1-2. A wa duhe rogo gu kpiapai nga ga Angelito, ginipai si aida ani mangihe wa du ani ni basasa?

YA MO avunguro nga aDezire Yekova? Kangia wo duhe, mo tingidi gupai nga anga bakurea Yekova nga mo mbiko gupai nga avunguro nga abakurea ko te. Singia avungurani nairiso Mbori watadu i airisongo ko te, ani ni basasa si aida ani sonosi gaani pagume ni tirani na Yekova.

² Oni bingo gu kpiapai du tipa gu wirina du rimoko nga Angelito. Gako aborokporo dunduko angia aDezire Yekova. Wa si avura duwo, ho ko adu ni ni paranga, ko aabingo tiko nga ko mbembedi na Mbori te. Ko aya: “Mi aairiso Yekova gbua mbiko mi aaida ka manga gupai gimi aborokporo aamangaha.” Ono tie, Angelito adiberã tipa kaa geda Fugo Mbori na kini berẽkuriihe, na ki tona kaa manga kparakpee fu Yekova dedede. Sangbanaha angia gine? Angelito aya: “Mi aye ka wirika gupai nga, gu yangara gene rengbe mi ka mbeda ngbaha na gu Buba nga Yekova nga ka asada ka inoko nitire wenengai nzunzu.” Gu kpiapai nga ga Angelito nasarani ani berẽpa gu nyanyakipa asanahe nga: Gini kparakparapai du dagba ino bete apai tipa Yekova na inoko wenengai nzunzu? Na waigu rengbe ani ka ino Yekova?

3. Gini kparakparapai duho dagba inopai tipa Yekova na inoko wenengai nzunzu?

³ Ani ima rengba ka berã gupai nga ani ima ino Yekova mbiko gupai nga ani ima ino rimoko watadu agu apai ko nagumbaha  watadu ko namangihe. Agi apai re ayugongo gupai nga ani ima ino Yekova wenengai te. Tipa ka ino Yekova wenengai, si naida ani di regbo ka wirikapai tipa ko na gako bawene asino. Si nika undo rani ani rugutirani na ndu gupai ko agumba apai ti ni na kini mangihe. Agi apai re nika undo rani ani inihe singia Yekova nakpinyemu gupai ani aberãha na gu ani amangaha. Si nika undo rani ani inihe singia ko idi na gaani aberãpai, adiaberã, na mangaapai. Bara sa kindi ani na ini gupai Yekova aida ani mangihe, si naida ani mangihe.

4. Waigu pa wisigo ani akpiapai rogo Ziazia Kekeapai yo nika undo rani?

⁴ Kura aboro ima rengba ka tona sawia rani tipa gupai nga ani naida ka iriso Yekova, na i ima rengba ka tona soga rani berewe gbe ho ani natona nduge ni kupati adunguratise. Ono ka ani kido kuti Yekova, ko ambunga rani te. Ani nika tona me gu pabakure na Yekova nga gu nika nyeanye kindi. Ya mo ani rengbe ka ino Yekova nzunzu wenengai? Ii, ani ima rengba ka inoko! Gu kpiapai gu kpakpa aboro nangia aMoize na Bakindo Davide amoihe nayugo gupai nga ani ima rengba ka inoko. A wa ani kaa wisigo agu apai i amangihe, ani nika karagapai kuti asanahe ue: Waigu i aye ka ino Yekova wenengai? Na ginipai rengbe ani ka wirikaha ti gayo akpiapai?

5. Ginipai Moize asia ka mangaha?

⁵ Moize amangipai kuti gupai ko awirikihe. Ho Moize adu ni na garãko 40, ko asia ka kodatiko na ga Mbori aboro nangia aEbere kuba gupai nga i iniko ni “wiri gu de nga wiri Faro.” (Eb. 11:24) Moize ambu nyanyakipa bangiriba. Ni ngbe ko na aEbere nga aguyo naadu ni akanga Ezipeta yo, ko aima ino gupai nga Faro nika du na bakere zinga na ko. Faro angia gu bazogo naadu na bakere ome kisusi na aEzipeto anaabi ko wakina mbori. Gere nayugo gupai nga Moize adu na nyanyaki idapase! Moize akido kuti Yekova. Gi kido re nangia gu nyanyakipa ndupai Moize adu ti ni na mbembedi pagume na Yekova nga gu naaraki ni gbangaha.​​—⁠Snz. 3:⁠5.

6. Ginipai rengbe ani ka wirikaha ti ga Moize kpiapai?

⁶ Ginipai ani awirikaha? Wakina Moize, ani dunduko du na diaberã ka mangaha: Ya mo ani asia ka iriso Mbori na ki koditirani na gako aboro? Gipai re ima rengba ka ida ani mbupa kura apai ambu tipa ka iriso Mbori, na ani ima rengba ka gbia sogote be agu aboro ainongo Yekova ya. Ono ka ani kido kuti gu Barani du ngbangbaturũ yo, ani ima rengba kadu na gu kido nga ko nika undo rani aundo!

7-8. Ginipai Moize aawirikaha kindi?

⁷ Moize aawirikapai kindi tipa asino Yekova na kini mangi gupai Ko akpinyemuhe. Ni kpiapai, ho Yekova asana Moize ni tipa ko ngbe kumbatayo fu aYisaraere tipa ka kusa yo rogo ringara Ezipeta, ko aadunga na kido kuti tiko te na ko agumba gupai fu Yekova bara dunguhe nga ko arẽnga te. Ga Mbori karagapai ayugu gupai nga ko adu na nunga, naida ka ya ko aima rugatiko na wai Moize aabi tiko na ko ki undo ko. (Gate 4:​10-​16) Ni sangbana gipai re, Moize adu na rengba ka gumba nyanyaki pangbanga nga ga sapangbanga fu Faro. Moize abi wai Yekova amangisunge na Gako ome wa Ko abatasi aYisaraere ono ki gbarasi Faro na gako rimbasa abasovura dunduko zamba baime yo.​​—⁠Gate 14:​26-​31; Tam. 136:⁠15.

⁸ Tifuo Moize kusi aYisaraere Ezipeta yo, i anaakpakanahe akpakana kindi tipa ahe. Wa si avura du wo, Moize aima bi bakio wai Yekova ayugu hipai fu agu aboro Ko akusiyo tii sunge akanga re. (Tam. 78:​40-​43) Moize aima bi wai Yekova ayugu bakere umbasitise ho ko  asana Ko ni ka ko gberesinga aYisaraere ya na Yekova ki mangi kina gupai ko asanako tipaha.​​—⁠Gate 32:​9-​14.

9. Ringbisihe kuti AEbere 11:27, ga Moize pabakure na Yekova adu wai?

⁹ Tifuo kura aYisaraere Ezipeta yo, ga Moize pagume na Yekova aye kada ni mbembedi he gbe si kidu wa ko aabi gu Bako du ngbangbaturũ yo abi. (Oni gedi AEbere 11:27.) Ziazia Kekeapai nayugo pa wai gu gayo pabakure re adu ni mbembedi he ho si aya ni wẽ: “Yekova ki nifura na Mose, kina ku bangiriko, a wa boro naafura na badiani.”​​—⁠Gate 33:⁠11.

10. Tipa ka ino Yekova wenengai, ginipai si aida ani mangihe?

¹⁰ Ginipai ani awirikaha? Tipa ka ino Yekova wenengai, si aidanga ani wirikipai sa tipa kina asinoko te ono si naida ani mangi gupai amanga ko akpinyemuhe. Gupai Yekova akpinyemuhe areme nga “aboro bati dunduko, ki ye sa gu inahe nga ga rengo.” (1 Tim. 2:​3, 4) Gene sa ani amanga gupai Mbori akpinyemuhe ngbaha nga ni yugo ani pai fu aboro tipa Yekova.

11. Wa ani kaa yugopai fu kura aboro tipa Yekova, waigu ani aye ka inoko wenengai?

¹¹ Dedede, ho ani ayugopai ni fu kura aboro tipa Yekova ani naye ka inoko wenengai. Ni kpiapai, ani nabi ga Yekova nunga tipa aboro ho ko aundo rani ni ani gbia agu aboro naida kadu ni abakureako. (Yo. 6:​44; Amo. 13:48) Ani nabi gu ome du ti Fugo Mbori ho ani abi agu aboro ni ani awisigo Ziazia Kekeapai na yo i nambu gayo gbegberẽ mangaapai na ki tona ka manga aˈariapai rogo asinoyo yo. (Koro. 3:​9, 10) Na ani nabi ga Yekova hipai wa ko afu momu fu dungu aboro rogo gaani dagbarago tipa i wirikipai tipa ko na ki gbia bata.​​—⁠Rom. 10:​13-​15.

12. A wa duhe rogo Gate 33:13, ginipai Moize asanahe tipaha na tipagine?

¹² Moize abi gako pagume na Yekova na nyanyakipaha. Yekova amangisunge na Moize tipa ko mangi dungu iiriwoapai, na Moize aima ino Yekova wenengai. Ono tie, ko asana Yekova kindi tipa ko undoko tipa ko ini ko wenengai. (Oni gedi Gate 33:13.) Garã Moize aima susa 80 ho ko asanahe ni, ono ko aima ino gupai nga dungu apai kinaho kindi ko arengbe ka wirikaha tipa gu Bako du ngbangbaturũ yo nga boro nyemuse.

13. Gini gene sa rengbe ani ka yugo gupai ngbaha nga ani nabi gaani pagume na Mbori na nyanyakipaha?

¹³ Ginipai ani awirikaha? Ka si vura du nga ani ima iriso Yekova tipa gbanga regbo, si aidanga ani bipa gaani pagume na ko na paha kusende te. Gene sa rengbe ani ka yugo gupai ngbaha nga ani nabipa gaani pagume na Mbori na nyanyakipaha nga ni fura ani fuko rogo kparakpee yo.

14. Tipagine du kparakpee ti ni na nyanyakipaha?

¹⁴ Ka mo aida kadu mbembedi na boro, si naida mo naafura na ni dedede. Sidu, mo mbedi na Mbori ni manga mo kparakpee dedede, ka mo naagundenga ti fura fuko tipa agu apai du kpotoroyo ya. (Ef. 6:​18) Krista, naraka Turkey yo, aya: “Gimi nyemuse tipa Yekova na gimi kido kutiko ninaasona ti agu aregbo ni basasa mi agumba agu apai fuko rogo kparakpee yo du kpotore yo na mi ki bi wai ko aundo re. Pa bi mi wai Yekova akaragapai kuti gimi akparakpee ima undo re mi naabi Yekova ni Buba na ni Bakureami.”

15. Waigu Yekova afura tipa Bakindo Davide?

¹⁵ I avungu Bakindo Davide ku rogo gu ngbatunga rikaaboro naadu ni kparakpara yo fu Yekova Mbori. Padu ga Davide aborokporo ni airisi Yekova aangianga gu ndupai ko aairiso ko ti ni te. Ko ambakadi kina gako pagume na Yekova na Yekova aima kpinyemu ko ni bakerehe. Yekova nitiko afura tipa Davide  nga ko nga gu kumba “du kpotoko yo wa gu [Ko] akpi nyemu he.” (Amo. 13:22) Wai du Davide aye kadu mbembedi na Yekova?

16. Ginipai Davide awirikihe tipa Yekova ni biko kusikusiahe?

¹⁶ Davide awirikipai tipa Yekova ti kusikusiahe. Ho Davide adu ni tooni, ko adi bakere regbo nvuo yo kaa ngerafuo ga bako akandoro. Isoke ti gu regbo re du ko atona berãkuriipa agu ahe Yekova ambakadihe. Ni kpiapai, ho Davide angere ni kuari yo yuru, ko aabingo kina akutu akerekuru sa te, ono ko aima bi kurapai nasusi agu akerekuru re. Si nangera wa ko aima bi agu asino nga ga gu Boro namangi ra. Gupai re asa Davide ko ke gupai nga: “Angbangbaturũ ninataka pande gu taarimo nga ga Mbori; ari yo ninayugo pa sabeko. Uru ninagumba pai na uru, yuru ninayugo inahe na yuru.” (Tam. 19:​1, 2) Ho Davide aberẽ ni kuriipa wai Yekova ambakadi aboro, ko aima bi wai du Yekova ni boro tatamana. (Tam. 139:14) Wa Davide aˈasada ka rugatiko na agu asunge nga ga Yekova, si asako ko du na umbasitise.​​—⁠Tam. 139:⁠6.

17. Ginipai rengbe ani ka wirikaha ka ani berẽkurii kusikusiahe?

¹⁷ Ginipai ani awirikaha? Mo du na nyemu kusikusiahe. Mo di regbo ka bi gu bawene zegino Yekova akusihe; kini gbia ngbarago ti ni! Rogo gamo raka yo na aˈuru dunduko, mo berẽkurii gupai gu kusikusiahe du patiro, rukuruku ahe, anya, na aboro ayugoho foro tipa Yekova. Rogo aˈuru ni basasa, mo nikaa wirikapai tipa gu Bamo nga boro nyemuse. (Rom. 1:​20) Na mo nika bi gupai nga, gamo nyemuse tipa ko nikaa sona na aˈuru ni basasa.

18. A wa duhe rogo Atambuahe 18, ginipai Davide arugutiko na paha?

¹⁸ Davide arugutiko na gupai nga Yekova du naaundo ko. Ni kpiapai, ti gu regbo Davide aabanda ga bako akandoro be bahu na be urusi, ko aima rugatiko na gupai nga Yekova du naafu ome fuko tipa ko imi gu kere anyanvuo re. Ho ko adi ni be gu kere ira ome ni nangia Goriata, Davide aima bihe ziazia nga Yekova du naangbe fuko kumbatayo. (1 Sam. 17:37) Na ho Davide abati ni be gu irakpihe nangia Bakindo Saura, ko aima rugatiko na gupai nga Yekova du nabatasi ko. (Gu kekeapai du barii Atambuahe 18) Ka si adu nga Davide angia boro rukö, ka ko aima berã gupai nga ko amangi agu apai re dunduko mbiko kina gako ome nitiko. Ono Davide adu ni boro umbasitise, ko aima bi wai Yekova anaaundo ko rogo gako raka yo.​​—⁠Tam. 138:⁠6.

19. Ginipai rengbe ani ka wirikaha ti ga Davide kpiapai?

¹⁹ Ginipai ani awirikaha? Si naida ani mangipai kisusi gu gbua nga ka sanahe tipa ga Yekova undo. Si naida ani asadi ka rugatirani na gini regbo na wai ko afu undo furani. Ka si du nga ani nga aboro umbasitise, ani nika rugatirani aruga na gupai nga ani arengba nga ka manga apai dunduko te, na Yekova naundo rani tipa ani mangi gupai ani arengbanga ka mangaha ya. Na ai gu regbo ani abi wai Yekova aundo rani, gaani pagume na ko nadu ni nyanyakihe. Wirina du rimoko nga Isaac rogo gu ringara nga Fiji naima iriso Yekova awere tipa dungu agarã ima bi gipai re nirengo. Ko aya: “Ho mi angera ni ku rogo gimi raka yo, mi nabi wai abi Yekova adigi niundo re naatona ti kina gu regbo mi atona wirika Ziazia Kekeapai ti ni da ku areme. Ni sangba gi pai re, Yekova nga ndikidi boro fere.”

20. Ginipai ani awirikaha ti ga Davide pagume na Mbori?

²⁰ Davide awiriki asino Yekova. Yekova akusi rani na gu tandu tirani nga ga wirika asinoko. (Bam. P. 1:​26) Wa ani nikaa wirikapai ni bakerehe tipa asino Yekova, ani nika du na rengba tipa ka wirika ko. Davide aye ka ino gu Bako du ngbangbaturũ yo wenengai, sidu, ko  aima rengba ka wirika Ko ho ko anaamangapai ni na aboro. Oni bingo kpiapai sa. Davide aingipai kuti Yekova ho ko amangi bäri ni na Bataseba na ki sa gupai nga i imi kumbari. (2 Sam. 11:​1-4, 15) Ono Yekova adiberã ka yugo inapai fu Davide, nga gu kumba naima yugo inapai fu kura aboro. Mbiko gupai nga Davide adu na wene pagume na Yekova, si asa gupai nga aYisaraere kpinyemu ko ni bakerehe, na Yekova amangisunge na ko ni kpiapai fu gu kura abakindo nangia ga Yisaraere yo.—⁠1 Aba. 15:11; 2 Aba. 14:1-3.

21. Nibi gupai du rogo AEfeso 4:24 na 5:1, asangbana ‘wirika ani Mbori’ nga gine?

²¹ Ginipai ani awirikaha? Si naida ani “wíriki Mbori.” Ho ani awirika Mbori ni, ani nagbia undo na ani nawirika dungu apai tipa ko. Ho ani awirika asino Mbori ni, ani nayugo gupai a nga ani nga awiriko.​​—⁠Oni gedi AEfeso 4:24; 5:⁠1.

22-23. Ginipai nika manga ka ani amangapai kuti agu apai ani awirikaha tipa Yekova?

²² A wa ani nabihe, Yekova nayugo tiko furani rogo kusikusiahe yo na rogo Fugoko yo nga Ziazia Kekeapai. Ziazia Kekeapai ima hi be badungu akpiapai nga ga ga Mbori amoyambu ani na rengbe ka wirika yo, wa aMoize na Davide. Yekova ima manga papara gako. Si naida ani mangi papara gaani ni wirika ani pai ni bakerehe tipa ko.

²³ Ani ambunga wirikapai tipa Yekova te. (Batu. 3:11) Anga gupai nyakipaha nga bakio agu apai ani nainihe tipa ko te, ono gupai ani amangaha na gupai ani nainihe. Ka ani aamanga gupai ani awirikaha na kini asadi ka wirika gu Barani nga boro nyemuse, ko nikaa ndu kindi kumbatayo kaa mbeda na ani. (Yak. 4:⁠8) Ko nakido rani rogo Fugoko yo nga ko ambunga agu aboro nagbata ko te.