GU KEKEAPAI DU TIPA WISIGOHO 37
Tipagine Ani Ara ni Gorani ti ni fu Yekova, na Wai du Ani Amangaha Wo?
‘Ka ani du nga ni zogozogo rani fu Barani te?’—EB. 12:9.
BIA 9 Yekova Nga Gaani Bakindo!
AGU APAI DU ROGO GI KEKEAPAI RE *
1. Tipagine si aida ani du na ranigose fu Yekova ti ni?
SI NAIDA ani du na ranigose fu * Yekova bambiko ko nga bakusirani. Mbiko gi ndupai re, ko na rengo beko ka gumba gupai furani si aida ani mangihe. (Yugo. 4:11) Ono gu kura wene ndupai kinaho si aida ani du na ranigose fu Yekova ti ni, nga gako gene zogarago ni bawenehe. Rogo gu pangbanga nga ga aboro nabaha, badungu aboro ima zogarago kurii akurayo. Ono ho ani arigisa gayo zogarago ni kuti ga Yekova, ani nabihe nga Yekova nga gu bazogo du na tatamana, nyemuse, inapai, na nunga kisusi.—Gate 34:6; Rom. 16:27; 1 Yo. 4:8.
2. Gini nduapai AEbere 12:9-11 afuhe furani tipa ani gisangba Yekova?
2 Yekova naida ani gisangba ko bambiko ko nga gu Barani nakpinyemu rani, angianga mbiko gupai gbua nga ani nagunde ka ba gberãrago tiko ya. Rogo gu ga Pauro waraga ko akehe fu AEbere, ko asaki ndu gupai si aida ti ni ani du ‘ni zogozogo rani fu Barani,’ bambiko ko naraba rani tipa gupai ‘ngba tipa rani.’—Oni gedi AEbere 12:9-11.
3. (a) Waigu ani ayugo gaani ranigose fu Yekova? (b) Gini asanahe ani ka karagapai kutini?
3 Ani nara nigorani fu Yekova ni manga ani ome ka giasangba ko na niso ani vura kuti gu gaani nyemupai nga ga diaberã tipa gupai du ni wenehe na gu du ni gbegberẽhe. (Snz. 3:5) Si taata furani ani gisangba Yekova ho ani awirikapai ni ni bakerehe tipa asinoko. Tipagine? Bambiko agu apai dunduko ko amangaha si naruriipa asinoko. (Tam. 145:9) Ho ani awirikapai ni tipa Yekova ni bakerehe, gu regbo re du a gaani nyemuse tipa ko ada ni bakerehe. Na ho ani akpinyemu Yekova ni, ani aidanga na badungu arugute si gumba gupai furani si aida ani mangihe na gu si aidanga ani mangihe ya te. Ani naʹasada ka wirika wai kaa berã na kini biapai kina wai Yekova aida ani naabihe tipa ka ne gbegberẽpai. (Tam. 97:10) Ono tie, ti kura aregbo, si taata tipa ani gisangba Yekova te. Tipagine duhe ti ni wo? Na ginipai rengbe abaakumba, abaagude, gbiati anaagude ka wirikaha ti agu akpiapai gu banyaki nangia Nemaya; Bakindo Davide; gbiati Maria nangia na Yesu amoihe? Gi kekeapai re nika fu akaragapai kuti agi asanahe re.
NDU GUPAI RENGBEHE KA DU TI NI NI KPAKARAKPAKARAHA FURANI ANI RA NI GORANI FU YEKOVA
4-5. Ringbisihe kuti ARomo 7:21-23, tipagine rengbehe kadu tini ni kpakarakpakaraha kadu na ranigose fu Yekova?
4 Ndupai sa nga gu rengbe ka saha furani ni kpakarakpakaraha ani ra ni gorani fu Yekova nga ani dunduko naadi ingapai na ani nga kpakpa aboro. Sidu, ani na gu toro nga ga samungu. Ho aAdamu na Eva abasasangba Mbori ni ni riyo gu zuzungua Mbori aya ka i ringa ha ya, i adiberã tipa kaa sia gupai du ni wenehe na gu du ni gbegberẽ he tipa tiyo. (Bam. P. 3:22) Areme, badungu aboro nabasa sangba Mbori na i naida kaa manga adiaberã nisayo tipa gupai du ni wenehe na gu du ni gbegberẽhe.
6-7. Gini kurapai rengbe ka saha ni kpakarakpakaraha furani ani du na ranigose fu Yekova? Oni fu nga kpiapai.
7 Zavura agu aboro naima ino Yekova na kini kpinyemuko naʹasada aʹasada ka ra ni goyo fuko. Gu mokedi nangia Pauro aima gbiatiko na gipai re. (Oni gedi ARomo 7:21-23.) Wakina Pauro, ani nakpinyemu ka manga gupai du ni ruruhe bangiri Yekova. Ono tie, ani du wa ka ani sovura ti aregbo dunduko kuti gaani gbegberẽ nyemuapai.
6 Gu kura ndupai rengbe ka saha ni kpakarakpakara ha tipa ani du na ranigose fu Yekova nga gu sino mangaapai na aberã du rogo gu rago ani asono rogoho. Badungu aboro nagumba agu apai furani du kia ti gupai Yekova aidaha. Sidu, si naida ani mangi nyanyaki asadatise tipa ka zanga berã wa agu aboro re. Ani bingo kpiapai sa.
7 Gu mangapai nga kaa sosoda paranga aboro i fu raka yo tipa kina manga bakere marã ima maapai rogo kura arago. Wirinarani du rimori nga Mary * aima gbia tiri na gu sosodahe re. Mbata fu ri wirikipai tipa Yekova, ri awirikipai rogo kura bawene sukuru sa rogo gari ringara. Ga Mary aborokporo aʹasadi ka sosoda ri tipa ri gbata gu sunge ri nikaa gbia bakere marã ti ni na aboro kini fu irisa furi. Na gure nga gupai ri aaidaha. Ono tie, tingbafuo ri wirikipai tipa Yekova na kini tona kaa kpinyemu ko, ri aʹaria gari asásá. Ono si aadunga taata furi te. Sangbari nga: “Kura aregbo kinaho mi agbia momu tipa ka manga bakere marã nga gu naima rengba ka ká na mi ti mangasunge fu Yekova wa gu mi amangaha awere. Mbiko gu gene raka i asonosi re ngbaha, si ni bakpakarakpakaraha fere mi ya oó tipa agu amomu re. Mi naazungadi Yekova tipa ko undo re mi sovura kuti gu asada nga ga idapa gu sunge nika ká na mi ti manga mi sunge fu Yekova na omere dunduko.”—Mt. 6:24.
8. Ginipai ani nika wisigopai tipaha awere?
8 Ani nagbia undo agbia ho ani ara nigorani ni fu Yekova. Ono agu aboro du na bete pagbia beyo wa abaakumba, abaagude, gbiati anaagude, i na kura ndupai beyo ka pekafuo ga Mbori rugapai—ho i apekafuo gako rugapai ni, i nadu na momu beyo ka undo kura aboro. Ani wisigingo bete akpiapai rogo Ziazia
Kekeapai yo nga gu nayugo wai furani rengbe ani ka mangasunge na pagbia ngba gu gene nasa ngbarago ti Yekova.GUPAI RENGBE ABAAKUMBA KA WIRIKAHA BE NEMAYA
Abaakumba nafubee kuti sunge Bambu Kindo yo, kina wai Nemaya amangisunge sa na awirinako tipa ka bungia Yerusarema (Oni bi genewaraga 9-11) *
9. Gini akpakarapai Nemaya agbiatiko na ni?
9 Yekova ima fu gu tindiro fu abaakumba nga ga ngerafuo gako aboro. (1 Pet. 5:2) Abaakumba rengbe ka wirika badungu apai ti wisigo yo wai Nemaya amangipai na ga Yekova aboro. Wa duhe nga Nemaya angia banyaki nga ga Yuda, ko aima du na bakere pagbia beko. (Nem. 1:11; 2:7, 8; 5:14) Oni berẽnga pa bete agu akpakarapai Nemaya agbiatiko na ni. Ko abi gupai nga aYudo aima gbarasa yekaru na i aafunga agamahe tipa si nisongodi aRevi a wa ga Yekova Ndiko aaida i nimangihe te. AYudo aairisongo ga Yekova ndiko tipa Rago Sabiti te, na bete kura akumba aamanga rogatise na kungbo adee. Si adu nga gu Banyaki nangia Nemaya mangipai kuti gi kpakarapai re.—Nem. 13:4-30.
10. Waigu Nemaya amangipai kuti agu akpakarapai ko agbiatiko na ni?
10 Nemaya aamanganga sunge na gako pagbia ka zio aboro ngbaome i pekefuo gako aberãpai te. Kuba gure, ko amangi kparakpee nyanyaki fu Yekova na ki sanako tipa undo, na ko ayugu ga Yekova aNdiko fu aboro. (Nem. 1:4-10; 13:1-3) Nemaya adu a na umbasitise kini mangisunge wa sa na aboro, zavura ki undo yo i bungia gu ngapa nga ga Yerusarema.—Nem. 4:15.
11. Ringbisihe kuti 1 ATesaroniko 2:7, 8, wai du si aida abaakumba nimangipai na agu aboro du rogo dungurati?
11 Si ima rengba kadu nga abaakumba agbianga tiyo na kina gu bangisa akpakarapai Nemaya agbiatiko na ni te, ono i ima rengba ka wirika ko ngba dungu agene. Ni kpiapai, i namanga sunge nyanyaki tipa ka undo awirinayo. Na i abingo tiyo nga i nyakipa yo ti kura aboro mbiko gayo pagbia te. Kuba gure, i namangapai na awirinayo ni nunga. (Oni gedi 1 ATesaroniko 2:7, 8.) Gayo umbasitise na gayo dudunguro nyemuse tipa kura aboro nasayo i nifura na kini mangipai na yo ni weneringise. Andrew, nga guko naima mangasunge ni bakumba tipa dungu agarã aya: “Mi bi gupai nga, ho du bakumba ni na weneringise na kidu na pabakure, si na bakere maapai kurii awirina. Agi asino re nasa awirina i du na giatise rogo dungurati na abaakumba.” Tony nga kura bakumba naima mangasunge ni bakumba tipa dungu agarã aya: “Mi naasada kaa mangapai kuti gu rugute du rogo AFiripoio 2:3 na kini asadi kaa bi kura aboro nga i kiipa yo tire. Gipai re naundo re ka mi asadingo ka zio kura aboro ngbaome i irisi re ya.”
12. Tipagine duhe tini ni nyanyakipa pai abaakumba du na umbasitise?
12 Si naida abaakumba du na umbasitise kina wai du Yekova na umbasitise a. Wa vura duhe nga Yekova nga bakere bazogo nga ga zegino, ko “naumbasi tiko” ka tumba “irazingoahe guguda kuke yo.” (Tam. 18:35; 113: 6, 7) Ka pe guhe nga rengo, Yekova ima soga aboro rukö.—Snz. 16:5.
13. Tipagine si aida bakumba du ti ni na rubangirise tipa gupai ni agumbaha na gu gene ni agumbaha ngbaha?
13 Gene sa bakumba ara ni goni ngbaha fu Yekova nga kadu na rubangirise tipa gupai ni agumbaha na gu gene ni agumbaha ngbaha. Ka si adunga wo ya, ni ima rengba ka fura ngba gbegberẽ gene ka boro zanga fu irisa fu ni. (Yak. 1: 26; Gara. 5: 14, 15) Andrew, ani nifura tipa ko mbata aya: “Ti kura aregbo, mi naida aida ka fura ngba gbegberẽ gene fu gu wirina mi abihe nga ni airisango re wangia mi bakumba te. Ono tie, mi ima berãkurii agu akpiapai nga ga ruru akumba du payo rogo Baibiri, na si ima undo re mi wirikipa nyakapa du na umbasitise na padu ni bayee boro.” Bakumba nayugoho nga ni nara ni goni fu Yekova nifura ni na awirina watadu kura abaakumba rogo dungurati ni nyemuse na nunga.—Koro. 4:6.
GUPAI RENGBE ABAAGUDE KA WIRIKAHA BE BAKINDO DAVIDE
14. Gini sunge Yekova nafuhe fu abaagude, na ginipai ko aidaha beyo?
14 Yekova ima fu gu sunge fu baagude nga ga du ni bariikporo, na Mbori naida ko niraba awiriko na kini rugu yo. (1 Kor. 11:3; Ef. 6:4) Ono gu pagbia nga ga baagude na ngbandaha ti ni—ni du wa ka ni karagapai fu Yekova, nga guko rimo vungu aenge yo du ko ni. (Ef. 3:14, 15) Abaagude nayugo gayo ranigose fu Yekova ni manga yo sunge na gayo pagbia ngba gu gene nafu ngbarago fu Mbori. I rengbe ka wirikapai ni bakerehe ni wisigo yo pai tipa gu raka nangia ga Bakindo Davide.
Gu gene baagude amanga kparakpee ngbaha nayugo gupai fu gako aborokporo nga ko nga boro umbasitise (Oni bi genewaraga 15-16) *
15. Tipagine du Bakindo Davide ti ni ni wene kpiapai fu abaagude?
15 Yekova asia Davide ni bariikporo angianga kina kurii gako aborokporo sa ya, ono kurii 2 Sam. 11:14, 15) Ono ko ayugu gako ranigose fu Yekova ni dia ko rugute kugume. Ko akusuko agu apai naadu ngbaduko yo fu Yekova rogo kparakpee yo. Na ko aʹasadi na ome ko dunduko ka mangapai kuti ga Yekova rugute. (Tam. 51:1-4) Kurigure, ko adu na umbasitise na ki di wene rugute kugume angianga kina be akumba sa ya ono be adee a. (1 Sam. 19:11, 12; 25:32, 33) Davide awirikipai ti gako aingahe na ko amoi pa mangasunge fu Yekova ni nyanyakipa pai rogo gako raka yo.
gu ringara nangia ga aYisaraere nabaha. Wa Davide angia Bakindo, ko aima du na bakere pagbia beko. Ti kura aregbo, ko amangisunge na gako pagbia ngba gbegberẽ gene. (16. Gini apai rengbe abaagude ka wirikaha be Davide?
16 Ginipai rengbe abaagude ka wirikaha be Bakindo Davide? Ka mo mangingo sunge na gu pagbia Yekova nafuhe foro ngba gbegberẽ gene ya. Mo idipa gamo ingahe, na kini di gu rugute du mburuhe rii Ziazia Kekeapai kugume kura aboro afuhe foro. Ka mo mangihe wo, gamo aborokporo nikaa irisa ro mbiko gamo umbasitise. Ho mo amanga kparakpee ni na gamo aborokporo, mo kusuko agu apai du kpotoroyo fu Yekova—i bi bakio wai mo akido kutiko. Na gu nyakipaha kisusi tie nga, mo moi pa mangasunge fu Yekova ni nyanyakipa pai rogo gamo raka yo. (Pa Rug. 6:6-9) Gamo wene kpiapai nga gu nyanyakipa he kisusi nga gu rengbe mo ka fuhe fu gamo aborokporo.
GUPAI RENGBE ANAAGUDE KA WIRIKAHA BE MARIA
17. Gini sunge Yekova nafuhe fu anaagude?
17 Yekova ima fu nyanyakipa tindiro fu anaagude rogo ramukporo yo, na ko ima fu bete pagbia fuyo kurii awiriyo (Snz. 6:20) Nirengo, gu mangapai nga ga nagude na wai ni afura ima rengba kadu na ome kurii ga agude raka naabaha. (Snz. 22:6) Oni tingidi gupai nga, anaagude ima rengba ka wirikapai be Maria, nangia na Yesu.
18-19. Ginipai rengbe anaagude ka wirikaha ti ga Maria kpiapai?
18 Maria aima ino Ziazia Kekeapai wenengai. Ri asonosi dudunguro irisa tipa Yekova na kidu na mbembedi pabakure na ko. Ri asonosi nyemu ka manga gupai Yekova akpinyemuhe, si ki vura ye na bakere ariapai vurũ rogo gari raka yo naabaha.—Rk. 1:35-38, 46-55.
Kangia naagude na mbugo, si naida ri mangi nyanyaki asadatise ka yugo nyemuse fu gari aborokporo (Oni bi genewaraga 19) *
19 Anaagude, oni ima rengba ka wirika Maria ngba dungu agene. Ginipai rengbe oni ka mangaha? Bambatapai nga, oni kakuti gaoni pabakure na Yekova nimanga oni wisigo Ziazia Kekeapai nisaroni na kini mangi kparakpee. Uepai nga, oni kpinyemu ka manga ariapai rogo gaoni raka yo tipa ka sa ngbarago ti Yekova. Ni kpiapai, si ima rengba kadu nga mo asono na agu avunguagude si adu fuyo taata ka zinga na kini peke gbegberẽ afugo fu awiriyo. Sidu, oni ima rengba kaa bihe nga wo du si Ef. 4:31) Ti ngbatunga agu aregbo re, si ni nyanyakipa pai oni sana Yekova ko undo roni. Nagude du rimori nga Lydia aya: “Ti kura aregbo, mi animangi nyanyaki kparakpee tipa gupai nga ka mi furanga na zinga ho wire anibasa sangba re ni ya. Mi anirugusi fugo gene tipa ka manga kparakpee kukiri tipa Yekova undo re. Kparakpee naaundo re mi ongo kii.”—Tam. 37:5.
aida i sonosi agude. Zavura tingbafuo oni wiriki wai Yekova aida oni sonosi agude, si ima rengba kadu ni kpakarakpakaraha furoni oni naahipai fu awironi na kidu na zerangbaduse, gbe, ho oni nambu ni na ka i aidanga ka irisa roni ya. (20. Gini kura kpakarapai bete kura anaagude agbiatiyo na ni, na waigu rengbe yo ka diabe gu kpakarapai re?
20 Gu kpakarapai rengbe bete kura anaagude ka gbia tiyo na ni nga, si ni bambumbuhe fuyo i yuguhe fu awiriyo nga i ima kpinyemu yo. (Tito 2: 3, 4) Badungu agu anaagude re i asonosi yo rogo gu ngbadimo akporo avunguagude aadunga na dawedawe nyemuse tipa agude rogoho ya. Ka sidu nga wo du i asonosi roni, ka oni mangingo kina bangisa gu ingahe avunguroni amangihe ya. Gu nagude naida ka manga gupai Yekova akpinyemuhe ima rengba ka wirika wai ka yugo nyemuse tipa awiiri. Si ima rengba kadu ni kpakarakpakaraha furi tipa ka aria gari berã, bipai, na mangapai. Ono ri ima rengba ka manga agu aʹariapai re, nga gu rengbe ka sa gari ramukporo si du na ngbarago.
ONI NINDU KUMBATAYO KAA RA NI GORONI FU YEKOVA
21-22. Ringbisihe kuti Yesaya 65:13, 14, gini aundo rengbe ani ka gbiaha ti ranigose fu Yekova?
21 Bakindo Davide aima inopa agu aundo du ti ranigose fu Yekova. Ko akepai ki ya: “Gu ndika nga ga Yekova du ni ruru he, ningiisi kpotoyo yo; sangba Yekova du ziazia, ni hasi bangirise; Ku ri gure, ga moyambu du ni rugurugu ni be he; bakere mosoro du tipa ka kuti ni.” (Tam. 19: 8, 11) Areme, ani ima rengba ka bi gu kparakparapai du dagba agu aboro na ra ni goyo fu Yekova na aguyo naká gako arugute. Agu aboro nara ni goyo fu Yekova ‘nangi mbiko ngbarago kpotoyo yo.’—Oni gedi Yesaya 65:13, 14.
22 Ho abaakumba, abaagude, gbiati anaagude adu ni na ranigose fu Yekova, ariapai namanga rogo gayo raka yo, gayo ramukporo kidu na ngbarago, na dungurati naabaha nada ni kodikodihe. Gu nyakipaha kisusi nga, i nasa ngbarago ti Yekova. (Snz. 27:11) Nairiwo gu riko pa ngbarago re!
BIA 123 Ra Nigorani fu gu Mbakadaapai Nga ga Siokrasia
^ genewaraga 5 Gi kekeapai re nika sakapai tipa ndu gupai si aida ani du na ranigose ti ni fu Yekova. Si nika sakapai a tipa wai rengbe abaakumba, abaagude, na anaagude ka mangasunge na gu pagbia Yekova nafuhe fuyo. I ima rengba ka wirikapai ni bakerehe be gu banyaki nangia Nemaya; Bakindo Davide; gbiati Maria, nangia na Yesu.
^ genewaraga 1 SAKAROGOPAIYO: Gu fugo nga ranigose na ranirii na gbegberẽ rogoyo fu agu aboro i azio yo ngbaome i gisangba. Ono tie, ga Mbori aboro namanga siapai ka giasangba ko, sidu, i abingo ranigose fu Mbori ni gbegberẽpai te.
^ genewaraga 7 I ima aria bete kura arimo rogo gi kekeapai re.
^ genewaraga 62 SAKAPAI TIPA ASURA: Bakumba namangasunge na wiriko Bambu Kindo yo, kina wai Nemaya aundo nitiko na bungia Yerusarema.
^ genewaraga 64 SAKAPAI TIPA ASURA: Baagude namanga kparakpee fu Yekova na gako aborokporo.
^ genewaraga 66 SAKAPAI TIPA ASURA: Kumbagude nadia bakere regbo kina kuti ngi mbaro nga ga avidio zanga ko nyasi gu sunge i afuhe fuko sukuru yo. Nako yego na bakere mbugo basunge yo, na ri nafu rugute fuko zanga zinga na gbegberẽ afugo.