1. Ginipai naadu tipa gu mokedi nangia Yoane ti digido bambata kama agarã?

TI DIGIDO bambata kama agarã, gu mokedi nangia Yoane adu rogo kpakarapai. Ko adu ni gbinzako, ki nye kubako be kaza Patemo yo, na si nawira gupai nga ko nangia gu yangara mokedi naadu ti gu regbo re ni ungako kindi. (Yugo. 1:9) Ko aima ino gupai nga abasamungu kuti ndikidi pambori aaingisa adungurati na kini ye na kparakaro ku dagba aKristano. Si ima rengba kadu nga si aangera wa ka i ya ndikidi aKristano adunga ho berewe fuo regbo ngbutuko te.​—Yuda 4; Yugo. 2:15, 20; 3:1, 17.

2. Ringbisihe kuti Yugoti 7:9-14, gini yuguyugupai Yoane abihe? (Oni bi gu sura duti kpotoho.)

² Ho Yoane adu ni rogo gi kpakarapai re, ko abi yuguyugupai tipa kumbatayo. Rogo gu yuguyugupai re yo, i ape gupai fu amaraika nga i zadi agu awege nga ga bakere gberãngbi daho i nika nogoda yangara nogodahe ni ti ngbanda kpakpu badona nga ga ga Mbori amoyambu. (Yugo. 7:1-3) Bange agu aboro du rogo gu badona re nga 144,000, na i nika zogarago na Yesu ngbangbaturũ yo. (Rk. 12:32; Yugo. 7:4) Fuo gure, Yoane apepa gu kura badona nga ga aboro, nga aguyo du ni badungu yo, na gipai re asako ko poi kuari ki ya: “Oni ngére,”​—gi fugo re ima rengba ka yugo gupai nga iriwo rago aima ti tiko mbiko gupai ko ainongo nga ko nika bihe ya. Ginipai Yoane abihe? “Bakere rimbasa aboro, ka boro ageda nga yo wa sa ya, dagba rika aboro dunduko, na angbatunga yo, na aboro, na angbatunga afugo dunduko, i arundu barangba mbatabakindo, na barangba Wiri Kandoro.” (Oni gedi Yugoti 7:9-14.) Oni berẽnga pa wai Yoane adu na ngbarago ka inopai tipa badungu aboro nga aguyo nikaa manga ndikidi irisombori kumbatayo!

3. (a) Tipagine si aida ga Yoane yuguyugupai nyakasi gaani idapase ti ni? (b) Gini apai ani nika wirikapai tipaha rogo gi kekeapai re?

³ Zanga kapa, gu yuguyugupai re aima nyakasa ga Yoane idapase. Si naida aida gu yuguyugupai re nyakasi gaani idapase bakere  gbe, bambiko ani naraka ti gu regbo si adigiso tihe ti ni! Ti gi gaani regbo re, ani ima bi wai amirioni aboro natona kaa iriso Yekova na kidu na gu maabangirise nga ga bata ti regbo bakere gberãngbi na ki raki nyeanye kindi auru kpotosende. Rogo gi kekeapai re, ani nika wirikapai tipa wai Yekova ayugupa gu bakere rimbasa aboro re fu gako aboro agarã naima susa muambe bawe kusayo. Fuo gure, ani nika sakapai tipa apai ue nibipa gu rimbasa aboro re: (1) bangeyo na (2) wai du yo rogo zegino dunduko. Si naida agi apai re nyakasi gu idapase nga ga agu aboro dunduko du na maabangirise kadu ni papara gu badona aboro re.

4. Gini rengo nga ga Ziazia Kekeapai agu apambori i aya tipaha wẽ si nga ga aKristano aruganga tiyo na ni ya, na waigu aBawiriki Ziazia Kekeapai adu kia rogo gi bangiriba re?

⁴ Agu apambori i aya tipaha wẽ si nga ga aKristano ayugongo gu rengo nga ga Ziazia Kekeapai nga gu nape gupai nga uru adu kinaho aboro giasangba nika raka nyeanye kindi auru kpotosende te. (2 Kor. 4:3, 4) Areme, badungu agu apambori i aya tipaha wẽ si nga ga aKristano nayugo gupai nga wene aboro dunduko nandu ku ngbangbaturũ yo ho i akpi ni. Ono tie, gu umba badona nangia ga aBawiriki Ziazia Kekeapai nga aguyo naakusa Ngbaõbambu Sinziri tona rogo 1879 adu na kura berãpai kia. I aima rugatiyo na gupai nga Mbori nika karaga Paradizo ku auro kpotosende na amirioni aboro giasangba nika raka auru kpotosende ane​—angianga ngbangbaturũ yo ya. Ono tie, si aima dia yo na regbo i rugutiyo ziazia na pa agu aboro nika ngia agu aboro giasangba re.​—Mt. 6:10.

5. Gini berãpai aBawiriki Ziazia Kekeapai adu na ni tipa agu aboro du bangeyo nga 144,000?

⁵ Rengo ngaha nga, aBawiriki Ziazia Kekeapai aini gupai rogo Ziazia Kekeapai yo nga kura badona aboro kinaho “i atumo yo rogo kpotosende” tipa i zogorago na Yesu ngbangbaturũ yo. (Yugo. 14:3) Si adu nga gu badona re nika ngia zaaza aKristano nga aguyo nairiso Yekova ni ruruyo auru kpotosende du bangeyo nga 144,000. Na ginipai tie du tipa bakere rimbasa aboro tigayo?

6. Gini berãpai aBawiriki Ziazia Kekeapai adu na ni tipa bakere rimbasa aboro?

⁶ Rogo ga Yoane yuguyugupai yo, ko abi gu badona aboro re i ‘narundu barangba mbatabakindo, na barangba Wiri Kandoro.’ (Yugo. 7:9) Agi afugo re asa aBawiriki Ziazia Kekeapai i da kuti gu digisopai nga, wakina agu aboro du bangeyo nga 144,000, bakere rimbasa aboro nika raka a ngbangbaturũ yo. Sidu, ka si adu nga agu aboro du bangeyo nga 144,000 nika raka ngbangbaturũ yo wa sa na bakere rimbasa aboro, wai du ka aguyo arengbe kadu kia ti aguyo? ABawiriki Ziazia Kekeapai aberẽ gupai nga bakere rimbasa aboro nika ngia agu aKristano naagianga sangba Mbori wenengai ya auru kpotosende. Wa si avura du nga i aaraka gigiri raka araka, agu akurayo kinaho naadu kindi rogo agu apambori i aya tipaha wẽ si nga ga aKristano. ABawiriki Ziazia Kekeapai ada kuti gu digisopai nga ngbatunga agu aboro re aduadu na bete nyemuse tipa Mbori, ono ka si arengbanga ka sayo i rẽ ka zogarago na Yesu ya. Mbiko gupai nga ga bakere rimbasa aboro nyemuse tipa Mbori aadunga ni bakerehe te, i arengbe kadu ngbangbaturũ yo barangba mbatabakindo, ono angianga ka sungo auru mbatabakindo ya.

7. Ringbisihe kuti aBawiriki Ziazia Kekeapai, ada du si adu nga i nika raka auru kpotosende ti regbo Agarã Kutu, na gini berãpai aBawiriki Ziazia Kekeapai adu na ni tipa gu ruru akumba naadu bakuru kusayo?

⁷ Ada tie si adu nga i nika raka auru kpotosende ane? ABawiriki Ziazia Kekeapai adu na gu berãpai nga fuo i dungura agu aboro du bangeyo nga 144,000 gbiati bakere rimbasa aboro ku ngbangbaturũ yo, kura amirioni aboro nika raka auru kpotosende ane ki gbia amaku nga ga ga Kristo Zogarago Tipa Agarã Kutu. ABawiriki Ziazia Kekeapai aadunga na gu berãpai nga agu amirioni aboro re nikaa iriso Yekova mbata fu  tona ga Kristo zogarago te. Kuba gure, i adu na gu berãpai nga i nika yugopai tipa Yekova fu gi badona aboro re ti regbo ga Yesu zogarago tipa Agarã Kutu. Fuo gure ngbutuko, agu aboro nikaa mangapai kuti ga Yekova arugute kini gbia nyenye unga auru kpotosende, na i kini gbarasi aguyo kusayo nika samungu kuti Yekova. ABawiriki Ziazia Kekeapai adu na gu berãpai a nga si ima rengba kadu nga agu aboro nika mangasunge auru kpotosende ni “abazogo” ti gu regbo re​—kodihe na gu “nyanyakipa aboro naadu mbata” (gu ruru akumba naakpi mbata fu Kristo)​—nika gbia mosoro agbia nga ga raka ngbangbaturũ yo ti digido ga Kristo zogarago tipa Agarã Kutu.​—Tam. 45:16.

8. Gini badona aboro biata si adu wa ka i ya i adu rogo gu ringbisapai yo nga ga Mbori?

⁸ Sidu, aBawiriki Ziazia Kekeapai adu na gu berãpai nga badona aboro aduho biata: (1) agu aboro du bangeyo nga 144,000, nga aguyo nika zogarago na Yesu ngbangbaturũ yo; (2) gu bakere rimbasa aboro naadunga na bakere nyemuse ya, nga aguyo si adu nga i nika ru barangba mbatabakindo na barangba Wiri Kandoro ngbangbaturũ yo; na (3) gu mirioni aboro si adu nga i nika yugopai fuyo tipa Yekova auru kpotosende ti regbo ga Kristo Zogarago Tipa Agarã Kutu. * Ono tie, ti gu ga Yekova regbo nada bangiriko, ko aundo yo i rugutiyo na gipai re ziazia.​—Snz. 4:18.

9. (a) Rogo gini gene rengbe bakere rimbasa aboro ka ru “barangba Wiri Kandoro”? (b) Tipagine ru gu giarogopai yo aru ti ni du rogo Yugoti 7:9?

⁹ Rogo gu garã nangia 1935, aDezire Yekova aima ye ka rugatiyo wenengai na pa gu bakere rimbasa aboro Yoane abiyo rogo yuguyugupai yo. ADezire Yekova aye ka rugatiyo na gupai nga si aidanga bakere rimbasa aboro ndu ndikidi nduge andu ku ngbangbaturũ yo tipa ka ru “barangba mbatabakindo, na barangba Wiri Kandoro” te. Kuba gure, i namanga gipai re rogo kura gene yo. Wa vura duhe nga bakere rimbasa aboro nika raka auru kpotosende, i naru “barangba mbatabakindo” ni rugayo tiyo na ga Yekova pagbia na kini ra ni goyo kutii gako bakere pagbia. (Yes. 66:1) I naru “barangba Wiri Kandoro” nidu yo na idapase kuti ga Yesu motumo tumorii. Kura veresi kinaho rogo Ziazia Kekeapai yo nga gu rengbe ka undo rani ani rugutirani na gupai nga Yugoti 7:9 na kura rogoyo kia. Gu veresi re nga Matayo 25:31, 32, nga gu i nape gupai rogoho nga i “nadungura” “arikaaboro” dunduko kodihe na gbegberẽ aboro ku barangba Yesu wa du ko rii gako mbatabakindo. Si tie ziazia nga, agi arikaaboro re dunduko ngbangbaturũ yo te, ono auru kpotosende. Gi ariapai rogo giarogopai yo re ruaru. Si nasaka rogo ndu gupai yo Ziazia Kekeapai apenga gupai ti ni nga bakere rimbasa aboro nika ndu ku ngbangbaturũ yo ya. Badona sa nga ga aboro nika raka nyeanye kindi ngbangbaturũ yo​—du bangeyo nga 144,000, na i nikaa ‘zoga rago ku auru kpotosende’ na Yesu.​—Yugo. 5:10.

10. Tipagine si aida gupai aida ti ni nga i yugupai tipa Yekova fu bakere rimbasa aboro mbata fu Agarã Kutu?

¹⁰ Natona rogo 1935, aDezire Yekova aima ye ka rugatiyo na gupai nga gu bakere rimbasa aboro Yoane abiyo rogo yuguyugupai yo nga badona nga ga gu ruru aKristano du na maabangirise ka raka auru kpotosende nyeanye kindi. Tipa gupai nga bakere rimbasa aboro bati ti regbo bakere gberãngbi, si naida i yugupai fuyo tipa Yekova mbata fu Agarã Kutu tona. Si nika ida i yugu nyanyaki idapase tipa gupai nga ka ‘diabe pai ka bata be agu apai nika manga dunduko’ mbata fu ga Kristo Zogarago Tipa Agarã Kutu.​—Rk. 21:34-36.

11. Tipagine kura aBawiriki Ziazia Kekeapai aberẽ gupai ti ni nga si ima rengba kadu nga kura aboro kinaho nika ndu ku ngbangbaturũ yo tingbafuo Agarã Kutu?

¹¹ Ono na gu bipai tigaha nga, kura aboro du  ni wene kpiapai auru kpotosende nika ndu ku ngbangbaturũ yo tingbafuo Agarã Kutu? Gu bipai re akuru agarã kusayo rogo gu Ngbaõbambu Sinziri nangia ga Wegebe 15, 1913. Boro aima rengba ka berã gupai nga, ‘Tipagine rengbe gu ruru akumba naadu bakuru kusayo ka gbia kina gu mosoro gbua nga ga raka auru kpotosende ti ni, ono agu aKristano naadunga gbe ni ruruyo ya kini gbia gu mosoro nga ga raka ngbangbaturũ yo?’ Iraira aberãpai ue nasayo i du na gu berãpai re, gu iraira aberãpai re angia: (1) bakere rimbasa aboro nika raka ngbangbaturũ yo, na (2) bakere rimbasa aboro nika ngia agu aKristano adunga ni ruruyo wenengai ya.

12-13. Ginipai mbedimbedi aKristano wa sa na bakere rimbasa aboro narugutiyo na ni nibipa gayo mosoro?

¹² Ono tie, a wa ani nabihe, natona rogo 1935, aDezire Yekova aima rugatiyo ziazia na gupai nga agu aboro nika bata ti regbo Aramegido du nga gu bakere rimbasa aboro Yoane abiyo rogo yuguyugupai yo. I nika “kura rogo bakere gberãngbi” auru kpotosende ane, na i ‘nikaa paa kindi ni bakere fugo, ki ya: “Gaani bata ye be gaani Mbori nasunga auru mbatabakindo, na be Wiri Kandoro.”’ (Yugo. 7:10, 14) Kurii gure, Ziazia Kekeapai nayugo gupai nga agu aboro i azingisa yo ku rogo gu raka nga ga ngbangbaturũ nagbia “kura pai ni wene he susi” gu ruru akumba naadu bakuru kusayo. (Eb. 11:40) Gu vovo giarogopai yo naakuru rogo 1935 afõngbadu awirinarani yo tipa i tona yamba aboro zaaza i ye ka iriso Yekova kidu na gu maabangirise nga ga raka nyeanye kindi auru kpotosende.

¹³ Bakere rimbasa aboro ima du na bakere ngbarago tipa gayo maabangirise. I ima rugatiyo na gupai nga Yekova namanga siapai nibipa wari ruru airisi ko nikaa irisoko ni, singia ngbangbaturũ yo watadu auru kpotosende ane. Mbedimbedi aKristano wa sa na bakere rimbasa aboro rugutiyo na gupai nga gu mosoro i nika gbiaha, i nika gbiaha sa kina mbiko gu weneringise nga ga Yekova arẽnga aboro tipaha ya nga gu ko ayuguhe vurube gu motumo tumorii nga ga Yesu Kristo.​—Rom. 3:24.

14. Tingbafuo 1935, tipagine badungu aboro aabakabangiriyo ti ni tipa wai gu sangbanebi du tipa bakere rimbasa aboro nika digiso tihe?

¹⁴ Tingbafuo ga Mbori aboro du na ziazia giarogopai yo rogo 1935, badungu aboro aabakabangiriyo kindi nga wai du agu aboro du na gu maabangirise nga ga raka auru kpotosende nika da ni bakere rimbasa aboro. Ni kpiapai, Ronald Parkin adu na garãko nga 12 ho aboro aini ada ni nzunzu nga bakere rimbasa aboro. Ko aya, “ti gu regbo re, bange abatungusipai rogo zegino dunduko adu nga 56,000, na badunguyo nangia mbedimbedi aKristano. Sidu, si angeranga wa bakere rimbasa aboro ni badunguyo te.”

15. Waigu Yekova andu kindi kumbatayo kaa dungura bakere rimbasa aboro?

¹⁵ Ono tie, rogo gu dungu bawe agarã nangbefuo  gure, i akedi amokedi ku rogo dungu aringara, na bange aDezire Yekova ki tona kaa kio kina kumbatayo. Sidu, fuo gure, rogo 1968, ani atona kaa wisigo Ziazia Kekeapai na aboro rogo gu buku nga The Truth That Leads to Eternal Life. Gu taata gene si asaka rogo rengo yo nga ga Ziazia Kekeapai ngbaha aima gbe badungu aboro koyo du Yekova ni kisusi gu naadu mbata. Vuru agarã yo biama, abawiriki bangeyo naima susa bisue kama akutu azi bapatiza. Wa gu Kanisa Nga ga Katoriko atona kaa zanga gu ome si adu na ni Latin America yo na rogo kura aringara na wa i ambu gene fu gaani sunge si naandu kumbatayo Eastern Europe yo na rogo agu akura papara Afirika, kura amirioni aboro azi bapatiza. (Yes. 60:22) Rogo agu agarã susi bambeda kusayo, ga Yekova riigbu ima kusa wene aũsunge tipa si undo aboro i wiriki gupai Ziazia Kekeapai ayugoho. Si ima du ziazia nga Yekova nadungura bakere rimbasa aboro​—nga aguyo bangeyo naima susa amirioni muambe awere.

16. Wari i adungura bakere rimbasa aboro ni?

¹⁶ Ho Yoane akepa gako yuguyugupai ni, ko ape gupai nga bakere rimbasa aboro nika ye dagba “rika aboro dunduko, na angbatunga yo, na aboro, na angbatunga afugo dunduko.” Mbata kusayo, gu nebi nangia Zekaraya ape kina ngbatunga gupai re kumbatayo. Ko ake gupai kumbatayo nga: “Ni gu rago re akumba bawe nikazada ga gu boro Ebere baukadi, ki ya, ‘Ani ndú na mo, bambiko ani gi he ya Mbori du na mo.’”​—Zek. 8:23.

17. Ginipai i amangaha tipa ka undo rikaaboro dunduko rogo ngbatunga afugo yo dunduko?

¹⁷ ADezire Yekova ima rugatiyo na gupai nga  tipa gupai nga i dungura aboro rogo ngbatunga afugo yo dunduko, si naida wene pangbanga duadu ni tungusi tungusihe rogo dungu afugo yo. Ani aima digo nisa agu awaraga du tipa wisigo Ziazia Kekeapai tipa agarã naima susa 130, ono awere, ani nasa pai ku rogo akama afugo yo, na sapai ho namangi rogo zegino mbata wa gure te. Si tie ziazia nga, Yekova namanga iiriwopai ti gi gani regbo re nga ga dungura bakere rimbasa aboro dagba ngbatunga aboro yo dunduko. Mbiko gupai nga gu riahe nga ga toro ima duho rogo badungu afugo yo, gi badona aboro du rogo zegino dunduko re ni kodikodi yo rogo irisombori yo. Na aboro ima ino aDezire Yekova ni agu aboro natungusapai zaaza, na kini kpinyemu tiyo dagbatiyo. Nairiwo wai gupai re anyakasa gaani idapase!​—Mt. 24:14; Yo. 13:35.

18. (a) Ringbisihe kuti gupai du rogo Yesaya 46:10, 11, tipagine si airiwongo ti ni tirani nga Yekova ima digiso gu sangbanebi du tipa bakere rimbasa aboro ya? (b) Tipagine agu aboro du na maabangirise ka raka auru kpotosende abingo ho ti ni nga i naká na wenepai beyo ya?

¹⁸ Ani na nduapai berani dunduko tipa kadu na bakere ngbarago tipa gu sangbanebi du tipa bakere rimbasa aboro! Si airiwongo tirani ka ino gupai nga Yekova ima digiso gu sangbanebi re rogo iiriwo gene wa gure te. (Oni gedi Yesaya 46:10, 11.) Bakere rimbasa aboro na tambuahe tipa gu maabangirise Yekova nafuhe fuyo. I abingo ho nga i naká na wenepai beyo ni zanga du yo ni agu aboro i nambedi yo na ziazia toro tipa ka zogarago na Yesu ngbangbaturũ yo te. Ani nagedapai rogo Ziazia Kekeapai yo tipa akumba na adee nga ga idapase yo nga aguyo ziazia toro anaangbe fuyo kumbatayo; ono tie, i nga papara agu aboro du bangeyo nga 144,000 te. Yoane Bafu Bapatiza nga boro sa dagba agu aboro re. (Mt. 11:11) Davide nangia gu kurani. (Amo. 2:34) I nika zingisayo be kpio gbiati dungu agu akurayo tipa i raki rogo paradizo auru kpotosende ane. I dunduko wa sa na bakere rimbasa aboro nika du na momu beyo ka yugo gayo padu ni ruruse fu Yekova na ki songodi gako bakere pagbia.

19. Waigu digisidigisi ga Yoane yuguyugupai nibipa bakere rimbasa aboro anyakasa gupai nga si naida ani mangipai ni ipiipihe ti gi regbo ani araka ti ni re?

¹⁹ Mbori aakodanga amirioni aboro mbata dagba ngbatunga aboro yo dunduko wa gere rogo gu pangbanga yo nga ga aboro te. Singia ani na gu maabangirise nga ga raka ngbangbaturũ yo watadu auru kpotosende, si naida ani undo badungu aboro wa omerani na rengbe na ni tipa i da ni papara bakere rimbasa aboro du nga “kura akandoro.” (Yo. 10:16) Barambeda, Yekova nika ye na gu bakere gberãngbi i agumbapaha kumbatayo nga gu nika gbarasa agu azogarago gbiati apambori naye na rungo kuti rika ngbatunga aboro dunduko. Nairiwo gu bakere momu du kumbatayo nga ga iriso Yekova auru kpotosende nyeanye kindi fu bakere rimbasa aboro re!​—Yugo. 7:14.