1-2. (a) Tipagine du Aramegido ti ni nga wene pangbanga fu aboro? (b) Gini asanahe ani nika sakapai tipaha rogo gi kekeapai re?

MO ABINGO aboro i nimangisunge na gu fugo nga “Aramegido” tipa gu vura i asoho na kere aũvura watadu tipa gberãngo? Gu kparakparapai du dagba gupai aboro apehe na gu Ziazia Kekeapai apehe tipa Aramegido nga, Aramegido nga wene pangbanga, nga gu nafu ngbarago! (Yugo. 1:3) Gu vura nga Aramegido agbarasanga aboro dunduko te ono si nika batasa yo! Ngba gini gene?

² Ziazia Kekeapai nayugo gupai nga gu vura nga ga Aramegido nika batasa aboro ni digisoho gu zogarago nga ga wiri aboro. Si nika gbarasa gbegberẽ aboro na ki batasi ruruyo. Gi vura re nika batasa aboro a ni gbarasaha agu aboro na gbarasa kpotosende. (Yugo. 11:18) Tipa ani rugutirani na gipai re ziazia, ani sakingo pai tipa asanahe biama: Ginihe nga Aramegido? Gini apai nika manga mbata fu Aramegido? Waigu rengbe ani kadu dagba agu aboro nika bata ti regbo Aramegido? Waigu rengbe ani ka nye niruru rani wa Aramegido ambeda?

3. (a) Rogo gu fugoyo nga “Aramegido” nga gine? (b) Ringbisihe kuti Yugoti 16:14, 16, tipagine rengbe ani ka ya ti ni wẽ Aramegido nga ndikidi ba te?

³ Oni gedi Yugoti 16:14, 16. Ziazia Kekeapai mangisunge na gu fugo nga “Aramegido” bara sa gbua, na si naye rogo gu pa-Ebere du rogoyo nga, “Gangara Megido.” (Yugo. 16:16, NW) Megido angia gbata rogo gu ringara aYisaraere naadu mbata. (Yos. 17:11) Ono Aramegido nga ndikidi ba auru kpotosende te. Ka pe kina boro rengo, si nayugopa wai i nika dungura “abakindo zegino dunduko” nga agu yo nika sovura kuti Yekova. (Yugo. 16:14) Ono tie, rogo gi kekeapai re, ani nika mangasunge amanga a na gu fugo nga “Aramegido” tipa ka yugo pa gu vura nika ngbefuo dungurayo agu abakindo nga ga zegino yo.  Wai du ani ainoho nga Aramegido ayugongo pa dindikidi ba te? Bambatapai nga, ndikidi bagangara ho nga Megido te. Uepai nga, ka gu rago nga Megido rengbenga na “abakindo zegino dunduko” na gayo ariivura gbiati gayo ahu vura te. Biatapai nga, wa gu ani nika bihe kumbatayo rogo gi kekeapai re, gu vura nga Aramegido nika tona ho “abakindo” zegino nika zubo ga Mbori aboro ni, nga aguyo naraka rogo dungu aba rogo zegino dunduko.

4. Tipagine Yekova aringbisi gako bakere yangara vura ti ni kuti Megido?

⁴ Tipagine Yekova aringbisa gako bakere yangara vura ti ni kuti Megido? Ti agu aregbo i ake Ziazia Kekeapai ti ni, i anaaso dungu avura gbe Megido yo na pati gu Ngboongboorago nga Yizerere. Ti kura aregbo, Yekova anaaundo gako aboro aundo i dibe agu avura re. Ni kpiapai, Mbori aundo ga aYisaraere Basapungbanga nangia Baraka “pati aime Megido” yo ko dibe gu riivura nangia ga aKanano rimo baira yo angia Sisera. Baraka na gu denebi nangia Debora atambua Yekova tipa gayo iiriwo diabese. I abibia ki ya: “Akerekuru ngbangbaturũ yo aso vura . . . na Sisera. Gu di nga Kisona si afu na yo ku sa yo.”​—Abasa. 5:19-21.

5. Ngba gini nyanyakipa gene gu vura nga ga Aramegido nika du kia ti gu vura Baraka aso ho?

⁵ ABaraka na Debora adigisi gayo bia na agu afugo nga: “Ako Yekova, avuraro nikpíki akpika a wo dunduko! Ono agu yo nakpi nyemu ko i dú wa uru ho si nakura ni be omehe.” (Abasa. 5:31) Ti regbo gu vura nga ga Aramegido, i nika gbarasa avura Mbori agbarasa a, na agu aboro nakpinyemu Mbori ki bati. Ono nyanyakipa kparakparapai kinaho dagba agu avura du ue re. Ti regbo gu vura nga ga Aramegido, ga Mbori aboro asonga vura te. I adunga na ahu vura beyo a te! Gayo “ome nika du ni nye yo zezeredi na kini yugu gayo kido kuti” Yekova gbiati gu gako ariivura du ngbangbaturũ yo.​—Yes. 30:15, NW; Yugo. 19:11-15.

6. Gini he rengbe Yekova ka manga sunge nani ka gbarasa avurako ti regbo gu vura nga ga Aramegido?

⁶ Waigu Mbori ni ka diabe avurako ti regbo Aramegido? Ko ima rengba ka mangasunge na dungu agene. Ni kpiapai, ko ima rengba ka mangasunge na abazigizo, amorogumba, gbiati ikpirogumba. (Eyo. 38:22, 23; Yeze. 38:19-22) Ko ima rengba ka sa avurako i nisovura kina kuti tiyo dagbatiyo. (2 Peka 20:17, 22, 23) Na ko ima rengba ka mangasunge na gako amaraika tipa i imi gbegberẽ aboro. (Yes. 37:36) Ka Mbori vura mangasunge na kina gini he, ko nika duadu na diabese. Ko nika gbarasa avurako dunduko. Na ruru aboro dunduko nika bata.​—Snz. 3:25, 26.

7-8. (a) Ringbisihe kuti 1 ATesaroniko 5:1-6, gini takapandepai agu abazogo nga ga zegino yo nika mangaha? (b) Tipagine gi takapandepai re nika du ti ni ni kere ziree?

⁷ Takapande pa ‘Zereda, na ngbabase’ nika manga mbata fu “rago Gbia.” (Oni gedi 1 ATesaroniko 5:1-6.) Rogo 1 ATesaroniko 5:2, “rago Gbia” watadu ga Yekova uru nayugopa “bakere gberãngbi.” (Yugo. 7:14) Waigu ani nika ino gu regbo gu bakere gberãngbi re nika tona ti ni? Ziazia Kekeapai nagumba gupai nga gu takapande re nika du kia. Gu takapande pa zereda na ngbabase re nika yugo gupai nga bakere gberãngbi ima tona.

⁸ Si nika ngia gu takapande pa ‘zereda na ngbabase’ i agumba paha kumbatayo. Tipagine agu abazogo nga ga zegino yo nika gumba gupai re ti ni? Ya mo abarumbatayo rogo pambori akodatiyo na yo? Si ima rengba kadu nga i nika kodatiyo akoda. Wa vura duhe wo, gu takapandepa pai re nika ngia gu kura kere ziree nga ga adaimona. Ono gu ziree re nika du ni kere ziree mbiko si nika sa aboro i berẽ  gupai nga ngba bayo angba, mbata fu gu bakere gberãngbi nga gu naamanganga mbata rogo gu pangbanga yo nga ga aboro ya nika tona. Nirengo, ‘gberãngbi nika ye ku ri yo ni ba sa, a wa imisiri pai sa gu de du na gude.’ Ginipai nika manga tipa ga Yekova ruru amoyambu? Mbiko gupai nga i ainongo gini regbo nzunzu bakere gberãngbi nika tona ti ni te, iriwopai nika ti ati tiyo ho si nika tona ni, ono i nika duadu regerege tipaha.

9. Ya mo Yekova nika gbarasa ga Satana zegino dunduko ti bangisa regbo sa? Oni sakingo rogoyo.

⁹ Yekova agbarasanga ga Satana zegino dunduko kusayo ti bangisa regbo sa wa gu ko amangihe ti rago Noa te. Kuba gure, ko nika gbarasaha ngba agene ue. Ni bambataha, ko nika gbarasa Babera Du na Bakere Ome Ti Ni nga bariwara ngbii zire pambori. Fuo gure, ti regbo Aramegido, ko nika gbarasa yangara ga Satana zegino nga gu nakoda gaha birĩ zogarago, gaha rikavura, gbiati gaha ababagiahe. Ani nika sakapai futufutu tipa gu nyanyakipa apai ue re.

10. Ringbisihe kuti Yugoti 17:1, 6, na 18:24, tipagine Yekova nika gbarasa bakere Babera ti ni?

¹⁰ ‘Gu sapangbanga du tipa debäri.’ (Oni gedi Yugoti 17:1, 6; 18:24.) Babera Du na Bakere Ome Ti Ni ima ye na bakere gbarasa rimo kuti rimo Mbori. Si ima yugo dungu aziree tipa Mbori. Si namanga sunge bäri [rogo toro yo] ni mangaha pabakure na agu abazogo nga ga zegino yo. Si ima mangasunge na gaha ome ka ri ga aboro marã. Na ziree pambori ima imo badungu aboro, kodihe na ga Mbori amoyambu. (Yugo. 19:2) Waigu Yekova nika gbarasa Babera Du na Bakere Ome Ti Ni?

11. Ginihe du nga “zamba nyarinde,” na wai du Mbori nika mangasunge na ni kuti Babera Du na Bakere Ome Ti Ni?

¹¹ Yekova nika mangasunge na gu zamba nyarinde du “gbangaru bawe” tipa ka gbarasa gu “debari” nga bakere Babera. Gu nyarinde re narukuba United Nations (Yu-eni). Agu agbangaru du bawe re narukuba agu azogarago naundo gu riigbu re. Ti gu regbo nika da bangiri Mbori, agu azogarago re nika zubo debäri nga Bakere Babera. I nika ‘gbarasa ri ni kundiri ri’  ni roga yo gari aũkumuko dunduko na ki yugupa wai du ri ni kere gbegberẽ ri fu aboro. (Yugo. 17:3, 16) Gu gbarasahe re nika manga ni ipo si kidu wa ka i ya si mangi “rogo uru sa.” Sidu, kina iriwopai nika ti ti agu aboro nasongoda ziree pambori, mbiko si naata ngbaduhe ki ni ya: “Mi nasunga ni nakindo, dekurugbo nga mi te, mi abí nga rungo te.”​—Yugo. 18:7, 8.

12. Ginipai Yekova nikaa mbunga aboro zegino i mangihe ya, na tipagine?

¹² Mbori ambunga aboro zegino tipa i gbarasi gako aboro te. Gako aboro na rimoko riyo, na i ima gia gu gako zinahe du tipa kura kusayo rogo Babera Du na Bakere Ome Ti Ni. (Amo. 15:16, 17; Yugo. 18:4) Na i ima mangasunge nyanyaki tipa ka undo aboro tipa i zubo behe. Sidu, ga Yekova amoyambu adianga gaha “gberãngbi” te. Wa vura duhe wo, gayo idapase nika duadu ni asadi asadihe.

13. (a) Ginihe nga Gogo? (b) Ringbisihe kuti Yezekere 38:2, 8, 9, ginipai nika sa Gogo si zubo ga Yekova aboro?

¹³ Gu zubohe nga Gogo. (Oni gedi Yezekere 38:2, 8, 9.) Fuo Yekova gbarasi agu ariigbu dunduko nga ga ziree pambori, pambori nika nye gbua sa auru kpotosende. Kina ga Yekova amoyambu sa nika nye. Rengo ngaha nga, Satana nika du na bakere zinga. Ko nika yugo gako zinga ni mangako sunge na ‘gbigbitapai,’ nga gu nika ngia ziree apangbanga be adaimona nga gu nika sa dungura dungura ariigbu tipa si zubo ga Yekova amoyambu. (Yugo. 16:13, 14) I nayamba gu dungura dungura ariigbu re nga “Gogo. . du rogo gu ringara nga ga Magogo.” Gu vura nga ga Aramegido nika tona ho agu ariigbu re nika zubo ga Yekova aboro ni.​—Yugo. 16:16.

14. Ginipai Gogo nika ye ka inoho?

¹⁴ Gogo nika kido kuti gaha ome nga gu “rikavura nga ga be borose.” (2 Peka 32:8) Ani nika kido kina kuti Yekova nga gaani Mbori, nga gupai nika du bangiri ariigbu wakina pa mungo. Nirengo, agu ambori nga ga Babera Du na Bakere Ome Ti Ni arengbanga ka batasaha be “nyarinde” gbiati “gu gbangaru” du bawe te! (Yugo. 17:16) Sidu, agu ariigbu re nika berã gupai nga si nika du taata tipa i gbarasi rani. I nika zubo ga Yekova aboro “wa  dubo na dada ringara.” (Yeze. 38:16) Ono ti gu regbo re, agu ariigbu re nika bi gupai nga ka i batingo te. Wakina Faro Zamba Baime yo, i nika ino gupai nga i nasovura kuti Yekova.​—Gate 14:1-4; Yeze. 38:3, 4, 18, 21-23.

15. Ginipai Yesu nika mangaha ti regbo gu vura nga ga Aramegido?

¹⁵ Kristo gbiati gako riivura du ngbangbaturũ yo nika banda ga Mbori aboro na ki gbarasi agu ariigbu re gbiati gaha ariivura. (Yugo. 19:11, 14, 15) Ginipai nika manga tipa gu bakere vura Yekova nga Satana nga guko nika gumba ziree fu agu ariigbu re ki sayo i zubo ga Mbori aboro ti regbo Aramegido? Yesu nika ba ko gbiati gako adaimona ku rogo gu due zanga mburuhe ti ni, ki kisi ko koyo tipa agarã kutu.​—Yugo. 20:1-3.

16. (a) Waigu ani ayugo gupai nga ani ima ‘ino Mbori’? (b) Ginipai nika manga fu agu aboro ini Yekova ti regbo gu vura nga ga Aramegido?

¹⁶ Singia ani nga vovo aboro rogo rengo yo watadu ani ima dia ndugu agarã ku rogoho, tipa ka bata ti regbo Aramegido, si naida ani yugu gupai nga ani ima ino “Mbori” na ani ‘nagia sangba wene pangbanga nga ga gaani Gbia Yesu.’ (2 Tesa. 1:7-9) Ani naino “Mbori” ho ani aino agu apai ni ko akpinyemuhe, gu ko asogaha, na gako sigirasigira arugute. Ani nayugo gupai a nga ani ima ino ko ho ani akpinyemu ko ni, kini gisangbako na kini irisi kina ko sa. (1 Yo. 2:3-5; 5:3) Ho ani ayugo gupai ni nga ani ima ino Mbori, ani nadu na gu mamu berani nga ga ‘ino’ ko rani, na gipai re nika batasa unga rani ti regbo Aramegido! (1 Kor. 8:3) Waigu duhe wo? Si wo mbiko gupai nga, ka Mbori “ini” rani, gure nayugo gupai nga ko ima ida na ani.

17. Ginipai pa gia ani sangba gu “wene pangbanga nga ga gaani Gbia Yesu” akodaha?

¹⁷ Gu “wene pangbanga nga ga gaani Gbia Yesu” nakoda agu arengo dunduko Yesu ayuguhe, nga gu du rogo Fugo Mbori yo. Ani nagiasangba gu wene pangbanga re ni manga ani pai kutini rogo gaani raka yo. Gu giasangba re nakoda maa agu apai nga ga Kindo mbatayo rogo raka ya, kini raki ringbisihe kuti ga Mbori  arugute na kini takipande ga Mbori Kindo. (Mt. 6:33; 24:14) Berewe a, si nakoda songoda mbedimbedi awirina Kristo wa i amanga gayo nyanyakipa sunge.​—Mt. 25:31-40.

18. Rogo gini gene mbedimbedi awirina Kristo nika fu mosoro fu gu kura akandoro?

¹⁸ Ga Mbori mbedimbedi amoyambu nika fu mosoro barambeda fu “gu kura akandoro” tipa agu apai dunduko i aundo yo na ni. (Yo. 10:16) Waigu duhe wo? Mbata fu gu vura nga ga Aramegido tona, i nika zingisa agu aboro azingisa be kpio dunduko du bange yo nga 144,000 ku ngbangbaturũ yo na gu kpotose tiyo nga ga toro kaa kpingo ya. Ti gu regbo re, i nika du ni papara gu riivura du ngbangbaturũ yo nga gu nika gbarasa Gogo na ki banda “bakere rimbasa aboro” nga ga Yekova aboro. (Yugo. 2:26, 27; 7:9, 10) Bakere rimbasa aboro nika du na bakere ngbarago nga i asongodi ga Yekova mbedimbedi amoyambu ho i adu ni auru kpotosende.

19-20. Ka ani vura du kina rogo gini kpakarapai yo vurũ, waigu rengbe ani ka nye ni rururani wa Aramegido ambeda?

¹⁹ Ti gi kere kpakarakpakara yangada arame re, badungu ga Yekova aboro nagbiatiyo na dungu aʹasada. Wa vura duhe wo, ani ima rengba ka hipai na ngbarago. (Yak. 1:2-4) Pai sa rengbe ka undo rani wenengai nga ka kpatakara kuti gu kparakpee naye ngbaduseyo. (Rk. 21:36) Si aidanga ani naamanga kina kparakpee sa te, ono si naida aida a ani naawisigo Fugo Mbori na aʹuru dunduko na kini berẽkuriihe kodihe na agu asangbanebi du tipa agu apai nika manga barambeda. (Tam. 77:12) Ka ani mangi agi apai re na kini mangi ome gene tungusapai yo, ani nika banda gaani idapase gbiati maabangirise nyanyaki.

²⁰ Mo berẽnga pa gu ngbarago mo nika du na ni ho i nika gbarasa Babera Du na Bakere Ome Ti Ni ni na ho Aramegido nika nyasa ni! Gu nyakipaha gbe nga, mo berẽnga pa gu ngbarago mo nika du na ni ho rimo Mbori gbiati gako bakere pagbia nika du ni ni ziasiziasi he! (Yeze. 38:23) Nirengo, Aramegido nga wene pangbanga fu agu aboro ini Mbori, kini gisangba wiriko, na kini hipai dati yangadaha.​—Mt. 24:13.