Si nawira gupai nga si nga gupai ko aagumbaha te. Bakitingbanga aagumbanga gupai fu Eva nga ka ri ri gu zuzungua Mbori aya ka i ringa ha ya, si nika du gbua wa ka i ya ri ima kpi ono guhe du rogo ri yo (nga gu kura aboro aya gu mbisimo akpinga ya) nikaa raka araka rogo kura ba te. Ho Satana aafura ni fu Eva rogo wo yo, ko aagumba gupai furi nga ka ri ri gu zuzungua re, ri ‘akpínga’ wagu sa te. Gupai ko aaida ka gumbaha nga ri nikaa raka araka kindi, kini gbia ngbarago ti wene raka auru kpotosende, kidu na ranirii zanga kaa kido kina kuti Mbori.​​—⁠Bam. P. 2:​17; 3:​3-5.

Ka si du nga gu ziree yugopai nga mbisimo akpinga te nga gu i ayugoho areme aenganga ati Edene yo te, wari du tie si aenge ni? Ani ainongo wari si aenge ni nzunzu te. Ani ima ino gupai nga i aima dia ziree pambori auru kpotosende dunduko na gu Ime Akangbii naadu ti rago Noa. Wa si adunga gu yangara aboro nabati be Ime Akangbii angia kina Noa na gako aborokporo na i adu dunduko nga ndikidi airisimbori, boro aadunga ho tie naayugo agu ayugopai nga ga ziree pambori te.

Sidu, si nangera wa gu yugopai du awere nga mbisimo aboro akpingo te atona tifuo Ime Akangbii. Ho Mbori aunzuguro fugo aboro ni Babera yo na aboro ki gbataka “ku auru kpotosende dunduko,” zanga kapa, i aima gbataka na gu bipai nga aboro na gu mbisimo tiyo akpinga ya. (Bam. P. 11:​8, 9) Ka si vura du nga kina gini regbo gu iraira bipai re akuru ti ni, ani ima rengba kadu na gu kido nga “irazire nga” Satana nga Bakitingbanga adu kina kugii gu ziree re, na ko aima du na ngbarago ka bihe si ni gbandaka.—⁠Yo. 8:​44.