1. Ada naundo na sigira gu dungurati naadu Firipoi yo?

HO AGU amokedi nangia Pauro, Sira, Ruka, na Timoteo ada ni Firipoi yo nga gu ringara naadu kutiibe aRomo, i agbia dungu aboro nga aguyo naadu na nyemu gu pangbanga nga ga Kindo. Agi Awirina du biama re aundo na pa sigira dungurati, na vovo awirina atona manga dunguratise, si ima rengba kadu nga i aadungura tiyo kua gu wirina yo nangia Rudia, nga gu ri naadu na gu toro tiri nga ga dia aboro kugume.​—Amo. 16:40.

2. Gini kpakarapai gu vovo dungurati re agbiatihe na ni?

² Fuoho aaimanga te, gi vovo dungurati re ki gbiatihe na kpakarapai. Satana asa agu aboro naasoga rengo i sovura kuti gu sunge tungusapai nangia ga Pauro na abadiangbako. I azi aPauro na Sira, ki ta yo na ngbondo, na ki ba yo ku bambukiso yo. Fuo i kusiyo bambukiso yo, i andu ka bi gu vovo abawiriki re na ki ngarasi yo. Fuoho, aPauro na Sira gbiati Timoteo aguari rogo gu gbata re, ono si nawira gupai nga Ruka anye tigako kina yo. Ginipai gi vovo dungurati re amangihe? Na gu undo nga ga ga Yekova toro, gi vovo aidipase re aandu andu kindi kumbatayo na ga Yekova sunge. (Frp. 2:12) Pauro adu na wene ndupai beko kadu na ngbarago tipa agu awirina re!

3. Gini apai Pauro amangi kparakpee tipaha, a wa duhe rogo AFiripoio 1:9-11?

³ Tifuo agarã bawe kusa, Pauro ake waraga fu gu dungurati naadu Firipoi yo. Wa mo nikaa geda gu waraga re, mo ima rengba ka bi gu nyemuse naadu ti Pauro tipa awirinako. Pauro akepai nga: “Mi nakpi nyemu roni gbe rogo gu weneringise nga  ga Kristo Yesu dunduko.” (Frp. 1:8) Ko akepai fuyo nga ko namanga kparakpee amanga tipa yo. Ko asana Yekova ko undo yo tipa i sonosi gayo nyemuse, ki moi berãyo sa agu apai du na nyanyakipaha, ki du ziazia, ki ne sa kura aboro i koto, na kini ndu kumbatayo kaa hi ahi be gu zuzuhe nga ga rurupai. Zanga kapa, ani ima rengba ka wirikapai areme ti agu afugo naaye kina boro kpoto Pauro yo re. Sidu tie, ani gedinga agu afugo Pauro ko akehe fu aFiripoio. (Oni gedi AFiripoio 1:9-11.) Fuoho, ani ka sakapai tipa agu apai ko afura tipaha na wai rengbe ani ka mangapai kutini ni basasa.

4. (a) Ringbisihe kuti 1 Yoane 4:9, 10, wai gu Yekova ayugu gako nyemuse tipa rani? (b) Si naida gaani bakio nyemuse tipa Mbori du wai?

⁴ Yekova ayugu gako bakere nyemuse furani ni kedako wiriko ku auru kpotosende no ko kpi tipa gaani aingapai. (Oni gedi 1 Yoane 4:9, 10.) Ga Mbori nyemuse nafõngbaduraniyo ani kpinyemuko. (Rom. 5:8) Si naida gaani bakio nyemuse tipa Mbori du wai? Yesu akaragapai kuti gu sanahe re ho ko ape gupai ni fu Farusi nga: “Mo kpí nyemu Gbia nga ga Mbori kpotoro yo dunduko, na mbisimoro dũ, na ga berã dũ.” (Mt. 22:36, 37) Si naida ani kpinyemu Mbori na kpotoraniyo dunduko. Na si naida gaani nyemuse tipa ko naasona na aˈuru dunduko. Pauro aya fu agu awirina naadu Firipoi yo wẽ , si naida gayo nyemuse “moi pai ki susi asusa gbe.” Ginipai si aida ani mangihe tipa ka sonosa gaani nyemuse tipa Mbori?

5. Waigu rengbe gaani nyemuse ka sona na ki da ni nyanyakihe?

⁵ Si naida ani ini Mbori aino mbata ani kini ru ka kpinyemuko. Ziazia Kekeapai naya: “Gu ni adu nga na nyemuse ya, ni aina nga Mbori te; bambiko Mbori nga nyemuse.” (1 Yo. 4:8) Gu mokedi nangia Pauro ayugu gupai nga gaani nyemuse tipa Yekova nika sona ka ani du na “inahe na pa kparia pai dũ” tipa ko. (Frp. 1:9) Ho ani atona wirika Ziazia Kekeapai ni, ani atona kpinyemu Yekova wa si avura du vurũ nga ani aainongo apai dunduko tipa ko te. Fuoho, wa ani aawirika dungu apai tipa ko, gaani nyemuse tipa ko ada ni nyanyakihe. Si nga ndu gupai duhe ti ni ni nyanyakipa pai ani naawisigo Ziazia Kekeapai dedede na kini berẽ nyanyaki kurii gupai ani agedaha!​—Frp. 2:16.

6. Ginipai ani awirikaha rogo 1 Yoane 4:11, 20, 21, nibipa du na bakere nyemuse?

⁶ Ga Mbori nyemuse tipa rani nika fõngbaduraniyo ani kpinyemu awirinarani. (Oni gedi Yoane 4:11, 20, 21.) Ani ima rengba kaa bihe nga si taata ka kpinyemu awirinarani. Si wo mbiko gupai nga ani nairiso Yekova na kini asadi ka wirika asinoko. Ani napekafuo gu kpiapai nga ga Yesu, nga gu ko gako nyemuse asako ko fu ungako tipa rani. Ono tie, si ima rengba ka du ni kpakarakpakaraha ka mangapai kuti gu rugute nga ani kpinyemu akuarani. Ani makianga kpiapai sa naadu rogo gu dungurati nangia ga aFiripoio.

7. Ginipai ani awirikaha ti ga Pauro rugute fu Euodia na Sunduke?

⁷ Euodia na Sunduke angia zaaza awirina namangisunge wa sa na gu mokedi nangia Pauro. Ono tie, si rengbe kadu nga i adu na tagbagapai dagbayo na si ki sa gayo pabakure si gberẽ. Rogo ga Pauro waraga fu gu dungurati agu awirina re adu rogoho, ko afura tipa Euodia na Sunduke na ki zinahe fu yo nga “i dú na berã sa.” (Frp. 4:2, 3) Pauro abihe a nga si arẽarẽ ko fu gu rugapai fu dungurati naabaha nga: “Oni mángi apai dunduko zanga kpakanahe na darãpai.” (Frp. 2:14) Zanga kapa, gi ga Pauro rugute re aima undo Euodia na Sunduke gbiati kura awirina rogo dungurati tipa i naakpinyemu akurayo ni bakerehe.

8. Ginipai rengbe ka saha ni kpakarakpakaraha furani ani kpinyemu awirinarani, na ginipai rengbe ka undo rani?

 ⁸ Ti kura aregbo, si ima du ni kpakarakpakaraha furani ka kpinyemu awirinarani mbiko ani namangapai wakina Euodia na Sunduke ni maa ani berãrani kina kuti gupai awirinarani amangaha ni irairaha. Ani dunduko namanga aingahe amanga na aˈuru dunduko. Ka ani moi berãrani kuti agu aingahe nga ga kura aboro, si nika du furani ni mbumbuhe ani yugu nyemuse fuyo. Ni kpiapai, ka bangiri wirina go ti undo rani ti giriso Bambu Kindo, si ima rengba ka sarani ani du na zinga. Ka ani tona kaa berãpa agu akura aingahe dunduko wirinarani namangihe, si ima rengba ka ba zinga tirani kina kumbatayo na ki sarani ka ani kpingo nyemuni ni bakerehe ya. Ka tagbagapai wa gure du dagbaro na boro rogo dungurati, si adu ni wenepai ka mo berẽkurii gu rengo nga: Yekova ima inopa gaani aingahe gbiati agu aingahe nga ga wirinarani. Wa vura duhe nga ani na aingahe, ko nakpinyemu rani akpi gbiati wirinarani. Mbiko gipai re, si naida ani wiriki ga Yekova nyemuse na ki moi berãrani kuti gu wene asino nga ga awirinarani. Ho ani amanga ome ni nyanyaki tipa ka kpinyemu awirinarani, si nasarani ani du na kodatise.​—Frp. 2:1, 2.

9. “Agu apai du na nyanyakipaha gbe” Pauro afura tipaha fu agu aKristano naadu Firipoi yo nakoda gini apai?

⁹ Yekova arugu Pauro ko pe gupai fu agu aKristano naadu Firipoi yo nga i moiberãyo sa “agu apai du na nyanyakipaha gbe.” (Frp. 1:10, NW) Kina gu bangisapai re a si aida ani mangihe areme. Agu apai du na nyanyakipaha re nakoda pa ziasi rimo Yekova, pa digiso gako ringbisapai, na pa du zereda na kodatise rogo dungurati. (Mt. 6:9, 10; Yo 13:35) Ho du agu apai re ni na nyanyakipaha rogo gaani raka yo, si nayugo gupai nga ani ima kpinyemu Yekova.

10. Ginipai si aida ani mangihe tipa i bi rani ziazia?

¹⁰ Pauro ape gupai a nga si naida ani du “ziazia.” Gipai re ayugongo gupai nga si naida ani du ni rengberengbe rani te. Ani arengbanga kadu ni ziazia rani kina wai du Yekova te. Ono Yekova nika bi rani abi ziazia ka ani mangi asadatise tipa ka kiiso gaani nyemuse na kini berẽpa agu apai du na nyanyakipaha. Gene sa nga gu rengbe ani ka yugo gaani nyemuse ngbaha nga ka manga asadatise ka zanga kotosa akuarani.

11. Tipagine si aida ani ne kotosa kura aboro ti ni?

¹¹ Gu rugapai du tipa zanga kotosa akuarani nga nyanyaki zahe. Waigu rengbe ani ka kotosa boro? Ani rengbe ka mangaha ngba gu gene ani asia gaani aũngbarago ngbaha, agu aroko ani asia ka vodaha na gu sunge ani asia ka mangaha. Si ima rengba kadu nga ani amanganga gupai Yekova asogaha te. Ono ka si du nga agu adiaberã ani amangaha nambusa sangbakpoto kura boro yo na ki kotosi ni, kerepai du nga ha. Yesu ape gupai nga ka ani sa wirinarani ni gbarasi gani pagume na Yekova, si angba gbe tipa rani ka i vo kikii mbia kuti gorani, ki ba rani ku bebere baime yo!​—Mt. 18:6.

12. Ginipai ani awirikaha ti gu kpiapai agu arogotise nangia abazakigene amangihe?

¹² Oni bingo wai kura arogotise ni abazakigene amangipai kuti ga Yesu zahe. I adu rogo bangisa dungurati sa na kura arogotise nazi bapatiza ni vovo yo na i asonosi yo rogo gu ngbadimokporo naima ka na yo ti manga dungu apai. Gi vovo arogotise re aidi kuti gupai nga si aidanga aKristano bi avidio te​—zavura agu avidio du ni wenehe. Kina ngbayo naazere ho i agi gupai ni nga agu arogotise nga abazakigene re andu ka bi vidio. Tingbafuo gure,  agu arogotise nangia abazakigene re ambu nduge kaa bi avidio, da kinaho gu vovo abawiriki re araba sangbakpotoyo yo ni tipa gupai du ni wenehe na gu du ni gbegberẽ he. (Eb. 5:14) Ngba gi gene re, agu arogotise nangia abazakigene re ayuguhe nga i ima kpinyemu awirinayo angianga kina rogo fugo yo ya ono rogo mangaapai yo a.​—Rom. 14:19-21; 1 Yo. 3:18.

13. Waigu rengbe ani ka sosoda boro ni mangi ingapai?

¹³ Gu kura gene rengbe ani ka kotosa boro ngbaha nga ka sosoda ni ni mangi ingapai. Wai du rengbe gipai re ka manga? Oni berẽnga kurii gipai re. Bawiriki Ziazia Kekeapai mangi ome nyanyaki tipa ka mbu kere mbira buda, na niyangaraha, ni na diabese. Ni bi gupai nga si aidanga ni mbiri buda berewe te. Ni mangi sonakumbatayo ni kina boro ipo na ki zi bapatiza. Kusa, wirina yambu ni tipa gu sungo nga ga aKristano na ki fu buda funi, ki ya funi: “Mo awere nga Kristano, mo na toro tiro nga ga Yekova. Zuzu gu toro re nga zatise. Ka mo du na zatise, mo ima rengba ka mbira buda tooni.” Si adu ni gbegberẽpai ka gu vovo wirina re degetuni kuti gu iraira rugute re na ki tona kere mbira buda berewe!

14. Waigu agu adunguratise nga ga aKristano aundo rani ani mangipai kuti agu arugute du rogo AFiripoio 1:10?

¹⁴ Gaani adunguratise nga ga aKristano naundo rani ani mangipai kuti agu arugute du rogo AFiripoio 1:10 rogo dungu abangiriba. Bambataha nga, agu apai ani asakapai tipaha ba adunguratise yo nayugo gupai furani Yekova abihe na nyanyakipaha. Uehe nga, ani  nawirika wai rengbe ani ka manga agu apai ani awirikaha tipa kadu ziazia. Na biataha nga, i nangarasa rani ani yugu “nyemuse na wene mangaapai.” (Eb. 10:24, 25) Ho awirinarani angarasa rani ni, gaani nyemuse tipa Mbori na tipa awirinarani nasona kina kumbatayo. Ho ani akpinyemu Mbori ni gbiati awirinarani na kpotorani yo dunduko, si nasarani ani mangi ome nyanyaki tipa ka zanga kotosa awirinarani.

15. Rogo gupai yo nga ka hi “be gu zuzuhe nga ga rurupai” nga gine?

¹⁵ Pauro amangi kparakpee nyanyaki tipa agu awirina naadu Firipoi yo nga i naahi ‘ahi be gu zuzuhe nga ga rurupai.’ (Frp. 1:11) Zanga kapa, gi “zuzuhe nga ga rurupai” re aakoda gayo nyemuse tipa Yekova na tipa gako aboro. Si aima rengba a ka koda pa furayo tipa gayo idapase kuti Yesu gbiati gayo bawene maabangirise. AFiripoio 2:15 namanga sunge na kura fugo berewe nga ‘aimahe auru kpotosende.’ Gu fugo re rẽarẽ mbiko Yesu ayambu gako abawiriki nga “ga zegino imarago.” (Mt. 5:14-16) Ko afu gu zinahe a fu apefuoko nga i sa aboro “ni abawiriki,” na ko ape gupai nga i nika du ni ‘adezire da ku digida sende yo.’ (Mt. 28:18-20; Amo. 1:8) Ani nazuko “zuzuhe nga ga rurupai” ho ani amanga ome ni nyanyaki tipa ka manga gi nyanyakipa sunge re.

16. Waigu AFiripoio 1:12-14 ayugo gupai nga ani ima rengba ka ki wa aimahe ani ki vura du rogo akpakarapai vurũ? (Oni bi gu sura duti kpotoho.)

¹⁶ Ani ima rengba kaa ki wa aimahe, ka kina ginipai vura du tipa rani vurũ. Ti kura aregbo, agu apai rengbe ani kaa bihe nga si naka na ani ti sunge tungusapai ima rengba ka du ni agu apai nika sarani ani tungusipai. Ni kpiapai, gu mokedi nangia Pauro adu ni zizi ko ku kporo Roma yo ho ko ake gako waraga ni fu aFiripoio.  Ono wa vura duhe nga ko adu ni zizi ko, ko aatungusapai fu agu aboro naabanda ko na agu aboro naaye kaa biko. Pauro atungusipai zaaza ko ki vura du vurũ rogo agi akpakarapai re, na gipai re afu kido na wingbaduse fu awirina tipa i ‘gumba fugo Mbori zanga gunde.’​—Oni gedi AFiripoio 1:12-14; 4:22.

17. Waigu kura awirina atungusapai zavura ho du he ni ni kpakarakpakaraha?

¹⁷ Dungu awirinarani nawirika gu kpiapai nga ga wingbaduse naadu ti Pauro. I naraka rogo agu aringara i arengbanga ka tungusapai gbaiga watadu kporo na kporo rogoho ya, sidu, i nagbata kura agene tipa ka tungusa wene pangbanga. (Mt. 10:16-20) Rogo kura ringara sa dagba agi aringara re, babi adungurati sa afu berãpai fu abatungusipai ni basasa nga si naida i tungusipai fu agumeyo, gayo amurakporo, gayo agude sukuru, gayo abadiasunge, na agu aboro i naini yo. Vuru agarã yo ue, bange agu adungurati naadu rogo gayo dagbarago ange kumbatayo. Si rengbe kadu nga ani naraka rogo gu ringara ani atungusapai atungusa gbaiga rogoho. Ono tie, ani ima rengba ka wirika nyanyakipa pai ti gu kpiapai nga ga agu awirinarani re: Ka ani mangi ome tipa ka tungusapai fu kura aboro, Yekova nika undo rani aundo ani tungusipai zavura ho du he ni ni kpakarakpakaraha.​—Frp. 2:13.

18. Ginipai si aida ani diberã ka mangaha?

¹⁸ Awere nga gu regbo si aida ani diberã ka pekafuo gu rugute du rogo gu waraga yo Pauro akehe fu aFiripoio. Si naida ani berẽpa agu apai du na nyanyakipaha gbe, ki du ziazia, ki ne kotosa kura aboro, na kini zuku gu zuzuhe nga ga rurupai. Fuoho, gaani nyemuse nika maapai na ani ki ye na taarimo fu gu Barani nga Yekova.