1-2. Ginipai maraika agumbaha fu ade pati murö Yesu yo, na gini rugapai Yesu nitiko afuhe fuyo?

NGBATUTU wiso rogo Nisana 16, rogo gu garã nangia 33 Fuo Batikayo Kristo, badona nga ga agu adee naagunde ti Mbori andu na bakere gberãrago ku pati gu murö yo i akpisidi Gbia Yesu Kristo rogoho arame ue kusayo. Ho i ada ni rogo gu ba i akpisidi ko rogoho, i aaida ka mbida kangbako na wene fuo ahe gbiati wene fuo nzeme, kina ngbayo naazere ka bi gupai nga murö adu ni kina kungboho! Maraika agumba gupai fu agu adee re nga Yesu ima zinga be kpio, na ko agbia kurapai kuti ni nga: “Ko nandu mbata fu roni ku Gariraya yo; yo oni ka bi ko ni.”—Mt. 28:1-7; Rk. 23:56; 24:10.

² Fuo agu adee re guari pati murö, Yesu nitiko aye fuoyo na ki fu gi rugapai re fuyo: “Oni ndu ki gumba ha fu awirinami i ndu ku Gariraya yo, i abi re yo.” (Mt. 28:10) Si nawiraha wa Yesu aaida ka fu nyanyakipa arugapai fu gako abawiriki, na gi dunguratise re angia gu bambatapai ko amangihe tifuo gako zingabekpio!

3-4. Tipagine rengbe ani ka ya ti ni gu zinahe du ni kekehe rogo Matayo 28:19, 20 aadunga sa fu kina amokedi te? (Oni bi gu sura du ti kpotoho.)

³ Oni gedi Matayo 28:16-20. Ti regbo gu dunguratise Yesu ambakadi paha, ko afura tipa nyanyakipa sunge nga gu si adu nga gako abawiriki nika mangaha tigu regbo re, na si nga kina gu bangisa sunge ani amangaha areme. Yesu aya: “Oni ndú tie, ki sa arikaaboro dunduko ni abawiriki, . . . ki nirugu yo a i niká kuti agu apai dunduko mi arugu roni kuti ni.”

⁴ Yesu naida gupai nga apefuoko dunduko tungusipai. Ko aafunga gi zinahe re sa fu kina gu gako ruru abawiriki naadu 11 te. Tipagine rengbe ani ka ya ti ni rengo du nga ko aafunga ha sa fu kina  yo te? Ho Yesu afu zinahe ni tipa sa aboro ni abawiriki, anga kina amokedi sa naadu rii bagangara Gariraya yo te. Ani nainoho wai? Oni tingidi gupai nga maraika aya fu agu adee re wẽ: “Oni  ka bi ko [Gariraya]” yo. Sidu, si nangera wa agu adee naadu niruru yo re adu kina pati gu dunguratise re. Ono gu kurapai kinaho berewe. Gu mokedi nangia Pauro ayugu gupai nga Yesu ‘ayugu tiko fu agu awirina nasusi 500 ni ba sa.’ (1 Kor. 15:6) Wari du agu awirina naadu 500 re adu ni?

5. Ginipai ani awirikaha rogo 1 AKorindo 15:6?

⁵ Ani na wene nduapai berani kadu na gu kido nga nibi gupai du rogo 1 AKorindo 15:6, Pauro aafura tipa gu dunguratise naadu Gariraya yo nga gu i nafura tipaha rogo Matayo kapita 28. Gini wene nduapai du du berani re? Bambatapai nga, badungu ga Yesu abawiriki adu kina Gariraya yo. Sidu, si arengbe kadu taata ka manga dunguratise na badungu aboro rii bagangara Gariraya yo kuba mangaha rogo kporo Yerusarema yo. Uepai nga, fuo Yesu zingi be kpio, ko aima gbia gako amokedi naadu 11 rogo kporo Yerusarema yo. Ka si adu nga Yesu aaida ka ruga kina gako amokedi sa tipa i tungusipai, ka ko aima rugayo kina Yerusarema yo kuba gupai nga ka sanayo gbiati agu adee re na gu kura aboro tipa i ndu ka gbia ko Gariraya yo.—Rk. 24:33, 36.

6. Waigu Matayo 28:20 ayugo gupai nga gu zinahe du tipa sa aboro ni abawiriki nabipa areme abi, na waigu aboro amangapai kuti gu zinahe re areme?

⁶ Oni bingo biata nyanyakipa ndupai. Ga Yesu zinahe tipa ka sa aboro ni abawiriki aadunga sa fu kina agu aKristano naadu rogo bambata kama agarã te. Waigu ani ainoho? Yesu adigisi gako arugapai fu apefuoko na agu afugo nga: ‘Mi na oni ti arago dũ, ki da ti digida zegino.’ (Mt. 28:20) A wa Yesu agumbaha, badungu aboro nasa aboro ni abawiriki awere. Mo berẽnga kurii gipai re! Aboro bangeyo naima mbeda kuti 300,000 rogo agarã yo dunduko ninaazio bapatiza kini da ni aDezire Yekova na kini da ni ga Yesu Kristo abawiriki!

7. Ginipai ani nika sakapai tipaha, na tipagine?

⁷ Badungu agu aboro nawisigo Ziazia Kekeapai ninaamanga sonakumbatayo amanga na ki zi bapatiza. Ono tie, gu kura aboro nawisigo Ziazia Kekeapai dedede na ani ninaagunde agunde tipa kada ni abawiriki. I nagbia ngbarago agbia ti gayo wirikapai, ono i aidanga ka manga sonakumbatayo ka zio bapatiza te. Ka singia mo nawisigo Ziazia Kekeapai na boro, ani na gu kido nga mo naida aida ka undo gu boro mo awisigopai na ni tipa ni mangi agu apai ni awirikaha na ki da ni ga Kristo bawiriki. Gi kekeapai re nika sakapai tipa wai rengbe ani ka undo bawiriki Ziazia Kekeapai ni kpinyemu Yekova na ki mangi sonakumbatayo. Tipagine si aida ani sakipai ti ni tipa gupai re? Bambiko ti kura regbo, si rengbe kadu nga ani diberã singia ka rugusa wirikapai watadu ka zanga rugusaha.

8. Tipagine duhe ti ni ti kura aregbo ni kpakarakpakaraha ka undo gaani abawiriki Ziazia Kekeapai i kpinyemu Yekova?

⁸ Yekova naida aboro irisiko mbiko gupai nga i ima kpinyemu ko. Sidu, gaani sasa nga ka undo abawiriki Ziazia Kekeapai i rugutiyo na gupai nga Yekova naberãpa yo aberã wa du yo ni basasa dunduko na ko ima kpinyemu yo ni bakerehe. Ani naida ka undo yo i bi Yekova wa “ba fu awirianyaure, ni basapungbanga fu adekurugbo.” (Tam. 68:5) Ho gaoni abawiriki Ziazia Kekeapai nika ino bakio wai ni Mbori nakpinyemu yo, si nangera wa i nika tona kpinyemuko akpi a. Gu kura abawiriki Ziazia Kekeapai ima rengba ka bihe ni kpakarakpakaraha tipa ka bi Yekova ni gu Baagude du na nyemuse bambiko abayo aayugongo nyemuse fuyo te. (2 Tim. 3:1, 3) Wa mo nikaa wirikapai na yo tie, mo nyakasipai tipa gu wene asino duti Yekova. Mo undo gamo abawiriki Ziazia Kekeapai i rugutiyo na gupai nga, gaani Mbori nyemuse naida gupai nga i gbia nyenye unga, na ko regerege ka undo yo i da ti gu sasa re. Gini kurapai berewe rengbe ani ka mangaha?

9-10. Gini abuku si aida ani mangisunge na ni ho ani awirika Ziazia Kekeapai ni na aboro, na tipagine si aida ani mangisunge ti ni na agu abuku re?

⁹ Mo mangisunge na agu abuku nga, “Gini Apai Rengbe Baibiri ka Yugoho Furani?” na “Wai ka Nye Rogo ga Mbori Nyemuse Yo.” I ambakadi agu abuku re tipa si undo rani ani zi ngbadu gaani abawiriki Ziazia Kekeapai yo. Ni kpiapai, kapita 1 nga ga gu buku nga Yugoho Furani nakaragapai kuti agu asanahe nga: Ya mo Mbori naberã parani?, Ya mo Mbori naida ani rungo?, na Mo rengbe kadu ni bakurea Yekova? Na ginipai tigaha du tipa gu buku nga, Nye Rogo ga Mbori Nyemuse Yo? Gu buku re nika undo bawiriki Ziazia Kekeapai ni rugutini na pa wai mangapai kuti agu abangua arengo nga ga Baibiri narengbe ka mbakada gani raka na ki mbedisi ni gbe na Yekova. Ka si vura du nga mo aima wisigo agi abuku re na kura abawiriki Ziazia Kekeapai, mo naambakada tiro wenengai tipa ai gu wisigopai mo amangaha na gu bawiriki Ziazia Kekeapai re tipa gupai nga ka wirikapai na ni ringbisihe kuti agu apai du tipa ni.

¹⁰ Ono tie, na ka si du nga gu bawiriki Ziazia Kekeapai re na nyemu kurapai nga gu du rogo gu waraga adunga dagba Gaani Aũsunge Nga ga Yugopai ya. Mo rengbe ka ngarasa ni ni gedi gu waraga  re ni sani, mangaha wo nika sa gupai nga mo naandu kindi kumbatayo kaa wirikapai na ni rogo gu buku nga Yugoho Furani watadu Nye Rogo ga Mbori Nyemuse Yo.

11. Ti gini regbo si aida ani tona manga kparakpee pati wirikapai, na waigu rengbe ani ka undo bawiriki Ziazia Kekeapai ni rugutini na ndu gupai duhe ti ni na nyanyakipaha?

¹¹ Mo tona wirikapai na kparakpee. Dedede, si nidu ni bawenepai ka tona wirikapai nibasa na kparakpee na ki digisihe na kparakpee rogo gu bambata aposo yo ani natona wirikapai na boro. Si naida ani undo gaani bawiriki Ziazia Kekeapai ni ini gupai nga ani rengbe ka rugatirani na Fugo Mbori sa kina gu ka ani sanako tipa ko undo rani na Gako ziazia toro. Gu kura abayugu Ziazia Kekeapai ninaasaka pai tipa pa nyakapa kparakpee pati wirikapai ni geda yo Yakoba 1:5 nga gu naya: “Ka zingo tatamana amanga gu ni dagba roni yo, ni sána Mbori.” Bayugu Ziazia Kekeapai ninaasana bawiriki Ziazia Kekeapai nga, “Waigu rengbe ani ka sana Mbori tipa tatamana?” Si nangera wa bawiriki Ziazia Kekeapai nika ida aida ani kpari fu Mbori.

12. Waigu rengbe mo ka mangasunge na Atambuahe 139:2-4 tipa ka undo bawiriki Ziazia Kekeapai ni nifura gbaiga fu Yekova?

¹² Mo yugu wai fu gamo bawiriki Ziazia Kekeapai ka manga kparakpee. Mo saki gupai fu ni nga Yekova nakpinyemu ka gia gu kpee naye ngbaduniyo. Mo saki gupai funi nga rogo gaani akparakpee yo ni sarani, ani ima rengba ka zaka ngbaduraniyo fu Yekova, ka gumba agu apai fuko ani arengbanga ka gumbaha fu ai boro ya. Oni tingidi gupai nga Yekova ima ino gu gbugbuapai du berãraniyo. (Oni gedi Atambuahe 139:2-4.) Ani ima rengba a ka ngarasa gaani bawiriki Ziazia Kekeapai ni sana Mbori tipa undo tipa ni aria gani iraira aberã na ki mbu gbegberẽ mangaapai. Ni kpiapai, bawiriki Ziazia Kekeapai ima rengba ka kpinyemu gu kura uru-ongoda nga gu si aidanga Kristano irisihe ya. Ni ima ino gupai nga ngbanga ha te, ono ni nagbia ngbarago kindi ti gu kura apai du tipaha. Mo ngarasi ni tipa ni gumbapa gani aberãpai fu Yekova na ki sanako tipa undo tipa kaa kpinyemu kina agu apai ko akpinyemuhe.—Tam. 97:10.

13. (a) Tipagine si aida ani yambu agu aboro ani awirika Ziazia Kekeapai na yo tipa adunguratise ti ni nibasa? (b) Waigu rengbe ani ka sa gu boro ani awirika Ziazia Kekeapai na ni ni du wenengai gbe Bambu Kindo yo?

¹³ Mo yambu gamo bawiriki Ziazia Kekeapai niye tipa adunguratise nibasa. Gupai gamo bawiriki Ziazia Kekeapai agiaha na kini bihe ba agu adunguratise yo nga ga aKristano ima rengba ka zio ngbaduniyo na ki undo ni ni mangi sonakumbatayo. Mo yugu gu vidio funi nga Ginipai Ninaamanga Bambu Kindo Yo? na ki yambu ni esuesu oni ndu na ni tipa dunguratise. Mo undo ni na guhe rengbe ka ndu na ni ku ba dunguratise yo ka rengba du. Si ni wenepai a kaa ndu na abatungusipai ni bakiakia ka wirikapai na boro. Rogo gi gene re, gu boro mo awirika Ziazia Kekeapai na ni nika inido tiní na kura aboro rogo dungurati, na si nawira gupai nga si nika sani ni du wenengai gbe ho du ni ni pati gaani adunguratise.

14. Ginipai rengbe ka fõngbadu bawiriki Ziazia Kekeapai yo ni sono rogo toro yo?

¹⁴ Gaani sasa nga ka undo gu boro ani awirika Ziazia Kekeapai na ni ni sono rogo toro yo. (Ef. 4:13) Ho boro naidi ni ka wirika Ziazia Kekeapai na ani, gani nyemupai gbe nga ka bi wai gu wirikapai re nika undo ni. Ono tie ho gani nyemuse tipa Yekova asona ni, si nangera wa ni nika tona berãpa wai rengbe ni ka undo kura aboro, kodihe na agu aboro du kina rogo dungurati. (Mt. 22:37-39) Ho gu regbo rẽarẽ nika da ni, ka mo zanganga gumbapa gu momu funi nga ga fu marã si songodi gu sunge nga ga Kindo ya.

15. Waigu rengbe ani ka undo bawiriki Ziazia Kekeapai ni mangi gupai du ni ruruhe ho kpakarapai akura ni?

¹⁵ Mo yugu gupai fu gamo bawiriki Ziazia Kekeapai si aida ni mangihe ho akpakarapai akura ni. Ani yanga ni kpiapai, gamo bawiriki Ziazia  Kekeapai nga gu ni ata ziongo bapatiza ya gumba gupai foro nga boro rogo dungurati ba gberãrago tini. Kuba gupai nga ka ngbe na gu kura boro, si naida mo saki gupai fu ni Ziazia Kekeapai agumbaha nga gu si aida ni mangihe. Ni ima rengba ka mbupai fu gu boro re watadu ka si dunga ka ni mbunga gupai re te, si naida ni fura na gu boro re na gu sasa nga ka ‘gbe wirinani fuo ni.’ (Oni ringbisinga ha na Matayo 18:15.) Mo undo gamo bawiriki Ziazia Kekeapai ni mbakadi gupai ni nika gumbaha. Mo yugu wai fu ni rengbe ni ka mangasunge na JW Library^® app, na Research Guide for Jehovah’s Witnesses, gbiati jw.org^® tipa ka wirika agu agene rengbe ni ka mangapai ngbaha kuti pai. Ka ni wiriki wai ka mangapai kuti agu akpakarapai du dagba ni na aboro mbata fu ni zi bapatiza, si nangera wa ni nika duadu na wene pabakure na aboro rogo dungurati fuo zio ni bapatiza.

16. Tipagine duhe ti ni ni wenepai ka ndu na kura abatungusipai ka wirikapai na gamo bawiriki Ziazia Kekeapai?

¹⁶ Mo yambu kura aboro rogo dungurati i ye oni wirikipai na ga mo bawiriki Ziazia Kekeapai na yo na mo yambu babi adungurati a ho ko naye ni ku rogo gu dungurati du mo rogoho. Tipagine? Kurii gu nduapai i nigumbaha kusayo, gu kura abatungusipai ima rengba ka undo gamo bawirikipai ngba agu agene mo arengbanga ka undo yo ngbaha ya. Ani ya nga ni kpiapai, gamo bawiriki Ziazia Kekeapai ima asada bara dunguhe ka mbu vugundö ono ka ni adunga na diabese ya. Ka si du nga wirina ho nga guni naaima diabe vugundö, isoke fuo manga ni asadatise bara dunguhe, mo yambu ni oni ndu na ni ka wirikapai na gu gamo bawiriki Ziazia Kekeapai re. Gu wirina re ima rengba ka fu gu nyanyakipa undo si aidaha tipa gu gamo bawiriki Ziazia Kekeapai re. Ka si du nga mo nagunde agunde ka manga wisigopai na gu boro mo awirikapai na ni ho du gu wirina ni du na bakere inohe, mo sana gu wirina re ni nungusi gu wisigopai re. Ka si vura du kina wai, ho mo andu ni na kura awirina ka wirikapai na gamo bawiriki Ziazia Kekeapai, ni ima rengba ka gbia undo ti gu inohe du yo na ni. Oni tingidi gupai nga, gaani sasa nga ka undo gaani bawiriki Ziazia Kekeapai ni sono rogo toro yo.

17-18. Gini apai si aida mo berẽkuriihe ho mo adiaberã ni tipa singia si naida mo rugusi wirikapai na gamo bawiriki Ziazia Kekeapai?

¹⁷ Ka si du nga gamo bawiriki Ziazia Kekeapai nye kaa wirikapai zanga manga sonakumbatayo, mo ima rengba ka sana tiro nga, ‘Ya mo si naida mi rugusi wirikapai na ni?’ Mbata fu mo mangi diaberã tipa gupai re, si naida mo berẽpa gu tandu mangapai nga ga gu boro re. Gu kura aboro nadia regbo adia tipa ka manga sonakumbatayo ono ka aguyo adianga regbo ya. Mo sananga tiro nga: ‘Ya mo gimi bawiriki Ziazia Kekeapai namanga bete sonakumbatayo apai ki vura du tipa ni vurũ?’ ‘Ya mo ni tona kaa “ka kuti,” watadu kaa manga agu apai ni awirikaha?’ (Mt. 28:20) Bawiriki Ziazia Kekeapai ima rengba ka dia gbanga regbo tipa kada ni bawiriki. Ono si naida ni naamanga ariapai amanga rogo gani raka yo yeeye.

¹⁸ Ono ginipai rengbe ani ka mangaha ka si du nga ani ima wirikapai na boro tipa wiri gbanga regbo na ni ayugongo gupai nga ni nabi wirikapai  na nyanyakipaha te? Mo berẽnga kurii gupai nga, bawiriki Ziazia Kekeapai bero nga guni naima nyasa wirika gu buku nga Yugoho Furani na isoke ni ima tona wirika gu buku nga Nye Rogo ga Mbori Nyemuse Yo ono ni aayengo tipa adunguratise na ni aayengo kandara tipa Tingida Pakpio Yesu te! Na ni naazanga wirikapai azanga mbiko gu nduapai anyakanga paha ya. Ka si du nga gamo bawiriki Ziazia Kekeapai wa gure, si naida mo sakipai asaka gbaiga na ni. *

19. Ginipai rengbe mo ka gumbaha fu gu boro si angera wa ni abingo gani wirika Ziazia Kekeapai na nyanyakipaha te, na ginipai si aida mo berẽkuriihe?

¹⁹ Mo rengbe ka tona fugo na gamo bawiriki Ziazia Kekeapai ni sana mo ni nga, ‘Ginipai kpakara mangaha akpakara foro gbe tipa kada ni Dezire Yekova?’ Ga mo bawiriki Ziazia Kekeapai ima rengba ka karagapai nga, ‘Mi ima kpinyemu wirika Ziazia Kekeapai, ono mi adanga ni boro sa dagba aDezire Yekova yo te!’ Ka si du nga gere nga gani berãpai tifuo ni naima dia regbo kuti wirikapai, ya mo ndupai ho tipa mo naandu kindi kumbatayo tipa kaa wirikapai na ni? Ono tie, gamo bawiriki Ziazia Kekeapai ima rengbe ka gumba ndu gupai foro ti kina bambata regbo ni amanganga sonakumbatayo ti ni ya. Ni kpiapai, ni ima rengba ka bihe nga ka ni tungusinga pai kporo na kporo te. Ho mo aino gani bipai ni, mo ima rengba ka rugatiro na pa wai rengbe mo ka undo ni.

20. Waigu pa ruga ani tirani na Amokedi 13:48 aundo rani ani bihe singia si naida ani naawirikapai kindi na boro watadu ani rugusihe?

²⁰ Si nipa gberãrago nga, gu kura abawiriki Ziazia Kekeapai kinaho du wakina agu aYisaraere naadu ti regbo Yezekere. Oni bingo gupai Yekova agumbaha tipa yo fu Yezekere, ko aya: “Mo ngére, mo bangiriyo wa gu boro nabi abia nyemuse na bawene fugoni ki nitaki ũworo he wenengaĩ, bambiko i gi gu pai gumba mo ho, ono i amánga nga ha te.” (Yeze. 33:32) Si ima rengba ka kpakara furani ani gumba gupai fu boro nga ani narugusa wirikapai na ni. Ono tie, gu regbo nye koyo ni ‘guruhe.’ (1 Kor. 7:29) Kuba gupai nga kaa dia bakere regbo kaa wirikapai na gu boro amanganga sonakumbatayo ya, si naida ani asadi ka gbata gu boro nayugo gupai nga i aima ‘ringbisa ni sa nyenye unga.’—Oni gedi Amokedi 13:48.

21. Gaani veresi nga ga gu garã nga 2020 nga gine, na si nika undo rani ani mangi ginipai?

²¹ Vuru gi garã nga 2020 re, gaani veresi nga ga garã nika undo rani ani moiberãrani kuti wai rengbe ani kaa mangasunge sa aboro ni abawiriki. Si nakoda bete agu afugo Yesu agumbaha ti regbo gu nyanyakipa dunguratise namangi rii bagangara Gariraya yo nga: ‘Oni nduˈ tie, ki sa aboro ni abawiriki, ki nibapatizi yo.’—Mt. 28:19.