1-2. (a) Tipagine si aidanga pa rugusa gaani irisombori iriwo ti ni tirani ya? (b) Gini apai ani nika sakapai tipaha rogo gi kekeapai re?

ROGO 2018, abatungusi wene pangbanga bangeyo naima susa 223,000 naaraka rogo agu aringara i aima rugusa gaani irisombori rogoho watadu i aima rugusa kura apai nga ga gaani irisombori rogoho. Gipai re airiwongo tirani te. A wa ani awirikihe rogo gu kekeapai naadu mbata fu gere, ndikidi aKristano ima ino gupai nga i nika rungosiyo arungosi. (2 Tim. 3:12) Singia ani naraka kina rogo gini ba, airangbii ima rengba ka rugusa gaani iriso fu gaani Mbori nga Yekova ni kina boro ipo ka ani ainongo nga pai nika manga wo ya.

² Ka si du nga irangbii rogo gu ba mo araka rogoho diberã ka rugusa iriso Yekova, mo ima rengba ka sana tiro na agu asanahe nga: ‘Ya mo arungosiro nayugo gupai nga Mbori aidanga na ani berewe te? Ya mo pa rugusa yo gaani irisombori nika digiso gaani iriso fu Yekova? Ya mo si naida mi ga ku rogo gu rago rengbe mi kadu na ranirii rogoho kaa iriso Mbori?’ Rogo gi kekeapai re, ani nika sakapai tipa agu asanahe re. Ani nika sakapai a tipa wai ani narengbe kaa iriso Yekova kindi ho i arugusa gaani sunge nga ga Kindo ni gbiati agu agbina si aida ani nehe.

3. Ringbisihe kuti 2 AKorindo 11:23-27, gini arungosiro gu ruru mokedi nangia Pauro agbiatiko na ni, na ginipai ani awirikaha ti gako kpiapai?

³ Ka irangbii rugusi gaani irisombori, ani ima rengba kada kuti gu digisopai nyanyaki nga Mbori na ngbarago na ani te. Ono oni tingidi gupai nga, arungosiro ayugongo gupai nga Mbori na ngbarago na ani te te. Oni bingo gu kpiapai nangia ga gu mokedi nangia  Pauro. Zanga kapa, Mbori aima ida na ko. Ko aima gbia gu momu nga ga keka awaraga 14 nga ga Vovo Ndiko, na ko angia ga aGendiria mokedi. Ono wa si avura duwo, ko aima gbia tiko na kere arungosiro. (Oni gedi 2 AKorindo 11:23-27.) Gupai ani awirikaha ti gupai naadu tipa Pauro nga Yekova ima rengba ka mbu gako ruru amoyambu ti kura aregbo i rungosiyo.

4. Tipagine aboro zegino asogarani ti ni?

⁴ Yesu aima sakapai tipa ndu gupai si aida ani moi bangirani ti ni tipa arungosiro. Ko ape gupai nga i nika rungosi rani arungosi bambiko aboro zegino nga ani te. (Yo. 15:18, 19) Arungosiro ayugongo gupai nga Mbori na ngbarago na ani te te. Kuba gure, si nayugo gupai nga ani namanga gupai du ni ruruhe!

5. Ya mo ome be aboro ka digiso iriso Yekova? Oni sakingo rogo yo.

⁵ Ka asogorani rugusinga iriso gu Mbori Du na Tanduapai Dũ nga Yekova te. Badunguyo ima asadaha, ono ka i adunga na diabese ya. Oni bingo gupai namangi ti regbo Ue Vura Nga ga Zegino. Ti gu regbo re, airangbii rogo dungu aringara aima rungosi ga Mbori aboro ni kerehe. Anga kina ga aNazi zogarago Germani yo sa narugusi ga aDezire Yekova sunge te, ono airangbii Austroria yo, Kanada yo na rogo kura aringara aima rugusaha a. Ono tie, oni bingo gupai naye ka manga. Rogo 1939 ti gu regbo vura atona, bange abatungusipai rogo zegino dunduko adu nga 72,475. Atingidapai ayugu gupai nga bara ti gu regbo vura adigi rogo 1945, bange abatungusipai adu nga 156,299, mbiko gupai nga Yekova aima fu maku fu gako aboro. Bange abatungusipai aima nge kisusi gu naadu mbata!

6. Gini weneapai rengbe ka manga ho i arungosi rani ni? Oni funga kpiapai.

⁶ Ho arungosiro atona ni, ani nagunde agunde. Ono arungosiro na kina wene sangbanaha ti ni. Si rengbe ka sarani ani diberã kaa manga ga Yekova sunge kindi. Ni kpiapai, gu kura arogotise sa adu na tooni gude beyo na i araki rogo gu ringara irangbii aima diaberã rogoho ka rugusa gaani irisombori. Kuba gupai nga agu arogotise re du na gunde, i atona mangasunge abazakigene. Zavura nairakporo aima mbu gu wene sunge marã ri aamangaha. Bairakporo ape gupai nga pa rugusa yo gaani irisombori aima sa badungu aboro i du na nyemu ka inopai tipa aDezire Yekova. Ni sangbana gipai re, si adu fuko taata ko tona wisigo Ziazia Kekeapai na aboro. Pa rugusa yo gaani irisombori rogo gu ringara re aima kusa kura wene sangbanapai a. Bakumba sa rogo kina  gu bangisa ringara re ape gupai nga agu aboro naaima mbu iriso Yekova atona nduge tipa adunguratise na i ki tona sunge tungusapai berewe.

7. (a) Ginipai ani awirikaha rogo Pa Amotumo 26:36, 37? (b) Ginipai rengbe mo ka mangaha ho i arugusa gaani irisombori ni?

⁷ Ho asogorani arugusa gaani irisombori ni, i naida gupai nga ka sarani ani gunde ti iriso Yekova. Kupati gu nga ka rugusa gaani irisombori, i ima rengba ka gbandaka aziree ti rimorani, ka keda airangbii i ye ka ta kpurani yo, ka ndu na ani ku ngbanga yo, watadu zavura ka ba agu akura rani ku bambukiso yo. I na gu maabangirise nga ani nika gunde agunde bambiko gupai nga i ba agu akura rani ku bambukiso yo. Ka ani ambu yo i rimisi gunde ku kpotorani yo, ani ima rengba ka tona “rugusa” gaani irisombori ni kina tirani. Si aidanga ani da wa agu aboro i napeke payo rogo Pa Amotumo 26:36, 37 te. (Oni gedihe.) Si aidanga ani mbu gunde si sarani ani tona manga agu apai nga ga toro ni betehe gbua watadu ani mbu mangaha te. Si naida ani kido kuti Yekova na kpotoraniyo dũ ki zanga gunde. (Tam. 27:1) Si naida ani gbata ga Yekova undo ni manga ani kparakpee. Ani ima ino gupai nga mbiko ga Yekova undo, irangbii ho rengbe ka rugusa rani ti iriso gaani Mbori te, ka ni vura du na ome tini kisusi wai vurũ.​—Eb. 13:6.

8-9. (a) Gini diaberã si aida ai Kristano mangihe tipa tiní watadu tipa gani riikporo? (b) Ginipai rengbe ka undo boro ni mangi wene diaberã?

⁸ Ka si du nga irangbii rugusi gaani irisombori rogo gu rago du mo rogoho, mo ima rengba ka bakabangiro singia si naida mo ga ku rogo kura ringara nga gu rengbe mo kadu na ranirii rogoho kaa iriso Yekova. Gere nga gu diaberã ka kura boro amanganga ha foro ya. Kura aboro ima rengba ka bihe ni pa undo ka wisigopai tipa gupai kura aKristano rogo bambata kama agarã amangihe ho i arungosi yo ni. Tingbafuo asogo Setefano imiko ni sopa ko na mbia, agu abawiriki naadu Yerusarema yo agbandaka rogo ngbii Yuda na Somorona na zavura ku Poinike yo, Kupurio yo na Andiokia yo. (Mt. 10:23; Amo. 8:1; 11:19) Ono tie, kura aboro ima rengba a ka wisigo gupai nga, tingbafuo agu aKristano naadu rogo bambata kama agarã gbiatiyo na kura arungosiro berewe, gu mokedi nangia Pauro adiberã ka zanga guari kusayo rogo agu aba aboro aasoga sunge tungusapai rogoho. Kuba gure, ko amoi gako padu wenengai ngbapai yo tipa ka tungusa wene pangbanga na ka nyakasa awirina rogo agu agbata bakere arungosiro adu rogoho.​—Amo. 14:19-23.

⁹ Ginipai ani awirikaha ti agi apangbanga re? Ai bariikporo si aida ni mangi diaberã ni tiní nibipa gupai nga ga ga ku rogo kura ba. Mbata fu manga ni diaberã, si naida ni mangi kparakpee na ki berẽ wenengai kuriipa agu apai du tipa gani riikporo gbiati gu wene asangbanapai na gu gbegberẽ asangbanapai pa ga ku rogo kura ba narengbe ka ye na ni kurii gani riikporo. Nibipa gipai re, ai Kristano si aida ni ‘kpidi kina gani pai’ watadu ni tindi kina gani tindiro. (Gara. 6:5) Si aidanga ani saringbanga aboro tipa agu adiaberã i amangaha te.

10. Gini arugapai be-basunge gbiati abaakumba nika fuhe?

¹⁰ Waigu rengbe mo kaa iriso Yekova kindi ho i narugusi gaani irisombori ni? Be-basunge nika fu arugapai gbiati aberãpai fu agu abaakumba du rogo gamo dungurati nibipa wai ka gbia gu riahe nga ga toro, wai ka dunguratise tipa irisombori, na wai ka tungusa wene pangbanga. Ka si du nga be-basunge na rengba ka fura na abaakumba te, abaakumba ima rengba ka undoro gbiati agu aboro dunduko du rogo dungurati tipa oni naandu kindi kumbatayo kaa iriso Yekova. I nika fu arugapai ringbisihe kuti agu arugute du rogo Ziazia Kekeapai na rogo gaani awaraga.​—Mt. 28:19, 20; Amo. 5:29; Eb. 10:24, 25.

11. Tipagine rengbe mo kadu na gu kido ti ni nga gu riahe nga ga toro nika duadu bero ti aregbo dunduko, na ginipai rengbe mo ka mangaha tipa ka banda gu riahe nga ga toro re?

 ¹¹ Yekova kidohe nga gako amoyambu nikaa ri riahe nga ga toro kpaima. (Yes. 65:13, 14; Rk. 12:42-44) Sidu, mo ima rengba kadu na gu kido nga gako riigbu nika manga ai gupai rengbehe ka mangaha tipa kaa fu gu ngarasaro nga ga toro foro mo aidaha. Ginipai rengbe mo ka mangaha? Ka i rugusi gaani irisombori, mo gbia wene ba ka igo gamo Ziazia Kekeapai rogoho gbiati gu kura awaraga rengbe kadu bero. Mo du na rubangirise ka zanga mbu gu nyanyakipaha ahe re rogo gu ba rengbe aboro ka inopai tipaha rogoho taata, singia si nga waraga, watadu si rogo terefuni, tablet, na rogo kompiuta. Ani dunduko ni basasa si aida ani mangi ai gupai rengbe ani ka mangaha tipa ka nye nyanyaki rogo toro yo.

12. Waigu rengbe abaakumba ka manga mbakadapai tipa adunguratise ngba gu gene nikaa gbenga berã aboro kuti rani ya?

¹² Na agu adunguratise tigaha du tipa irisombori ninaamanga na aposo dunduko? Abaakumba nika manga mbakadapai tipa oni naamanga adunguratise ngba gu gene nikaa sanga gupai nga asogorani inipai tipaha ya. I ima rengba ka pe gupai nga oni naadungura tironi ku rogo umba abadona, na si nawira gupai nga i nikaa aria aregbo dunguratise aˈaria dedede gbiati agu aba oni nikaa mangaha rogoho. Oni rengbe ka banda agu aboro dunduko nikaa du pati adunguratise ni fura oni ku sende ho oni aye ni tipaha na ho oni aga ni tingbafuo nyasaha. Oni ima rengba a kaa vo roko rogo gu gene nikaa gbenga berã aboro kuti roni ya.

13. Ginipai rengbe ani ka wirikaha ti gu kpiapai nangia ga agu awirinarani naadu rogo gu ba naadu mbata nga Soviet Union?

¹³ Nibipa sunge tungusapai, apai ima rengba kadu ni bakiakia rogo aba. Ono ani ima kpinyemu Yekova na ani nagbia ngbarago agbia ti tungusapa gako Kindo fu aboro, sidu, ani nika gbia gene agbia kaa tungusapai ngbaha. (Rk. 8:1; Amo. 4:29) Ho gu nakeke kuru apangbanga nga Emily B. Baran aafura ni tipa ga aDezire Yekova tungusapai rogo gu rago naadu mbata nga Soviet Union, ri aya: “Ho irangbii ape gupai ni fu aDezire Yekova nga ka i tungusinga pa gayo idapase fu kura aboro ya, aDezire Yekova anaafura na gayo amurakporo, abadiasunge, gbiati abakureayo. Ho i azi aDezire Yekova ni ku bambukiso yo tipa gipai re, i atona kaa tungusapai yo fu zizi aboro.” Wa i avura rugusa gaani sunge, agu awirinarani naadu rogo gu ba naadu mbata nga Soviet Union re aambunga sunge tungusapai te. Ka i rugusi sunge tungusapai rogo gu ba du mo rogoho, mo dunga adu kina wai agu awirina re adu!

14. Atambuahe 39:1 rengbe ka undo rani ani ne gini gbina?

¹⁴ Oni du na rubangirise nibipa gupai oni apehe fu aboro. Ti gu regbo i narugusi gaani irisombori, si naida ani ini gu regbo si aida ani ‘ongo kii’ ti ni. (Batu. 3:7) Si naida ani zanga peka agu apai si aida si du ni gbugbuhe, wa agu nga rimo awirinarani, gu ba ani adunguratirani ku rogoho,  wai ani amanga gaani sunge tungusapai, na wai ani agbia gu riahe nga ga toro. Si aidanga ani gumba agi apai re fu airangbii te; na si aidanga ani gumbaha a fu agu abakurearani watadu agumerani du rogo gaani ringara watadu rogo kura aringara te. Ka ani ti ku rogo gi gbina re, ani ima rengba ka maa raka awirinarani ngbapai yo.​—Oni gedi Atambuahe 39:1.

15. Ginipai Satana nika asada ka manga rani na ni, na waigu rengbe ani ka ne gi gbina re?

¹⁵ Ka oni mbunga rukutu akpakarapai si kparaka rani ya. Satana ima ino gupai nga gu kporo du na kparakaro rogoho, ka si runga te. (Mk. 3:24, 25) Ko nikaa asada kindi ka ye na kparakaro ku dagbarani. Rogo gu gene re, ko kini du na gu maabangirise nga ani nika tona kaa sovura dagba tirani kuba gupai nga ka sovura kutiko.

16. Gini wene kpiapai gu wirina nangia Gertrud Poetzinger amoihe?

¹⁶ Zavura agu aKristano naima nyaka rogo toro yo, si naida aida i du na rubangirise ka zanga ti ku rogo gi gbina re. Oni bingo kpiapai nga ga kura mbedimbedi awirina ue ni adee nangia, Gertrud Poetzinger na Elfriede Löhr. I aziyo ku bambukiso yo bataya zizi aboro yo na kura aKristano ni adee. Gertrud akpipai ho Elfriede aafu agumbapai ni nga ga ngarasaro fu kura awirina ni adee bataya yo. Kusa, zee azi Gertrud na ri ki kpari fu Yekova tipa undo. Ri akepai ki ya, “Ho du kura aboro ni na bakere tandu mangaapai beyo watadu ho i afu bakere amomu ni fuyo, si naida ani wiriki ka dia gupai re kugume.” Waigu ri adibe gu sino nga ga kpihe re? Gertrud agbeberã ri kuti gu wene asino nangia ga Elfriede. Rogo gi gene re, ri kini du na wene pagume berewe na Elfriede. I dunduko ue abati bataya zizi aboro yo na ki irisi Yekova ni ruruyo da ti digido gayo raka auru kpotosende. Ka ani mangi nyanyaki asadatise ka diabe akpakarapai dagbarani na awirinarani, ani nika ne gu gbina nga ga kparakaro.​—Koro. 3:13, 14.

17. Tipagine si aida ani naapekafuo arugapai ti ni ti aregbo dũ?

¹⁷ Oni naapekafuo arugapai ti aregbo dũ. Ka ani apekafuo agu arugapai ani agbiaha be agu awirina du na pagbia beyo rogo dungurati, ani nika ne akpakarapai. (1 Pet. 5:5) Ni kpiapai, rogo gu kura ringara sa i arugusi gaani sunge tungusapai rogoho, agu awirina du na pagbia beyo rogo dungurati afu gu rugapai nga ka abatungusipai kparakanga awaraga gene tungusapai yo ya. Ono tie, kura wirina sa ni bazakigene aapekanga fuo gu rugapai re te, sidu, ko andu ki kparaka awaraga gene tungusapai yo. Sangbana gupai re angia gine? Ngbutuko tingbafuo ko na kura awirina nyasi tungusapai, aborisi aye kini tona sasana yo. Si nawira gupai nga airangbii aima biyo i nikparaka awaraga na i ki rogodi agu awaraga i akparakaha fu aboro re. Ginipai ani awirikaha ti gi pangbanga re? Si naida ani naapeka fuo arugapai ka si vura du vurũ nga ani nabihe nga ani inipai kisusi. Yekova nafu maku furani ti aregbo dũ ho  ani agiasangba agu awirina ni ko namoi yo i naangbembatayo furani.​—Eb. 13:7, 17.

18. Tipagine si aida ani ne maa agu andiko ti ni si aidanga ha ya?

¹⁸ Ka oni moingo agu andiko si aidanga ha ya ya. Ka abaakumba moi agu andiko si aidanga ha ya, i nika sa apai ni kpakarakpakaraha fu kura aboro. Kura wirina nga Juraj Kaminský atingidi gupai namangi ho i arugusi gaani irisombori ni rogo gu ringara naadu mbata nga Zeksorovakia, ko aya: “Fuo i zi agu awirina naadu na pagbia beyo rogo dungurati gbiati dungu abaakumba, bete agu awirina naangbembatayo rogo adungurati na rogo badona nga ga adungurati nga aguyo i aaziongo yo ya atona kaa maa andiko nga ga mangaapai fu abatungusipai, kini keke agu apai fuyo si aida i naamangaha na agu si aidanga i naamangaha ya.” Yekova afunga gu pagbia furani nga ga manga adiaberã fu kura aboro te. Gu boro namaa agu andiko si aidanga ha ya abandanga gu du wenengai nga ga wirina ni te, ni naˈasada kada ni bazogo ga wirinani idapase.​—2 Kor. 1:24.

19. Ringbisihe kuti 2 Pekapai 32:7, 8, tipagine si aida ani du ti ni ngangarã ka Satana vura kaa manga kina ginipai vurũ?

¹⁹ Vurarani nga Satana Bakitingbanga ambunga asada ka rungosi ga Yekova ruru amoyambu te. (1 Pet. 5:8; Yugo. 2:10) Satana gbiati agu aboro nasongoda ko nika asada ka rugusa gaani iriso fu Yekova. Ono tie, ndupai ho tipa gunde rungburasi rani te! (Pa Rug. 7:21) Yekova na kina rani, na ko nikaa songoda rani kindi zavura ho ka i rugusi gaani irisombori ni.​—Oni gedi 2 Pekapai 32:7, 8.

20. Ginipai mo nadiberã ka mangaha?

²⁰ Ani dunga adu na kina gu bangisa diaberã agu awirina naadu rogo bambata kama agarã adu na ni, nga aguyo naya fu agu abazogo naadu ti rago yo wẽ: “Si ngia gia gaoni pai bakere ti ga Mbori ru bangiriko, kina roni na ni; bambiko gaani nga kina gumba agu apai ani abi nigi he.”​—Amo. 4:19, 20.