ZANGA kapa, mo nagbia ngbarago agbia ti gu dungu agamahe Yekova nafuhe foro, na mo na tambuahe nga ko mbu gene foro mo diberã tipa wai mo nika gbia ngbarago ti agi agamahe re. Ringbisihe kuti Baibiri, buda nga gamahe be Mbori, zavura si naya: “I nimangi pumbo tipa mongo, imekakue ki ningiisi unga aboro.” (Batu. 10:19; Tam. 104:15) Ono si nawiraha wa mo ima bi kura aboro i nadu na akpakarapai na buda. Na berewe a, aboro rogo zegino dunduko na abipai ni bakiakia tipa mbirabuda. Ginipai rengbe ka undo aKristano i mangi agu adiaberã nga ga tatamana nibipa mbirabuda?

Ho ani amanga adiaberã ni, si naida ani kido kuti ga Mbori arugute angianga kuti gupai agu aboro du pati rani aberãha ya, ka ani mangihe wo, ani nika du na bakere ngbarago rogo gaani raka yo.

Zanga kapa, a wa oni abihe, badungu aboro rogo zegino nambira buda dedede na ni bakerehe. Agu akurayo nambira buda tipa kadu na ngbarago. Agu akurayo nambiraha tipa ka zanga bakabangiriyo tipa gayo akpakarapai. Na rogo kura aba, aboro naberã gupai nga gu boro nambira buda ni bakerehe nga nyanyaki boro.

Ono aKristano nagbia agu arugute nga ga tatamana be gu Bakusiyo nga boro nyemuse. Ni kpiapai, ko ima pepa gu kere asangbanapai du ti bakere mbirabuda. Si rengbe kadu nga ani aima geda gupai du rogo Asanza 23:29-35 tipa wai i nasaki futufutuapai tipa gu boro nakpibuda na bete agu akpakarapai naye ni sangbanaha. a Daniel, nga bakumba putu yo natingidapa wai gako raka adu mbata fu ko wirikipai tipa Yekova na kini mangipai kuti gako arugute, ko aya “Mi anaambira buda ni kerehe, na gupai re asa re mi mangi gbegberẽ adiaberã, na mbiko gipai re, mi agbia tire na kere gbegberẽ apai na mi nidu adu na gberãrago ho mi aberã ni kuriihe.”

Waigu rengbe ani ka manga agu adiaberã nga ga tatamana nibipa buda na ki ne agu akpakarapai naye ti ho boro ambira buda ni ni bakerehe? Si naida ani mbu ga Mbori aberãpai si du na maapai kurii gaani aberã na mangaapai.

Ani bingo gupai Baibiri apehe tipa buda na bete gu nduapai aboro ambira buda ti ni.

Fugo Mbori azangahe ti mbirabuda rengbe arengba te. Na zavura Bibiri nape gupai nga boro ima rengba ka gbia ngbarago ti mbirabuda. Ani nageda gupai nga: ‘Mo ri ga riahe na ngbarago, ki nimbiri ga imekakue na ngbarago kpotoro yo.’ (Batu. 9:7) Yesu anaambira buda ambira ti kura aregbo, na zavura gu kura ruru ga Yekova amoyambu a.​—Mt. 26:27-29; Rk. 7:34; 1 Tim. 5:23.

Ono tie, Fugo Mbori ima yugo gu bakiki kparakparapai du dagba mbirabuda ni betehe na kpibuda. Si nape gupai gbaiga nga: “Ka oni kpí nga imekakue ya.” (Ef. 5:18) Na zavura si nape gupai nga “akpibuda . . . adía nga kumbo ga Mbori ngbi te.” (1 Kor. 6:10) Ni rengo, Yekova ima soga bakere mbirabuda na kpibuda. Kuba gupai nga kaa pekafuo agu aboro du pati rani nibipa mbirabuda, ani namaamburu gaani diaberã rii gupai nika sa ngbarago ti Mbori.

Gu kura aboro nabihe nga i ima rengba ka mbirabuda ni bakerehe zanga kpihe. Ono gupai re nga kerepai. Ziazia Kekeapai ima yugoho ziazia nga ‘fú tise fu bakere buda’ ima rengba ka sa boro ni mangi kere aingahe na ki mangi ingapai kuti Yekova. (Tito 2:3; Snz. 20:1) Na zavura Yesu aima fu zahe nga “kpibuda” watadu bakere mbirabuda ima rengba ka sa boro ka ni rimingo ku rogo ga Mbori vovo zegino ya. (Rk. 21:34-36) Ginipai tie rengbe ka undo Kristano ni ne agu akpakarapai rengbe ka ye taata ti mbira buda?

Ho ani adiaberã ni nibipa mbira buda, si ni kerepai ka mangapai kuti gupai dungu aboro rogo gaani sino ngbatunga amangaha. AKristano namangapai nitatamana tipa ka sa ngbarago ti Yekova ho daha ni ti agu apai du wa riahe na mbirabuda. Baibiri natingida rani na gupai nga: “Watadu ri he tie, na mbira he, na gu pai oni ka manga ha dunduko, oni mángi he dunduko sa taasa rimo Mbori.” (1 Kor. 10:31) Bete asanahe na abangua arengo nga ga Baibiri gere si aida ani berẽkuriihe:

Ya mo mi nambira buda tipa gupai nga kura aboro kpinyemu re? Gate 23:2 naya: “Ka mo peke nga rimbasa aboro” ya. Herẽ, Yekova aafu zahe fu aYisaraere tipa ka i pekenga fuo agu aboro naasanga ngbarago tiko ya te. Gure nga wene rugute fu aKristano areme a. Ka ani mbu kura aboro i du na maapai kurii gaani aberã na adiaberã nibipa buda, ani ima rengba ka turuso tirani ti Yekova na gako arugute.​—Rom. 12:2.

Ya mo mi nambira buda tipa aboro berẽ gupai nga mi nyanyaki? Rogo kura asino ngbatunga, mbirabuda dedede na ni bakerehe nga gupai aboro abingo ho na gbegberẽpai ti ni ya. (1 Pet. 4:3) Ono oni bingo gupai 1 AKorindo 16:13 angarasa rani ani mangihe: “Oni ngére, oni rú nyanyaki rogo idapase. Oni dú wa akumba, oni dú nyanyaki.” Ya mo buda rengbe ka undo boro nzunzu ni du nyanyaki? Oó, ka si undongo boro te. Buda ima rengba taata ka rungburasi ga boro tandu berãpai na ki sa ni ka ni mangingo wene adiaberã ya. Sidu, mbira bakere buda ayugongo gupai nga boro ni nyanyaki ni te, kuba gure, si nayugo gupai nga ni nga iramungo. Yesaya 28:7 nasakapai tipa gu boro nandu yangiyangi be buda nga ni nandu ngbuongbuo, na ni sangbanaha, ni na kotoka.

Ndikidi nyaka naye be Yekova na si nakoda pa ‘ngera ani, ki rú nyanyaki rogo idapase yo.’ (Tam. 18:32) Ani namanga agi apai re nidu ani na rubangirise ka ne kereapai na ki mangi agu adiaberã nikaa gbarasanga gaani pagume na Yekova ya. Yesu aima du na nyanyaki pagume dagbako na Yekova, na dungu aboro adu na irisa koyo du ko ni mbiko ko adu na wingbaduse na ki diberã ka manga gupai du ni ruruhe.

Ya mo mi naambira buda tipa ka zanga bakabangire tipa gimi akpakarapai? Ga Mbori toro adu kugii tatamanatatamana bake papara atambuahe  ko ke gupai nga: ‘Wa du sakapai ku kpotore yo ni badungu he, gamo wasawasa apai [Yekova] nangarãsa mbisimore.’ (Tam. 94:19) Ka si du nga mo na bakabangirise tipa pai, mo kido kuti Yekova ko undo ro angianga kuti buda ya. Gu wene gene rengbe mo ka mangaha ngbaha nga kaa manga kparakpee dedede fu Yekova. Na berewe, kura aboro ima bihe nga undo kina ti gbata wene arugute be agu abakure rogo dungurati niima nyaka rogo toro yo. Ni rengo, mbirabuda tipa ka diabe akpakarapai ima rengba ka sa boro ka ni dinga berã ka manga gupai du ni ruruhe ya. (Osea 4:11) Daniel, i nipe pa ko kusayo aya: “Mi aasovura kuti bakabangirise na gberãrago be manga ingapai. Mi aambira buda tipa ka mi bakingo bangire gbe ya ono gipai re aye na kina kura dungu akpakarapai na mi aima zanga abakure na ka mi adunga berewe na kiki ya.” Ginipai naundo Daniere ni yangaraha? Ko aya, “Mi aye ka rugatire na gupai nga si naida mi kido kuti Yekova angianga kuti buda ya. Niyangaraha, ho mi adu ni na rengba ka manga gipai re, mi aye ka mangapai kuti gimi akpakarapai na ki dibehe.” Gu rengo duho nga, Yekova kinaho ti aregbo dunduko ka undo rani ka si vura kaa ngera vurũ wa maabangirise ho tipa agu apai du tipa rani te.​—Frp. 4:6, 7; 1 Pet. 5:7.

Ka si du nga mo naambira buda ambira ti kura aregbo, tipagine ka mo awisigongo pa wai ti ni mo ambira buda kuti agi asanahe du re ya, ‘Ya mo gimi borokporo watadu bakureami na bakabangirise tipa wai mi ambira buda?’ Ka si du wo, gere ima rengba ka yugo gupai nga mo nasonosa gu sino watadu kpakarapai mo ainongo pai tipaha ya. ‘Ya mo mi nambira buda kisusi wai mi anaambiraha mbata kusayo?’ Gipai re ima rengba ka manga gu boro buda natona ziobaha ti ni. ‘Ya mo si kpakara akpakara fere mi zanga mbirabuda tipa bete aˈuru watadu dungu aˈuru?’ Ka singia wo duhe, gure nga gu sino nga ga mbirabuda ima ziobaha tiro. Si ima rengba ka yugo gupai nga si naida mo gbia undo agbia be agu aboro nafu undo tipa bakere mbira buda tipa ka diabe gu kpakarapai re.

Mbiko gupai nga mbirabuda ima rengba ka ye na dungu akpakarapai, gu kura aKristano ima diaberã ka zanga mbira ai buda. Gu kura aboro ima rengba ka zanga mbirabuda mbiko gupai gbua nga i akpingo nyemu wai duhe ngbase yo te. Ka si du nga bakureamo  sa mangi ngbatunga gu siapai re, mo ima rengba ka yugo wene sino nidu mo na irisa tipa gani diaberã ki zanga bisirapa ni.

Isoke mo ima bihe nga si nipa tatamana ka diaberã tipa bakio buda wai si aida mo mbirihe. Watadu mo ima rengba ka maa gamo andiko tipa bange wai mo nikaa mbiraha isoke bara sa rogo poso yo watadu ni betehe ti regbo ariahe. Gu kura aboro ima maa ngbanda nibipa ngbatunga agu abuda i aida kaa mbiraha, wa ngbatunga gu nga mbira gu du wa imekakue watadu biere rengbe arengba angianga gu du na bakere buda rogoho watadu ka kodaha na kura mbirimbiri ahe ya. Ka si du nga boro ima maa gani ngbanda nibipa mbira buda, si nika du taata gbe fu ni ni kakuti ni. Na si aidanga gu Kristano niima nyaka rogo toro yo bakibangiiri ni tipa gupai kura aboro nika berãha tipa gu siapai ni namangihe te na ni diberã ka nye kuti gani siapai.

Ho ani amanga adiaberã ni nibipa buda, si naida aida a ani berẽpa ga kura aboro bipai. ARomo 14:21 naya: “Ngba nga ri pasio, na mbira imekakue, na manga gu pai ka wirinamo koto be he wa sa te.” Waigu rengbe mo ka mangapai kuti gi rugute re? Mo du na nyemu awirinamo. Ka mo bihe nga mbirabuda ima rengba ka kotosa kura boro, nyemuse nika sa ro ka mo mbiringa buda ti gu regbo re ya. Ho mo amanga gipai re ni, mo nayugo gupai nga mo na nyemuse gbiati irisa koyo du kura aboro ni na mo aberãnga kina pa tiro te.​—1 Kor. 10:24.

Na berewe, irangbii ima rengba ka maa andiko tipa buda, na si naida Kristano mangipai kuti agu andiko re. Agu andiko re ima rengba ka pe gupai nga gu kura garã kinaho si aida mo da mbata na ni mo kini ru ka mbirabuda, watadu agu andiko re ima rengba ka zahe ti gupai nga boro ta mbirabuda kini gbe tarambiri watadu kini mangisunge na kura amakana.​—Rom. 13:1-5.

Yekova ima yugo irisa furani ni fuko ranirii furani ani gbia ngbarago ti gu dungu agamahe ko nafuhe furani. Kodihe na gu ranirii nga ga sia guhe ani nika rihe na guhe ani nika mbiraha. Gaani asiapai yugungo ho ayugo nga ani nabi gu ranirii gu Barani du ngbangbaturũ yo nafuhe furani na nyanyakipaha nimanga ani sunge na ni ka sa ngbarago tiko.