I avungu re rogo 1948 rogo wiri tooni gbaria du bangbanda sudiyo na dioyo Nigeria yo. Ti gu regbo re, tame Buba nangia Moustapha, na unvurami nangia Wahabi, azi bapatiza na ki da ni aDezire Yekova. Ho garã re adu ni nga ribua, buba akpi. Rago aima gberã tire nikerehe. Wahabi ape gupai fere nga ani ima rengba ka bi Buba berewe ti regbo zingabekpio. Gi berãpai nga ga wasa re asa re mi tona wirika Baibiri. Mi azi bapatiza rogo 1963. Aunvurami ue na tamere sa azi bapatiza a.

Rogo 1965, mi aga fuo unvurami nga Wilson ku Lagos yo na kini gbia ngbarago ti koda mi tire na gu kura awirina nangia abazakigene rogo gu dungurati nangia ga Igbobi. Gu ngbarago i aagbiaha na wai i adu zaaza asa re mi tona sunge abazakigene rogo Ngi 1968.

Gu wirina naamangasunge Betere yo nangia Albert Olugbebi, amangi kparakpara dunguratise na ani nangia paranga aboro ka undo rani ani tona sunge kparakpara abazakigene Nigeria yo ku nodiyo. Mi natingidapa wai kindi Wiriba Olugbebi afura na ngbarago furani, ko aya: “Oni kindi nga paranga aboro, na oni ima rengba ka mangasunge na gaoni ome fu Yekova. Dungu asunge duho furoni si aida oni mangihe yo!” Mi aaida kadu wa Yesaya na ka ndu kurogo ai gu ba Yekova aida mi ndu ku rogo ho, sidu, mi afu rimore tipa ka mangasunge ni kparakpara bazakigene.​—Yes. 6:8.

Rogo Merekoko 1968, i akedi re ni kparakpara bazakigene kurogo gu bagbata nga Kano, du Nigeria ku nodiyo. Gipai re amangi ti regbo gu vura nangia ga Biafran nga gu naadu rogo 1967 kuti 1970, gu vura re aima ye na kpio na rungosiro ku Nigeria ku nodiyo nikerehe na si ki guari yo ki ndu ku Nigeria  ku uroyo. Kura wirina aˈasadi ka sa re ka mi ndu nga ku Nigeria ku uroyo ya bambiko ko aaidanga kerepai gbia re te. Ono mi ape gupai fuko nga: “Tambuahe foro tipa ka bakabangiro tipa re. Ono tie, ka si du nga Yekova naida mi irisiko tingba gi sunge re, mi ima ino gupai zanga kapa nga ko nika ngera angerafuo re.”

Si aima du ni gbegberẽpai ka bi gupai namangi ti regbo gu vura namangi Kano yo. Vura aima gbarasa gu bagbata re. Ho ani anindu ni ku gene tungusapai yo, wo ani anaabi kangba aboro nga aguyo i aimi yo ti regbo vura. Wa vura duhe nga dungu adungurati naadu Kano yo, dungu awirina aima zubo yo. Kina bete abatungusipai wa 15 nanye yo, na i aagunde nikerehe na i kidu na bakere gberãrago. Agu awirina re adu na bakere ngbarago ho i abi rani ni sita nga kparakpara abazakigene ani nada. Ani angarasiyo na i kidu na ngbarago. Ani aundo yo i tona gayo apai nga ga toro berewe na ki tona fu gayo fuo sunge nga ga tungusapai na kini sana be-basunge tipa awaraga.

Wa ani angia kparakpara abazakigene, ani atona ka wirika pa-Hausa. Ho agu aboro naadu rogo gu rago re atona ka gia gu pangbanga ni nga ga Kindo rogo fugoyo yo, badungu yo atona ka degatuyo furani. Ono tie, rago aangbanga ti agu aboro naadu rogo gu kindigi apambori naadu rogo gu dagbarago re na gaani sunge tungusapai te, sidu, si aaida ani du na bakere rubangirise. Ti kura regbo sa, gu kura boro ado rani na gimi badiasunge na kina boro sape. Ono tie, ani azubo kisusi ko na ka gene adu nga beko wa ka ko zi rani ya! Zavura wa gi kpakarapai re avura du vurũ, Yekova asa rani ani du “ni bandabanda” rani na bange awirina ki tona kaa kio kina kumbatayo. (Tam. 4:8) Areme, abatungusipai bangeyo naima susa 500 du rogo adungurati du bangehe nga 11 Kano yo.

Rogo Buza 1968, tingbafuo du ani Kano yo tipa wiri bete adiwi gbua, i akedi re ku Niamey yo, nga gu bakere bagbata nga ga Niger, mi gbiati gu kura kparakpara abazakigene ue. Ngbutuko fuo da ani yo, ani aye ka ino gupai nga, Niger nga gu ringara du ni fofoihe rogo gu dagbarago nga ga West Africa. Ku pati gupai nga ga inido tirani na gu faarago naadu yo, si aaida ani wiriki gu fugo i apehe rogo  gu ringara re nga Faransée. Wa vura duhe nga gipai re aima kpakara furani tipa ani mangihe, ani akido kuti Yekova na ki tona ka tungusapai rogo gu bagbata re na bete agu awirina naaraka yo. Kina vuru wiri bete regbo yo gbua, agu aboro dunduko naaraka Niamey yo nga aguyo narengbe ka gedapai, agbia gu buku naadu tipa wisigopai nangia The Truth That Leads to Eternal Life. Aboro anaaye kaa gbata rani tipa ka gbia gu buku re!

Si aimanga te ani ki ye ka ino gupai nga airangbii aaidanga na aDezire Yekova te. Rogo Bamburu 1969, ani amangi bambata bakere dunguratise nga ga arame ue rogo gu ringara re, na aboro 20 naadu pa tini. Ani amaabangirani tipa bapatiza nga ga vovo abatungusipai ue. Ono tie, rogo bambata uru nga ga bakere dunguratise, aborisi aye na ki rugusi gaani mbakadapai. I adi kparakpara abazakigene na babi adungurati ku borisi yo. Tingbafuo i sasana rani, i ape gupai furani nga ani ki karaga tirani rogo gu kura girorago ku borisi yo. Ani aini gupai nga airangbii ima rengba ka manga kerepai, ani amangi mbakadapai tipa ka manga gumbapai nga ga bapatiza rogo kporo na ki fu bapatiza ni gbugbuhe rogo di.

Fuo bete aposo kusa, gu basunge nangera kurii agu apai du rogo ringara ado re kusayo rogo gu ringara re na gu kparakpara abazakigene naadu bisue. Si aaida ani kuru kusayo rogo gu ringara re vura asaa yo 48, na kina rani si adu nga ani nika manga gaani mbakadapai tipa ka kura. Ani agisangba yo, na ani ki ndu ni basa kurogo gu be-basunge nga ga Nigeria, yo i afu gu kura vovo asunge ni furani.

I akedi re kurogo gu kura wiri gbaria Nigeria yo du rimoho nga Orisunbare, yo mi agbia ngbarago ni ti sunge tungusapai na agu awirina naadu rogo gu wiri badona naaraka yo. Ono tingbafuo adiwi sita, be-basunge asana re tipa mi karaga tire ku Niger yo nisare. Ti tonatonaha, kina ngbare nazere, na mi adu na gunde, ono tingbafuo gure, mi adu na maabangirise tipa ka ndu ka bi agu awirina nadu Niger yo berewe!

Mi akaraga tire ku Niamey yo. Gu uru mi ada Niger yo, gu kura babagiahe nangia boro Nigeria aini re nga Dezire Yekova nga mi na ko atona ka sana agu asanahe nga ga Baibiri. Ani atona wirikapai na ko, na tingbafuo ko mbu vugundö na bakere mbira buda, ko azi bapatiza. Fuo gure, mi adu na ngbarago ka tungusapai na awirina rogo dungu apapara Niger na ki bi wai tingbafuo dungu agarã aboro aidi rengo yo. Ho mi adaada ni yo, aDezire Yekova adu rogo gu ringara re 31 ono ho mi aguari ni yo bange yo adu yo nga 69.

Rogo Banduru 1977, mi akaraga tire ku Nigeria yo ka gbia rabahe. Tingbafuo digido gu rabahe naadu tipa aposo biata re, barii gu Rondo nga ga Be-basunge nangia Malcolm Vigo, agedi gu waraga fere gu be-basunge nga ga Sierra Leone akedihe. Agu awirina re aagbata gu wirina du kpotoni wenengai, ni bakuparanga kingia bazakigene nga  guni nape pa-Ngirisi na Faransée tipa ni rengba ka mangasunge ni babi adungurati Guinea yo. Wiriba Vigo ape gupai fere nga i aaraba re tipa gu sunge re. Ko asaki gupai fere ziazia nga gu sunge re angianga taata sunge te. Ko ape gupai fere nga “Mo berẽkuriihe wenengai mbata fu mo diberã.” Mi akaragapai fuko nibasa nga, “Wa duhe nga Yekova du na keda re mi nika ndu andu.”

Mi andu ku Sierra Leone yo na ki gbia agu awirina naadu rogo be-basunge yo. Wirina sa rogo Rondo nga ga Be Basunge ape gupai fere nga, “Ani ainongo pai ni bakerehe tipa sunge Kindo Guinea yo te.” Wa vura duhe nga gu be-basunge nga ga Sierra Leone nangera kurii sunge tungusapai Guinea yo, gene aadunga wa ka i aafura na agu awirina naadu yo te bambiko gu vunduvundu apai nangia ga birĩ-zogarago rogo gu ringara re. Be-basunge aima asada bara dunguhe tipa ka keda boro nindu ka bi awirina Guinea yo, ono gene adunga wa ka wirina ndu kurogo gu ringara re te. Sidu, i asana re mi ndu kurogo gu bakere gbata nga ga Guinea nga Conakry na ki asadi ka sana irangbii singia i rengbe ka idaha fere mi raki yo.

Ho mi ada ni Conakry yo, mi andu kurogo gu basunge naru kuba gaha ringara nga ga Nigeria na mi agbia gu boro naru kuba gimi ringara nga Nigeria. Mi ape pa gimi nyemupai fuko nga ga tungusapai Guinea yo. Ko ape gupai fere nga ka mi raki nga yo ya, bambiko i ima rengba ka zio re watadu ka manga fere gbegberẽ. Ko aya: “Mo ga ku Nigeria yo ka ndu ka tungusapai yo,” na mi akaragapai fuko ki ya, “Mi ima diaberã ka raka ane.” Sidu, ko ake waraga fu gu boro naangerakurii agu apai du rogo ringara nga ko undo re, na ko aima undo re.

Ngbutuko fuoho, mi akaraga tire kurogo gu be-basunge nga ga Sierra Leone na ki pe pa gu diaberã nga ga gi bamangisunge re fu awirina. Awirina atangbayo na ngbarago ka gia pa wai Yekova afu maku kurii gimi nunguro. Irangbii aima idaha fere mi raki Guinea yo!

Natona rogo 1978 kuti 1989, mi amangisunge ni babi adungurati Guinea yo, Sierra Leone yo, na ni gu boro naundo babi adungurati Liberia yo. Ti tonatonaha, mi aawoka dedede. Na ti kura aregbo, gipai re anaamanga ho mi ani du ni gbaria yo. Ono awirina anaamanga ome tipa ka ndu na mi ku bambu ngua yo.

Ti kura regbo sa, mi awoki nikerehe be mararia, gbiati agbiro vuse yo. Ni yangaraha, ho mi ahu ni, mi aye ka ino gupai nga awirina aasakapai tipa wari i nika kpisido re ni! Wa gi kereapai re avura kaa manga re vurũ, mi aaberãnga pa mbu sunge te. Mi aima ida kuti gupai nga kina Mbori sa rengbe ka fu ngbabase furani bambiko ka ani kpi, kinako rengba ka zingisa rani be kpio.

Rogo 1988, mi agbia Dorcas, nga gu nazakigene nakpinyemu Yekova gbe na kidu na umbasitise. Ani arogo tirani na ani ki tona mangasunge biko adungurati na ri. Dorcas aamangasunge na mi nyanyaki tingba gimi sunge, na ri ambu pa kura gari apai ka mangasunge fu Yekova. Ani anaandu nunguro ni ndurani nga akirometere 25 (amairo 15) dagba adungurati tipa kaa ndu kaa biko kura adungurati  na kini tindi gaani amangu rirani yo. Tipa agu adungurati naanidu ni tuturũ he, ani anaandu na ai gu ũnduge naani duho, nga gu naandu ti agu agene naanidu na dungu adue rogoho.

Dorcas angia ngangarã dee. Ni kpiapai, ti kura aregbo, ani anaasi gu ime naanidu na angondi rogoyo. Ti kura regbo sa, ani aandu nunguro tipa auru bisue, gu tanga i ambakadihe rogo ngua yo aima kuo, na si aaida ani si di na gu kurungba i ambakadihe rogo ngua yo. Ho Dorcas aru ni kuari ka zorã kurungba yo, ri ati kurogo dudunguro ime. Ani dunduko na ri aainongo wai ka wagia te, na angondi adu kina rogo gu ime re. Si ni gupai nafu ngbarago nga, bete aparanga akumba adu kinaho, na i andu na ki batasi ri. Ani dunduko arari gbegberẽ amusumo tipa gupai re tipa bete regbo, ono ani aandu kindi kumbatayo na sunge biko adungurati.

Ti tonatona gu garã nangia 1992, kina ngbarani nazere ka bi gupai nga Dorcas adu na vuse. Gipai re aaida ani mangi diaberã singia ani nikaa ndu kindi kumbatayo kaa mangasunge kparakpara abazakigene. Ani abi gupai nga, “Yekova ima fu gamahe furani!” Sidu, ani adiberã ka yamba rimo wirani nga Jahgift. Agarã biama tingbafuo vunga ani Jahgift ani avungu kawiiri nga Eric. Awirani dunduko nga gaani gamahe nga ga toro be Yekova. Jahgift amangisunge safugo tipa bete regbo rogo gu basunge nga ga sa-fugo du Conakry yo, na Eric nga moundo abaakumba.

Wa vura duhe nga, Dorcas azoro ti sunge kparakpara abazakigene, ri aandu kumbatayo kindi kaa mangasunge abazakigene na kini ngerefuo awirani. Mbiko gu undo nga ga Yekova, mi andu kumbatayo kindi kaa mangasunge Kindo ti aregbo dũ. Tingbafuo awirani sono, Dorcas adu na rengba ka tona mangasunge kparakpara abazakigene berewe. Awere ani dunduko namangasunge amokedi Conakry yo.

Rogo agu aba dunduko Yekova aya fere mi ndu kuhoni, mi aima ndu koyo. Mi na diare aima bi wai dedede Yekova abanda rani na kini fu maku furani. Mbiko kido ani kuti Yekova kuba kido kuti aũzegino, ani ima ne dungu akpakarapai na bakere bakabangirise. Rogo agu apai yo mangi rani, mi na Dorcas ima bi gupai nga Mburu ndikidi ngbabase gu du be “Mbori gaani bata,” nga Yekova. (1 Peka 16:35) Mi ima du na gu kido nga raka agu aboro dunduko na kido kutiko “ni vovoho na Yekova ga Mbori ni ungaha.”​—1 Sam. 25:29.