1-2. (a) Ginihe naundo rani ani naahi akpakarapai na aˈuru dunduko? Oni sakingo rogoyo. (b) Gini apai ani ka sakapai tipaha rogo gi kekeapai re?

“HO MI aberãpa agu aˈasada ni mi nasusi rogoyo, mi nainoho aino nga ka mi akuru nga rogoho ni tire te.” Ya mo mo agumbanga pai wa gure? Dungu agu rani kinaho naima pe ngbatunga gupai re. Isoke mo ape gipai re fuo berã mo kuriipa wai mo adu na rengba ka diabe kere kaza watadu kpio gu boro mo na kpi nyemu ni gbe. Ho mo aberãpa agu aˈasada re ni, mo nabi he abi nga mo aduadu na rengba ka hipai rogo aˈuru ni basasa mbiko ga Yekova ziazia toro nafu gu “bakere [ome] susi.”​—2 Kor. 4:7-9.

² Ani naida ziazia toro aida si undo rani ani sovura kuti gu maapai kurii nga ga gi gbegberẽ zegino re. (1 Yo. 5:19) Kurigure, ani naida ome tipa ka sovura kuti “agu atoro nga ga gbegberẽpai yo.” (Ef. 6:12) Awere tie, ani nika sakapai tipa agene ue nga gu ziazia toro aundo rani ngbaha rogo agi akpakarapai re. Fuo gure, ani ki sakipai tipa gupai rengbe ani ka mangaha tipa ka gbia undo bakere gbe ti ziazia toro.

3. Gini gene sa Yekova aundo rani ngbaha tipa ani hi akpakarapai?

³ Ga Yekova ziazia toro naundo rani ni fuhe ome furani tipa ani mangi agu apai dunduko si aida ani mangihe ani ki vura kaa gbiatirani vurũ na akpakarapai. Gu mokedi nangia Pauro abihe nga ko adu na rengba kaa mangasunge fu Yekova kindi ko ki vura kaa gbiatiko na akpakarapai bambiko gupai nga ko akido kuti “gu ome nga ga Kristo.” (2 Kor. 12:9) Ti regbo ga Pauro ue nunguro ni mokedi, ko aamanganga kina sunge tungusapai sa nyanyaki te, ono ko anaamangasunge marã amanga a tipa kaa undo tiko. Ko aasungo Korinda yo kua aAkuira yo na Puriseka. I angia ambakadi bamburoko. Wa duhe nga Pauro aamanga kina gu bangisa sunge marã re,  aˈuru anidu kinaho ko anaamanga sunge na yo. (Amo. 18:1-4) Ziazia toro aima fu ome fu Pauro ko mangisunge marã ka undo tiko na ko mangisunge tungusapai.

4. Ringbisihe kuti 2 AKorindo 12:7b-9, gini kpakarapai Pauro adu rogoho?

⁴ Oni gedi 2 AKorindo 12:7b-9. Ginipai du Pauro aaida ka pehe rogo agi averesi re ho ko aya ni wẽ ko adu na ‘kiwe ti kpotoko’ yo? Ka kiwe kiti kini nye kutii kpotoroyo, mo rengbe kadu rogo kere igirã. Sidu, Pauro aape gupai nga ko aagbiatiko na iigirã kpakarapai. Ko aya tipa gi kpakarapai re si angia “ga Satana sunge” nga gu ‘naatura ko atura’ kindi. Si ima rengba kadu nga Satana watadu gako adaimona aayengo na gu ga Pauro kpakarapai naadu wakina kiwe tii kpotoko yo re te. Ono ho gu gbegberẽ atoro re abi gu “kiwe” re ni, si ima rengba kadu nga i adu na bakere nyemu ka turaha kuti kpoto Pauro yo wenengai, naida ka ya ka kiiso gako igirã. Ginipai Pauro amangihe?

5. Wai du Yekova akaragapai kuti ga Pauro akparakpee?

⁵ Ti tonatonaha, Pauro aaida gupai nga i di gu “kiwe” re ti kpotokoyo kusayo. Ko aya: “Mi azungadi [Yekova] bara biata, ya si guari ti re.” Ono tie, gu kiwe re anye kindi ti kpoto Pauro yo, ko ki vura manga akparakpee vurũ. Ya mo gere nayugo gupai nga Yekova aakaraganga pai kuti ga Pauro akparakpee te? Wagusa te. Ko aima karagapai kuti gako akparakpee. Yekova aadianga ga Pauro kpakarapai kusayo te, ono ko afu ome fuko tipa ko hi he. Yekova aya: “Gi [ome] du ni mbakadimbakadi he ziazia rogo rungbura yo.” (2 Kor. 12:8, 9) Na mbiko gu undo nga ga Mbori, Pauro adu na rengba ka banda gako ngbarago gbiati gako zereda nga ga berãseyo!​—Frp. 4:4-7.

6. (a) Waigu rengbe Yekova ka karagapai kuti gaani akparakpee? (b) Gini akidohe rogo agu averesi yo du rogo gi genewaraga re nafu ome foro?

⁶ Ya mo mo azungodingo Yekova wakina Pauro tipa ko di gamo kpakarapai kusayo? Ka si du nga mo aima manga dungu akparakpee fuko nibipa gu kpakarapai re, ono si ki nyeanye watadu si ki gberẽ kina kumbatayo​—ya mo si asa ro mo naabaka bangiro nga si ima rengba kadu nga rago angbanga ti Yekova na mo te? Ka ngia wo si adu, mo tingidi gu kpiapai nangia ga Pauro. Kina wai Yekova akaragapai kuti gako akparakpee, kinawo a ko nika karagapai kuti gamo akparakpee! Si ima rengba kadu nga Yekova adianga gu kpakarapai re kusayo te. Ono vurube ziazia toro, ko nika fu gu ome foro mo aidaha tipa ka hi gu kpakarapai re. (Tam. 61:3, 4) I ima rengba ka ‘bafa ro,’ ono Yekova ambunga ro te.​—2 Kor. 4:8, 9; Frp. 4:13.

7-8. (a) Rogo gini gene du ziazia toro wa wege? (b) Wai du Petero asakipai tipa gu gene ziazia toro amangasunge ngbaha?

⁷ Gini kura gene berewe ziazia toro aundo rani ngbaha? Ani rengbe ka ringbisa ziazia toro kuti wege. Gu wege naya ku rogo gu ba Bakurungba andu ku rogoho ima rengba ka undoho si da zanga kpakarapai ka si vura du vurũ nga baima nasungburo asungburo. Wakina gure a, ziazia toro naundo rani ani naairiso Yekova kindi da kuho ani nika rimo ni ku rogo vovo zegino, ka ani vura kaa gbiatirani vurũ na akpakarapai.

⁸ Mbiko gupai nga Petero angia baziatĩo, ko aima du na bakere inohe tipa nungusa kurungba. Si ima rengba kadu nga si du nga ndu gupai ko amangisunge ti ni na agu afugo duhe wa ka i ya si nayugo pa nduge kurungba. Ko akepai ki ya: “A nga tungusitungusi pai sa naye mbiko sangba boro te, ono aboro agumba pai be Mbori, wa Ziazia Toro arugu yo.” Gu fugo Giriki i asaha nga “aruguyo,” i ima rengba ka saha a nga ka nungusa yo​—2 Pet. 1:21.

9. Ginipai Petero aaida aboro berẽpaha ho ko ake gupai ni nga ziazia toro “arugu” watadu anungusi abakeke Ziazia Kekeapai?

⁹ Ginipai naadu berã Petero yo ho ko amangisunge ni na gu fugo nga ‘ruga’ watadu nungusa? Ruka nangia bake gu buku nga Amokedi  aima mangasunge na ngbatunga gu fugo Giriki re tipa ka fura tipa gu bakurungba wege “agbehe” watadu anungusaha. (Amo. 27:15, NW) Kura wene bawiriki Ziazia Kekeapai sa ape gupai nga, ho Petero aya ni wẽ ziazia toro ‘arugu’ watadu anungusi abakeke Ziazia Kekeapai, ko amangisunge na gu fugo narengbe ka sa aboro i berẽpa nduge kurungba. Petero aape gupai nga, kina wai wege naaturã kurungba koyo si andu kuhoni, kinawo a ziazia toro arugu watadu anungusi abakeke Ziazia Kekeapai tipa i mangi gayo sunge. Gu wene bawiriki Ziazia Kekeapai re ape gupai a nga abakeke Ziazia Kekeapai adu wa agu abakurungba “zaki apopoho.” Yekova aima manga gupai si aaida ko mangihe. Ko afu “yuge,” watadu ziazia toro. Abakeke Ziazia Kekeapai aima manga gu sunge i afuhe fuyo i mangihe. I apekefuo gu rugapai nga ga ziazia toro.

10-11. Gini apai ue si aida ani mangihe tipa gupai nga ziazia toro naanungusa rani? Oni funga kpiapai.

¹⁰ Rengo ngaha nga, areme, Yekova amanganga sunge berewe na gako ziazia toro ka sa aboro i ke abuku nga ga Ziazia Kekeapai te. Ono tie, ko namangasunge kindi na gako ziazia toro tipa si naanungusa gako aboro. Yekova namanga gupai kindi si aida ko mangihe. Waigu rengbe ani ka gbia undo ti ga Mbori ziazia toro? Si naida ani naamanga gupai kindi si aida ani mangihe. Wai du rengbe ani ka mangaha?

¹¹ Oni berẽnga pa gi kpiapai re. Tipa ka gbia undo ti wege, si naida banungusi kurungba mangi apai ue. Bambatapai nga, si naida ni moi gani kurungba rogo gu ba wege aya rogoho. Ka banungusi kurungba du tuturũ ti gu ba wege aya rogoho, gani kurungba ndunga kumbatayo te. Uepai nga, si naida ni zaki apopo gani kurungba wenengai. Si tie ziazia nga, ka wege vura kaa ya, gani kurungba nika ndu kumbatayo kina gu sa ka wege zi apopoho. Wakina gure a, ani nika hipai ti ngba ga Yekova sunge kina gu sa ka ziazia toro aundo rani. Tipa ka gbia undo ti ziazia toro, si naida ani mangi apai ue. Bambatapai nga, si naida ani moi tirani ngba gu gene nga ga ziazia toro ni manga ani agu apai naye na ani kutii gu maapai nga gaha. Uepai nga, si naida ani “zaki popo rani” wenengai ni manga ani agi apai re wenengai  gbe wa rengbe omerani na ni. (Tam. 119:32) Ka ani mangi agi apai re, ziazia toro nika nasarani ani naandu kindi kumbatayo ho ani agbia tirani ni na sogote gbiati aˈasada na si nika undo rani ani naahipai kindi ni rururani da kuho ani nika rimo ni ku rogo ga Mbori vovo zegino.

12. Ginipai ani nika sakapai tipaha awere?

¹² Kada ku ane, ani ima sakapai tipa agene ue nga gu ziazia toro aundo rani ngbaha. Ziazia toro nafu ome furani na si naundo rani ani nye ni rururani ho ani agbia tirani ni na aˈasada. Ziazia toro naundo rani a ani naandu kindi kumbatayo na ani nye ngba gu gene nandu sa nyenye unga. Awere tie, ani nika sakapai tipa apai biama nga gu si aida ani mangihe tipa ka gbia undo bakere gbe ti ziazia toro.

13. Ringbisihe kuti 2 Timoteo 3:16, 17, ginipai rengbe Ziazia Kekeapai ka mangaha furani, ono ginipai si aida ani mangihe?

¹³ Bambatapai nga, oni naawisigo Fugo Mbori. (Oni gedi 2 Timoteo 3:16, 17.) Gu fugo Giriki i asaha nga ‘ye be ga Mbori Toro’ nayugo gupai nga Mbori amoi gako aberãpai ku berã abakeke Ziazia Kekeapai yo. Ho ani ageda Ziazia Kekeapai ni na kini berẽkurii gupai ani agedaha, ga Mbori arugapai narimo ku berãraniyo na ku kpotoraniyo. Agu aberãpai naaye be ga Mbori toro re nafõngbaduraniyo ani sa gaani raka si du ringbisihe kuti gupai Mbori akpinyemuhe. (Eb. 4:12) Ono tipa ka gbia undo bakere gbe ti ziazia toro, si naida ani di regbo kaa wisigo Ziazia Kekeapai dedede na kaa berã dudunguro kurii gupai ani agedaha. Ka ani mangihe wo, Fugo Mbori nika du na maapai kurii agu apai dunduko ani agumbaha na kini mangihe.

14. (a) Tipagine rengbe ani ka pe gupai ti ni nga ziazia toro kina ba gaani adunguratise yo? (b) Ginipai rengbe ka undo rani ani gbia undo ti ziazia toro bakere gbe ba gaani adunguratise yo?

¹⁴ Uepai nga, oni naairiso Mbori kina sa. (Tam. 22:22) Ga Yekova toro kina ba gaani adunguratise yo. (Yugo. 2:29) Tipagine rengbe ani ka pehe ti ni wo? Bambiko ho ani adungura tirani ni tipa irisombori na akuarani aKristano, ani namanga kparakpee tipa ziazia toro, ani nabi abia Kindo du mburuhe rii Fugo Mbori, na ani nadega turani kuti agu arugapai du mburuhe rii Ziazia Kekeapai nga gu agu awirina ziazia toro namoi yo afuhe. Ti kina gu bangisa regbo re a, ziazia toro naundo agu awirina nga adee i naambakada agu apapara dunguratise du yo na ni na kini mangihe. Ono tie, tipa ka gbia undo bakere gbe ti ziazia toro, si naida ani naambakada adunguratise na kini fu akaragapai ti regboho. Ka ani aamangaha wo, ani nika du regerege ka gbia undo ba gaani adunguratise yo ti ziazia toro wakina agu akurungba du na apopoho ni zakizakihe.

15. Waigu ziazia toro aundo rani rogo sunge tungusapai yo?

¹⁵ Biatapai nga, oni naamanga sunge tungusapai. Ho ani amangasunge ni na Ziazia Kekeapai ti regbo sunge tungusapai na yugopai, ani nambu ziazia toro si undo rani rogo gaani sunge tungusapai yo. (Rom. 15:18, 19) Ono tie, tipa ka gbia undo bakere gbe ti ga Mbori ziazia toro, si naida oni naatungusapai dedede, na kini mangisunge na Ziazia Kekeapai ti ai gu regbo du rengba ka mangasunge na ni. Gene sa rengbe oni ka mbakada gaoni genefugo dagbase na aboro ngbaha gene tungusapai yo nga ni manga oni sunge na agu Akpia Wai ka Tungusapai du rogo Waraga Dunguratise Nga ga Gaani Raka na Sunge.

16. Gini ipiipi gene kisusi rengbe ani ka gbia ziazia toro ngbaha?

¹⁶ Biama pai nga, oni naamanga kparakpee fu Yekova. (Mt. 7:7-11; Rk. 11:13) Gu ipiipi gene kisusi rengbe ani ka gbia ziazia toro ngbaha nga ka sana Yekova tipaha rogo kparakpee yo. He ho rengbe ka ká na gaani akparakpee ti da yo du Yekova ni te na he ho a rengbe ka sa gupai nga ka ani gbianga ga Mbori toro ya te​—singia bambukiso na zavura Satana vurũ. (Yak. 1:17) Waigu si aida ani mangi kparakpee tipa gupai nga ka gbia undo  bakere gbe ti ziazia toro? Tipa ka karagapai kuti gu sanahe re, ani wirikinga pai tipa kparakpee ti kpiapai nga gu du ni kekehe sa kina rogo gu wene pangbanga nga ga Ruka. *

17. Ginipai rengbe ani ka wirikaha tipa kparakpee ti gu ga Yesu kpiapai du rogo Ruka 11:5-9, 13?

¹⁷ Oni gedi Ruka 11:5-9, 13. Ga Yesu kpiapai nayugo pa wai si aida ani mangi kparakpee tipa ziazia toro. Gu boro i nape pani rogo gu kpiapai re agbia guhe ni aaidaha “mbiko gani zadapai.” Ni aagundenga ka sana bakureani tipa undo te, wa si avura du vurũ nga bebere yuru du naadu. (Rk. 11:8) * Ginipai Yesu apehe nga si gi kpiapai re ayugoho tipa kparakpee? Ko aya: “Oni sána he tipa he, i ki fu he fu roni; oni gbáta he, oni ki bi he; oni ngóka ngbadimo, i ki uru he fu roni.” Sidu, ginipai ani awirikaha ti gipai re? Tipa ka gbia undo ti ziazia toro, si naida ani naamanga kparakpee amanga kindi tipaha.

18. Ringbisihe kuti ga Yesu kpiapai, tipagine rengbe ani kadu ti ni na gu kido nga Yekova nika fu gako ziazia toro afu furani?

¹⁸ Ga Yesu kpiapai naundo rani a ani bi ndu gupai Yekova nika fu ziazia toro ti ni furani. Gu boro du pa ni rogo gu kpiapai re aaida ka dia gani gino kugume wenengai. Ni abihe nga si naida aida ni mangi riahe fu gu gani gino naaye yuru. Yesu ape gupai nga murakporo afu kpakuto fu gu boro re mbiko gupai nga ni azadi paha azada kindi. Ginipai Yesu aaida ka yugoho na gipai re? Ka si du nga kpakpa boro ima rengba ka undo gani murakporo nga guni zadi pahe, ani ima rengba kadu na gu kido nga wene sino Barani du ngbangbaturũ yo naundo agu aboro aundo nasana ko asana kindi tipa ziazia toro. Sidu tie, ani ima rengba kadu na gu kido nga Yekova nika karagapai akaraga kuti gaani akparakpee tipa ziazia toro.​—Tam. 10:17; 66:19.

19. Tipagine rengbe ani kadu ti ni na gu kido nga ani nika duadu na diabese?

¹⁹ Ani ima rengba kadu na gu kido nga ka Satana vura kaa asada aˈasada kindi ka ida ka dia berani, ani nika duadu na diabese. Tipagine? Bambiko ziazia toro naundo rani rogo agene yo ue. Bambata gene nga, si nafu gu ome furani ani aidaha tipa ka diabe aˈasada. Ue gene nga, si nga gu ome naundo rani ani naairiso Yekova airiso kindi da ku rogo vovo zegino. Ani dinga berã adia ka gbia undo bakere gbe ti ziazia toro!