1. Wai du Yekova abi aboro umbasitise? oni sakingo rogo yo.

YEKOVA ima kpinyemu aboro umbasitise. Kina agu aboro sa du na umbasitise tiyo rengbe kadu na mbembedi pagume na ko. Ono “ko naaina ga airaenda pai tuturũ.” (Tam. 138:6) Ani dunduko naida ka fu ngbarago fu Yekova na ki gbia gako wesewese nyemuse, sidu, ani na wene nduapai berani ka sonosa umbasitise.

2. Gini apai ani nika sakapai tipaha rogo gi kekeapai re?

² Rogo gi kekeapai re, ani nika sakapai tipa akaragapai kuti asanahe biata: (1) Ginihe nga umbasitise? (2) Tipagine si aida ani sonosi gu sino re ti ni? (3) Gini apai rengbe ka asada gaani umbasitise? A wa ani nika bihe, ho ani asonosa umbasitise ni, ani nasa kpoto Yekova yo si du na ngbarago na ani ki gbia undo a.​—Snz. 27:11; Yes. 48:17.

3. Ginihe nga umbasitise?

³ Gu boro du na umbasitise aberãnga gupai nga ni nyakipa ni kisusi kura aboro te. Ni na rukö ti ni te. Ziazia Kekeapai nayugo gupai nga gu boro du na umbasitise ti ni na ruru bipai tipa gani pagume na Yekova Mbori na tipa akurani. Gu boro du na umbasitise tini naruga tini na gupai nga aboro dunduko payo nanyaki tini rogo ai kura gene yo.​—Frp. 2:3, 4.

4-5. Tipagine rengbe ani ka ya ti ni wẽ gu boro nangera wa ka i ya ni nga boro umbasitise ima rengba kadu ni gu boro adunga na ndikidi umbasitise ya?

⁴ Kura aboro kinaho si angera wa ka i ya i nga aboro umbasitise, ono tie, i nga aboro umbasitise nzunzu te. I ima rengba kadu ni agu aboro du yee. Watadu i ima rengba kadu ni agu aboro nabi aboro na irisa watadu ni agu aboro adunga rogo  dungu apai na aboro ya bambiko wo du i asonosi yo. Ono tie, i ima rengba kadu ni airarukö. Kumbatayo gizo, i nika yugo gupai ayugo nzunzu du kpotoyo yo.​—Rk. 6:45.

⁵ Kura aboro kinaho si angera wa i na kido na kini pe gayo aberãpai tipa apai, ono gure ayugongo gupai nga i nga aboro rukö te. (Yo. 1:46, 47) Ono tie, agu aboro adunga na zee tiyo ya, si naida aida i du na rubangirise ka zanga du na kido kuti gayo tandu mangaapai. Singia ani nga aboro zee watadu ani nga aboro zee te, ani dunduko si aida ani mangi nyanyaki asadatise kadu na ndikidi umbasitise.

6. A wa yuguyo ho rogo 1 AKorindo 15:10, ginipai rengbe ani ka wirikaha ti gu kpiapai nangia ga gu mokedi nangia Pauro?

⁶ Oni bingo gu kpiapai nangia ga gu mokedi nangia Pauro. Yekova aima mangasunge na ko gbe tipa ka sigira vovo adungurati rogo dungu agbata. Si ima rengba kadu nga ko aima mangasunge tungusapai ni bakerehe kisusi gu kura ga Yesu Kristo amokedi dũ. Ono wa si avura duwo, Pauro aabingo tiko nga ko pako anyaki kisusi awirinako te. Ko ape gupai ni umbasitise nga: “Mi nga gu umba ni dagba amokedi yo dunduko, arengba nga na gu rimo nga mokedi ya, bambiko mi arungosi ga Mbori kanisa.” (1 Kor. 15:9) Fuo gure, Pauro ape gupai ni rengo nga ko adu na wene pagume na Yekova mbiko gupai nga Yekova ayugu gu weneringise arẽnga aboro tipaha ya fuko, na ko aayugongo ho mbiko gupai nga Pauro adu ni bakerepa boro watadu mbiko gupai nga ko aima manga dungu asunge te. (Oni gedi 1 AKorindo 15:10.) Nairiwo gu wene kpiapai nga ga umbasitise Pauro ayuguhe rogo gu waraga yo ko akehe fu aKorindo, si ki vura du vurũ nga kura aboro rogo dungurati aaida ka yugo gupai nga i payo anyaki ti ga Pauro!​—2 Kor. 10:10.

7. Waigu gu wirina nga guko aboro aima ino ko wenengai ayugu gupai nga ko angia boro umbasitise?

 ⁷ Badungu ga Yekova aboro aima gbia ngarasaro ti gu pangbanga du tipa Wiriba Karl F. Klein, nga guko namangisunge rogo Riigbu Bipasunge. Rogo gu pangbanga yo du tipa ga Wiriba Klein raka, ko afura ni umbasitise tipa dungu gako arungbura gbiati akpakarapai nga gu naadu rogo gako raka yo. Ni kpiapai, rogo agu agarã naatona rogo 1920, ko abi gupai nga sunge tanga ti akporo na tungusapai ima nyaka ni kerehe fuko fuo kura ko gene tungusapai yo ti bambata regbo, sidu, garã aima manga ue ka ko atungusanga pai kporo na kporo ya. Kusa, ti gu regbo ko aamangasunge Betere yo, ko aima kpipai tipa bete regbo fuo fuyo rugute fuko. Berewe a, kura aregbo anidu kinaho ko anaambu be kaza berã, nga gu ko aima ye ki hu behe kusa. Ono tie, ko aima gbia ngbarago a ti dungu wene amomu. Pa fura Wiriba Klein tipa gako arungbura si ki vura du vurũ nga ko angia gu wirina aboro aima ino ni wenengai nayugo gupai nga ko adu na bakere umbasitise tiko! Badungu awirina natingidapa Wiriba Klein na gu wene pangbanga du tipa gako raka. *

8. Waigu 1 Petero 5:6 aundo rani ani bi gupai nga umbasitise nafu ngbarago fu Yekova?

⁸ Gu nyanyakipa ndupai kisusi si aida ani sonosi umbasitise ti ni nga si nafu ngbarago fu Yekova. Gu mokedi nangia Petero aima fura tipa gipai re ziazia. (Oni gedi 1 Petero 5:6.) Gu buku nga, “Come Be My Follower” nafura tipa gupai Petero agumbaha ki ya: “Rukö wakina samamu (poison). Sangbanaha ima rengba kadu ni kere gbegberẽhe. Si nga gu sino nasa gu boro du na bakere tandu mangaapai tini ni du na umbapa ni bangiri Mbori. Ono umbasitise tigaha, si nasa gu boro du naumba pani ni du na nyanyakipa ni bangiri Yekova. . . . [Ko] nika du . . . na ngbarago ka fu mosoro foro tipa gamo umbasitise.” * Nirengo, gu bawenepai rengbe ani ka mangaha nga ka sa Yekova ko du na ngbarago.​—Snz. 23:15.

9. Waigu umbasitise agbe aboro koyo du ani ni?

⁹ Kupati gu nga kafu ngbarago fu Yekova, ani nagbia dungu aundo ho ani asonosa umbasitise ni. Umbasitise nagbe kura aboro koyo du ani ni. Tipa ka rugatiro na gipai re, mo moingo tiro kuba kura aboro. (Mt. 7:12) Dedede ani naakpingo nyemu kadu na gu  boro naida aboro mangi kina gupai ni aida ka mangaha na ka ni aidanga ka degatuni tipa ai berãpai ya te. Ono tie, ani ninaagbia wasa ho ani amangapai ni na agu akuarani aidipase du na ‘nunga akurayo tiyo, nakpi nyemu akurayo wa awirinayo, kidu na weneringise, na kini niumbasi patiyo.’ (1 Pet. 3:8) Ka si du nga ani nambeda na ngbatunga agu aboro re, si nangera wa i nika mbeda ambeda a na ani ka ani du ni aboro umbasitise.

10. Wai du umbasitise asa gaani raka si du taata?

¹⁰ Umbasitise nasa gaani raka a si du taata. Ka gumba guhe nga rengo, ani ima rengbe ka bi apai rogo raka yo nga gu si angera wa si arunga te watadu si aaidanga si du wo te. Gu tatamana tatamana kumba nangia Bakindo Soromo aya: “Mi bi akanga ku ri afarasi, awiri bakindo ki nita ni nduyo wa akanga.” (Batu. 10:7) Dedede, agu aboro du na bakere tandu mangaapai tiyo ninaagbianga taarimo te. Na agu aboro du na bete tandu mangaapai gbua nagbia bakere taarimo. Wa vura duhe wo, Soromo aima ino gupai nga si naida ani idi na raka kina wai du he na ki zanga du na gberãrago tipa wai du apai rogo raka yo. (Batu. 6:9) Ka ani du na umbasitise, si ni kadu taata furani ani idi na agu apai namanga rogo raka yo nga gu angbanga tirani ya.

11. Ginipai si aida ani mangihe ho i afu rugute ni furani?

¹¹ Aʹuru ni basasa ani agbia dungu amomu tipa ka yugo umbasitise. Bete akpiapai gere. Ho i nafu rugute ni furani. Si naida ani tingidi gupai nga ho boro namangi asadatise ni tipa ka fu rugute furani, si rengbe kadu nga ani ima manga kere ingahe ka ani ainongo ho ya. Ho boro nafu rugute ni furani, ani ima rengba ka ida ka káha ni ipo. Ani ima rengba ka bisirapa gu boro fuhe watadu gu gene ni nafuhe ngbaha. Ono ka ani du na umbasitise, ani ima rengba ka asada tirani kadu na wene bipai.

12. Ringbisihe kuti Asanza 27:5, 6, tipagine si aida ani du ti ni na tambuahe fu gu boro fu rugute furani? Oni funga kpiapai tipa gipai re.

¹² Boro umbasitise na tambuahe tipa rugute. Tipa ka yugoho na kpiapai, mo berẽnga gupai nga mo ba gu dunguratise yo nga ga aKristano. Fuo fura mo na dungu akuaro aidipase, gu kura ni sa aria ro ku giirago yo rogo tatamana yo na ki gumba gupai foro nga riahe gu du ti rindi ro. Si nawira gupai nirengo nga, zee ima rengba ka zio ro. Ono mo ima rengba kadu na tambuahe nga ni pehe foro. Mo rengbe ka bihe a nga, ka kura boro niima gumbanga ha foro areme mbata! Wakina gure a, si naida ani du na umbasitise na kidu na  tambuahe ho wirina afu gu rugute ni furani si aidaha aida. Si naida ani bi gu boro re ni bakurearani, angianga ni vurarani ya.​—Oni gedi Asanza 27:5, 6; Gara. 4:16.

13. Waigu rengbe ani ka yugo umbasitise ho gu kura aboro nagbia amomu sunge ni?

¹³ Ho kura aboro nagbia amomu sunge ni. Gu kura bakumba sa du rimoko nga Jason aya: “Ho mi naabi kura aboro ni i nigbia amomu, mi naabaka bangire abaka ti kura aregbo nga tipagine i aasianga re ti ni ya.” Ya mo pai amangingo ro wa gure? Gbegberẽpai ngaha ka ani du na nyemu ka manga bakere sunge fu Yekova te. (1 Tim. 3:1) Ono tie, si naida ani banda gaani berãpai. Ka ani adunga na rubangirise ya, ani ima rengba ka mbu rukö si sono kpotoraniyo. Ni kpiapai, gu kumba nga Kristano ima rengba ka tona berã gupai nga ko rẽ gbe tipa ka manga gu kura asunge rogo dungurati. Watadu gu diakumba nga Kristano ima rengba ka berã gupai nga, ‘Kumbami rengbe ka manga gi sunge re ni bawenehe gbe kisusi gu kura wirina re!’ Ono tie, ka ani du nirengo na umbasitise, ani nika ne gu toro nga ga rukö re ane.

14. Ginipai rengbe ani ka wirikaha ti gu gene Moize amangipai ngbaha ho kura aboro agbia amomu ni?

¹⁴ Ani ima rengba ka wirikapai ti wai Moize amangipai ho gu kura aboro agbia amomu ni. Moize aabi gako sunge nangia ga ngbe mbata yo fu gu riko aboro nangia aYisaraere na nyanyakipaha. Waigu Moize amangipai ho Yekova ambugene ni fu kura aboro tipa i niimangi sunge wa sa na Moize? Ko aadunga na ngbaduse te. (Geda 11:24-29) Ko adu na umbasitise na ki mbu gu kura aboro tipa i undo ko ti manga gu sunge nga ga sapangbanga aboro. (Gate 18:13-24) Ngba gi gene re dungu akumba naadu be aYisaraere narengbe ka undo yo tipa ka i dinga bakere regbo adia tipa ka gbia sarangbanga ya. Gere nayugo gupai nga Moize aaberã gbe tipa gupai naaundo aboro kisusi gupai nga ga du na dungu amomu. Gere nga bawene kpiapai furani! Si naida ani tingidi gupai  nga ka ani aaida kadu na nyanyakipa rani fu Yekova, si naida gaani umbasitise susi gu tandu mangaapai du tirani. Wa vura duhe nga ‘Yekova du ni tumbatumba ko vurũ, ko naaida pa [aboro umbasitise].’​—Tam. 138:6.

15. Gini vovo apai gu kura aboro nagbiatiyo na ni?

¹⁵ Ho ani agbiatirani ni na vovo apai. Vuru agu agarã susi bambeda kusayo, badungu agu awirina nga akumba na adee naima iriso Yekova tipa dungu agarã ima gbia gu kura asunge. Ni kpiapai, rogo 2014, i ayambu ababi rimbasa adungurati na adiayo tipa i mangisunge rogo gu kura sunge Kindo ti aregbo dũ. Kina rogo gu bangisa garã re, si adu nga ababi adungurati nika mbu ta kaa biko adungurati ho garã yo nikaa ni da ni ti 70. Na agu awirina nga akumba du garãyo nga 80 watadu susi gure amanganga sunge berewe rogo dungurati ni barii gu rondo nga ga abaakumba te. Kurigure, rogo agu agarã susi kusayo, i ima keda badungu avuru Betere ni abazakigene. Agu akurayo ima mbu sunge Kindo ti aregbo dũ mbiko kaza, agu atindiro nga ga aborokporo, watadu gu kura apai du tipa yo.

16. Waigu awirinarani nayugu umbasitise ni dia yo gu vovo sunge kugume i nafuhe fuyo?

¹⁶ Ngbatunga agi aʹariapai re aima du ni bakere kpakarakpakaraha fu agi awirina re tipa i mangihe. Si ziazia nga, i aima kpinyemu gu gayo kuru sunge i aamangaha mbata tipa dungu agarã. Agu akurayo kinaho naandu rogo bakere “gberãrago” wa i aainido tiyo na gayo vovo sunge. Ono tie, fuo bete regbo kusa, i aima inido tiyo na gayo sunge. Tipagine? Mbiko gupai nga i ima kpinyemu Yekova. I aima ino gupai nga i akparatiyo fu Mbori​—angianga fu sunge watadu rimo nga ga sunge ya. (Koro. 3:23) I na ngbarago kaa iriso Yekova kindi tingba ai gu sunge i nafuhe fuyo. I ‘naba agu apai nafuda yo ku auru ko yo,’ kini ini gupai nga ko naberã payo aberã.​—1 Pet. 5:6, 7.

17. Tipagine du ani ti ni na tambuahe tipa gupai nga Fugo Mbori nangarasa rani ani sonosi umbasitise?

¹⁷ Ya mo ani na tambuahe tipa gupai nga Fugo Mbori nangarasa rani ani sonosi umbasitise te? Ho ani asonosa gi wene sino re ni, ani nagbia undo gbiati kura aboro a. Ani nadu na rengba ka hi akpakarapai rogo raka yo. Na gu nyakipaha anyaka gbe nga, ani nadu mbembedi gbe na gu Barani du ngbangbaturũ yo. Nairiwo gu ngbarago du ani na ni ka ino gupai nga wa vura duhe nga “Ko du ari yo gbe,” ko ima kpinyemu gu gako amoyambu du na umbasitise tiyo, na ko nabiyo na nyanyakipa yo!​—Yes. 57:15.