1. Ginipai si aida aKristano mangihe tipa ka nyasa gu oto abaangirã nga ga unga?

AKRISTANO ngba gene gu oto abaangirã nga ga unga. Ka si vura du nga ani tona oto abaangirã awere watadu ani aima digo ni oro ho tipa dungu agarã, si naida ani naaora aora kindi tipa ka digisoho. Gu rugute gu mokedi nangia Pauro afuhe fu agu aKristano naadu Firipoi yo ima rengba ka ngarasa rani tipa ani digisi gaani oto abaangirã. Bete agu aKristano naadu rogo bambata sa kama agarã aima digo niirisi Yekova tipa dungu agarã ho Pauro ake gu waraga re ni fuyo. I aairiso Yekova airiso wenengai, ono Pauro atingidi yo na gupai nga si naida i naairiso Yekova airiso kindi na hipai. Ko aaida gupai nga i naapeka fuo gako kpiapai nga ga ‘dusia gu ringbisiringbisi he du ku mbata yo’.​—Frp. 3:14.

2. Tipagine si arẽarẽ ti ni Pauro fu gu rugute re fu aFiripoio?

² Si arẽarẽ Pauro fu gu rugute re fu aFiripoio. Agu awirina naadu rogo gu dungurati naadu Firipoi yo agbiatiyo na asogote ho i asigira gu dungurati re ni. Rogo gu garã nangia 50 Fuo Batikayo Kristo, aPauro na Sira amangipai kuti ga Mbori yambahe nga i “si ku Makedonia” yo. Sidu, i andu ku Firipoi yo tipa ka tungusa wene pangbanga yo. (Amo. 16:9) I abi dee yo nangia Rudia nadegeturi “Gbia ki za kpotori yo” ri ki gi wene pangbanga. (Amo. 16:14) Nibasa, ri azi bapatiza na gari aborokporo dũ. Ono tie, Bakitingbanga atona ka ye na a′asada kuti yo. Aboro gu gbata re andu na aPauro gbiati Sira ku barabangiri abazogo na ki kitingbanga yo nga i naye na kpakarapai kuti aboro. Ni sangbana gipai re, i ata aPauro na Sira, ki bayo ku bambukiso yo, na kusa, i ki ya fuyo i kuru kusayo rogo gu gbata re. (Amo. 16:16-40) Ya mo i ambu tungusapai? Oó! Na ginipai tigaha agu awirina naadu rogo gu vovo dungurati re amangihe? I amoi wene kpiapai mbiko i aima hipai a  tigayo! Zanga kapa, i aima gbia ngarasaro ti gu wene kpiapai aPauro na Sira amoihe fuyo re.

3. Ginipai Pauro aima inoho, na gini asanahe ani nika sakapai tipaha?

³ Pauro aima diaberã ka hipai. (2 Kor. 4:16) Ono tie, ko aima ino gupai nga tipa ko oro ato abaangirã ki digisihe, ko du wa ka ko moi berãko wenengai sa gako sásá. Ginipai rengbe ani ka wirikaha ti gako kpiapai? Gini akpiapai du ho areme nga ga idapase nayugo gupai furani nga ani ima rengba ka hipai akpakarapai ki vura du vurũ? Na waigu rengbe gaani maabangirise tipa kumbatayo ka nyakasa rani tipa ani hipai?

4. Wai du Pauro aamangasunge kindi fu Yekova ko ki vura du rogo kpakaraapai vurũ?

⁴ Ani makianga pa agu apai Pauro aamangaha ho ko ake waraga ni fu aFiripoio. Ko adu niziziko ku kporo Roma yo. Ko aadunga na rengba beko ka tungusapai gbe te. Ono wa si avura du wo, ko aatungusapai kindi fu agu aboro naaye ka biko na ko anaakeka awaraga fu agu adungurati naadu tuturũ. Wakina gure areme, badungu aKristano kinaho du ni bangabanga yo ku kporo mbiko kaza, gbinza watadu kura apai, i namangasunge na gu momu du beyo tipa ka tungusa wene pangbanga fu agu aboro naye ku kpuyo yo. I nakeka wene awaraga na ngarasaro rogoho fu agu aboro si naima kpakara ka gbiayo na wene pangbanga.

5. Ringbisihe kuti agu afugo Pauro du rogo AFiripoio 3:12-14, ginipai naundoko ko moi berãko sa gako sásá wenengai?

⁵ Pauro aambunga gu weneapai naadu tipa ko watadu gu gbegberẽ apai ko amangihe si gbe berãko ti mangasunge fu Yekova te. Ko aya, pa zanga ko ‘tingidapa agu ahe naadu sa yo’ adu ni nyanyakipa pai tipa ‘ko ndu ku mbatayo sa agu ahe du ku mbatayo,’ watadu, ko nyasi gako oto abaangirã na diabese. (Oni gedi AFiripoio 3:12-14.) Gini bete apai narengbe ka gbeberã Pauro? Bambatapai nga, Pauro aima du na bakere diabese dagba aYudo mbata fu ko da ni Kristano. Wa si avura du wo, ko abi agu apai re dũ wa “mirĩ ahe.” (Frp. 3:3-8) Ue pai nga, ko aambunga pa wai ko arungosi aKristano bakurukusayo si gbarasi pa gako mangasunge fu Yekova te. Na biatapai nga, ko aaberãnga ha nga si naida ko rugusi mangasunge fu Yekova mbiko ko ima manga dungu wene apai fu Yekova te. Wa si avura du nga i azi Pauro ku bambukiso yo, ki ta ko, ki sopo ko na ambia, na kurungba ki gberẽ na ko bangiri ime, zingo riahe gbiati zingo roko ki mangiko, surungba gako sunge tungusapai aima du ni bawenehe. (2 Kor. 11:23-27) Ono tie, zanga bipa agu apai Pauro amangihe na agu akpakarapai ko agbia tiko na ni, ko aima ino gupai nga si naida ko naairiso Yekova airiso kindi. Kina gu bangisapai re du tipa rani areme a.

6. Ginihe nga bete “agu ahe nadu sa yo” nga gu si aida ani mbu berãpaha?

⁶ Waigu rengbe ani ka wirika ga Pauro kpiapai nizanga ‘tingida pa agu ahe naadu sa yo’? Agu akura rani kinaho si aida ani mbu berãpa agu aingapai ani amangihe kusayo. Ka ngia wo duhe, si angba gbe ka ani amanga wisigopai nisase nga gu du gbe tipa ga Yesu motumo tumori. Ka si du nga ani nawisigopai, kini berẽ kuriihe, na kini kparikpee tipa gu weneapai ani awirikaha, si nika undo rani ka ani berẽnga kuri gu ingapai ani aima mangaha kusayo ya. Si nika sa gupai nga ka ani naabakanga bangirani tipa gu ingapai Yekova aima mbupai furani tipaha ya. Ani makianga kurapai berewe rengbe ani ka wirikaha be Pauro. Si rengbe kadu nga kura aboro aima mbu agu asunge ka ye na bakere marã fuyo tipa ka mangasunge gbe fu Yekova. Ka ngia wo duhe, ya mo ani rengbe ka mbu ngera kusayo nizanga ani berãpa agu ahe kadu berani awere? (Geda 11:4-6; Batu. 7:10) “Agu ahe nadu sa yo” rengbe ka koda agu apai ani amangihe fu Yekova watadu agu aasada ani ahihe mbata kusayo. Rengo ngaha nga, ka ani angera kusayo ka bi wai Yekova nafu maku  furani na kini songodi rani vuru agu agarã yo susi, si ima rengba ka mbedisa rani na ko. Ono tie, si aidanga ani mbu mangasunge fu Yekova tipa kina gu sunge ani aima mangaha kusayo te.​—1 Kor. 15:58.

7. Ringbisihe kuti 1 AKorindo 9:24-27, ginipai si aidaha tipa kadu na diabese rogo gu oto abaangirã yo nga ga unga? Oni funga kpiapai tipa gipai re.

⁷ Pauro aima rugatiko wenengai na agu afugo Yesu nga: “Oni ásadi.” (Rk. 13:23, 24) Pauro aima ino gupai nga, wakina Yesu, si naida ko asadi tiko kakaka. Sidu, ko aringbisi gu raka nga ga aKristano kuti oto abaangirã. (Oni gedi 1 AKorindo 9:24-27.) Gu boro naora oto abaangirã namaaberã ni wenengai sa gani sásá zanga mbu ai pai si gbeberã ni kusayo. Ni kpiapai, agu aboro naora oto abaangirã ti gi gaani regbo re rengbe ka ora ngba gu gene du na bambu bagaahe na dungu apai ngbaha nga gu rengbe arengba ka gbe berãyo. Ya mo gu boro naora rengbe ka ru tipa ka ngana agu ahe gbaragi yo ho gene re? Ni arengbanga ka mangapai wo te ka ni aida kadu na diabese! Rogo gu oto abaangirã nga ga unga, si naida ani ne agu apai rengbe ka gbe berãrani kusayo a. Ka ani moi berãrani wenengai sa gaani sásá, ki asadi tirani kakaka wa gu Pauro amangihe, ani duadu na diabese!

8. Gini akpakarapai biata ani ka makiapai tipaha?

⁸ Ani makianga akpakarapai awere biata nga gu rengbe ka sarani omerani bati. Si nga ho ani amaabangirani ni tipa pai ka si amanganga ya, ho omerani natona ka bata ni, na ho ani agbia tirani ni na agu aasada du tipa gbanga regbo. Ani ima rengba ka gbia undo ti wirika ani wai kura aboro amangipai sa ngbatunga agu a′asada re.​—Frp. 3:17.

9. Waigu rengbe pa ima agu apai ani amaabangirani tipaha kadu na maapai kurii rani?

⁹ Ho ani amaabangirani ni tipa pai ka si amanganga ya. Si tie ziazia nga ani namaabangirani tipa gu wene apai Yekova akidopaha. Nirengo, ho ga Yekova nebi nangia Abakuka ayugu gupai ni nga ko adu na nyemu Yekova digisi gu gbegberẽ sino raka naadu Yuda yo, Yekova aruguko nga, ko ‘sungudihe.’ (Abak. 2:3) Ono tie, ho agu apai ani amaabangirani tipaha angera ni wa si naima aima, ani ima rengba ka tona kaa zera. Rago ima rengba ka gberã tirani. (Snz. 13:12)  Gipai re aima manga bete agu awirina naadu bara rogo gu garã nangia 1914. Ti gu regbo re, badungu mbedimbedi aKristano amaabangiriyo tipa ka gbia gayo mosoro nga ga ngbangbaturũ rogo 1914. Ho si aamanganga ni wo ya, waigu i amangipai kuti gi gayo maabangirise naaima aima re?

10. Ginipai kura arogotise amangihe ho gupai i amaabangiriyo tipaha aaima aima ni?

¹⁰ Ani bingo kpiapai nga ga ruru aKristano ue nagbiatiyo na ngbatunga gu kpakarapai re. Wiriba Royal Spatz azi bapatiza rogo 1908 ho garãko adu ni nga 20. Ko aima du na bakere kido nga ko nika gbia gako mosoro nga ga ngbangbaturũ barambeda. Nirengo, ho ko aaida ka manga rogatise ni rogo gu garã nangia 1911, ko ape gupai fu gu dee ko aaida ka diari nangia Pearl nga: “Mo ima ino gupai nandu ka manga rogo gu garã nga 1914. Ka si du nga ani ka manga rogatise, si naida ani mangihe ni ipo!” Ya mo agi arogotise re ambu gayo oto abaangirã nga ga unga ho i aagbianga gayo mosoro ni nga ga ngbangbaturũ rogo 1914 ya? Oó, bambiko i amoi berãyo tipa ka mangasunge fu Yekova niruru yo, angianga tipa ka gbia mosoro ya. I aima diaberã ka ora oto abaangirã na hipai. Na nirengo, Royal na Pearl anye zaaza ti ngba gayo sunge na niruru yo tipa dungu agarã daho i anyasi gayo raka ni auru kpotosende ane. Zanga kapa, ani nangera kumbatayo tipa ka bi Yekova ko nigirisi rimoko na gu gbarasarimo duti pa gako bakere pagbia na ki digisi gako akidohe dunduko. Ani du na gu kido tie nga, agi apai re dunduko nika manga ti kina gu regbo Yekova naringbisihe. Ono wadu rago re, si naida ani du zaaza ti ngba ga Mbori sunge, si aidanga ani mbu agu apai ani amaabangirani tipaha nga gu naima aima si ba gberãrago tirani watadu si sarani omerani bati te.

11-12. Tipagine si aida ani naamangasunge amanga ti ni kindi fu Yekova si ki vura du vurũ nga omerani ima bata? Oni funga kpiapai.

¹¹ Ho omerani natona ka bata ni. Tipa ka sonosa idapase kuti Yekova na kidu zaaza ti ngba gako sunge, si aidanga aida ani du mbata wa agu aboro na ora kungbo oto abaangirã nga aguyo si aida i du na bakere ome tiyo i kini ru ka ora te. Badungu agu aboro omeyo nabati namanga ome kindi tipa ka mangasunge fu Yekova. (2 Kor. 4:16) Ni kpiapai, ho garã Wiriba Arthur Secord * adu ni nga 88, ko aima mangasunge Betere yo tipa agarã 55, ti gu regbo re, omeko aima bata na ka kpotoko adunga wenengai ya. Rogo kura uru sa, boro sa dagba agu aboro naangerafuo gbinza aboro aye ka ngera fuoko. Ri angana ko ni nunga na ki ya: “Wiriba Secord, mo ima manga bakere sunge fu Yekova.” Ono tie, Arthur aaberãnga gbe kurii agu apai ko amangihe kusayo te. Ko angana ri, ki mamu tingba ko, na ki ya: “Ii, kina rengo du. Ono anga agu apai ani amangihe kusayo nyakipaha te. Agu apai ani amangaha awere du nyakipaha.”

 ¹² Isoke si rengbe kadu nga mo aima digo nimangisunge fu Yekova tipa dungu agarã, ono awere kpotoro wenengai tipa ka manga bakere sunge fuko berewe wa gu mo anaamangaha mbata te. Kangia wo duhe, si aidanga rago gbere tiro te. Mo du na gu kido nga Yekova nabi agu asunge mo amangihe fuko bakuru kusayo na nyanyakipaha. (Eb. 6:10) Na tipa awere, mo tingidi gupai nga, gupai nyakipaha nga gu sunge boro amangaha fu Yekova na ngbaduniyo dũ angianga bakio gu sunge boro amangaha ya. Ani nayugo wai ani nakpinyemu Yekova ho du ani ni na wene bipai na kini mangi gupai rengbe omerani na ni. (Koro. 3:23) Yekova ima rugatiko wenengai na gaani azangarengba, ko arengbanga ka sana rani ani mangi gupai arẽnga omerani na ni ya te.​—Mk. 12:43, 44.

13. Wai du gu kpiapai nga ga Anatoly na Lidiya angarasa rani ani naandu kindi kumbatayo kaa iriso Yekova ani ki vura kaa gbiatirani na dungu akpakarapai vurũ?

¹³ Ho ani agbia tirani ni na agu aasada du tipa gbanga regbo. Bete ga Yekova amoyambu aima hi akpakarapai na arungosiro tipa dungu agarã. Ni kpiapai, garã Anatoly Melnik * adu gbua nga 12 ho i azi bako ni ki bako ku bambukiso yo na ki kedi ko ku Saberia yo, nga gu baturõho aima susa amairo nga 4,000 (watadu akirometere 7,000) ti gako aborokporo naadu Moldova yo. Fuo garã sa kusa, i akedi navungu Anatoly gbiati atitako berewe ku Saberia yo. Kusa, i arengbe ka ndu tipa adunguratise ku rogo kura gbaria, ono si ani idi i ndu tipa amairo 20 (watadu akirometere 30) rogo dubo, na rogo kere zere. Kusa, Wiriba Melnik araki kusayo tipa agarã biata bambukiso yo ti diako nga Lidiya gbiati tooni wiriyo. Wa i avura ka manga dungu agarã ku rogo gi rungosiro re, Anatoly na gako aborokporo aairiso Yekova kindi niruru yo. Anatoly awere na garã nga 82, ko namangasunge rogo gu Rondo nga ga Be Basunge du Central Asia yo. Si naida ani wiriki Anatoly na Lidiya ni manga ani ome tipa kaa mangasunge fu Yekova na kini hipai kindi wa gu ani aima digo nimangihe kusayo.​—Gara. 6:9.

14. Ginipai Pauro abihe nga si naida ko mangihe tipa kada ti gako sásá?

¹⁴ Pauro aima du na gu kido nga ko nika nyasa gako oto abaangirã anyasa na ki da ti gako sásá. Wa ko angia mbedimbedi Kristano, ko aamaabangiriko “sa dia gu mosoro du ti ga Mbori yambahe.” Ono tie, tipa ko da ti gi gako sásá re, ko abi gupai nga si naida ko naamanga ome kindi ka ‘dusia’ ho. (Frp. 3:14) Pauro amangisunge na wene kpiapai ka undo aFiripoio tipa i moi berãyo wenengai fuo gayo sásá.

15. Waigu Pauro amangisunge na gu kpiapai du tipa du ni vuru ringara tipa ka ngarasa agu aKristano nangia aFiripoio i ‘dusia’ gayo mosoro?

 ¹⁵ Pauro atingidi aFiripoio na pa gayo maabangirise nga ga ngbangbaturũ. (Frp. 3:20) Tipagine si adu ti ni na nyanyakipaha? Ti agu aregbo re, padu boro ni vuru gu ringara nga ga Roma adu na nyanyakipaha. * Ono tie, gu maabangirise mbedimbedi aKristano adu na ni nga ga raka ngbangbaturũ yo nangba kisusi, si narengbe ka ye na badungu wene amaku. Ka ani ringbisi du ni vuru ga Mbori Kindo kuti du ni vuru ga aRoma ringara, ga Mbori ngba kisusi! Tipa gi ndupai re, Pauro angarasi aFiripoio nga gayo ‘raka rẽarẽ na ga Kristo wene pangbanga.’ (Frp. 1:27) Mbedimbedi aKristano areme namaa wene kpiapai nidusio yo gayo sásá nga ga raka nyeanye kindi ngbangbaturũ yo.

16. Singia ani na gu maabangirise nga ga raka ngbangbaturũ yo watadu auru kpotosende, ginipai si aida ani naamangaha kindi ringbisihe kuti AFiripoio 4:6, 7?

¹⁶ Singia ani na maabangirise ka raka ngbangbaturũ yo watadu auru kpotosende ane, si naida ani naamanga ome kindi ka dusia gaani sásá. Ka si vura du nga kina gini apai du tipa rani vurũ, si aidanga ani ngere kusayo sa agu apai ani ambuhe te, watadu ka mbu ai pai si ka na ani ti iriso Yekova te. (Frp. 3:16) Si rengbe kadu nga ani aima digo nisungudi Yekova ko digisi gako akidohe, watadu ani ima gbinza na omerani ima bata. Si rengbe kadu nga ani aima hi arungosiro na kpakarapai tipa dungu agarã. Ka si vura du nga kina ginipai du vurũ, “ka oni ídi nga fu pai si fudi roni wa sa ya.” Kuba gure, oni yugu gaoni sanahe na zungoditise fu Mbori rogo kpe yo, na ko nika fu zereda furoni susi gu oni narengbe ka berãpaha.​—Oni gedi AFiripoio 4:6, 7.

17. Ginipai ani ka wisigoho rogo gu kekeapai naye fuo gere?

¹⁷ Wakina gu boro naora oto abaangirã tipa ka digisoho, si naida ani moingo berãrani amaa wenengai tipa gaani sásá nga ga nyasa gu oto abaangirã nga ga unga. Ringbisihe kuti gaani rengba na pai, ani funga tirani afu ka mangasunge nyanyaki na kini ngere kumbatayo tipa wene apai. Ginipai si aida ani mangihe tipa kaa ndu ngba ruru gene na kaa hipai kindi? Gu kekeapai naye fuo gere nika undo rani ani peresipa agu apai mbatayo nyakipaha rogo raka yo na ‘ki idipa agu apai nangba.’​—Frp. 1:9, 10.