1. Ginipai ani dunduko akpinyemu si du tipa agumerani?

WIRINA du rimori nga Pauline aya, “Tona ti gu regbo mi awiriki rengo, mi anaaida gupai nga ani du na gimi aborokporo dunduko Paradizo yo. * Gbe, mi aaida kumbami nga, Wayne, gbiati tooni wirani tona iriso Yekova wakina re a.” Ya mo agumero ho ata inongo Yekova na ki kpinyemuko ya? Si nawira gupai nga mo naberã payo kina wai Pauline aaberãpa gari aborokporo.

2. Gini asanahe ani nika sakapai tipaha rogo gi kekeapai re?

² Ka ani mangingo agumerani ngbaome i idi na wene pangbanga te, ono ani ima rengba ka ngarasa yo i berẽpa gu pangbanga nga ga Ziazia Kekeapai na ki dihe kugume. (2 Tim. 3:14, 15) Tipagine si aida ani mangi dezirepai ti ni fu agumerani? Tipagine si aida ani du ti ni na rugatinapai na yo? Ginipai rengbe ani ka mangaha tipa ka undo agumerani i kpinyemu Yekova wa gu ani nakpinyemuko? Waigu rengbe agu aboro dunduko du rogo gaani dungurati ka undo rani?

3. Ringbisihe kuti 2 Petero 3:9, tipagine si aida ani mangi dezirepai ti ni fu agumerani?

³ Barambeda, Yekova nika digiso gi sino raka re. Kina agu aboro sa “i aima ringbisa yo sa nyenye unga” nika bata. (Amo. 13:48) Ho ani adia bakere regbo ni na ki fu omerani gbe tipa tungusapai fu agu aboro du rogo gaani dagbarago ani ainongo yo ya, si naida aida a ani tungusipai fu agumerani tipa gupai nga i tona iriso Yekova wakina rani a. Barani nga ga nyemuse ko nga, Yekova,  “akpi nga nyemu aboro kpi wa sa te, ono ko nakpi nyemu aboro da ti zungadi tiyo dunduko.”​—Oni gedi 2 Petero 3:9.

4. Gini ingahe rengbe ani ka mangaha ho ani amanga dezirepai ni fu agumerani?

⁴ Si naida ani moi gupai ku berãrani yo nga wene gene tungusa pangbanga bata kina ti ni gbiati irairaha a. Wa vura duhe nga ani ima rengba ka mangapai na birĩ ho ani atungusapai ni fu gu boro ani ainongo ni ya, ani ima rengba ka zanga mangapai na birĩ ho ani atungusapai ni fu agumerani.

5. Ginipai si aida ani moihe ku berãrani yo mbata fu ani asadi ka yugo rengo fu agumerani?

⁵ Ho ani aberãpa gu bambata regbo ni ani aˈasadi ka manga dezirepai fu agumerani, badungu rani nabira tirani abira tipa gu gene ani amangihe ngbaha na kini bihe nga ka ani aini wo ani ki mangihe ngba kura gene kia. Gu mokedi nangia Pauro afu gu rugute fu aKristano nga: ‘Oni fúra na undahe dedede, si ki hii na tikpo, si du oni ka ina ti ni ya wãi oni ka karaga ha fu akuaroni.’ (Koro. 4:5, 6) Si ni wenepai ani tingidipa gi rugute re ho ani afura ni fu agumerani. Ka si adunga wo ya, ani ima rengba ka ba gberãrago tiyo kuba gupai nga ka undo yo i gi gupai ani apehe.

6-7. Oni funga kpiapai nga gu nayugo gupai si aida boro yugu rugatinapai ti ni fu gu gani badiarogatise angianga ndikidi idipase ya.

⁶ Oni du na rugatinapai. Pauline, i nifura tipa ri kusayo, aya: “Mbata mi anaaida kaa fura na kumbami tipa kina agu apai sa nga ga toro. Ani anaafuranga tipa ‘kura apai’ nga ga raka te.” Oni tie, kumbaku Pauline nga, Wayne, aadunga na bakere inohe tipa Ziazia Kekeapai te, na ko aaruganga tiko na gupai Pauline anaafura tipaha te. Ko anaabihe tigako nga gupai ri anaaberã paha sa nga kina gari pambori. Ko aabaka kina bangiriko nga ri aarimiso tiri ku rogo kere sangisangi pambori na i aananga ri ananga.

 ⁷ Pauline aidi gupai nga tipa bete regbo, ri anaadia bakere regbo rogo anyemu na ti digido aposo na kina akurari aidipase​—ba dunguratise yo, ba tungusapai yo, na pati asungo nga ga wasa. Pauline aya, “Ti kura aregbo, Wayne anaayego ku kporo zanga bi boro, na ko kini sungu ni kina nisako.” Si nirengo nga, Wayne anaazingo azingo tipa diako gbiati wiriko. Ko anaainongo agu aboro ri anidu na yo te, na si aawira gupai nga vovo abakurea ri payo anyaki kisusi ko. Sidu, Wayne aserekpohe nga ko nika mbu Pauline kusayo. Ya mo mo rengbe ka berãpa agu agene ka Pauline ayugu rugatinapai ngbaha?

8. Ringbisihe kuti 1 Petero 3:1, 2, ginipai si awira gupai nga si agumerani agbeberã yo kutini gbe?

⁸ Oni moi wene kpiapai. Dedede, agumerani nagbeberã yo kuti agu apai ani amangaha, kisusi agu ani agumbaha. (Oni gedi 1 Petero 3:1, 2.) Pauline aima ye ki ini gu rengo re. Ri aya, “Mi aini gupai nga Wayne aima kpinyemu rani na ko aaidanga nzunzu ka mbu re te. Ono gako serekpohe asare mi bi gupai nga si aaida mi tona manga apai ngba gu gene Yekova aidaha. Kuba gupai nga kaa fura kina ba kumu fugo, si aaida mi moi wene kpiapai rogo gimi sino mangaapai yo.” Pauline ambu gupai ri anaamangaha nga kaa sosoda Wayne ko fura tipa Ziazia Kekeapai, na ri ki tona kaa fura na ko tipa gu kura apai nga ga raka. Wayne abi gupai nga ri aye kada ni boro zereda kisusi gu naadu mbata, na ko ki bi gupai a nga wiriyo aye ki da ni wene sino gude kisusi gu naadu mbata. (Snz. 31:18, 27, 28) Ho Wayne abi gu wene sangbanapai ni gu pangbanga nga ga Ziazia Kekeapai adu na ni kurii gako aborokporo, ko atona kaa berãpa gu pangbanga nga ga Ziazia Kekeapai na ki tona diaha kugume.​—1 Kor. 7:12-14, 16.

9. Tipagine si aida ani naamanga asadatise ti ni kindi ka undo agumerani?

 ⁹ Oni naamanga asadatise kindi ka undo agumeroni. Yekova namaa kpiapai furani. Ko nafu momu fu aboro “berewe na berewe” i di wene pangbanga kugume na ki gbia nyenye unga. (Yere. 44:4, NW) Na gu mokedi nangia Pauro ape gupai fu Timoteo nga ko kpatagara kuti undo aboro. Tipagine? Bambiko mangaha wo nika sa gupai nga ko rengbe ka batasa tiko gbiati agu aboro nagia gupai ko agumbaha. (1 Tim. 4:16) Ani ima kpinyemu agumerani, sidu, ani naida gupai nga i ini gu rengo du rogo Fugo Mbori yo. Fuo bete regbo kusa, ga Pauline afugo gbiati mangaapai aye kadu na wene sangbanapai kurii gari riikporo. Ri awere na ngbarago bambiko ri nairiso Yekova sa na kumbari. I dunduko ue namanga sunge abazakigene, na Wayne nga bakumba rogo dungurati.

10. Tipagine si aida ani du ti ni na zerangbaduse?

¹⁰ Oni du na zerangbaduse. Ho ani atona mangapai ni ringbisihe kuti ga Mbori arugute, si ima rengba kadu ni mbumbuhe fu agumerani i di gaani vovo aida gbiati gene raka kugume. Dedede, gu bambatapai i naabihe nga ani akodanga tirani berewe na yo rogo agu apumbo yo nga ga pambori te, na ani arimisongo tirani ku rogo agu apai yo nga ga birĩ zogarago te. Ti tonatonaha, kura agumerani ima rengba kadu na zinga na ani. (Mt. 10:35, 36) Ono si aidanga ani mbu yo te. Ka ani mbu manga asadatise tipa ka undo yo i rugutiyo na gaani aida, gure wa ka i ya ani ima sarangbanga yo nga i arẽnga tipa ka gbia nyenye unga te. Yekova afunga gu sunge furani nga ga sarangbanga aboro te​—ko fu gu sunge re fu Yesu. (Yo. 5:22) Ka ani du na zerangbaduse, agumerani ima rengba kadu na nyemu ka degatuyo kuti gaani pangbanga kumbatayo.​—Oni bi gu sanduki nga “Oni Mangisunge na Gaani Bangiriba nga ga Internet ka Yugopai.”

11-13. Ginipai oni awirikaha ti wai Alice amangipai na avunguri?

¹¹ Oni ru nyanyaki, ono kini mangipai na birĩ. (Snz. 15:2) Oni bingo gu kpiapai nga ga Alice. Ri awirikipai tipa Yekova ho ri aaraka ni tuturũ ti avunguri, nga aguyo naaidanga kuti Mbori ya, na kidu ni agu aboro naarimiso tiyo ku rogo agu apai yo nga ga birĩ zogarago. Ri aye ka bi gupai nga si naida ri pepa gu wene apai fuyo ni ipiˈipihe ri aawirikaha. Alice aya, “Ka mo sungu asungo kini ru ka pepa gamo vovo aida gbiati mangaapai fu gamo aborokporo fuo gbanga regbo kusa, si ima rengba ka zigbá yo ni bakerehe.” Ri anaakeka awaraga fu avunguri, kini sanayo tipa gayo berãpai nibipa agu ayugopai nga ga Ziazia Kekeapai ri adu na maabangirise nga si ima rengba ka ngbatiyo, wa gu nafura tipa nyemuse. (1 Kor. 13:1-13) Ri afu tambuahe fu avunguri tipa sonosa yo ri na tipa ngera yo fuo ri, na ri ki kedi agamahe fuyo. Ho ri anaandu ni ka bi avunguri, ri anaaundo nari na sunge kporo. Ti tonatonaha, rago aangbanga ti avungu Alice ho ri apepa gari vovo aida ni fuyo te.

¹² Ho Alice adu ni fuo avunguri yo, ri anaageda gari Ziazia Kekeapai kindi na aˈuru dũ. Alice aya, “Gipai re aundo nina ri rugutiri na wai du Ziazia Kekeapai na nyanyakipa paha fere.” Ba Alice tigako adiberã ka wirikapai tipa Ziazia Kekeapai tipa gupai nga ka rugatiko na ndu gupai wiriko amangi ariapai ti ni, na ko aaida ka bi apai nga gu rengbe ko ka bisira paha rogo Ziazia Kekeapai yo. Alice aya, “Mi afu Ziazia Kekeapai fuko, na ki ke wiripai vuruhe yo fuko.” Sangbana gipai re angia gine? Kuba gupai nga ba Alice bi apai nga gu ka ko bisira paha, gupai ko agedihe rogo Fugo Mbori yo aima zio ngbaduko yo bakere gbe.

¹³ Si naida ani ru nyanyaki, ka si vura du vurũ nga si nika ida ani hi aˈasada ahi. (1 Kor. 4:12b) Ni kpiapai, Alice aima hi sogote be nari. Ri aya, “Ho mi azi bapatiza ni, Nina aya  mi nga ‘gbegberẽ sino degude.’” Ginipai Alice amangihe? Ri aya, “Kuba gupai nga ka mbu fugo tipa gimi vovo pambori, mi ape gupai rogo irisa yo nga mi aima diaberã ka da ni Dezire Yekova na ka mi arianga gu gimi diaberã re te. Mi aasadi ka fu gu kido fu nina nga mi ima kpinyemu ri nzunzu. Ani dunduko ue akpari ni aume, na mi ki mangi wene riahe furi. Tona ti gu regbo re ka ndu kumbatayo, nina atona ka ino gupai nga Ziazia Kekeapai aasa re ni wene boro.”

14. Tipagine si aidanga ani mbu agumerani ti ni i aria gu diaberã ani namangihe ka iriso Yekova ya?

¹⁴ Si ima rengba ka dia regbo tipa agumerani rugutiyo wenengai na wai du pa iriso Yekova furani na nyanyakipaha. Ni kpiapai, ho Alice amangi diaberã ni ka manga sunge abazakigene kuba gupai nga ka manga gu sunge avunguri asiaha furi, nari akpari berewe ni aume. Ono Alice aru kindi nyanyaki. Alice aya, “Ka mo mbu gamo aborokporo i aria gamo diaberã tipa kurapai sa, si nawira gupai nga i nika asada aˈasada a ka aria gamo adiaberã tipa kura apai. Ono ka mo amangapai na gamo aborokporo ngba wene gene, ono ki ru kindi nyanyaki, agu akurayo ima rengba ka gia gupai mo apehe.” Gure nga gupai namangi tipa Alice. Avunguri dunduko ue awere namanga sunge ni abazakigene, na bari nga bakumba rogo dungurati.

15. Ringbisihe kuti Matayo 5:14-16 gbiati 1 Petero 2:12, waigu rengbe gu “ruruapai” nga ga kura aboro ka undo agumerani?

¹⁵ Yekova nagbe aboro koyo du ko ni vurube gu “ruruapai” nga ga gu dungurati nga ga aKristano. (Oni gedi Matayo 5:14-16; 1 Petero 2:12.) Ka si du nga gamo badiarogatise nga Dezire  Yekova te, ya mo ni bingo agu aboro du rogo gamo dungurati? Pauline, i nifura tipa ri kusayo, anaayamba awirina ku kpuri yo tipa gupai nga kumbari nga Wayne rengbe ka ino yo. Wayne atingidipa wai kura wirina sa aundo ko ko rugutiko na wai nzunzu du aDezire Yekova, ko aya: “Ko adi ongoda basunge yo rogo kura uru sa tipa ani bi kuro na ko. Gipai re asa re mi bihe nga, ‘Ko naberãpa kura apai aberã a, angianga kina pambori sa ya!’”

16. Tipagine si aida ani naayamba agumerani ti ni tipa adunguratise?

¹⁶ Gu bawene gene kisusi rengbe ani ka undo agumerani ngbaha nga ka yamba yo i ye kupati gu gaani adunguratise nga ga dungurati. (1 Kor. 14:24, 25) Gu bambata dunguratise Wayne andu tipaha angia​—Tingida Pakpio Yesu​—bambiko si adu tingbafuo kura aboro basunge yo na si adu tipa guru regbo. Ko aya, “Mi aaruganga tire nzunzu wenengai na gupai gu gumbapai i amangihe aafura tipaha te, ono agu aboro naadu yo payo anye ku rireyo. I aye fuo re ki di re kugume na ki fu sene fere wenengai. Mi aima bihe nga wene aboro du naadu.” Kura wirina sa na diako anaamanga wene apai fu Pauline, kini undo ri na wiiri ba adunguratise yo na gene tungusapai yo. Sidu, ho Wayne adiberã ni ni yangaraha nga si naida ko rugutiko wenengai na ga Pauline vovo aida, ko asana gu wirina re tipa ko wisigi Ziazia Kekeapai na ko.

17. Ginipai si aidanga ani bira tirani tipaha ya, ono tipagine si aidanga ani mbu manga asadatise ka undo agumerani ti ni ya?

¹⁷ Ani namaa bangirani nga agumerani dunduko da ni airisi Yekova wakina rani. Ono tie, wa vura duhe nga ani namanga bakere asadatise tipa ka undo agumerani i da ni ga Mbori amoyambu, i ima rengba ka zanga ye ku rogo rengo. Ka pai mangi wo, si aidanga ani bira tirani tipa gu gayo diaberã re te. Gu kurapai berewe nga, ka ani mangingo boro ngbaome tipa ni di gaani aida kugume te. Ono wa vura duhe wo, gu maapai kurii rengbe oni kadu na ni kurii agumeroni wa i abi wai oni airiso Yekova na ngbarago, ka oni bingoho na paha taata ya. Oni mangi kparakpee tipaha yo. Oni naafura fuyo na tatamana. Ka oni mbunga manga asadatise ka undo yo ya! (Amo. 20:20) Oni du na gu kido nga Yekova nika fu maku afu kurii gu ome oni amangaha. Na ka agumeroni diberã ka gia gupai oni agumbaha, i nika bata abata!