Gu pangbanga du rogo Pa Fu Rugute ni Ue he 22:​25-27 afuranga gbe tipa ka yugoho singia gu kumba re aima manga bäri te, bambiko rogo gu pangbanga re gu kumba re aima manga bäri. Gi ndiko re nafura gbe tipa ka sigira padu gu dee re ni boro wenesa. Ani bingo agu apai naanidu mbata fu gipai re.

Agu averesi du mbata fu gere fura tipa gu kumba naanimangi kodaba na gu dee i aima pazua ri “bakporo yo.” Ni mangako gipai re, ko aima mangapa bäri, mbiko i anaabi gi pazuapazua dee re ni diakumba. Na tipa gu dee re ti gari? “Ri ata nga wawa wa ri adu kina rogo bakporo” te. Ka ri anita wowo, ka kura aboro aniima gia kpe ri na ki undo ri. Ono ri aata nga wowo te. Rogo gi gene re, ri aima mangapa bäri a, sidu, i dunduko naanimangi pa bäri.—⁠Pa Rug. 22:​23, 24.

Gu ndiko ngbefuo gure afura tipa kurapai kia nga: “Ka kumba bi pazuapazua degude haurago yo, kumba ki darĩ ri adarã, ki ra na ri, kina gu kumba ra na ri ko nikanikpi. Ono ka oni amánga nga degude ni pai ya; a nga pai ho tipa degude re na kpio te, bambiko ho boro nizingi ni kuti kura ni, ki imi ni, kina wo du gi pai re; mbiko ho ko abi ri ni haurago yo, gu pazuapazua degude re akpari, ka boro adu nga ho ka batasa ri ya.”—⁠Pa Rug. 22:​25-​27.

Mbiko gipai re, abasapungbanga anaaida kuti gupai gu dee re anigumba ha. Ngba gini gene? I anaaberã ha nga ri “akpari, ka boro adu nga ho ka batasa ri ya.” Ri aamanga nga bäri te. Ono tie, gu kumba re du naanimangi ingapai ka kodaba na ri ngbaome na ki mangi pa bäri na gu pazuapazua dee re bambiko ko ‘anidarĩ ri adarã ngbaome, ki ra na ri.’

Sidu, wa vura duhe nga gu ndiko re aafura gbe tipa padu dee ni boro wenesa, gu pangbanga re afura tipa gu kumba re nga ko amangi kodaba ngbaome na ki mangi bäri. Ani ima rengba kadu na gu kido nga abasapungbanga anaasanahe “sirisiri” na ki mangi diaberã ringbisihe kuti agu arugute Mbori anaagumbaha dedede.—⁠Pa Rug. 13:14; 17:4; Gate 20:⁠14.