1-2. Gini apai dungu ga Yekova aboro agbiatiyo na ni, na gini sangbanapai rengbehe kadu na ni kuriyo?

ONI berẽnga kurii agi akpiapai du biata re: Munganga pe gupai fu kura paranga wirina sa nga kere kaza du tiko. Wirina garãko naima susa 50 zanga gako sunge, na ko mangi bakere ome ka gbia gu kura sunge, ono ka ko agbianga ha ya. Sosono ruru wirina sa ni dee arengbanga ka mangasunge fu Yekova ni bakerehe wa gu ri anaamangaha mbata te.

² Ka si du nga mo nagbia tiro na pai wa ngbatunga agi akpiapai i nafura tipaha re, mo ima rengba ka berã gupai nga sunge berewe tiro te. Agu apai re ima rengba ka dia gamo ngbarago kusayo, ki saro mo du na iraira bipai tipa tiro, na ki kusi akpakarapai dagba ro na kura aboro.

3. Wai du Satana gbiati agu aboro nawirika ko abi aboro?

³ Gi zegino re nayugo gu bipai du Satana na ni tipa aboro. Satana ninaamanga pai na aboro dedede wa ka i ya nyakingo payo te. Ko amangi gu kerepai nga ka ya fu Eva wẽ ri nika du na ranirii ka ri basasangba Mbori, wa si avura du vurũ nga ko aima ino gupai wenengai nga sangbana basasangba Mbori nika ngia kina kpio. Satana ti aregbo dunduko na ome kurii gu sunge bagaahe, birĩ zogarago, gbiati apambori nga ga gi zegino re. Sidu, si airiwongo te nga dungu ababagiahe, aboro birĩ zogarago, gbiati abarumbatayo rogo pambori nawirika kina gu zanga irisa du ko na ni tipa aboro na i abingo aboro na nyanyakipa yo te.

4. Ginipai ani nika sakapai tipaha rogo gi kekeapai re?

⁴ Ono tipa Yekova tigako, ko naida ani du na wene bipai tipa tirani, na ko naundo rani aundo ho ani agbiatirani ni na agu apai  rengbe ka sarani ani naabi tirani nga nyakingo parani te. (Tam. 136:23; Rom. 12:3) Gi kekeapai re nika sakapai tipa wai Yekova aundo rani rogo agi apai yo re: (1) Ho ani ambu ni be kaza, (2) ho duhe ni ni mbumbuhe furani ka gbia marã, na (3) ho gbinza asa rani ni ani naabihe nga nyanyakipa pai ho rengbe ani ka mangaha rogo ga Yekova sunge yo te. Ono tie, ni bambataha, ani bingo ndu gupai rengbe ani kadu ti ni na kido nga ani dunduko ni basasa na nyanyakipa rani bangiri Yekova.

5. Ginipai nayugo gupai foro nga pa aboro ima nyaka bangiri Yekova?

⁵ Wa vura duhe nga i ambakadi rani rogo nvutu sende yo, parani ima nyaka ni kerehe gbe kisusi nvutu sende. (Bam. P. 2:7) Oni bingo bete gu nduapai ani aino ti ni nga parani ima nyaka bangiri Yekova. Ko akusi aboro na gu tandu nga ga wirika asinoko. (Bam. P. 1:27) Ni manga ko gipai re, ko atumbapa rani kuari kisusi gu kusikusi ahe dunduko du auru kpotosende, na ki fu gu sunge furani nga ga ngerafuo kpotosende gbiati anya.—Tam. 8:4-8.

6. Gini kura ndupai duho berani nayugo gupai nga Yekova nabi kpakpa aboro abi na nyanyakipa yo?

⁶ Zavura tingbafuo manga Adamu ingapai, Yekova aandu kindi kumbatayo kaa bi aboro na nyanyakipa yo. Parani ima nyaka bangiriko ni kerehe, si du ko afu gu Wiriko ti ni ko aima kpinyemuko nga Yesu ni motumo tumorii tipa gaani ingaapai. (1 Yo. 4:9, 10) Mbiko motumo tumorii, Yekova nika zingisa agu aboro be kpio kpiki mbiko sangbana ga Adamu ingapai, ‘ruru yo na iraira yo a.’ (Amo. 24:15) Fugoko nayugo gupai nga parani ima nyaka bangiriko ka si vura du nga ani na kaza, ni rungorungo rani watadu ni gbinza rani vurũ.—Amo. 10:34, 35.

7. Gini kura nduapai nasa ga Mbori amoyambu i idi kuti gupai nga payo ima nyaka bangiri Yekova?

⁷ Kura nduapai kinaho berewe nasarani ani idi kuti gupai nga parani ima nyaka bangiri Yekova. Ko agbe rani koyo du ko ni na ki gbeberã ko kuti wai ani adi wene pangbanga kugume. (Yo. 6:44) Wa ani atona ka mbeda na Yekova, ko kini mbedi na ani. (Yak. 4:8) Yekova nadia regbo na kini mangisunge na gako ome a kaa yugopai furani, na gipai re nayugo gupai nga parani ima nyaka bangiriko. Ko ima ino gu ngbatunga aboro nga ani awere wa du ani ni basasa dunduko, na ko ima ino gu ngbatunga aboro rengbe ani kada nga yo. Na ko naruga rani bambiko ko ima kpinyemu rani. (Snz. 3:11, 12) Nairiwo gu bakere gopai nayugo gupai nga Yekova nabi rani na nyanyakipa rani re!

8. Waigu rengbe agu afugo du rogo Atambuahe 18:27-29 kadu na maapai kurii wai ani abi gaani akpakarapai?

⁸ Kura aboro anaabi Bakindo Davide nga sunge tiko te, ono ko aima ino gupai nga Yekova aima kpinyemu ko na ko aasongoda ko asongoda. Mbiko gupai nga Davide aima ino gipai re, si aundo ko ko hi gupai ko adu rogoho na ruru bipai. (2 Sam. 16:5-7) Ho du ani ni rogo gberãrago watadu ho ani agbiatirani ni na akpakarapai, Yekova ima rengba ka undo rani ani bi apai kia na ko ima rengba ka undo rani ani dibe ai kpakarapai. (Oni gedi Atambuahe 18:27-29.) Ho Yekova asongoda rani ni, pai ho rengbe ka rugusa rani ti irisoko na ngbarago te. (Rom. 8:31) Ani furanga awere tipa apai biata nga gu si aida gupai nga ho du ani ni rogoho, ani tingidi gupai nga Yekova ima kpinyemu rani na ko nabi rani na nyanyakipa rani.

9. Gini sangbanapai rengbe kaza kadu na ni kurii wai ani abi tirani?

⁹ Kaza ima rengba kadu na maapai kurii gaani berãpai, ki sarani ani bihe nga parani anyakanga berewe bangiri ai boro te. Zee ima rengba kaa zio rani ho aboro abi gupai ni nga kura apai kinaho adunga ani na rengba ka mangaha ya watadu ho ani angera ni kina ku be aboro tipa  undo. Zavura ho kura aboro ainongo pa gaani kaza ni ya, zee ima rengba kaa manga rani mbiko gupai nga ani na rengba ka manga gu kura apai ani anaamangaha mbata te. Ti gu kpakarakpakara aregbo re, Yekova nangarasa rani angarasa. Ngba gini gene?

10. Ringbisihe kuti Asanza 12:25, ginipai rengbe ka undo rani ho ani awoka ni?

¹⁰ Ho ani awoka ni, “wene fugo” ima rengba ka ngarasa rani. (Oni gedi Asanza 12:25.) Yekova ima peka dungu wene afugo rogo Ziazia Kekeapai yo, nga gu natingida rani na gupai nga parani ima nyaka bangiriko ka si vura du vurũ nga kaza tirani. (Tam. 31:19; 41:3) Ka ani ageda agu afugo ga Mbori toro adu kugiipa kehe re na zavura kini dogodi gedaha, Yekova nika undo rani ani sovura kuti agu abakabangirise kaza aye na ni kuti rani.

11. Waigu kura wirina sa agbia ga Yekova undo?

¹¹ Oni bingo gupai naadu tipa kura paranga sa nga Jorge. Kaza azi ko nga gu naagberã kina kumbatayo ni ipo, na si ki sako ko naabi tiko nga sunge tiko te. Jorge aya, “Mi aambakadanga tire tipa wai gimi kaza asa re mi naabi tire te na tipa gu zee a naazio re mbiko wai aboro aagbeberã yo kuti re te. Wa gimi kaza aagberã kina kumbatayo, mi aberẽ kuriipa wai gimi raka nika aria tihe. Rago aima gberã tire ni kerehe, na mi ki zungodi Yekova tipa ko undo re.” Waigu Yekova aundo ko? “Mbiko gupai nga si adu ni mbumbuhe fere ka maaberã re kuti pai, i angarasi re nga mi naageda apai rogo Atambuahe yo guruguru nga gu nayugo gupai nga Yekova nangera angerafuo gako amoyambu. Mi anaadogoda geda gu bete averesi re na aˈuru dũ, na mi abihe nga si aafu wasa afu. Fuo bete regbo kusa, aboro atona kaa bi gupai nga mongo ti ngbare dedede. Zavura i ape gupai nga gu ruru bipai mi adu na ni aima ngarasa yo. Mi aini gupai nga Yekova aima karagapai kuti gimi akparakpee! Ko aundo re mi aria gu bipai mi adu na ni tipa tire.  Mi atona kaa maaberã re kurii gupai Fugoko apehe nibipa wai ko abire mi ki vura du vurũ na kaza tire.”

12. Ka si du nga kaza tiro, ginipai rengbe mo ka mangaha tipa ka gbia ga Yekova undo?

¹² Ka si du nga mo na kaza tiro, mo du na gu kido nga Yekova ima ino gupai mo andu rogoho. Mo zungodi ko ko undo ro tipa gupai nga mo du na rengba ka sonosa ruru bipai tipa gupai namanga ro. Fuo gure, mo ki mangisunge na Ziazia Kekeapai tipa ka gbia gu wene afugo Yekova namoihe foro ku rogoho. Mo gbeberã ro gbe kuti agu averesi nayugo pa wai Yekova abi gako amoyambu na nyanyakipa yo. Wa mo nika mangaha wo, mo nika bi gupai nga Yekova ni wene ko fu agu aboro dunduko nairisoko ni ruruyo.—Tam. 84:11.

13. Waigu rengbe bariikporo kadu ka ni zanga gani sunge?

¹³ Ai bariikporo naida kadu na rengba ka ngerafuo gani aborokporo na agu ahe i aidaha tipa ka raka. Ono wirina ima rengba ka zanga gani sunge, si ki vura du vurũ nga gbegberẽpai ho ni namangihe te. Ni ima rengba ka manga asadatise kakaka ka gbia kura sunge, ono ka ni adunga na diabese ya. Gipai re ima rengba ka sa ni ni naabi tiní nga sunge tini te. Waigu rengbe gbe berãse kuti ga Yekova akidohe ka undo ni?

14. Gini nduapai nasa Yekova ko naaka kuti gako akidohe?

¹⁴ Yekova ti aregbo dunduko ninaaka aka kuti gako akidohe. (Yos. 21:45; 23:14) Ko naamangaha wo tipa dungu nduapai. Bambatapai nga, mbiko si nika duadu na sangbanapai kurii wene rimoko. Yekova ima kidohe nga ko nika ngera angerafuo gako ruru amoyambu, na ko nabihe nga si naida ko digisi gu kidohe re adigiso. (Tam. 31:1-3) Kurigure, Yekova ima inoho nga wa du ani ni papara gako aborokporo, ani ima rengba kadu na gberãrago ka si du nga ko angeranga fuo rani te. Ko ima kidohe nga ko nikaa  ngerafuo rani rogo borose yo na rogo toro yo, na he ho rengbe ka rugusa ko ti digiso ko gu kidohe re te!—Mt. 6:30-33; 24:45.

15. (a) Gini kpakarapai agu aKristano naadu rogo bambata sa kama agarã agbiatiyo na ni? (b) Gini kido Atambuahe 37:18, 19 afuhe?

¹⁵ Ho ani aino gu nduapai ni nasa Yekova ko naaka kuti gako akidohe, ani ima rengba kadu na gu kido nga ko nika undo rani aundo ho duhe ni ni mbumbuhe furani ka gbia marã. Oni bingo gu kpiapai nangia ga agu aKristano naadu rogo bambata sa kama agarã. Ho bakere rungosiro akuru ni kuti gu dungurati naadu Yerusarema yo, aKristano “agbandaka . . . dunduko, kina amokedi ki nye.” (Amo. 8:1) Oni berẽnga pa gupai gipai re arengbe ka ye na ni. Zingo marã! Si nawira gupai nga aKristano aima zanga gayo akporo gbiati gu gayo ahe i anaabagaha. Ono tie, Yekova aambunga yo te; na i aazanganga gayo ngbarago a te. (Amo. 8:4; Eb. 13:5, 6; Yak. 1:2, 3) Yekova aima undo gu ruru aKristano re, na ko nika undo rani aundo a.—Oni gedi Atambuahe 37:18, 19.

16. Ginipai rengbe ka sarani ani naabaka bangirani singia Yekova nabi gaani iriso fuko na nyanyakipaha?

¹⁶ Ho ani atona kaa gbinza ni, ani ima rengba ka tona kaa berã gupai nga ka ani mangingo sunge fu Yekova ni bakerehe berewe te. Si nawira gupai nga Bakindo Davide aima du na kina gu bangisa berãpai re ho ko atona gbinza ni. (Tam. 71:9) Waigu rengbe Yekova ka undo rani?

17. Ginipai rengbe ani ka wirikaha ti gu pangbanga du tipa gu wirina nga Jheri?

¹⁷ Oni bingo gu kpiapai nangia ga kura wirina sa du rimori nga Jheri. I ayambu ri tipa ri ndu kadu pati wirikapai Bambu Kindo yo nga gu naabipa ngerafuo ahe, ono ka ri aidanga ka ndu ya. Ri aya: “Mi nga sosono boro, kingia dekurugbo, na wiri birĩ-sunge ho du mi na ni rengbe Yekova ka mangasunge na ni te. Sunge tire te.” Gu yuru  naadu mbata fu gu wirikapai re, ri akusuko kpotoriyo fu Yekova rogo kparakpee yo. Ho ri ada ni Bambu Kindo yo fuo girorago, ri aabaka kina bangiiri singia si naida ri duadu yo nzunzu. Ti regbo gu wirikapai re, boro sa dagba abagumbapai yo anyakasi gupai nga gu gaani birĩ-sunge nyakipaha gbe kisusi nga gu nyemupai du ani na ni tipa Yekova yugupai furani. Jheri aya: “Mi aye ka bihe nga, ‘Gu birĩ-sunge re kina tire!’ Mi ati ni kpee ho mi aini gupai ni nga Yekova aakaraga pai kuti gimi kparakpee. Ko aanyakasa re na gupai nga nyanyakipa he kina bere rengbe mi ka fuhe fuko na ko na nyemu ka yugopai fere!” Wa Jheri aatingida gupai re, ri aya: “Mi arimi ku ba gu wirikapai re yo na gunde gbiati gberãrago. Ono ho mi akuru ni baha yo, mi adu na kido, kidu ni gu boro naima gbia ngarasaro na ki bi tire nga pare ima nyaka!”

18. Waigu Ziazia Kekeapai ayugo gupai nga Yekova nandu kindi kumbatayo kaa bi gaani irisombori na nyanyakipaha ho ani agbinza ni?

¹⁸ Ho ani atona gbinza ni, ani ima rengba kadu na gu kido nga Yekova na kina sunge beko kindi furani tipa ani mangihe. (Tam. 92:12-15) Yesu ayugu gupai furani nga ka si vura du vurũ nga gaani birĩ mangaapai akiongo te watadu ani nabi agu apai ani narengbe ka mangaha na paha kusende, Yekova nabi ai gupai du ani na rengba ka mangaha tingba gako sunge na nyanyakipaha. (Rk. 21:2-4) Sidu, mo moiberã ro kuti gupai du mo na rengba ka mangaha. Ni kpiapai, mo ima rengba ka fura tipa Yekova, ka manga kparakpee tipa awirinamo, na ka ngarasa kura aboro i nye ni ruruyo. Yekova nabi ro ni gako badiasunge, angianga mbiko gupai mo narengbe ka mangaha ya, ono mbiko du mo na nyemu ka giasangbako.—1 Kor. 3:5-9.

19. Gini kidohe ARomo 8:38, 39 afuhe furani?

¹⁹ Nairiwo gu tambuahe du ani na ni mbiko gupai nga ani nairiso Yekova, nga gu Mbori nabi agu aboro nairiso ko na nyanyakipa yo! Ko akusi rani ani mangi gupai ko akpinyemuhe, na ndikidi irisombori du nasa gupai nga ani du na ngbarago rogo gaani raka yo. (Yugo. 4:11) Ka zegino vura kaa bi rani nga sunge tirani te, Yekova abingo rani wa gure te. (Eb. 11:16, 38) Ho rago agberã ni tirani mbiko kaza, zingo marã, watadu gbinza, si naida ani tingidi gupai nga he ho rengbe ka kpara rani ti gu nyemuse nga ga gu Barani du ngbangbaturũ yo te.—Oni gedi ARomo 8:38, 39.