1. Tipagine rengbe ani ka ya ti ni ga Abarayama maabangirise adu ni ndikidihe?

 YEKOVA akido gu bakureako nangia Abarayama nga, rogo ngbatunga ko yo i nika fu maku fu rikaaboro zegino dunduko. (Bam. P. 15:5; 22:18) Mbiko wa Abarayama adu na bakere idapase kuti Mbori, ko aima ida kuti gupai nga ga Mbori kidohe nika da ada ti rengo. Wa si avura duwo, ho garã Abarayama aambeda ni kuti 100 na garã diako kingia 90, gi ruru arogotise re aavunganga gude kindi te. (Bam. P. 21:1-7) Wa vura duhe wo, Baibiri nape gupai nga: “Abarayama amoi bangiriko ti kidohe, ki idi pa ha aida, si du du ko ti ni ni ba fu dungu rika aboro, ku sangba gu pai yo i agumba.” (Rom. 4:18) Oni ima ino gupai nga, gupai Abarayama amaabangiriko tipaha aima da ti rengo. Ko aima da ni ba gu gude ko aima digo ni moibangiriko tipa ko nga, Yisaka. Tipagine Abarayama adu ti ni na gu kido nga Yekova nika banda gako kidohe abanda?

2. Tipagine Abarayama adu ti ni na gu kido nga ga Yekova kidohe nika da ada ti rengo?

² Mbiko gupai nga Abarayama adu na mbembedi pabakure na Yekova, ko ‘aini ni rengo ya gu pai [Mbori] akido he ti ni’ nika da ada ti rengo. (Rom. 4:21) Yekova aidi na Abarayama na ki yambu ko nga ruru boro mbiko gako idapase. (Yak. 2:23) A wa i nayuguhe rogo ARomo 4:18, Abarayama adu na idapase gbiati maabangirise. Ani wisigingo pai awere tipa gupai gu mokedi nangia Pauro aaida ka pehe tipa maabangirise wa duhe ni kekehe rogo ARomo kapita 5.

3. Ginipai Pauro asakapai tipaha nibipa maabangirise?

³ Pauro asakipai tipa ndu gupai rengbe ani ka ya ti ni “maabangirise afu nga rani sa zee te.” (Rom. 5:5) Ko aundo rani a tipa ani rugutirani na wai rengbe gaani maabangirise nga ga aKristano ka sona. Wa ani nikaa sakapai tipa ARomo 5:1-5, mo  berẽnga pa wai gamo maabangirise tipa kumbatayo nada ni nyanyakihe vuru agu aregbo yo susi. Gaani sakapai nika undo ro a tipa mo ini wai rengbe mo ka sonosa gamo maabangirise tipa si nyaki susi wai duhe awere. Ani sakingo pai mbata tipa gu bawene maabangirise Pauro afura tipaha nga si andunga sa zee te watadu gberãrago te.

4. Ginipai i nasakipai tipaha rogo ARomo 5:1, 2?

⁴ Oni gedi ARomo 5:1, 2. Pauro ake agu afugo re fu gu dungurati nadu Roma yo. Agu awirina nadu yo aima wirikapai tipa Yekova na Yesu, ki ima yugo idapase, na ki ima da ni aKristano. Mbori ‘adi pai ri yo mbiko idapase,’ na ki mbedi yo na ziazia toro. I arengbe ka ngera kumbatayo tipa bawene amaku na kidu na gu kido nga i nika gbiaha agbia.

5. Gini maabangirise du mbedimbedi aKristano na ni?

⁵ Pauro akepai kusa fu gu mbedimbedi aKristano nadu Efesa yo tipa gu maabangirise i ayambu yo tipaha. Gu maabangirise re aakoda “ũkumbo du rogo gako aboro yo.” (Ef. 1:18) Na Pauro ayugu gu ba fu agu awirina nadu Korosai yo i nika gbia gayo mosoro rogoho. Ko ayambuhe nga “gu maabangirise moi yo ho fu roni ngbangbaturũ yo.” (Koro. 1:4, 5) Sidu, gu maabangirise nga ga mbedimbedi aKristano nga, i nika zingisa yo tipa i raki nyeanye kindi ngbangbaturũ yo nga gu ba i nika zogarago na Kristo rogoho.​—1 Tesa. 4:13-17; Yugo. 20:6.

6. Ginipai kura mbedimbedi Kristano sa apehe tipa gako maabangirise?

⁶ Mbedimbedi aKristano nabipa gu maabangirise re na nyanyakipaha. Boro sa dagba mbedimbedi aKristano yo nga Wiriba Frederick Franz ape gupai kina boro kpotokoyo nga: “Gaani maabangirise nika da ada ti rengo, na ani dunduko ni basasa nga aboro 144,000 nika gbia guhe agbia Mbori nakido paha furani. Pa gaani mosoro nika nyaka kisusi pa ai guhe du berani.” Fuo Wiriba Franz mangisunge fu Mbori ni ruruko tipa badungu agarã, rogo 1991 ko aya: “[Ani] nabi gaani maabangirise na nyanyakipaha kindi. . . . A wa ani nikaa sungudo ho, kina wo a ani nika du na bakere tambuahe tipaha. Ani na nyemu ka sungudo ho  ka si vura du vurũ nga ani sungudihe tipa agarã mirioni. Mi ima bipa gaani maabangirise na nyanyakipaha.”

7-8. Gini maabangirise du dungu ga Yekova amoyambu na ni? (ARomo 8:20, 21)

⁷ Dungu agu aboro naairiso Yekova areme na amaabangirise ni bakiakia. Si nga gu maabangirise Abarayama adu na ni nga​—ka raka nyeanye kindi auru kpotosende rogo ga Mbori Kindo. (Eb. 11:8-10, 13) Pauro aima kepai tipa gi bawene maabangirise re. (Oni gedi ARomo 8:20, 21.) Ho mo awirikipai ni ni bambataha tipa gu maabangirise Baibiri afuhe kumbatayo, ginipai mo aangera gbe kumbatayo tipaha? Ya mo si rengbe kadu nga, mo abihe nga uru adu kinaho sa mo nikaa dunga ni boro ingapai ya? Watadu mo adu na ngbarago ka wirika gupai nga gu gamo aboro nakpiki nika raka araka berewe auru kpotosende ane rogo Paradizo? Mbiko gu maabangirise Mbori naafuhe furani, mo na badungu weneapai mo angera kumbatayo tipaha.

⁸ Singia ani na maabangirise tipa ka raka nyeanye kindi ngbangbaturũ yo watadu auru kpotosende, ani na bawene maabangirise nga gu nasa rani ani du na ngbarago. Na ani ima rengba kadu na gu kido nga gaani maabangirise re nika da ada ti rengo. Gupai Pauro akehe tingbafuo gure nasakapai tipa wai rengbe gipai re ka manga. Ani bingo gupai ko akehe nibipa gaani maabangirise. Afugoko naundo rani ani du na gu kido nga agu apai ani amaabangirani tipaha nika da ada ti rengo.

9-10. A wa i nayuguhe rogo ga Pauro kpiapai, ginipai rengbe aKristano kadu na maabangirise tipaha nga si nika manga amanga? (ARomo 5:3) (Oni bi asura a.)

⁹ Oni gedi ARomo 5:3. Pauro ape gupai nga ho ani agbiatirani ni na arungosiro, ani nabi gaani maabangirise na nyanyakipaha. Gipai re ima rengba ka iriwo tirani. Gu rengo duho nga, apefuo Kristo dunduko nika gbiatiyo agbia na rungosiro. Ani bingo gu kpiapai nga ga Pauro. Ko ape gupai fu agu awirina naadu Tesaronike yo nga: “Ho ani adu ni na oni, ani agumba ha fu roni mbata ni rengo ya ani ka hi gberãngbi; si ki ye ka du a wo.”  (1 Tesa. 3:4) Na ko akepai fu aKorindo nga: “Ani akpi nga nyemu oni zanga inahe te, awirina, tipa gu gaani rungosi . . . Wa ani aberã nga ya ani anye ni ungarani ya.”​—2 Kor. 1:8; 11:23-27.

¹⁰ AKristano ima rengba areme a ka gbiatiyo na kina ngbatunga gu rungosiro re. (2 Tim. 3:12) Ya mo i rungosingo ro mbiko mo moi idapase kuti Yesu na ki tona peka fuoko? Si nawiraha wa abakureamo na agumero aima sawia ro. Si rengbe kadu nga i aima manga foro gbegberẽ. Ya mo gamo diaberã ka nye niruru ro rogo apai yo dunduko yengo na akpakarapai foro ba gamo sunge yo? (Eb. 13:18) Ya mo mo gbianga tiro na rungosiro be airangbii mbiko gupai nga mo atungusipai fu kura aboro tipa gamo maabangirise? Ono tie, ka ani vura kaa gbiatirani na kina gini ngbatunga arungosiro vurũ, Pauro aya si naida ani ngi angi. Tipagine?

11. Tipagine si aida ani diberã ti ni ka hi ai asada?

¹¹ Ani ima rengba kadu na ngbarago zavura ho ani arungo ni bambiko ani ima ino gupai nga gipai re nika undo rani tipa ani sonosi kura nyanyakipa sino. A wa i napehe rogo ARomo 5:3, ‘rungosi namaa hipai.’ AKristano dunduko nika gbiatiyo agbia na arungosiro, sidu, aKristano dunduko si aida i du na hipai. Si naida ani diberã ka hi ai agu aasada dunduko rengbe ani ka gbiatirani na ni. Ani rengbe ka gbia gu mosoro ani amaabangirani tipaha kina gu sa ka ani hipai na kini ndu kindi kumbatayo kaa iriso Yekova. Ani aidanga kadu wa agu aboro payo adu berã Yesu yo ho ko aafura ni tipa gu tunga nati ku dagba ambia te. Agu aboro duwa gu tunga nati ku dagba ambia re agi wene pangbanga ti bambataha na i ki koto tingbafuo i gbiatiyo na gberãngbi gbiati rungosiro. (Mt. 13:5, 6, 20, 21) Kina rengo nga ha nga, anga arungosiro na aasada ni wenehe te, ono ani nagbia undo ho ani ahipai ni na kini ndu kumbatayo kaa iriso Yekova. Ngba gini gene?

12. Waigu ani agbia undo ho ana ahi aasada ni?

¹² Gu mokedi nangia Yakoba afura tipa agu aundo ani agbiaha ti hi aasada. Ko ake gupai nga: “Oni ídi fu zadapase si mangi gaha ziazia sunge, ya oni du ziazia na baroni, ka zingo he amanga nga roni ya.” (Yak. 1:2-4) Sidu, Yakoba ape gupai nga zadapase watadu hipai na kina sunge si amangaha gbiati ringbisapai. Si rengbe ka undoro tipa mo sonosi gu sino nga ga zerangbaduse, kidu na bakere idapase, na kini kido gbe kuti Mbori. Ono tie, ani nagbia undo ngba kura nyanyakipa gene ho ani ahi aasada ni.

13-14. Ginipai hipai akusaha, na gini ngbanya du dagbaha na maabangirise? (ARomo 5:4)

¹³ Oni gedi ARomo 5:4. Pauro ape gupai nga hipai ‘namaa inahe.’ Sidu, ho mo ahipai ni, Yekova naida na gamo pai. Anga gere nayugo gupai nga rago nangba ti Yekova ho ani agbiatirani ni na akpakarapai te. Kuba gure, ko na ngbarago mbiko wai ani ahipai niruru rani. Si ni bakerepa ngarasaro ka ino gupai nga, ho ani ahipai ni, ani nasa Yekova ko du na ngbarago!​—Tam. 5:12.

¹⁴ Oni tingidi gupai nga, Abarayama agbia tiko na aasada ko ki hi he dunduko ni ruruko, na Yekova adu na ngbarago na ko. Yekova aabi ko ni bakureako na ki bi ko nga ruru boro. (Bam. P. 15:6; Rom. 4:13, 22) Kina gu bangisapai re rengbe kadu tipa rani a. Anga Yekova na ngbarago na ani mbiko gu bakio sunge ani amangaha watadu gu ba ani airisoko rogoho te. Yekova na ngbarago na ani ho du ani ni niruru rani ani ki vura kaa gbiatirani na aasada vurũ. Na ka garã rani vura du wai vurũ, na agu apai du tipa rani ki vura du wai vurũ, watadu gaani birĩ mangaapai, ani dunduko naima rengba ka hipai. Ya mo mo nahi asada awere niruru ro? Ka ngia wo duhe, mo tingidi gupai  nga mo nasa ngbarago ti Yekova. Pa ino ani gupai nga Mbori na ngbarago na ani ima rengba kadu na bakere ome kurii rani. Si ima rengba ka nyakasa gaani maabangirise.

15. Gini kura memepai berewe Pauro apepaha, na tipagine rengbehe ka zeresa ngba kura aboro ti ni?

¹⁵ A wa Pauro asakipai tipaha, Yekova na ngbarago na ani ho ani anye ni niruru rani fuko na kini hi aasada. Oni bingo wai Pauro andu kumbatayo na gako sakapai, ko aya: “Inahe [namaa] maabangirise, maabangirise afu nga rani sa zee te.” (Rom. 5:4, 5) Kina ngba kura aboro rengbe ka zera be gipai re. Tipagine? Bambiko kusayo, a wa duhe ni kekehe rogo ARomo 5:2, Pauro aima gumba gupai nga agu aKristano nadu Roma yo aima du na maabangirise, ‘maabangirise ti ga Mbori taarimo.’ Ni sangbana gupai re, boro ima rengba ka sanahe nga, ‘ka si dunga agu aKristano re aima du na maabangirise, tipagine Pauro arimisi maabangirise ti ni kusa ku rogo gako sakapai?’

16. Waigu maabangirise atona ka sona rogo boro yo? (Oni bi asura a.)

¹⁶ Ani rengbe ka giatirani na gupai Pauro apehe re ho ani aino gupai ni nga maabangirise nga guhe nasona asona. Tipa ka yugoho na kpiapai: Ya mo mo natingidanga gu bambata regbo mo agi pa gu bawene maabangirise du rogo Fugo Mbori yo? Si rengbe kadu nga mo aberẽ gupai nga gu berãpai nga ga raka nyeanye kindi rogo Paradizo auru kpotosende ni bawenehe, ono mo aadunga na gu kido nga si rengbe ka manga te. Ono tie, tingbafuo mo tona ka wirika badungu apai tipa Yekova na agu akidohe nga ga Baibiri, mo aye ka du na gu kido nga gu maabangirise re nika da ada ti rengo.

17. Waigu gamo maabangirise asona kina kumbatayo tifuo gamo kparatise na bapatiza?

¹⁷ Zavura tingbafuo zio mo bapatiza, mo aye ka ino Yekova gbe na zavura kini kpinyemuko gbe. Mo aima du na bakere kido tipa agu apai mo amaabangiro tipaha. (Eb. 5:13–6:1) Si nawiraha wa mo ima bi gupai du rogo ARomo 5: 2-4 si ni mangi. Mo aima gbiatiro na dungu arungosiro na Yekova ki ima yugoho foro nga ko na ngbarago na mo. Mbiko gupai nga mo ima ino gupai nga ko nakpinyemuro na ko na ngbarago na mo, mo na dungu nduapai awere bero kadu na gu maabangirise nga mo nika gbia agu ahe agbia ko nakido paha foro. Gamo maabangirise ima nyaka susi wai si adu ti tonatonaha. Si ima da ni ndikidipai foro nitiro. Si na bakere maapai gbe kurii ro. Ka pepai ngba kura gene, si ima du na maapai kurii gamo raka naabaha na ki ima aria wai mo amangapai na gamo aborokporo, wai mo amanga adiaberã na zavura wai mo amangasunge na gamo regbo.

18. Gini kidohe Yekova nafuhe?

¹⁸ Gu mokedi re agbia kura nyanyakipa pai nibipa gu maabangirise mo agbiaha tingbafuo Mbori idi na mo. Ko na kido ro nga gamo maabangirise nika digiso tihe adigiso. Tipagine rengbe mo ti ni kadu na gu kido re? Pauro apepa gi kidohe be Mbori re fu aKristano nga: “Maabangirise afu nga rani sa zee te; bambiko ga Mbori nyemuse i niuka ku kpotorani yo be gu Ziazia Toro fu ko ko fu rani.” (Rom. 5:5) Mo na nduapai bero dunduko kadu na kido kuti gu maabangirise Yekova nafuhe foro.

19. Ginipai rengbe mo kadu na kido tipaha nibipa gamo maabangirise?

¹⁹ Oni niberẽpa ga Yekova kidohe fu Abarayama na wai Mbori aidi na ko na kini biko ni bakurea Ko. Gupai Abarayama aamaabangiriko tipaha aima da ti rengo. Baibiri nape gupai nga: “Fuo ima ko na hipai, ko ki zi kidohe.” (Eb. 6:15; 11:9, 18; Rom. 4:20-22) Rago aagberãnga tiko te. Mo ima rengba kadu na kina gu bangisa kido nga ka mo nye niruru ro, mo nika gbia gu mosoro agbia mo amaabangiro tipaha. Mo na badungu andu apai bero tipa ka du na ngbarago bambiko mo ima ino gupai nga gamo maabangirise nika da ada ti rengo; rago agberãnga tiro te! (Rom. 12:12) Pauro ape gupai nga: “Were gu Mbori nga ga maabangirise ko ko hisi roni na ngbarago na zereda rogo idapase yo, gaoni maabangirise moi pai, mbiko tandu Ziazia Toro.”​—Rom. 15:13.