1-2. Gini iiriwopai namangi rago Pendekote rogo gu garã nangia 33 Fuo Batikayo Kristo?

GU URU re angia Rago Poso wiso Yerusarema yo. Rago Pendekote du naadu rogo gu garã nangia 33 Fuo Batikayo Kristo. Badona abawiriki bangeyo adu wa 120 adunguratiyo ku rogo gu vuru bambu naadu kuari yo. (Amo. 1:13-15; 2:1) Bete aˈuru kusayo, Yesu aruguyo na gupai nga i nye Yerusarema yo tipa gupai nga ka gbia kparakpara gamahe. (Amo. 1:4, 5) Ginipai namangi tingbafuo gure?

² “I ki ya gi [woro he] si niwo awo ari yo wa ka kina bakere yuge aya ari yo.” Gu woro he re adu vuru gu bambuyo dunduko i adu tihe. Fuo gure, “mirãhe . . . wa kina mirã we” kidu ri abawiriki yo dunduko, na i ki “hiki ahika be Ziazia Toro dunduko.” (Amo. 2:2-4) Rogo gi iiriwo gene re, Yekova auka gako ziazia toro kurii gu badona aboro re. (Amo. 1:8) I nangia gu bambata aboro i ambedi yo na ziazia toro * na ki fu gu maabangirise fuyo nga ga zogarago na Yesu ngbangbaturũ yo.

3. Tipagine agu aboro naadu rago Pendekote aadunga ti ni na kapa kuti gupai nga i mbedi yo na ziazia toro ya?

³ Ka i niya mo adu kina dagba agu abawiriki naadunguratiyo ku rogo gu vuru bambu naadu kuari yo re rogo gu uru re, ka bangiro  gonga ti gupai re te. Mo berẽnga gupai nga ka he aye nga gu naangera wa mirãwe ki sungu riro yo, na mo ki tona kaa fura rogo dungu afugo yo! (Amo. 2:5-12) Ka pai amangi wa gure, ka mo aima du na gu kido nzunzu nga i ima mbeda ro na ziazia toro. Ono ya mo agu aboro i ambeda yo na ziazia toro, i nambeda yo ngba iiriwo gene na ti kina bangisa regbo sa rogo gayo raka yo? Oó. Waigu ani aino gipai re?

4. Ya mo i aambeda agu aKristano naadu rogo bambata kama agarã na ziazia toro ti kina bangisa regbo sa rogo gayo raka yo? Oni sakingo rogoyo.

⁴ Ani furanga tipa pa gu regbo i ambeda boro na ziazia toro. Gu badona nga ga aKristano bangeyo adu wa 120 angianga gu yangara aboro i ambedi yo na ziazia toro rago Pendekote rogo gu garã nangia 33 Fuo Batikayo Kristo te. Rogo gu uru re kusa, kura aboro bangeyo adu wa 3,000 aima gbia ziazia toro a. I ambedi yo na ziazia toro ho i azi bapatiza ni. (Amo. 2:37, 38, 41) Ono rogo agu agarã nangbefuo gure, anga mbedimbedi aKristano dunduko i ambedi yo ti regbo gayo bapatiza te. I ambedi aboro Somorona na ziazia toro kusa tingbafuo zio yo bapatiza. (Amo. 8:14-17) Na gu gene i ambedi aKorunerio na gako aborokporo na ziazia toro ngbaha adu tigaha kia. I ambedi yo mbata fu zia yo bapatiza.—Amo. 10:44-48.

5. Ringbisihe kuti 2 AKorindo 1:21, 22, ginipai ninaamanga ho i ambeda boro ni na ziazia toro?

⁵ Ani furanga a tipa gupai ninaamanga ho i ambeda boro ni na ziazia toro. Agu aboro i ambeda yo na ziazia toro, si ima rengba kadu fuyo ni mbumbuhe ti bambata regbo ka ida gupai nga Yekova ima siayo. I ima rengba kaa bakabangiriyo nga, ‘Tipagine Mbori nasia re ti ni?’ Kura aboro kinaho a adunga na gu berãpai re ya. Singia ginigu nga ginigu, Pauro afura tipa gupai ninaamanga fu agu aboro dunduko i ambeda yo na ziazia toro ki ya: “Wa idi oni pase, i amoi dezire * fu roni nga gu Ziazia Toro nga ga kidohe, Ziazia Toro [tigaha] nga dezire gaani ũkumbo.” (Ef. 1:13, 14) Sidu, Yekova namangasunge na gako ziazia toro tipa ka yugo gupai ziazia fu agi aKristano re nga ko ima sia yo. Rogo gi gene re, ziazia toro nga “ngbaanga [watadu kidohe]” nga gu i afuhe tipa ka fu gu kido fuyo nga  kumbatayo, i nika raka nyeanye kindi ngbangbaturũ yo angianga auru kpotosende ane ya.—Oni gedi 2 AKorindo 1:21, 22.

6. Ginipai si aida mbedimbedi Kristano mangihe tipa ka gbia gani mosoro nga ga ngbangbaturũ?

⁶ Ya mo ho i ambeda boro ni na ziazia toro, gure nga ni nagbia gani mosoro nga ga ngbangbaturũ nibasa? Oó. Ni na gu kido nga i ima sia ni ni ndu ku ngbangbaturũ yo. Ono tie, si naida ni tingidi gu rugute nga: ‘Awirina, oni fú tironi nyanyaki pa yamba roni si da ti rengo na pa sia roni a, bambiko ka oni amanga agi apai re, oni ati nga wa sa te.’ (2 Pet. 1:10) Ka i vura sia boro ni mbedimbedi Kristano tipa ni ndu ku ngbangbaturũ yo, ni nika gbia gani mosoro kinagu sa ka ni nye ni ruru ni.—Frp. 3:12-14; Eb. 3:1; Yugo. 2:10.

7. Waigu mbedimbedi aKristano aino gupai nga i ima siayo i ga ku ngbangbaturũ yo?

⁷ Ono waigu boro aino gupai nga i ima yamba ni ni ndu ku ngbangbaturũ yo? Karagapai kuti gi sanahe re ima du ziazia rogo agu afugo Pauro yo ko agumbaha fu agu aboro naadu Roma yo nga aguyo i ayambu yo i du ni “[ziazia] aboro.” Ko aya fuyo wẽ: ‘Oni adianga gu toro kugume nga ga kanga naye na gunde berewe te, ono oni adi gu toro kugume nga gu nasa Mbori ko di roni ni awiriko, nga gu ani akpara nani ni ya: “Abba, Buba!” Toro nga dezire ni tihe na tororani ya awiri Mbori nga ani.’ (Rom. 1:7; 8:15, 16) Sidu, vurube ga Mbori ziazia toro, Mbori nayugoho ziazia fu mbedimbedi aKristano nga i ima siayo i ndu ku ngbangbaturũ yo.—1 Tesa. 2:12.

8. Waigu 1 Yoane 2:20, 27 ayugo gupai nga mbedimbedi aKristano aidanga kura boro tipa ni yugu gupai fuyo nga rengo du nga i ima da ni mbedimbedi aKristano te?

⁸ Agu aboro Yekova nasia yo i ndu ku ngbangbaturũ yo, Yekova ambunga yo i du na kapa berãyo yo gbiati kpotoyo yo te. (Oni gedi 1 Yoane 2:20, 27.) Rengo ngaha nga, si naida aida Yekova yugupai fu mbedimbedi aKristano vurube dungurati kina wai a ko ayugopai fu kura aboro. Ono boro ho i aida ni tipa ni yugu gupai fuyo nga rengo du nga i ima da ni mbedimbedi aKristano te. Yekova ima mangasunge na gu ome susi aome dũ rogo zegino, du nga gako ziazia toro tipa ka yugo gupai fuyo ziazia nga i ima da ni mbedimbedi aKristano!

9. A wa furayo tipaha rogo AEfeso 1:18, gini ariapai namanga tipa boro ho i ambeda ni ni na ziazia toro?

⁹ Si ima rengba kadu ni mbumbuhe fu badungu ga Mbori amoyambu i rugutiyo na gupai namanga fu boro ho Mbori ambeda ni ni na ziazia toro. Tipagine? Bambiko gupai nga i ambedanga yo tigayo na ziazia toro te. Mbori akusi aboro i raki nyeanye kindi auru kpotosende, angianga ngbangbaturũ yo ya. (Bam. P. 1:28; Tam. 37:29) Ono Yekova ima sia bete aboro i raki ngbangbaturũ yo. Sidu, ho ko ambeda yo ni na ziazia toro, ko naˈaria gayo maabangirise na gu gene i aberã ngbaha, tipa gupai nga i naamaabangiriyo tipa gu raka nga ga ngbangbaturũ.—Oni gedi AEfeso 1:18.

10. Rogo gupai yo nga ka ‘vunga boro berewe’ nga gine? (Oni bi rukutu kekeapai a.)

¹⁰ Ho i ambeda aKristano ni na ziazia toro, gure nga i ima ‘vunga yo berewe.’ * Yesu ayugu gupai a nga gu boro angianga mbedimbedi Kristano ya, ka i sakingo gupai funi nzunzu namanga fu boro ho i ‘avunga ni ni berewe,’ watadu ho i ‘avunga ni ni be toro’ te.—Yo. 3:3-8.

11. Oni sakingo pai tipa gu ariapai namanga berã gu boro yo i ambeda ni na ziazia toro.

¹¹ Gini ariapai rogo berãyo namanga fu agu aKristano i ambeda yo na ziazia toro? Mbata fu Yekova mbedi agi aKristano re na ziazia toro, i  nabi gu maabangirise nga ga raka auru kpotosende nyeanye kindi na nyanyakipaha. I nadu ni agu aboro nangera kumbatayo na ngbarago tipa gu regbo Yekova nika dia gbegberẽ apai dunduko kusayo na ki sa kpotosende ni paradizo. Isoke i nadu a ni agu aboro naberãpa gu regbo i nika dia gu gayo aborokporo watadu abakureayo kugume naakpiki ho i nika zingisa yo ni be kpio. Ono ho i ambeda yo ni na ziazia toro, i natona kaa berã kia. Tipagine duhe ti ni wo? Anga gupai namanga nga i natona kaa berã gupai nga raka auru kpotosende angbanga berewe te te. I aˈarianga gayo maabangirise mbiko gupai nga i na gberãrago watadu i nambu ni kerehe te. Na i atonanga kaa berã gupai nga ngbarago adunga ti raka nyeanye kindi auru kpotosende te. Kuba gure, Yekova namangasunge na gako ziazia toro ka aria gu gene i aberã ngbaha gbiati gu maabangirise i abihe na nyanyakipaha.

12. Ringbisihe kuti 1 Petero 1:3, 4, waigu mbedimbedi aKristano abi gayo maabangirise?

¹² Gu boro i nambedi ni na ziazia toro ima rengba kaa bi tiní nga ni arẽnga na gi nyanyakipa momu re te. Ono ni akapanga kandara tooni kuti gupai nga Yekova ima sia ni te. Ni na bakere ngbarago na tambuahe ho ni aberãpa gu gani maabangirise ni nga ga raka ngbangbaturũ yo.—Oni gedi 1 Petero 1:3, 4.

13. Wai du mbedimbedi aKristano abi gayo raka auru kpotosende ane?

¹³ Ono ya mo gere nayugo gupai nga mbedimbedi aKristano naida aida ka kpi? Gu mokedi nangia Pauro aima karagapai kuti gi sanahe re. Ko aringbisi kpotoyo kuti bamburoko na ki ya: ‘Bambiko agu rani du rogo gi boro re ani nauko, wa du ani na tindiro; a nga mbiko ani nakpi nyemu i uru he ti rani te, ono ani nakpi nyemu i ukadi rani ku auru he, ya gu nga kpikpi he du ni mbirimbiri he be unga.’ (2 Kor. 5:4) Nyemu gi raka re agbandakanga ti agi aKristano re si kini sayo i idi ka kpi ni ipo te. Kuba gure, i nagbia ngbarago ti raka na i naida ka mangasunge na aˈuru dunduko ni basasa tipa ka iriso Yekova na gayo aborokporo gbiati abakureayo. Ono tie, ka si vura du nga i namanga kina ginipai, i natingidapa gu bawene maabangirise du yo na ni tipa kumbatayo ti aregbo dunduko.—1 Kor. 15:53; 2 Pet. 1:4; 1 Yo. 3:2, 3; Yugo. 20:6.

14. Ginipai ayugongo gupai nga i mbedi boro na ziazia toro ya?

¹⁴ Isoke mo nabaka kina bangiro singia i ima mbeda ro na ziazia toro. Kangia wo duhe, mo berẽnga kurii agi asanahe re: Ya mo mo na bakere nyemu ka manga gupai Yekova akpinyemuhe? Ya mo mo nabihe nga mo ima du zaaza gbe rogo sunge tungusapai? Ya mo mo ni gu boro nagbia bakere ngbarago ti geda Ziazia Kekeapai na ti wirika “gu dudungura apai nga ga Mbori”? (1 Kor. 2:10) Ya mo mo nabihe nga Yekova undo ro mo gbia bawene asangbanapai gene tungusapai yo? Ya mo mo nabihe nga mo na bakere nyemu ka undo aboro rogo toro yo? Ya mo mo ima bi gopai nga gu nayugo gupai nga Yekova ima undo ro ngba dungu agene rogo gamo raka yo? Ka si du nga gamo akaragapai kuti agi asanahe re nga, ii, ya mo gere nayugo gupai nga i ima sia ro mo ndu ka raka ngbangbaturũ yo? Oó, si ayugongo ho wo te. Tipagine duhe ti ni wo? Bambiko ga Yekova amoyambu dunduko rengbe agi apai re kadu tipa yo, singia i nga mbedimbedi aKristano watadu i nga mbedimbedi aKristano te. Na vurube ga Yekova ziazia toro, ko ima rengba ka fu bangisa ome fu ai gako moyambu, ka si vura du nga ni na kina gini ngbatunga maabangirise vurũ. Ka si du nga mo nabaka bangiro abaka singia i mbedi ro na ziazia toro, gu kapa re ni tihe nayugo gupai nga i ambedanga ro na ziazia toro te. Agu aboro Yekova nasia yo ni mbedimbedi aKristano abakanga bangiriyo singia i siayo watadu i asianga yo te te! I ima inoho nga i ima siayo!

15. Waigu ani aino gupai nga anga agu aboro dunduko gbia ga Mbori ziazia toro nika ndu ku ngbangbaturũ yo te?

 ¹⁵ Ziazia kekeapai na badungu akpiapai rogoho nga ga agu akumba naadu na idapase nga aguyo naaima gbia ziazia toro; ono wa vura duhe wo, i aadunga na gu maabangirise nga ga raka ngbangbaturũ yo te. Ziazia toro anaangbe kumbatayo fu Davide. (1 Sam. 16:13) Ziazia toro aundo ko ko rugutiko na gu dudunguroapai du tipa Yekova na si angbe fuko kumbatayo a ko ke apapara Ziazia Kekeapai. (Mk. 12:36) Ono wa si avura duwo, gu mokedi nangia Petero ape gupai nga Davide ‘aandunga ku ngbangbaturũ yo te.’ (Amo. 2:34) Yoane Bafu Bapatiza angia gu boro i ‘ahisi ni ni ziazia toro.’ (Rk. 1:13-16) Yesu ape gupai nga boro ho pa ni akii kisusi Yoane te, ono ko ape gupai berewe nga Yoane adunga dagba agu aboro yo nika zogarago ngbangbaturũ yo te. (Mt. 11:10, 11) Yekova amangisunge na gako ziazia toro ka fu ome fu agi akumba re tipa i mangi iiriwoapai, ono ko aamanganga sunge na gu toro re tipa ka siayo i raki ngbangbaturũ yo te. Ya mo gere nayugo gupai nga agu aboro i nasia yo i ndu ka zogarago ngbangbaturũ yo ru kisusi yo? Oó. Gupai duho nga Yekova nika zingisa yo azingisa be kpio tipa i raki rogo Paradizo auru kpotosende.—Yo. 5:28, 29; Amo. 24:15.

16. Gini mosoro badungu ga Mbori amoyambu areme angera kumbatayo tipaha?

¹⁶ Badungu gu ga Mbori amoyambu du auru kpotosende areme na gu maabangirise nga ga raka ngbangbaturũ yo te. Wakina Abarayama, Sara, Davide, Yoane Bafu Bapatiza, gbiati gu kura dungu akumba gbiati adee du payo rogo Ziazia Kekeapai yo, i nangera kumbatayo tipa ka raka auru kpotosende ti gu regbo ga Mbori Kindo nikaa zogarago kurii yo.—Eb. 11:10.

17. Gini asanahe ani nika sakapai tipaha rogo gu kekeapai ngbefuo gere?

¹⁷ Areme, kura mbedimbedi aKristano kindi dagba ga Mbori aboro, na gipai re nakusa kura asanahe akusa. (Yugo. 12:17) Ni kpiapai, waigu si aida mbedimbedi aKristano naabi tiyo? Ka boro rogo gaoni dungurati tona ri kpakuto na kini mbiri imekakue ti regbo Tingida Pakpio Yesu, wai du si aida oni naamanga pai na ni? Na na ka si du nga bange agu aboro naya i nga mbedimbedi aKristano nange kina kumbatayo? Ya mo si naida oni naabaka bangironi tipaha? Ani nika karagapai kuti agi asanahe re rogo gu kekeapai ngbefuo gere.