Ya mo ka mo karagapai kuti agi asanahe du mburuhe rii agu aNgbaõbambu Sinziri nangia ga 2019?

Rogo gu ga Mbori Kidohe yo nga: “Gu ũvura i ka mbakada ha kuti ro si adía nga be ro wa sa te” nga gine? (Yes. 54:⁠17)

Ani ima rengba kadu na gu kido nga Mbori nika banda rani abanda be “gu iiriwo pai” gbegberẽ aboro amangaha. (Yes. 25:​4, 5) Avurarani adunga na diabese tipa ka gbarasa rani nyeanye kindi te.​​—⁠w19.01, kpe. 6-7.

Waigu ga Mbori mangaapai na aKanano gbiati agu aboro-nyakarii nangia aYisaraere ayugo gako ruru sarangbanga?

Mbori aye na sarangbanga kurii agu aboro naamanga gbegberẽ mangaapai nga ga wasiwasi kodaba watadu agu aboro naarungosi agu adee gbiati agude adunga gene beyo ya watadu adunga boro tiyo ya. Ko anaafu maku afu fu gako aboro ho i anidu ni ni ruruyo fuko na kini mangipai na akurayo ngba wene gene.—⁠w19.02, kpe. 22-​23.

Ginipai rengbe ani ka mangaha ka gu boro angianga ndikidi idipase ya mangi kparakpee?

Si naida ani ongo kii rogo irisa yo. Ani arengbanga ka ya “amina” watadu ka zio berani na gu kura aboro ti regbo gu kparakpee re te. Ani ima rengba ka diaberã ka manga gaani kparakpee kukiri.​​—⁠w19.03, kpe. 31.

Waigu du gupai nga ga mangapa wasiro na gude ti ni nikere nyanyakipai?

Mangapa wasiro nagude nga ingaapai kuti agu agude i awasi yo, kuti dungurati, kuti airangbii na kuti Mbori. Agu arago du agu andiko nga ga airangbii rogoho nibipa tingidapa mangapa wasiro na gude, abaakumba nairisa agu andiko re airisa.—⁠w19.05, kpe. 9-​10.

Waigu rengbe mo ka manga ariapai berãro yo?

Gu nyanyakipa apai si aida mo mangihe: Mo fura fu Yekova rogo kparakpee yo. Mo berẽkuriipai na gu sasa nga ga wisigo tiro. Mo sia gamo abakure na tatamana.—⁠w19.06, kpe. 11.

Ginipai rengbe ani ka mangaha awere tipa ka mbakada tirani tipa arungosiro?

Si naida ani nyakasi gaani pagume na Yekova. Kidu na gu kido nga ko nakpinyemu rani akpi na ko ambunga rani te. Mo naageda Ziazia Kekeapai na aˈuru dunduko na kini mangi kparakpee dedede. Mo du na gu kido nga agu amaku nga ga ga Mbori Kindo nika da ada ti rengo. Mo zi agu averesi kuriro yo ngba tiro gbe na agu abia natambua Yekova.​​—⁠w19.07, kpe. 2-4.

Ginipai rengbe ani ka mangaha ka undo agumerani tipa i bati?

Si ni nyanyakipa pai tipa ani du na rugatinapai, si naida gaani wene mangaapai mangi dezirepai, na ani du na zerangbaduse na kini mangipai na birĩ.​​—⁠w19.08, kpe. 15-​17.

Waigu ani agbia ongoda a wa Yesu akidopaha rogo Matayo 11:⁠28?

Ani na agu aKristano nga ababiapai du na nyemuse tiyo, ani na bawene abakure berani, na ani namanga bawene sunge kisusi.—⁠w19.09, kpe. 23.

Waigu rengbe Mbori ka fu nyemupai na ome foro tipa mo mangipai? (Frp. 2:​13)

Wa ani nikaa geda Fugo Mbori na kini berẽkuriihe, ko nika fu gu ome furani ani aidaha, na ki fu nyemupai furani tipa ani mangi gupai ko akpinyemuhe na ome tipa mangapai. Gako ziazia toro nika sonosa gu tandu mangapai du tirani.—⁠w19.10, kpe. 21.

Gini apai si aida ani mangihe mbata fu ani mangi nyanyakipa diaberã?

Agu apai bisue rengbe mo ka mangaha: Mo mangi wetekapai sirisiri. Mo kpari tipa tatamana. Mo wisigi ndu gupai mo amanga diaberã ti ni. Mo du na gu asasa mo aida kada ti ni. Mo du na ruru bipai.—⁠w19.11, kpe. 27-​29.

Ya mo gu berãpai nga toro boro akpingo te aye ti gupai Satana agumbaha fu Eva bakuru kusayo?

Si nawira gupai nga si nga gupai ko agumbaha te. Satana agumba gupai fu Eva nga ri akpingo te, angianga si nika du gbua wa ka i ya ri ima kpi ya. I aima dia agu abipai dunduko nga ga ziree pambori kusayo na Ime Akangbii. Si nangera wa gu yugopai nga mbisimo aboro akpingo te akuru mbata fu Mbori gbataka agu aboro naame Babera.​—⁠w19.12, kpe. 15.