YA MO mo nidu ni gu boro ninaafu tambuahe? Ani dunduko si aida ani berẽkurii gi sanahe re. Ziazia Kekeapai aima gumba gupai tipa gi gaani regbo re nga, dungu aboro nika du ni agu aboro “atambua nga he ya.” (2 Tim. 3:2) Si nawiraha wa mo aima gbia agu aboro naberã gupai nga kura aboro du si aida gupai nga i naamangapai fuyo watadu kaa fu ahe fuyo. Si nawiraha wa i nabi tiyo nga, si aidanga i fu tambuahe tipa guhe i nafuhe fuyo te. Mo ima rengba ka ida kuti gupai nga si naadunga ni pangbarago tipa kadu pati ngbatunga agu aboro re te.

Ga Yekova amoyambu tigayo kia, i nagumba gupai fuyo nga i: ‘Naafu tambuahe.’ Si naida ani naafu “tambuahe rogo apai dũ.” (Koro. 3:​15; 1 Tesa. 5:18) Ni rengo, si ni wenepai furani tipa ani naafu tambuahe. Badungu nduapai duho si aida ani naafu tambuahe he ti ni.

Nyanyakipa ndupai sa si aida ani du ni agu aboro nafu tambuahe ti ni nga, si rengbe ka undo rani ani du na wene bipai tipa tirani. Dedede, ho boro afu tambuahe ni tipa pai ni nadu na ngbarago, na gu boro i nifu tambuahe funi kidu na ngbarago a. Tipagine pa fu ani tambuahe aye ti ni na ngbarago furani gbiati agu aboro ani afuhe fuyo? Sidu, mo bingo gi kpiapai re: Ka si du nga kura aboro regerege tipa ka dia regbo ka mangapai foro, gure nayugo gupai nga i nabihe nga mo ima rẽ tipa i fu undo foro. I naberã paro aberã. Ho mo nika ino gupai re ni, si nika sa ro mo du na ngbarago. Gere nangia gupai naadu tipa Ruta. Boaza agamuhe fu Ruta. Ho Ruta abi gupai ni nga Boaza aaberã pari aberã, si asari ri du na ngbarago tipa tiri.—Ruta 2:10-13.

Si rẽarẽ tie gbe ani naafu tambuahe fu Mbori. Si nawira gupai nirengo nga, mo ima berãkuriipa gu dungu agamahe nga ga toro gbiati ga borose ko nafuhe na gu ko andu kindi kumbatayo kaa fuhe. (Pa Rug. 8:17, 18; Amo. 14:17) Si naida ani di regbo ka berã wenengai kurii agu ahe dunduko Yekova afuhe furani gbiati agu aboro ani akpinyemu yo. Pa berã mo kurii gu gamahe nga ga Bakusiro nika nyakasa gamo tambuahe tipa ko na ki kiisi gamo kido tipa wai ko nakpinyemuro na kini bi ro na nyanyakipa ro.—1 Yo. 4:⁠9.

Si naida ani naaberãkurii agu ahe Yekova nafuhe furani na kini fu tambuahe a tipa gako wenesino. (Tam. 100:​4, 5) I nagumba gupai nga “fu tambuahe fu kura aboro nasa aboro i du na ngbarago.”

Gu kura ndupai berewe si aida ani naafu tambuahe ti ni nga si nanyakasa gu pabakure du dagba aboro. Ani dunduko naida aboro naafu tambuahe furani. Ho mo afu ndikidi tambuahe ni fu boro tipa gu wenepai ni namangihe, si nambedisa ro na gu boro re na oni ki da ni wene abakure. (Rom. 16:​3, 4) Kurigure, si nawira gupai nga, agu aboro du na gu sino tiyo nga ga fu tambuahe nga agu aboro naundo kura aboro. I nabi gu wenesino aboro ayugoho fuyo na si kini fõ yo tipa i yugu wenesino fu kura aboro a. Ni rengo, undo kura aboro naye na ngbarago. Si wakina gupai Yesu agumbaha nga: “Fu he ngba ti dia ha” watadu bakere ngbarago du ti gamahe kisusi ti diaha.—Amo. 20:⁠35.

Robert Emmons namangasunge ni barugupai rogo gu Yunivasiti nga ga California amangi wisigopai tipa fu tambuahe na ko agumba gupai nga: “Tipa ani du ni agu aboro nafu tambuahe, si naida ani rugutirani na gupai nga gupai re nabi aboro ni basasa. Ti kura aregbo ani nagamahe na gu kura aregbo  kura aboro kini gamuhe furani.” Tipa ani nye kindi ni ungarani na kidu na ngbarago, ani naida na kura aboro rogo dungu agene yo. Ni kpiapai, i ima rengba ka ye na riahe furani watadu ka undo rani ti gu regbo du ani na kaza. (1 Kor. 12:21) Gu boro du na gu sino nga ga fu tambuahe nafu tambuahe tipa agu apai kura aboro amangaha funi. Wa duhe tie wo, ya mo mo mangihe ni sinoro tipa kaa yugo tambuahe tipa agu apai kura aboro amangaha foro?

Gu kura ndupai berewe si aida ani sonosi gu sino nga ga fu tambuahe ti ni nga, fu tambuahe naundo rani ani moiberãrani fuo weneapai kuba gbegberẽ apai. Rogo gu kura gene yo, gamo aberã namangasunge wakina kangira. Ho du mo ni ni gu boro nafu tambuahe, si nasa ro mo moiberã ro gbe kurii weneapai na ka mo amaanga berãro gbe kurii gbegberẽ apai ya. Si nasa ro mo naabi weneapai na ki zanga maaberã ro tipa kpakaraapai. Kina wai mo nika du na tambuahe, kinawo a mo nikaa bi weneapai nga gu nika sa ro mo naafu tambuahe berewe gbe. Ka mo moiberãro kuti agu apai rengbe mo ka fu tambuahe tipaha, si nika undo ro mo mangi gupai gu mokedi nangia Pauro agumbaha nga: “Oni ngí rogo Gbia yo dedede.”—Frp. 4:4.

Padu ani ni agu aboro nafu tambuahe nika undo rani ka ani dunga na iraira aberã ya. Si ima kpakara tipa boro du ni gu boro nafu tambuahe ti kina gu bangisa regbo re ni kidu ni gu boro nakpihe, du na gberãrago watadu na zinga. Agu aboro du na gu sino nga ga fu tambuahe aberãnga pa bakere aũzegino gbe te. I na tambuahe tipa agu ahe du beyo na i amaanga berãyo gbe tipa gbia badungu ahe te.​​—⁠Frp. 4:​12.

Wa ngia mo Kristano, mo ima rugatiro na gupai nga Satana nakpinyemu gupai nga mo du na bakere gberãrago be agu akpakarapai mo agbia tiro na ni ti gi yangara areme re. Ko na bakere ngbarago gbe ka si du nga mo na gbegberẽ bipai na kini kpakanahe tipa apai dunduko. Ka si du nga mo nga ngbatunga gu boro re, si ima rengba ka kpakara fu aboro tipa i degetuyo foro ho mo atungusa wene pangbanga ni. Ni rengo, fu tambuahe gbiati ga Mbori zuzu toro nga agu apai nandu kina sa. Ni kpiapai, ani nagbia ngbarago ho ani abi agu apai ni Mbori namangihe furani na ani na idapase tipa gupai ko nakidopaha furani kumbatayo.—Gara. 5:22, 23.

Wangia mo boro sa dagba ga Yekova aboro yo, si nawira gupai nga mo ima ida kuti agu apai i nafura tipaha rogo gi kekeapai re tipa fu tambuahe. Wa vura duhe wo, mo ima ino gupai nga si arengbanga kadu ti aregbo dunduko ni taatapai tipa kadu ni gu boro nafu tambuahe na kidu na ruru bipai te. Ka si vura du wo, ka mo mbunga gupai re si ba gberãrago tiro ya. Mo ima rengba ka sonosa gu sino nga ga fu tambuahe na ki bandaha. Ngba gini gene? Mo di regbo rogo aˈuru ni basasa tipa ka berãkurii kura apai rogo gamo raka yo nga gu rengbe mo kadu na tambuahe tipaha. Kina wai mo nikaa manga gipai re, kinawo si kaa satihe foro ni sinoro tipa kaa yugo tambuahe. Gere nika sa ro mo du na ngbarago kisusi agu aboro namaaberã yo kina kurii gu kpakaraapai nga ga raka. Mo berẽkurii agu apai Mbori amangaha gbiati gu kura aboro tipa ka ngarasaro. Mo ima rengba ka tona kekaha sande. Rogo gu waraga re, mo rengbe ka ke apai ue watadu biata nga gu na saro mo du na tambuahe rogo gu uru re.

Agu aboro wirikipai tipa gipai re bi gupai nga, “ho ani afu tambuahe ni dedede fu kura aboro, si rengbe ka aria gu gene berãrani amangasunge ngbaha tipa si du furani taata ani du na wene bipai tipa gaani raka.” Gu boro du na tambuahe nga boro ngbarago. Sidu, mo berẽkurii gu weneapai dunduko mo nagbiaha, mo gbia ngbarago be gu weneapai namanga foro, na mo naafu tambuahe ti aregbo dunduko! Kuba gupai nga ka zanga fu tambuahe tipa apai, mo ‘fú tambuahe fu Yekova, bambiko ko ni wene ko.’ Ii, “mo fu tambuahe rogo apai dũ.”—1 Peka 16:34; 1 Tesa. 5:​18.