1. Ginipai naye ku berãro yo ho mo aberãpa Yekova ni?

 YA MO mo asadingo ka berãpa wai du Yekova? Ho mo naamanga kparakpee ni fuko, ginipai ninaaye ku berãro yo? Wa vura duhe nga ka ani bingo Yekova te, Baibiri ima sakapai tipa ko ngba dungu agene yo. I nayamba Yekova nga “uru na vurakube” na “we nanyasa rago.” (Tam. 84:11; Eb. 12:29) Yezekere asakipai tipa Yekova rogo gu yuguyugupai yo ko abihe nga ko wa gu mbia nga safira, wa nzere sirigi, na wa kpia imaima rago wa kpia wangu. (Yeze. 1:26-28) Bete agi apai i nasakipai tipa Yekova na ni re ima rengbe ka gundesi rani watadu ani ima rengba ka bi tirani nga sunge tirani te.

2. Ginipai rengbe ka sa gu kura aboro ka i mbedinga na Yekova ya?

² Mbiko wa ka ani abingo Yekova ya, si ima rengba kadu furani ni kpakarakpakaraha ka ida kuti gupai nga ko ima kpinyemu rani. Gu kura aboro naberã gupai nga, ka Yekova kpingo nyemuyo te bambiko gu gbegberẽ apai namangi mbata kusayo rogo gayo raka yo. Si ima rengba kadu nga abayo aadunga ho ka kpinyemu te. Yekova ima rugatiko na pa wai du ani na ko ima ino wai duhe ni kpakarakpakaraha furani tipa ka mbeda na ko. Tipa ka undo rani, ko ima yugopa gu ngbatunga boro nga ko furani vuru Baibiri yo.

3. Tipagine si aida ani sakipai ti ni tipa ga Yekova nyemuse?

³ Gu fugo rẽ i sakipai tipa Yekova na ni nga nyemuse. (1 Yo. 4:8) Baibiri nape gupai nga “Mbori nga nyemuse.” Agu apai dunduko ko amangaha, nyemuse du nasako ko nimangihe. Ga Mbori nyemuse ni bakerehe gbe, na si asanga ko ko ni yugu nyemuse sa fu kina agu aboro nakpinyemu ko te ko nayugoho ayugo a fu agu aboro akpingo nyemuko ya. (Mt. 5:44, 45) Rogo gi kekeapai re, ani nika sakapai tipa Yekova na gako nyemuse. Kina wai ani nikaa wirikapai tipa gaani Mbori, kina wo a ani kaa kpinyemu ko.

 YEKOVA IMA KPINYEMU RANI NI BAKEREHE GBE

4. Waigu ga Yekova nyemuse asa ro mo du? (Oni bi sura a.)

⁴ Yekova “nakpi nyemu roni akpi ni tiko.” (Yo. 16:27) Rogo Baibiri yo, ko naringbisa tiko kuti gu nyemuse du nagude na ni. (Yes. 66:12, 13) Mo berẽnga pa gu nagude nakpinyemu tooni wiiri. Ri natinda ru rii mboso ri na kini fura furu zezeredi. Ho gu gude re akpara ni watadu u na igirã, ri naafu guhe furu u aidaha. Ho du ani rogo bakere igirã, ani ima rengba kadu na gu kido nga Yekova nakpinyemu rani akpi. Bake papara Atambuahe aya: “Wa du sakapai ku kpotore yo ni badungu he, gamo wasawasa apai nangarãsa mbisimore.”​—Tam. 94:19.

5. Ginipai ga Yekova bangabanga nyemuse ayugoho foro?

⁵ Yekova ni ruruko. (Tam. 103:8) Ko ambunga kpinyemu rani ho ani amanga gupai ni du ni irairaha te. Gu rikaaboro nangia aYisaraere aba gberãrago ti Yekova bara dunguhe; ono wa si avura du wo, ko ayugu gako nyemuse tipa aguyo nasa berãyo na agi afugo re: “Bambiko wa du mo ni kikiipa he bangire, ni irisiirisi ro.” (Yes. 43:4, 5) Kina gu bangisa nyemuse re du Yekova na ni tipa rani areme. Ani ima rengba ka kido kuti gako nyemuse ti aregbo dunduko. Ka ani vura manga kere aingahe, Yekova ambunga rani te. Ho ani saberã rani ni na ki karaga tirani fuo Yekova, ani nabi gupai nga Yekova nakpinyemu rani kindi. Ko nakidohe nga “ko avú ni avu kpaima.” (Yes. 55:7) Baibiri nasakapai tipa gako mbupai wa gu “zereda ye yo du Gbia ni.”​—Amo. 3:19.

6. Ginipai Zekaraya 2:8 ayugoho furani tipa Yekova?

⁶ Oni gedi Zekaraya 2:8. Bambiko Yekova ima kpinyemu rani, ko naino gupai du tipa rani niipo, na ko regerege tipa ka banda rani. Ko na gberãrago ho du ani ni nifudifudi rani. Sidu, ani ima rengba kadu na gu kido nga ko nika karagapai akaraga kuti gaani kparakpee ho ani nika kpara ni nga: “Mo bánda re wa rindi bangiro.” (Tam. 17:8) Bangirise nga gu barapa boro paha naima rengba ka gberã niipo, na si nga nyanyakipa papara kpoto boro. Sidu, ho Yekova aringbisa rani ni kuti rindi bangiriko watadu zende bangiriko, si wa ka i ya ko naya ‘Gu boro ka imisi roni gimi aboro, ni na imisa guhe du na nyanyakipaha fere.’

7. Tipagine si aida ani nyakasi gaani kido ti ni kuti ga Yekova nyemuse?

⁷ Yekova naida ani idi kuti gupai nga, ko ima kpinyemu rani. Ono ko ima ino gupai nga,  mbiko agu apai namangi rani kusayo, ani ima rengba ka bakabangirani singia ko rengbe ka kpinyemu rani. Watadu ani nasusa rogo gupai yo awere nga gu naˈasada gaani kido kuti ga Yekova nyemuse. Ginipai nika nyakasa gaani kido? Inopa wai Yekova ayugo nyemuse koyo du Yesu ni, nga gu mbedimbedi ko, na wai ko ayugoho fu rani dunduko nika nyakasa gaani kido a.

WAI YEKOVA AYUGO GAKO NYEMUSE

8. Tipagine Yesu adu ti ni na kido tipa ga Bako nyemuse?

⁸ Yekova na bangisa Wiriko aima du kina sa tipa gbanga regbo kisusi ai boro. Vuru gu badungu agarã yo i adu kina sa ngbangbaturũ yo, i aima mbeda dagbayo gbe na gayo nyemuse dagbayo ki ima nyaka gbe. Yekova ayugu gako nyemuse tipa Yesu gbaiga a wa ani agedaha rogo Matayo 17:5. Yekova aima rengba ka pe gupai gbua nga, ‘Gi ko re mi idi pako.’ Ono tie, ko aaida gupai nga ani ini pa bakio wai ko nakpinyemu Yesu, sidu, ko aya tipa ko, “Wire du re, nyemuko namanga re.” Yekova adu na ngbarago na Yesu, gbe, tipa gupai nga ko aidi ka fu unga ko. (Ef. 1:7) Na Yesu aima du na kido nga Bako ima kpinyemu ko. Ga Yekova nyemuse aima du ni ndikidipai fu Yesu, na ko aadunga na kapanga tipaha te. Ko aima pe gupai bara dunguhe zanga kapa nga, Bako ima kpinyemu ko.​—Yo. 3:35; 10:17; 17:24.

9. Gini fugo i namangisunge na ni ka yugopa ga Yekova nyemuse tipa mbedimbedi aKristano? Oni sakingo rogoyo. (ARomo 5:5)

⁹ Yekova ima yugo gako nyemuse a fu mbedimbedi aKristano. (Oni gedi ARomo 5:5.) Oni bingo gu fugo i namangisunge ane na ni nga “niuka ku kpotorani yo.” Gu kura buku sa nasakapai tipa Baibiri nape gupai tipa gipai re nga si wa ka i ya “niye ku auru rani wakina ime.” Gi kpiapai re nayugo wai nzunzu Yekova nakpinyemu mbembedi aKristano! Mbedimbedi aKristano ima ino gupai nga i nga “abadiangba rogo Mbori yo,” watadu Mbori ima kpinyemu yo. (Yuda 1) Gu mokedi nangia Yoane ape gayo bipai ho ko ake gupai ni nga: “Oni bi nga ngbatunga gu nyemuse fu Mbori nga Ba fu rani, ya i ya ti rani awiri Mbori.” (1 Yo. 3:1) Ya mo Yekova nakpi kina nyemu mbedimbedi aKristano sa? Oó, Yekova ima yugo gako nyemuse furani dunduko.

10. Gini nyanyakipa pai duho nayugo pa ga Yekova nyemuse tipa roni?

¹⁰ Gini bakerepai duho nayugo pa ga Yekova nyemuse? Si nga motumo tumorii. Nimanga Yekova gi nyanyakipa pai re, si nayugo pa gu nyemuse boro aayugongo ho mbata ya! (Yo. 3:16; Rom. 5:8) Yekova afu gu Wiriko ko aima kpinyemuko gbe, ko ye ka kpi tipa aboro dunduko ka dia gaani aingapai kusayo na i mbupai furani na ani ki da ni abakurea Yekova. (1 Yo. 4:10) Kina wai ani nikaa berãkurii gupai aYekova na Yesu amangihe, kinawo a ani nika rugatirani na pa bakio wai i nakpinyemu rani wa du ani nibasasa dunduko. (Gara. 2:20) I aafunga gu motumo tumorii re tipa gupai gbua nga si aaida na ga Yekova ruru sarangbanga te. Ono si nga gu gamahe nga ga nyemuse. Yekova aima fu gako gamahe furani ni fuko guhe paha anyaki fuko gbe nga​—Yesu. Yekova aidihe Wiriko mbu na ki kpi tipa rani.

11. Ginipai ani awirikaha rogo Yeremaya 31:3?

¹¹ A wa ani nabihe, Yekova nape pa wai ape furani ko nakpinyemu rani ni bakerehe. (Oni gedi Yeremaya 31:3.) Yekova ima gberani koyo du ko ni mbiko ko ima kpinyemu rani. (Oni ringbisinga ha na Pa Fu Rugute ni Ue he 7:7, 8.) Boro ho watadu he ho ka kpara rani kusayo ti gi nyemuse re te. (Rom. 8:38, 39) Waigu gi nyemuse re asa ro mo du? Oni gedi Atambuahe 23, na ki bingo ga Davide bipai tipa ga Yekova nyemuse, na kina gu bipai re si aida ani du na ni a.

 WAIGU GA YEKOVA NYEMUSE ASA RO MO DU?

12. Waigu rengbe mo ka sakarogo gupai yo du rogo Atambuahe 23?

¹² Oni gedi Atambuahe 23:1-6. Atambuahe 23 nga gu bia nafura tipa kido kuti ga Yekova nyemuse. Davide nangia bake gi papara atambuahe re asakipai tipa gu nyanyaki nyemuse naadu dagbako na gako Babanda akandoro nga Yekova. Davide abi tiko nga ba ko gu ngbaangba ho ko ambu tiko ni Yekova naangbe fuko kumbatayo na ko adu na kido kuti Ko. Davide aima ino gupai nga Yekova nikaa yugo gako nyemuse fuko rogo gako raka yo naaˈuru dunduko. Ginipai nasako ko du na gu kido re?

13. Tipagine Davide adu na gu kido ti ni nga Yekova nika ngera angera fuoko?

¹³ ‘Zingohe amánga nga re te.’ Davide abi tiko nga i aangera angerafuo ko bambiko Yekova aafu agu ahe dunduko fuko ko aaida na ni ti aregbo dũ. Davide aima ino gupai a nga Yekova angia bakureako na Yekova aima ida na ko. Si du nga ndu gupai ko adu na gu kido ti ni nga ka kina ginipai vura manga kumbatayo, Yekova nikaa ndu kindi kumbatayo kaa ngerafuo gako azingo. Bambiko Davide adu na gu kido nga Yekova aima kpinyemu ko na ko nikaa ngera angera fuo ko, si aundo ko ka ko naabaka nga bangiriko ya, ono kuba gure, ko adu na ngbarago na rengbabepai.​—Tam. 16:11.

14. Waigu rengbe Yekova ka ngerafuo rani?

¹⁴ Yekova nangera angera fuo rani, gbe, ho gbegberẽ apai amanga rani ni rogo gaani raka yo. Claire, a nga gu ri niima mangasunge Betere yo tipa agarã naima susa 20, abi tiri nga ri aarengbanga ka undo agumeri te ho i adu ni rogo kere kpakarapai. Gu kaza nayosorasi papara boro amangi bari, na tamere ki kuru kusayo rogo dungurati, na gari aborokporo adu nazingo marã, na i ki zanga gayo kporo.  Waigu Yekova ayugu gupai nga ko nakpinyemu yo akpi? Claire ape gupai nga: “Yekova abi gupai nga gimi aborokporo na guhe beyo nga gu i anaaida ha rogo aˈuru ni basasa. Bara dunguhe, Yekova anaafu guhe furani susi gu ani aidaha! Dedede, mi naaberã tipa wai Yekova naundo rani, na bangire agonga ti gako nyemuse te. Tingidapa agi apai re ima undo re mi naandu kindi kumbatayo kaa iriso Yekova na ngbarago ka kina gini akpakarapai vura ka manga vurũ rogo gimi raka yo.”

15. Tipagine Davide abi tiko ti ni nga ko ima gbia wasa? (Oni bi sura a.)

¹⁵ ‘Ko ninambakada mbisimore.’ Ti kura aregbo, Davide anidu rogo bakere gberãrago bambiko gu gbegberẽ apai na aˈasada ko aagbiatiko na ni. (Tam. 18:4-6) Ono tie, ga Yekova nyemuse anaafu wasa afu fuko. Yekova anindu na gi bakureako naanidu na mbugo re ku “rogo wesewese banambu” na “kupati ruru ime.” Ni sangbana gipai re, Davide anigbia ome na ko aniidu na rengba kaa ndu kumbatayo kindi kaa iriso Yekova na ngbarago.​—Tam. 18:28-32.

16. Waigu ga Yekova nyemuse afu wasa foro?

¹⁶ Wakina gure areme a, ho ani agbiatirani ni na agu akpakarapai nga ga raka ‘ga Yekova inaapai nga gu anyasa nga wa sa ya,’ nika undo rani. (Kpe 3:22; Koro. 1:11) Oni bingo gu kpiapai nga ga Rachel. Ri adu na bakere gberãrago ho kumbari ambu ri ni na ki mbu Yekova a ti regbo gu ririkaza nangia Korona. Ginipai Yekova amangihe furi? Ri aya: “Yekova asa gupai nga mi ni bi tire nga i ima kpinyemu re. Ko aye na abakureami kupati re nga aguyo naadia regbo na mi, i anaaye na riahe fere, kini kekeapai fere na kini kedi agu averesi nga gu naangarasa re, kini mamu na mi, na kini tingidi re na gupai nga Yekova naberãpa re aberã fuo re. Wo mi natambua Yekova tipa fuko agu aborokporo fere nakpinyemu re.”

17. Tipagine Davide ‘aagunde nga be gbigbitapai’ ti ni ya?

¹⁷ ‘Mi agunde nga be gbigbitapai te, bambiko mo du na mi.’ Ga Davide raka anidu dedede ngbapai, bambiko ko adu na dungu agu avurako naadu na ome tiyo kisusi ko. Ono tie, ga Yekova nyemuse asa ko ko naabi tiko nga ba ko gu ngbaangba na ko ni bandabanda ko. Davide aima rengba ka bi gupai nga Yekova adu na kina ko rogo apai yo dunduko, na gipai re afu kido fuko. Si du ko arengbe ka bibia ti ni nga: “[Yekova] ki batasi re be gimi agunde dunduko.” (Tam. 34:4) Wa vura duhe nga ti kura aregbo Davide aniidu na gunde, ko aima rengba ka diabe gako gunde, bambiko ko aima ino gupai nga Yekova aima kpinyemu ko.

18. Waigu pa kido kuti ga Yekova nyemuse narengbe ka undo ro ho du mo ni na gunde?

 ¹⁸ Waigu pa ino gupai nga Yekova ima kpinyemu rani anyakasa rani ho du ani ni rogo kpakarapai? Nazakigene du rimori nga Susi asakipa wai ri adu na kumbari ho wiriyo aimi tiko ni, ri aya: “Ho gbegberẽpai amanga ni rogo gamo raka yo, si nadu na bakere maapai kuriro na mo kini bi tiro nga gene bero te. Ono ga Yekova nunga ima sarani ani bi tirani nga ba rani gu ngbaangba na ani ni bandabanda rani.” Rachel, i nifura tipa ri kusayo natingida gupai nga: “Rogo kura yuru sa ho mi adu ni na bakere gberãrago, mi akpari kuari fu Yekova. Ti gu regbo re, Yekova aima fu zereda ku kpotore yo kina wai nagude namanga wirini, na mi ati ni rame. Bangire agonga ti gu regbo re te.” Bakumba du rimoko nga Tasos adi agarã biama ku bambukiso yo tipa ká ko ka manga sunge asekere. Waigu ko abi ga Yekova nyemuse na ki bi gupai nga Yekova aangera angerafuo ko? Ko aya: “Yekova afu guhe fere susi gu mi aaidaha. Gipai re anyakasi gimi kido nga mi ima rengba ka kido kutiko na ngbadure yo dunduko. Berewe a, vurube ga Yekova ziazia toro, ko afu ngbarago fere si ki vura du vurũ nga padu bambukiso yo angia kerepai. Gipai re aundo re mi bi gupai nga kina wai mi nikaa kido kuti Yekova, kina wo a mi nikaa bi gako nyemuse tipa re. Sidu, mi atona mangasunge ni bazakigene mbure kina bambukiso yo.”

ONI MBEDI NA MBORI NYEMUSE

19. (a) Waigu pa ino ani pa ga Mbori nyemuse narengbe kadu na maapai kurii gaani akparakpee? (b) Gini sakapai tipa ga Mbori nyemuse nga gu ngba tiro gbe? (Oni bi gu sanduki nga, “ Agu Afugo Naundo Rani Ani bi ga Yekova Nyemuse.”)

¹⁹ Agi apai ani nasakipai tipaha re dunduko nayugoho ziazia nga Yekova, nga ‘Mbori nyemuse’ na kina rani! (2 Kor. 13:11) Ko naberãpa rani aberã wadu ani nibasasa dũ. Ani ima rengba kadu na gu kido nga gako ‘weneringise nake pati rani kirikiri.’ (Tam. 32:10) Kina wai ani kaa berãkuriipa wai ko nayugu gako nyemuse furani, kinawo a ani nikaa bi wai ko angerafuo rani. Ani ima rengba ka kpara fuko zanga gunde na kini pe pa wai fuko ani aida na gako nyemuse. Ani ima rengba ka pepa gaani abakabangirise fuko bambiko ani ima ino gupai nga ko ima gia tiko na gupai du tipa rani na ko regerege ka undo rani.​—Tam. 145:18, 19.

20. Waigu ga Yekova nyemuse agbe rani mbembedi koyo du ko ni?

²⁰ Kina wai ani naambeda kupati we ti regbo zere, kinawo a gako nyemuse agbe rani koyo du ko ni. Wa vura duhe nga ga Yekova nyemuse ni nyanyakihe, kinawo du gako nunga a. Sidu, mo du na ngbarago bambiko Yekova ima kpinyemuro. Sidu tie, ani dunduko karaganga pai akaraga kuti gako nyemuse ni pe ani gupai nga: “Mi nakpi nyemu Yekova”!​—Tam. 116:1.