1-3. Gini bete nduapai duho rengbe ka sa gupai nga boro guari ti ngba mangasunge Kindo ti aregbo dũ?

ROBERT na Mary Jo aya, “Tifuo ani mangi agarã 21 kuti ngba sunge amokedi, avungurani biama dunduko ada kpokorokpokoro be gbinza. Ani aima du na ngbarago tipa ka ngerafuoyo. Wa si avura du wo, rago aima gberã tirani tipa ka mbu gu ba ani aima kpinyemuhe gbe.”

² William na Terrie aya, “Ho ani aini gupai ni nga gene berani tipa ani karaga tirani kuti ngba gaani sunge te mbiko kaza, ani akpari ni aume. Gu maabangirise ani adu na ni nga ga mangasunge rogo gu kura ringara aima go kusayo.”

³ Aleksey aya: “Ani aima ino gupai nga asogorani naida ka kiso gu be-basunge ani aamangasunge rogoho. Ono ho gipai re amangi ni, si aima zigbä rani si ki sa rani ani kuru kusayo Betere yo.”

4. Gini asanahe ani nika sakapai tipaha rogo gi kekeapai re?

⁴ Kurii gure, badungu agu aboro naamangasunge Kindo ti aregbo dũ kodihe na agu aboro naamangasunge Betere yo azanga gayo amomu. * Si ima rengba kadu ni ba kpakarakpakaraha fu agi awirina re tipa i mbu gu sunge i nakpinyemuhe gbe. Ginipai rengbe ka undo yo tipa i mangipai kuti gi kpakarapai re? Waigu rengbe mo ka undo yo? Pa gbia ani akaragapai kuti agi asanahe re rengbe ka undo rani dunduko tipa ani mangipai kuti agu aˈariapai ani agbia tirani na ni rogo raka yo.

5. Gini maapai kurii rengbe aˈariapai nga ga sunge kadu na ni kurii rani?

⁵ Singia ani namangasunge tungusapai watadu sunge Betere, ani ima rengba ka sonosa bakere nyemuse tipa aboro gbiati gu ba ani amangasunge rogoho. Ka apai kuru si kini idi ani mbuhe, si naba bakere gberãrago tirani. Ani rengbe kaa berãpa agu awirina ani nambu yo, na kini bakibangirani tipa yo, gbe ka si du nga ani mbuyo mbiko rungosiro be agu aboro narungosi rani. (Mt. 10:23; 2 Kor. 11:28, 29) Kurigure, singia ani gbia vovo sunge watadu ani nakaraga tirani ku rogo gu ba ani aye rogoho, gipai re ima rengba kadu furani ni kpakarakpakaraha. Robert na Mary Jo aya: “Si aima du furani ni mbumbuhe ka inidotirani na gaani sino raka na zavura ka tungusapai rogo gaani fugo. Mbiko wa ani aima raka kusayo, ani aabi tirani wa ayeaye rogo gaani ringara.” Agu aboro i naˈaria gayo sunge ima rengba ka gbiatiyo na kere zingo marã. I ima rengba kaa bakabangiriyo, kaa gunde na kadu na gberãrago. Ginipai rengbe ka undo yo?

6. Waigu rengbe ani ka nye mbembedi na Yekova?

⁶ Oni nye mbembedi na Yekova. (Yak. 4:8) Waigu rengbe ani ka nye mbembedi na Mbori? Ni kido ani kutiko mbiko ko “ninagia kpetambuahe.” (Tam. 65:2) Atambuahe 62:8 naya: “Oni úka kpotoroni yo ku bara bangiriko.” Yekova ima rengba ka manga apai “susi gu ani aõ na gu ani aberã dunduko.” (Ef. 3:20) Yekova nakaraga pai furani kuti gaani akpee na kini mangipai furani susi gu ani asanako tipaha. Yekova ima rengba ka manga gupai furani ani aaberãnga ha nga si rengbe ka manga ya, tipa ka undo rani rogo gaani kpakaraapai yo.

7. (a) Ginipai nika undo rani ani nye mbembedi na Yekova? (b) Ringbisihe kuti AEbere 6:10-12, ginipai nika manga ka si du nga ani nandu kindi kumbatayo kaa mangasunge fu Yekova niruru rani?

⁷ Tipa ka mbeda na Yekova, si naida ani naageda Ziazia Kekeapai naˈuru dũ na kini berẽkuriihe. Kura kuru mokedi sa aya: “Mo naamanga gu irisombori nga ga aborokporo dedede na kini mbakadi adunguratise, a wa mo anaamangaha mbata tingba ga sunge.” Na berewe a, mo naafu tiro kindi kakaka sa sunge tungusa wene pangbanga rogo gamo vovo dungurati. Yekova natingidapa aguyo nandu kindi kumbatayo kaa mangasunge fuko niruru yo, si ki vura du vurũ nga i arengbanga ka mangaha wa gu i anaamangaha mbata te.​—Oni gedi AEbere 6:10-12.

8. Waigu rengbe agu afugo du rogo 1 Yoane 2:15-17 ka undo ro mo sa ga raka si du taata?

 ⁸ Oni sa gaoni raka si du taata. Ka oni mbunga agu abakabangirise du rogo gi ga Satana zegino re si “kandasi” gaoni apai nga ga toro ya. (Mt. 13:22) Ka oni degenga turoni fu agu aboro zegino, abakurearoni, watadu agumeroni nga aguyo nasosoda roni oni gbata bakere marã rogo gi ga Satana zegino re ya. (Oni gedi. 1 Yoane 2:15-17.) Mo kido kuti Yekova, nga gu ko nakidohe nga ko nika ngerafuo gaani azingo dunduko nga ga toro, ga berãse yo, na ki ‘undo rani rogo rago zingo.’​—Eb. 4:16; 13:5, 6.

9. Ringbisihe kuti Asanza 22:3, 7, tipagine duhe ti ni ni nyanyakipa pai ka ne dia bape bau, na ginipai rengbe ka undo rani ani mangi wene adiaberã?

⁹ Oni ne rogoda bape bau. (Oni gedi Asanza 22:3, 7.) Pa ga boro ku rogo kura ba ima rengba ka dia bakere marã, na si taata boro di bape. Tipa ka bape kiingo kurirani ya, si naida ani ne diaha tipa kaa ngbe agu ahe ani adunga adu na zingoho ya. Ho du ani ni rogo kpakarapai nga ga bakabangirise, wa ho ani angera ni fuo gu gaani aboro nawoka, si ima rengba kadu furani ni nyanyakihe ka diaberã tipa bakio gu marã si aida ani dihe ni bape. Rogo akpakarapai yo wa gure, si naida oni tingidi gupai nga, “kpe na zungaditise” rengbe ka undo roni tipa oni mangi wene diaberã. Ni karaga Yekova pai kuti gaoni akpe, ko ima rengba ka fu zereda ‘si bánda kpotoroni yo na gaoni aberã,’ na ki undo roni oni zogo tironi ka berã wenengai ho du oni ni rogo kpakarapai​—Frp. 4:6, 7; 1 Pet. 5:7.

10. Waigu rengbe ani ka zio wene abakure?

¹⁰ Oni banda wene pabakure. Mo gumba gamo berãpai na agu akpakarapai mo agbia tiro na ni fu mbembedi abakureamo, gbe aguyo si narengbe kadu nga i aima gbiatiyo na ngbatungapai wa gure. Ka mo mangihe wo si ima rengba ka undo ro mo du wenengai. (Batu. 4:9, 10) Agu abakure mo azihe tingba gu sunge mo aamangaha mbata, i nika du kindi ni kina abakureamo. Awere tie, ti ngba ga vovo sunge, si naida mo zi vovo abakure. Mo tingidi gupai nga tipa kadu na bakure, si naida mo du ni bakure. Waigu rengbe mo ka zio vovo abakure? Mo gumbapa gu weneapai Yekova namangihe foro, na aboro bi gu ngbarago abi mo agbiaha ti mangasunge fu Yekova. Ka si vura du nga kura aboro aruganga tiyo na ndu gupai mo nakpinyemu sunge Kindo ti aregbo dũ ti ni te, ga wene kpiapai ima rengba ka gbeberã kura aboro i ki da nga wene abakureamo. Ono tie, wa vura duhe wo, si naida mo du na rubangirise, ka mo naafuranga gbe tipa kina tiro watadu agu asunge mo amangihe fu Yekova na gu gbegberẽ apai namangi ro ya.

11. Waigu rengbe mo ka banda ga rogatise si du na ngbarago?

¹¹ Ka si du nga si nika ida mo mbu ga sunge mbiko ga badiarogatise nawoka, ka mo biranga ni ya. Watadu ka si du nga kina boro mo du ni  tiro nawoka, ka rago gberẽnga tiro mo kini tona kaa bihe nga mbiko ro du gupai re namangi ti ni ya. Oni tingidi gupai nga, oni nga “boro sa” na oni amangi mokido barabangiri Yekova ka ngerafuo tironi ka kina gini kpakaraapai vura du vurũ. (Mt. 19:5, 6) Ka si du nga mo ambu gu sunge mo aamangaha mbiko du mo na vuse nga gu mo aasonga gimaha aso ya, si naida gu gude re ini gupai nga paru ima nyaka ki susi gu sunge mo aamangaha mbata. Mo kido wiro na gupai nga mo nabi ru wa “gamahe” be Mbori. (Tam. 127:3-5) Ti kina gu bangisa regbo re, mo pepa gu wene apai namangi foro ti ngba ga Yekova sunge. Pa mangaha wo nika fõngbadu wiro yo u mangisunge na gau raka fu Yekova kina wai mo amangihe.

12. (a) Waigu rengbe ani ka undo agu aboro du rogo sunge Kindo ti aregbo dũ i naandu kindi kumbatayo na gayo sunge? (b) Waigu rengbe ani ka undo yo tipa gi gayo ariapai nga ga vovo sunge re du taata fuyo?

¹² Si ni wenepai nga, badungu awirina rogo adungurati namanga gupai rengbe yo ka mangaha tipa ka undo agu aboro namangasunge Kindo ti aregbo dũ i naandu kumbatayo kindi na gayo sunge. I namanga gipai re ni ngarasa yo yo i naandu kindi kumbatayo na gayo sunge, ni fuyo agu ahe fuyo du yo na zingoho, watadu ni undo yo yo ka ngerafuo gu gayo aborokporo du tuturũ. (Gara. 6:2) Ka si du nga agu aboro namangasunge Kindo ti aregbo dũ yego ku rogo gaoni dungurati na vovo sunge, ka oni bingoho nga i aamanganga sunge yo wenengai te watadu gbegberẽpai du i amangihe yo ya. * Kuba gure, oni undo yo gi gayo ariapai re du fuyo taata. Oni di yo kugume zaaza na ki tambua yo tipa gu sunge  i amangihe, ka si vura du vurũ nga kaza du sa gupai nga ka i ndunga kumbatayo berewe ya. Oni asadi ka inoyo. Oni wirikipai ti gu bakere inohe du yo na ni, gu rabahe i agbiaha, gbiati agu apai namangi fuyo.

13. Gini undo rengbe ani ka fuhe fu agu aboro ariapai namangi rogo gayo sunge yo?

¹³ Ti tonatonaha, agu aboro nagbia vovo sunge ima rengba ka ida na gaoni undo tipa ka gbia bambu, ũnduge, sunge marã, na kura apai nga ga raka. Si rengbe kadu nga i naida ka ino dungu apai tipa wai apai amanga rogo gu dagbarago re, wa gu nga ka fu marã ngbeti na kura apai. Gupai nyakipaha gbe nga mo asadi ka rugatiro na agu apai du yo rogoho. Si rengbe kadu nga i na gu kpakarapai nga ga kaza watadu gumeyo nawoka. Si rengbe kadu nga i na rungo kpotoyo yo tipa gu gume yo nakpi. * Na i ima rengba kadu na bakere rungo kpotoyo yo tipa zanga agu abakureayo naadu rogo gayo kuru dungurati ka si vura du nga i afuranga tipaha te vurũ. Si nadia yo adia na regbo tipa gu gberãrago re go kusayo.

14. Wai du awirina aundo wirina sa ri mangi ariapai kuti gari vovo sunge?

¹⁴ Wa du rago re, gamo undo na gamo kpiapai ima rengba ka undo yo rogo gi gayo ariapai re. Wirina sa namangisunge rogo kura ringara tipa dungu agarã aya: “Rogo gu gi sunge naadu mbata, mi anaawisigo Ziazia Kekeapai na aboro na aˈuru dũ. Rogo gi vovoho re, si aima mbu tipa mi gbia kandara momu ka zaka Ziazia Kekeapai watadu ka yugo vidio fu boro batungusapai yo. Agu awirina naadu yo anaandu na mi fuo gayo abawiriki Ziazia Kekeapai. Pa bi mi agi awirina naamangasunge kakaka re i niwirikipai na agu aboro namanga sonakumbatayo rogo toro yo asa re mi du na wene bipai. Mi awiriki wai ka tona fugo rogo gu vovo dagbarago re. Agi apai re naaundo re mi gbia ngbarago berewe.”

15. Waigu rengbe mo kadu na diabese rogo gamo vovo sunge yo?

¹⁵ Mo ima rengba kadu na diabese rogo gamo vovo sunge yo. Ka mo bingo ariapai nga gure nga mo aima ti tigu sunge mo amangihe mbata  watadu nyakingo paro berewe ya te. Mo berẽpa gu dungu agene Yekova aundo ro awere ngbaha na mo naatungusapai kindi. Mo wiriki gu ruru aKristano naadu rogo bambata sa kama agarã. Agu aba dunduko i adu rogoho, i anaandu “kirikiri nitungusi pai.” (Amo. 8:1, 4) Ka si du nga mo nikaa tungusapai kindi, mo ima rengba ka gbia wene surungbaha. Ni kpiapai, agu abazakigene i ado yo kusayo rogo kura ringara aga ku rogo gu ba nambedi ambeda na gu i ado yo rogoho nga gu naadu na bakere zingo rogoho nga ga agu aboro nape gayo fugo. Tipa bete wiri adiwi gbua, i atona vovo badona nga gu naasona ni kina ipo.

16. Waigu rengbe mo ka gbia ngbarago rogo ga vovo sunge?

¹⁶ “Ga Yekova ngbarago nga gaoni ome.” (Nem. 8:10) Si naida ani gbia gaani ngbarago mbata rogo Yekova yo angianga rogo gaani sunge yo ya, ka si vura du nga ani ima kpinyemuhe vurũ. Sidu tie, ani naata kindi na Yekova kini ngere koyo du ko ni tipa tatamana, arugute, na undo. Mo tingidi gupai nga mo aye ka kpinyemu gu sunge mo aamangaha mbata mbiko mo afu tiro na ngbaduro yo ka undo agu aboro naadu yo. Mo fu ngbaduro yo a sa gu sunge mo amangaha awere na ki bi wai Yekova nika undo ro mo kpinyemuhe.​—Batu. 7:10.

17. Ginipai si aida ani tingidihe tipa gu sunge ani amangaha awere?

¹⁷ Si naida ani tingidi gupai nga, gaani sunge fu Yekova nika nye anye kindi, ono gu ani amangaha awere, si tipa wiri guru regbo gbua. Rogo vovo zegino, si rengbe kadu nga ani dũ nika gbia ariapai nga ga sunge. Aleksey, i nifura tipa ko ti tonatona gi kekeapai re idi kuti gupai nga agu apai du tipa ko awere nambakada ko tipa gupai re. Ko aya: “Mi aima inoho nga Yekova gbiati vovo zegino nga ndikidipai, ono si wa gupai du kindi kumbatayo. Awere, mi nabi Yekova barabangire na mi nabihe nga vovo zegino nika ye barambeda.” (Amo. 2:25) Ka si vura du nga ani na kina gini sunge berani vurũ, si naida ani naata kindi na Yekova. Ko ambunga rani te, ono ko nika undo rani ani gbia ngbarago ti manga ai gupai rengbe ani ka mangaha tingba gako sunge​—ka si vura du kina wari vurũ.​—Yes. 41:13.