga akumba ape gupai ni nga ‘wene sunge.’ Ono ani ni nagbia ngarasaro gbe ho agu awirina nga akumba atambua rani ni tipa ndikidipai, wagu nga pa yugo ani pai fu awirani i sungu zezeredi ba adunguratise yo na pa dia ani regbo tipa ka ndu ka ye na gu boro na wirika Baibiri tipa adunguratise.” Ho abaakumba atambua agu awirina ni nga adee tipa ndikidipai, i nasa yo i bi tiyo nga i naida aida na yo na payo ima nyaka rogo dungurati.

I nadegatuyo fu agu awirina nga adee. Agu abaakumba nga aboro umbasitise ima ino gupai nga anga kina yo sa du na wene aberãpai te. Ngbatunga agu abaakumba re nasana agu  awirina nga adee tipa gayo aberãpai, na kini degetuyo wenengai ho i afura ni. Ho abaakumba amangaha ni wo, i nangarasa agu awirina nga adee na kini gbia undo ni tiyo. Ngba gini gene? Bakumba du rimoko nga Gerardo, nga gu ko namangasunge Betere yo ape gupai nga: “Mi naasana agu awirina nga adee tipa gayo berãpai bambiko si ima undo re tipa mi mangi gimi sunge wenengai. Dedede, i ima mangasunge kisusi kura agu awirina nga akumba.” Rogo dungurati, dungu agu awirina nga adee namangasunge ni anazakigene, sidu, i ima ino dungu apai tipa agu aboro naraka rogo dagbarago. Bakumba du rimoko nga Bryan ape gupai nga: “Agu awirinarani nga adee na dungu asino gbiati abiri-sunge gaani riigbu aida na ni!” Sidu, mo gbia undo ti gayo kpiapai.

Agu abaakumba du na tatamana aipongo ka ká agu aberãpai nga ga agu awirina nga adee te. Tipagine? Bakumba du rimoko nga Edward aya, “Gu berãpai gbiati gu kpiapai nga ga gu wirina nga dee ima rengba ka undo gu wirina nga kumba ko rugutiko na pai wenengai, na gari berãpai ima rengba ka undo ko tipa ko ini gu berãapai nga ga kura aboro.” (Snz. 1:5) Ka si vura du nga bakumba amanganga sunge na gu berãpai nga ga gu wirina nga dee te, ko ima rengba kindi ka tambua ri tipa gari berãpai na gari dudunguro giarogopai yo.

I naraba agu awirina nga adee. Agu abaakumba du na tatamana nangera angera tipa amomu ka raba agu awirina nga adee. Ni kpiapai, i ima rengba ka yugo wai fu agu awirina nga adee rengbe yo ka nungusa gu dunguratise du tipa sunge tungusapai ka si du nga gu wirina nga kumba zi bapatiza ho regerege ka nungusaha te. I ima rengba ka rabayo tipa i ini wai ka mangasunge na aũsunge watadu makana tipa gupai nga i ima rengba ka undo na sunge meka arago gbiati banda ahe rogo gaani riigbu. Betere yo, ababiapai ima raba agu awirina nga adee i ngerefuo badungu asunge, kodihe na ngerafuo ahe, ngbeka ahe, mangasunge na marã, agu ambakadapai nga ga kompiuta, na kura dungu asunge. Ho abaakumba araba agu awirina ni nga adee, i nayugoho nga i nabiyo na nyanyaki payo na kidu na kido kuti yo.

Badungu agu awirina nga adee namangasunge na gu rabahe i agbiaha re ka undo kura aboro na ni. Ni kpiapai, kura agu awirina nga adee namangasunge na gu rabahe i agbiaha ba mekaarago yo ka me agu akporo nga ga agu awirina gberãngo namangi yo. Agu akura yo kini mangisunge na agu abiri i ayuguhe fuyo nibipa manga dezirepai gbaiga ka undo gu kura dungu akurayo na ni tipa i naamangaha a wo. Waigu agu awirina nga adee abi agu abaakumba nafu rabahe fuyo? Wirina du rimori nga Jennifer ape gupai nga: “Ho mi andu ni kupati me kura Bambu Kindo sa, bangerekurii gu sunge re adi regbo tipa ka raba re. Ko aima bi gu sunge mi amangihe, na ki tambua re tipaha. Mi aima kpinyemu mangasunge na ko bambiko mi aabi tire nga mi na nyanyaki pare na ko aima du na kido kuti re.”

AGU AUNDO DU TI MANGAPAI NA AGU AWIRINA NGA ADEE WAKINA ABOROKPORO

Ani nakpinyemu gu ruru awirina nga adee kina wai Yekova amangaha! Sidu, ani namangapai na yo wakina gaani aborokporo. (1 Tim. 5:1, 2) Ani nayugo irisa fuyo na kidu na ngbarago kaa mangasunge wa sa na yo. Na ani na bakere ngbarago ho i abihe ni nga ani ima kpinyemuyo na ani nasongoda yo asongoda. Wirina du rimori nga Vanessa ape gupai nga: “Mi na bakere tambuahe fu Yekova tipa ka du ni papara gako riigbu, nga gu naima hi be agu awirina nga akumba naima ngarasa re ni bakerehe.” Wirina du Taiwan yo ape gupai nga: “Mi na bakere tambuahe nga Yekova na gako riigbu naabi adee na nyanyaki payo na kini du na irisa tipa gayo aberãpai. Gipai re nanyakasa gimi idapase na kini sare mi du na bakere tambuahe tipa gu momu du mi na ni nga ga du ni papara ga Yekova riigbu.”

Nairiwo gu ngbarago du Yekova na ni ho ko abi gu ruru aKristano ni nga akumba nga aguyo nabi adee na nyanyakipa yo na kidu na irisa koyo du yo ni wakina gu ko amangaha! (Snz. 27:11) Bakumba du Scotland yo du rimoko nga Benjamin ape gupai nga: “Badungu akumba areme rogo zegino ayugongo irisa fu adee kandara tooni te. Sidu, ho agu awirinarani nga adee aye ni tipa adunguratise ku Bambu Kindo yo, ani naida ka bi gupai nga i nabi tiyo nga ani nairisa yo airisa na kini kpinyemuyo.” Ani mangingo ome amanga tipa ka wirika Yekova ni manga ani pai na agu awirinarani nga adee rogo nyemuse yo na kini fu gu irisa fuyo rẽ tipa yo.​—Rom. 12:10.