YA MO pai ho mo aida ka mangaha rogo dungurati ono adunga mo na rengba ka mangaha awere ya? Isoke si rengbe kadu nga sunge du kura boro kia amangaha. Watadu si rengbe kadu nga sunge du mo anaamangaha amanga mbata. Ono tie, gbinza, kaza, zingo tipa agu ahe mo aidaha, watadu agu atindiro nga ga aborokporo kini zogosi bete agu apai rengbe mo ka mangaha. Watadu mbiko gu ariapai namanga rogo riigbu, si aidi mo mbu gu sunge mo aima mangaha tipa gbanga regbo. Ka si vura du nga kina gini ndupai du ngaha, mo ima rengba ka berã gupai nga mo amanganga agu apai dunduko mo akpinyemu ka mangaha tingba ga Mbori sunge te. Rogo ngbatunga apai wa gure, gbegberẽpai ngaha nga mo ima rengba kadu na gberãrago ti kura aregbo te. Wa vura duhe wo, ginipai rengbe ka undoro ka mo dunga ti aregbo dũ na gberãrago, zinga, watadu kpipai ya? Wai gu rengbe mo ka nye na ngbarago?

Ani rengbe ka wirika nyanyakipa pai tipa wai ka nye na ngbarago tigu kpiapai nangia ga Yoane Bafu Bapatiza. Yoane adu na wene amomu nga gu ko aagbia ngbarago ti ni, wa si avura duwo, si nawira wa ko aaberãnga pa gupai nika manga rogo gako raka yo te. Si rengbe kadu nga ko aaberãnga gupai nga ko nika dia bakere regbo ku bambukiso yo kisusi gu regbo ko adihe kuti ngba gako sunge tungusapai te. Wa si avura duwo, Yoane adu kindi na ngbarago na ko abanda gi sino re rogo gako raka yo naabaha. Ginipai naundo ko? Na wai du rengbe ani ka nye na ngbarago zavura ho ani agbiatirani ni na gberãrago?

Rogo 29 F.B.K., Yoane atona gu sunge Yekova afuhe fuko nga ga mbakada aboro tipa paye Masiya ni peko gupai nga: “Oni sá gaoni berã; bambiko gu ngbi nga ga ngbangbaturũ si nambeda.” (Mt. 3:2; Rk. 1:12-17) Badungu aboro nadegetuyo. Nirengo, ndurumo aboro aye rogo tuturũ arago tipa ka gia ga Yoane pangbanga, na gu pangbanga re afõngbadu dungu aboro yo i saberãyo na ki zi bapatiza. Yoane afu zahe na wingbaduse fu agu abarumbatayo rogo pambori naamanga tiyo nga i nga ruru aboro ki ya, sapangbanga nasungudo yo ka i asanga berã yo ya. (Mt. 3:5-12) Yoane amangi nyanyakipa pai rogo gako sunge tungusapai yo ho ko abapatiza Yesu ni rogo 29 F.B.K. Natona ti gu regbo re ka ndu ku mbatayo, Yoane arugu aboro i pekefuo Yesu nangia gu Masiya i akido pako.​—Yo. 1:32-37.

Nibipa gi ga Yoane kparakpara sunge re, Yesu aya: “Dagba agu yo ade avunga yo, a nga  gu ni sa susi Yoane Babapatiza te.” (Mt. 11:11) Zanga kapa, Yoane aima du na ngbarago na agu amaku ko agbiaha. Areme, badungu aboro ima gbia amaku wakina Yoane. Kpiapai sa nga ga wirina du rimoko nga Terry. Ko gbiati diako nga Sandra ima dia agarã naima susa 50 kuti ngba mangasunge Kindo ti aregbo dũ. Terry aya: “Mi adu na wene amomu bere. Mi aima mangasunge bazakigene, sunge Betere, sunge kparakpara abazakigene, babi adungurati, babi rimbasa adungurati, na awere mi namangasunge berewe ni kparakpara bazakigene.” Pa ngbarago du ngaha ka gbia agu amomu nga ga siokrasia, ono si naida na asadatise tipa ka nye na ngbarago ho agu apai du tipa rani aˈariatihe ni a wa ani ka wirikaha ti gu kpiapai nangia ga Yoane.

Yoane Bafu Bapatiza anye na ngbarago mbiko ko adu na tambuahe tipa agu amomu ko adu na ni. Mo makianga gi kpiapai re. Tingbafuo Yesu zi bapatiza, ga Yoane sunge tungusapai atona ka umba ono ga Yesu kini kii kumbatayo. Ga Yoane abawiriki adu na bakabangirise mbiko gipai re na i ki pe gupai fuko nga: “Mo bí, ko nabapatizi aboro, aboro naye koyo du ko ni dũ.” (Yo. 3:26) Yoane akaragapai ki ya: ‘Gu ni du pazuapazua de be ni ni nga kumbari; ono gu badia kumbari naru ka gia pani, rago nangba angba ti ni bakere gbe bambiko fugo kumbari; si du moi gimi ngbarago pai ti ni.’ (Yo. 3:29) Yoane aamanganga abaangirã na Yesu te; na ko aaberãnga gupai nga gako sunge na paha kusende mbiko ga Yesu sunge adu na nyanyakipaha te. Kuba gure, Yoane anye na ngbarago mbiko ko aandu kindi kumbatayo kaa bi gako sunge nga ga du ni “badia kumbari” watadu bakurea badidee na nyanyakipaha.

Gu ruru bipai naadu ti Yoane naundo ko ko nye na ngbarago wa si avura du vurũ nga gako sunge aadunga ni taataha te. Ni kpiapai, Yoane angia boro Nazara natona ti kina gu regbo i abatika ko, sidu, i aima ka na ko ti mbira imekakue. (Rk. 1:15) Yesu afura tipa gu taata raka Yoane aarakaha ki ya, “Yoane aye ka ko ari nga he ki nimbiri he ya.” Ono tipa Yesu tigako na gako abawiriki, i aangianga aboro Nazara te, i aaraka wakina kura kungbo aboro. (Mt. 11:18, 19) Berewe a, Yoane aamanganga iiriwoapai te, ko aima ino gupai nga ga Yesu abawiriki kodihe na agu aboro naapekafuo ko, nika manga iiriwo apai amanga. (Mt. 10:1; Yo. 10:41) Kuba gupai nga Yoane naaberã gbe kurii gu kparakparapai naadu bangbanda apefuoko na apefuo Yesu, Yoane akakuti manga gu sunge zaaza Yekova afuhe fuko.

Wakina gure a, ka ani bi gu gaani sunge ani amangaha awere ti ngba ga Yekova sunge na nyanyakipaha, ani ima rengba ka banda gaani ngbarago. Terry, i nifura tipa ko kusayo re aya, “Mi amoi berãre kuti ai gu sunge i afuhe fere.” Ho ko aaberã ni kurii gu gako raka ko nadihe kuti tingba mangasunge Kindo ti aregbo dũ, ko aya, “Pai ho mi abira tire tipaha te, ono mi natingida kina wene apai naabaha.”

Ani rengbe kadu na ngbarago ka ani aberãkurii gupai nasa ai sunge watadu atindiro ti ngba ga Yekova sunge si du na nyanyakipaha. Si nga gu momu nga ga du ni “ga Mbori abadiasunge.” (1 Kor. 3:9) Gu he du ni bawenehe rengbe ka nye na nyanyakipaha ka ani angerafuo ho ti aregbo dunduko. Wakina gure a, ani nika nye na ngbarago ka ani kakuti berãkurii pa wai duhe ni pa irisa ka mangasunge na Yekova. Ani aringbisanga gu asadatise ani amangaha na ga kura aboro te. Ani aberãnga gupai nga gu sunge Yekova nafuhe furani ani mangihe si na paha kusende ti gu ko nafuhe fu kura aboro te.​—Gara. 6:4.

Si rengbe kadu nga Yoane aima ino gupai nga gako sunge tungusapai andunga kumbatayo tipa gbanga regbo te, ono ko aainongo pa wai si nika digo ni wiri ipo te. (Yo. 3:30) Rogo gu garã nangia 30 F.B.K., Bakindo Erode aba Yoane ku bambukiso yo fuo adiwi sita gbua tingbafuo ko bapatiza Yesu. Wa si avura duwo, Yoane amangi ai gupai ko arengbe ka mangaha tipa gupai nga kaa tungusapai atungusa kindi. (Mk. 6:17-20) Ginipai naundo ko ko nye na ngbarago rogo agi aˈariapai re? Ko amoiberãko kuti agu apai nga ga toro.

Ho Yoane adu ni bambukiso yo, ko agi pangbanga tipa wai ga Yesu sunge tungusapai aakio kumbatayo. (Mt. 11:2; Rk. 7:18) Yoane aima ida kuti gupai nga Yesu nangia Masiya, ono si rengbe kadu nga ko aima bakabangiriko nga wai du Yesu nika digiso agu apai dunduko Ziazia  Kekeapai aya Masiya nika mangaha. Wa duhe nga Masiya nika dia gu zogarago nga ga bakindo, ya mo si rengbe kadu nga ga Yesu zogarago nika tona nibasa? Ya mo si asa gupai nga i kusi Yoane bambukiso yo? Nidu Yoane na nyemu ka ino dungu apai tipa gupai Yesu nika mangaha, ko akedi gako abawiriki ue i ndu ka sana Yesu na gu sanahe nga: ‘Gu ni naye nga mo, watadu ani ka ngera ti gu kura ni?’ (Rk. 7:19) Ho i akaragatiyo ni, si nawira wa Yoane aima degatuko wenengai wa i aaringbisa pa wai Yesu ahusi aboro ngba iiriwo gene na ki kedi yo nga i ndu ki gumba gupai fu Yoane nga: “Airavurari nangera, airaterenga nata, airangbataka nahu, airangbianga ki nigi pai, kangba aboro ki nizingi, i nitungusi wene pangbanga fu rungorungo aboro.”​—Rk. 7:20-22.

Zanga kapa, Yoane aima gbia ngarasaro ti gu pangbanga gako abawiriki aye na ni. Si aima yugo gupai nga Yesu nadigiso gu sangbaanebi nga ga Masiya. Wa vura duhe nga Yesu aakusanga Yoane bambukiso yo te, ko aima inoho nga gako sunge adu na kina nyanyakipaha. Wa Yoane avura du vurũ rogo agi akpakarapai re, ko aduadu na ndupai beko kadu na ngbarago.

Ka ani moiberãrani kuti agu apai nga ga toro wakina Yoane, ani nika du na rengba ka hipai na ngbarago gbiati zerangbaduse. (Koro. 1:9-11) Ani rengbe ka manga gipai re ni geda ani Ziazia Kekeapai na kini berẽkuriihe, na si nika undo rani ani ini gupai nga ai gupai ani amangaha fu Mbori, si na kina nyanyakipaha. (1 Kor. 15:58) Sandra ape gupai nga: “Geda kapita sa nga ga Baibiri rogo aˈuru ni basasa ima undore mi mbedi na Yekova. Si naundo re mi moiberãre kuti ko angianga kuti tire ya.” Ani rengbe ka maaberãrani a kuti agu apangbanga du tipa agu asunge awirinarani amangaha fu Yekova, si rengbe ka undo rani ani mbu berãpa tirani na ki gbe berãrani kuti agu apai Yekova amangaha. Sandra ape gupai nga, “Gu mbakadapai nga ga JW Broadcasting^® du rogo adiwi ni basasa naundo rani ani du mbembedi na riigbu, na si undo rani ani nye na ngbarago ti ngba gaani sunge.”

Vuru gu wiri umba regbo yo Yoane Bafu Bapatiza atungusipai, ko atungusipai na “toro Eriya na tanduko,” na wakina Eriya, ko “adu ni boro nihi dungu apai wa kina rani.” (Rk. 1:17; Yak. 5:17) Ka ani wiriki ga Yoane kpiapai nga ga du na tambuahe na kini gbe berãrani kina kuti mangasunge fu Yekova, ani ima rengba a ka nye na ngbarago ti ngba gaani sunge Kindo, ka kina ginipai vura manga rani vurũ rogo raka yo.