1. Tipagine ani afu karagapai ti ni ti regbo adunguratise?

 TIPAGINE ani ninaandu ti ni tipa agu adunguratise nga ga dungurati? Bambata ndupai nga, ka sambuo Yekova. (Tam. 26:12; 111:1) Ani nandu a tipa adunguratise tipa wa ka ani ngarasi akuarani ti gi kpakarakpakara aregbo re. (1 Tesa. 5:11) Ho ani afu karagapai ni ti regbo adunguratise, gure nga ani namanga agi apai du ue re.

2. Gini amomu du berani tipa ka fu karagapai ti regbo adunguratise?

² Rogo aposo yo dunduko, ani na amomu ka fu karagapai ti regbo gaani adunguratise. Ni kpiapai, ti digido poso, ani ima rengba ka fu karagapai ti regbo gu Wisigo Ngbaõbambu Sinziri nga ga dungurati. Ti regbo agu adunguratise du bebere poso, ani ima rengba ka fu karagapai ti regbo gu Nyanyakipa Ahe Nga ga Toro, Gu Wisigo Ziazia Kekeapai Nga ga Dungurati, gbiati gu kura apaparaha du na sakapai rogoho.

3. Gini akpakarapai rengbe ani ka gbiatirani na ni, na waigu rengbe AEbere 10:24, 25 ka undo?

³ Ani dunduko naida ka sambuo Yekova na kini ngarasi akuarani airisimbori. Ono apai kinaho ima rengba ka saha furani ni kpakarakpakaraha tipa ka fu karagapai. Ani ima rengba kadu na gunde ka fu karagapai, watadu ani ima rengba nzunzu kadu na nyemu kaa fu akaragapai ni dunguhe ono ti kura aregbo, gu wirina nanungusaha ima rengba ka zanga tumba berani tipa ani fu karagapai. Waigu rengbe ani ka mangapai kuti agi akpakarapai re? Gupai gu mokedi nangia Pauro akehe fu aEbere ima rengba ka undo rani ani gbia karagapai. Ho ko aasakapa ndu gupai ni duhe ti ni ni nyanyakipa pai tipa ani naadungura tirani kina sa, ko ape gupai nga, si naida ani moiberãrani kuti pa ‘nyakasa akuarani.’ (Oni gedi AEbere 10:24, 25.) Ka ani tingidi gupai nga, ani ima rengba ka ngarasa akuarani zavura na gu taata akaragapai nayugopa gaani idapase, si ima rengba ka sa rani ka ani dunga  na bakere gunde ka tumba berani tipa ka fu karagapai ya. Na ka si vura du nga i atumbanga berani dedede te, ani ima rengba kadu na ngbarago nga gu kura aboro rogo dungurati na momu ka fu karagapai.—1 Pet. 3:8.

4. Gini memeapai biata ani nika sakapai tipaha rogo gi kekeapai re?

⁴ Rogo gi kekeapai re, ni bambataha, ani nika sakapai tipa wai rengbe ani ka nyakasa akuarani rogo gu dungurati du ni umbaha nga gu angenga aboro rogoho tipa kaa fu akaragapai ya. Fuo gure, ani nika sakapai tipa wai rengbe ani ka ngarasa akuarani rogo gu dungurati du ni kikihe nga gu du na dungu aboro rogoho natumba beyo tipa ka fu karagapai. Ni yangaraha, ani nika sakapai tipa wai rengbe ani ka ngarasa akuarani nibipa gupai ani apehe ho ani afu karagapai ni.

5. Waigu rengbe ani ka ngarasa akuarani ka si du nga kina bete aboro du pati dunguratise?

⁵ Rogo gu dungurati du ni umbaha watadu badona, badungu aboro ho natumba beyo ka fu karagapai rengbe gu boro nanungusa dunguratise ka si yo i fu karagapai te. Ti kura aregbo, si ima rengba ka ida ko sungudi mbata tipa wiri bete regbo mbata fu boro tumba beni ka fu karagapai. Si ima rengba kaa ngera wa dunguratise na dia gbanga regbo—na si ima rengba ka kpakara tipa boro gbia ngarasaro. Ginipai rengbe mo ka mangaha? Mo du na nyemu kaa ya bero dedede. Ni manga mo ho wo, mo ima rengba ka fõngbadu kura aboro yo tipa i naafu karagapai dedede.

6-7. Waigu rengbe ani ka zogosa bete gu gunde du tirani nibipa fu karagapai?

⁶ Ginipai rengbe mo ka mangaha ka si du nga mo nagunde agunde tipa ka fu karagapai? Dungu aboro ima rengba kadu na gunde. Wa vura duhe wo, tipa kadu ni mburu ngarasaro fu awirinamo, mo ima rengba ka ngera tipa agu agene rengbe mo ka zogosa bete gamo gunde ngbaha nibipa fu karagapai. Waigu rengbe mo ka manga gupai re?

⁷ Mo ima rengba ka bihe ni pa undo ka fugö bete agu aberãpai i akusihe rogo agu Ngbaõbambu Sinziri du kusayo. b Ni kpiapai, mo mbakadi gamo karagapai wenengai. (Snz. 21:5) Ka si du nga mo inidi tiro wenengai na gupai i asakapai tipaha, si ima rengba kadu foro taata mo tumba bero ka fu karagapai. Na berewe a, si naida gamo akaragapai du ni wiri guruhe. (Snz. 15:23; 17:27) Ka si du nga mo nafu guru karagapai, si ima rengba ka sa gupai nga ka mo dunga na bakere gunde ya. Gu karagapai du ni wiri guruhe, isoke na fugo sa watadu ue ima rengba kadu taata fu awirinamo tipa i rugutiyo na ni ti gu karagapai du ni gbangaha na kidu na dungu aberãpai rogoho. Ni fu mo gu karagapai du ni wiri guruhe kina wai mo naafura, si nika yugo gupai nga mo ima mbakada gamo karagapai wenengai na mo ima rugatiro nzunzu na gupai oni awisigoho.

8. Waigu Yekova abi gu ome ani amangaha?

⁸ Ono ginipai rengbe mo ka mangaha ka si du nga mo asadi agi aberãpai re ono mo kidu kindi na gunde ka fu karagapai susi bara sa watadu ue? Mo du na gu kido nga, Yekova nika duadu na tambuahe tipa gu asadatise mo amangaha tipa ka manga gupai rengbe mo ka mangaha. (Rk. 21:1-4) Yekova asananga rani ani mangi gupai arengbanga omerani na ni ya te. (Frp. 4:5) Mo ini gupai rengbe mo ka mangaha, mo moi sasa tipa ka mangaha, na mo ki mangi kparakpee tipa kadu na zereda kpotose yo. Ti tonatonaha, mo ima rengba ka maa gu sasa nga ga fu wiri guru karagapai.

9. Gini kpakarapai rengbe ka kura rogo agu adungurati du ni kikihe?

⁹ Ka si du nga gamo dungurati na badungu abatungusipai rogoho, mo ima rengba ka gbiatiro na gu kpakarapai du kia. Isoke si rengbe kadu nga badungu awirina naya beyo ka fu karagapai si ki sa gupai nga ka i naatumba nga bero dedede ya. Ni kpiapai, Danielle ninaagbia ngbarago ti fu karagapai ti regbo adunguratise. c Ri naabi karagapai ni papara gari irisombori, na ni gu gene rengbe ri ka ngarasa kura aboro ngbaha, na ni gu gene rengbe ri ka nyakasa gari idapase ngbaha kuti agu apai Baibiri ayugoho. Ono ho ri aga ni ku rogo gu dungurati du ni kiki he, i anaatumba nga beri dedede tipa ri naafu karagapai te—ti kura aregbo, dunguratise ani nyasi anyasa dunduko ka i adianga beri tipa ri fu karagapai ya. Ri aya, “Mi aima du na bakere gberãrago. Mi aabihe wa ka i ya mi ima zanga momu. Ho gi pai re amanga ni dedede, mo ima rengba ka bakabangiro singia gu boro re ata ino aino kini mangihe rogo wia yo.”

10. Waigu rengbe ani ka kiiso gaani amomu nga ga fu karagapai?

¹⁰ Ya mo mo abingo tiro wa gu Danielle abi tiri? Ka si du wo, mo ima rengba ka ti ku rogo gu asada nga ga zanga ida ka fu karagapai berewe na ki sungu gbua kaa degaturo kuti dunguratise. Ono ka mo asadingo ka mbu fu karagapai ya. Ginipai rengbe mo ka mangaha? Mo ima rengba ka bihe nipa undo ka mbakada dungu akaragapai tipa adunguratise ni basasa. Na ka si vura du nga i asianga ro mo fu karagapai ti tonatona sakapai te, mo nika du kindi na amomu ka fu karagapai wa dunguratise nikaa ndu kumbatayo. Ho mo ambakada gu Ngbaõbambu Sinziri ni du tipa wisigoho, mo berẽpa wai du agenewaraga nibasasa na ngbanya dagbaha na gu rii kekeapai re. Ka mo mangihe wo, mo nika duadu na karagapai ngba ro tipa ka pehe ti regbo gu wisigopai re dunduko. Kurigure, mo ima rengba ka mbakada karagapai kuti agu agene waraga nga gu nasaka rogo gu dudunguro arengo yo nga gu si naima rengba ka kpakara tipa ka sakarogoyo. (1 Kor. 2:10) Tipagine si aida mo mangihe ti ni wo? Mbiko si ima rengba kadu nga, dungu aboro akaraganga pai ti regbo gu paparaha re te. Ginipai rengbe mo ka mangaha ka si dunga mo ima mangapai kuti agi aberãpai  re ono tifuo dungu adunguratise mo ata gbianga momu kindi ka fu karagapai te? Mo ima rengba ka ndu mbata fu dunguratise fuo gu boro nanungusaha na ki pe pa gu sanahe fuko mo akpinyemu ka karagapai kuti ni.

11. Ginipai AFiripoio 2:4 angarasa rani ani mangihe?

¹¹ Oni gedi AFiripoio 2:4. Ga Mbori toro adu kugii gu mokedi nangia Pauro ko ngarasi aKristano tipa i naaberãpa ga akurayo apai. Waigu rengbe ani ka mangapai kuti gu rugute re ti regbo adunguratise? Ni tingida ani gupai nga, gu kura aboro wakina rani naida aida a ka fu karagapai.

12. Gini wene gene duho rengbe ani ka ngarasa kura aboro ngbaha ti regbo adunguratise? (Oni bi sura a.)

¹² Mo berẽnga kuriihe ngba gi gene re. Ho mo afura ni na abakureamo, ya mo mo rengbe ka fura ni bakerehe si ki sa gupai nga ka i dunga na bakere momu tipa ka fura ya? Wa gu sa te! Mo naida aida a i fubee kuti gu fugodagbase re. Wakina gure a, ti regbo adunguratise, ani naida ka mbu momu fu dungu aboro wa rengbehe tipa i fu karagapai. Ni rengo, gene sa dagba gu kura wene agene yo rengbe ani ka ngarasa akuarani ngbaha nga, ni mbu ani momu fuyo i sakipai tipa gayo idapase. (1 Kor. 10:24) Ani bingo wai rengbe ani ka manga gupai re.

13. Waigu rengbe ani ka mbu momu fu dungu aboro tipa i fu karagapai?

¹³ Gu bambatapai rengbe ani ka mangaha nga, ani ima rengba ka sa gaani akaragapai si du ni guruhe, rogo gi gene re, ani nambu regbo fu kura dungu aboro tipa i fu karagapai a. Abaakumba gbiati gu kura abatungusipai du na bakere inohe ima rengba ka maa gi kpiapai re. Zavura ho mo afu wiri guru karagapai ni, mo ne gupai nga ka fura tipa dungu memeapai. Ka si du nga mo ima fura tipa apai dunduko rogo genewaraga yo, dungu apai anyenga ho fu gu kura aboro tipa i pehe te. Ni kpiapai, rogo gi genewaraga re, i fu aberãpai ue—mo fu agu akaragapai du ni guruhe na ki ne fura tipa dungu memeapai. Ka si du nga mo du i natumba bero ni bambataha tipa mo fu karagapai kuti genewaraga, tipagine ka mo aˈasadanga ti ni ka fura tipa memepai sa ya?

14. Ginipai rengbe ka undo rani tipa ani mangi diaberã tipa bange wai rengbe ani ka ya berani? (Oni bi sura a.)

 ¹⁴ Mo mangisunge na tatamana ho mo amanga diaberã ni tipa bange wai mo nika tumba bero ka fu karagapai. Ka si du nga ani naya berani dedede, ani ima rengba ka sa gu boro nanungusaha ko naatumba berani dedede si ki vura du vurũ nga gu kura aboro kinaho ata gbianga momu kindi ya. Gipai re ima rengba ka sa kura aboro i du na gberãrago tipa ka ya beyo ka fu karagapai.—Batu. 3:7.

15. (a) Waigu si aida ani mangipai ka si du nga i adianga berani tipa ani fu karagapai te? (b) Waigu rengbe agu aboro nanungusa apapara adunguratise ka yugo gupai nga, i naberãpa aboro dunduko? (Oni bi gu sanduki nga, “ Ka si du Nga Mo du Nanungusaha.”)

¹⁵ Ho badungu abatungusipai aya beyo ni ti regbo wisigopai, ani ima rengba ka zanga fu akaragapai ni dunguhe wa gu ani akpinyemuhe. Ti kura aregbo, dunguratise ima rengba ka nyasa dunduko ka banungusi he adunga na rengba ka yamba rani ya. Gipai re ima rengba ka ba gberãrago tirani, ono si naida ani asadi ka bi gupai nga, ho i atumba nga berani ni tipa ani fu karagapai ya, anga gipai re wo mbiko banungusi he namangaha ni wia te.—Batu. 7:9.

16. Waigu rengbe ani ka ngarasa agu aboro nafu karagapai?

¹⁶ Ka si du nga rengba bero tipa ka fu akaragapai dedede wa gu mo akpinyemuhe te, tipagine ka mo aadeganga turo ti ni wenengai kuti agu akaragapai nga ga kura aboro na tifuo dunguratise mo ki fu tambuahe fuyo tipa gayo akaragapai ya? Awirinamo nika bi gu tambuahe re nipa ngarasa ro kina wai ka mo nifu akaragapai si ki ngarasi yo. (Snz. 10:21) Fu tambuahe  fu kura aboro nga gu kura gene berewe rengbe ani ka ngarasa akuarani ngbaha.

17. (a) Waigu rengbe avunguagude ka undo awiriyo i mbakadi agu akaragapai du ni wenehe? (b) Ringbisihe kuti vidio, gini apai biama si aida boro mangihe ho ni ambakada karagapai ni? (Oni bi gu kekeapai du bandu waraga yo a.)

¹⁷ Waigu berewe rengbe ani ka ngarasa akuarani ti regbo gaani adunguratise? Ka si du nga vungugude nga mo, mo undo rukutu awiro i mbakadi agu akaragapai nga gu rẽ na garã yo. (Mt. 21:16) Ti kura aregbo, i naasakapai tipa nyanyakipa apai, ngbatunga gu du wa, agu akpakarapai nga ga rogatise, watadu agu apai nabipa irisiirisi mangaapai, ono si nawiraha wa, genewaraga nika duadu ho sa watadu ue nga gu rengbe gude ka karagapai kuti ni. Na berewe, mo undo awiro i rugutiyo na gupai nga, i adianga beyo ti ai gu regbo i nikaa tumbaha te. Ka mo saki gipai re fuyo, si nika sa gupai nga ka i dunga na gberãrago ho i nika sia gu kura aboro ni zanga i sia yo ya.—1 Tim. 6:18. d

18. Waigu rengbe ani ka ne gbeberã aboro kuti tirani ho ani afu karagapai ni? (Asanza 27:2)

¹⁸ Ani dunduko niima rengba ka mbakada agu akaragapai nga gu nafu taarimo fu Yekova na kini ngarasi akuarani aKristano. (Snz. 25:11) Wa vura duhe nga ani ima rengba ti kura aregbo ka fu wiri guru karagapai nga gu du tipa gupai du tipa rani, si naida ani ne gupai nga kaa fura ni bakerehe tipa tirani. (Oni gedi Asanza 27:2; 2 Kor. 10:18) Kuba gure, si naida ani mangi asadatise tipa aboro moiberãyo kuti Yekova, Fugoko, gbiati gako aboro wa du yo dunduko. (Yugo. 4:11) Ono ka gu genewaraga re du na gu sanahe rogoho nga gu du tipa ani pekepa agu apai du tipa rani, si agberãnga ka mangaha wo te. Kpiapai tipa gipai re gu du rogo gu genewaraga ngbefuo gere rogo gi kekeapai re.

19. (a) Ginipai rengbe ka manga ka ani aaberãpa agu aboro dunduko du pati dunguratise? (ARomo 1:11, 12) (b) Ginipai du mo nitiro na tambuahe tipaha nibipa fu karagapai ti regbo adunguratise?

¹⁹ Wa vura duhe nga ndiko ho tipa wai ka fu karagapai te, ani dunduko niima rengba ka manga nyanyaki asadatise tipa ka ngarasa akuarani. Gipai re ima rengba ka yugo gupai nga ka fu karagapai dedede. Watadu gipai re ima rengba ka yugo gupai nga ka rengba kina be agu amomu du berani ka fu karagapai na kidu na gu ngbarago nga kura aboro ima gbia gu momu a nga ga fu karagapai. Pa gbe ani berãrani kuti gu nyemupai nga ga kura aboro ti regbo agu adunguratise nga ga dungurati ima rengba ka sa gupai nga, ani dunduko gbia ngbarago ti ‘wasa ani wa sa’ watadu ti ngarasa ani tirani dagbarani.—Oni gedi ARomo 1:11, 12.