1. Tipagine si aida ani mbakadatirani ti ni tipa arungosiro?

ROGO gu yuru naadu mbata fu i imi gaani Gbia nga Yesu, ko ape gupai nga agu aboro dunduko nasia kadu ni gako abawiriki nika gbiatiyo agbia na arungosiro. (Yo. 17:14) Tona ti gu regbo re kada ku areme, agu aboro nasoga ruru irisombori aima digo ni rungosi ga Yekova ruru aKristano. (2 Tim. 3:12) Wa digido gi zegino re ambeda, si naida ani moi gupai ku berãrani yo nga avurarani nika soga rani kisusi gu nidu mbata.​—Mt. 24:9.

2-3. (a) Ginipai si aida ani inihe tipa gunde? (b) Gini apai ani nika sakapai tipaha rogo gi kekeapai re?

² Waigu rengbe ani ka mbakadatirani awere tipa arungosiro? Si aidanga ani asadi ka berãpa gu gbegberẽ apai dunduko rengbe ka manga rani kumbatayo te. Ka ani aberãpa gu gbegberẽ apai dunduko rengbe ka manga rani, gunde gbiati bakabangirise ima rengba ka fu rii omerani. Na gipai re ima rengba ka sarani ani mbu iriso Yekova mbata fu ani gbiatirani na ndikidi akpakarapai. (Snz. 12:25; 17:22) Gunde nga nyanyaki unvura ‘vurarani nga bakitingbanga,’ aˈasada ka sovura na ni kuti rani. (1 Pet. 5:8, 9) Ginipai rengbe ani ka mangaha tipa ka nyakasa tirani?

³ Rogo gi kekeapai re, ani nika wisigopai tipa wai ani narengbe ka nyakasa gaani pagume na Yekova na ndu gupai duhe ti ni furani ni nyanyakipa pai ka mangaha wo. Berewe a, ani nika sakapai tipa gupai rengbe ani ka mangaha tipa ka kiiso gaani wingbaduse. Na ni yangaraha, ani nika sakapai tipa gupai rengbe ani ka mangaha ho aboro asogorani ni.

4. Ringbisihe kuti AEbere 13:5, 6, ginipai si aida ani du na kido kutini, na tipagine?

⁴ Mo du na gu kido nga Yekova ima kpinyemu ro na ko ambunga ro te. (Oni gedi AEbere 13:5, 6.) Dungu agarã kusayo, Ngbaõbambu  Sinziri ape gupai nga: “Gu boro naima ino Mbori wenengai gbe nakido kutiko bakere gbe ti regbo asada.” Nairiwo wai du gipai re ni rengo! Tipa ka hi arungosiro, si naida ani kpinyemu Yekova, kini kido kutiko na kpotoraniyo dũ na ki zanga du na kapa singia ko nakpinyemu rani akpi.​—Mt. 22:36-38; Yak. 5:11.

5. Ginipai nika undo ro mo bi gupai nga Yekova ima kpinyemuro?

⁵ Mo naageda Ziazia Kekeapai na aˈuru dũ kidu na gu sasa nga ga mbeda na Yekova. (Yak. 4:8) Ho mo ageda Ziazia Kekeapai ni, mo gbeberã ro kuti ga Yekova wene asino. Mo asadi ka rugatiro na wai ko nakpinyemu ro ho mo agedapai ni tipa agu apai ko agumbaha na kini mangihe. (Gate 34:6) Si ima mbu fu kura aboro i idi kuti gupai nga Mbori ima kpinyemu yo bambiko i aayugongo nyemuse fuyo mbata te. Ka singia wo du pai tipa ro, mo asadingo kaa kekepa agu agene na aˈuru dũ Yekova nayugu inapai gbiati wenesino foro ngbaha. (Tam. 78:38, 39; Rom. 8:32) Wa mo nikaa bi agu apai du tipa ro na kini berẽkurii agu apai mo nagedihe rogo fugo Mbori yo, si nawira gupai gbe nga mo nika berã badungu apai nga gu Yekova namangihe foro. Ka mo du na bakere tambuahe tipa agu apai dunduko Yekova namangihe foro, gamo pagume na ko nika du ni nyanyakihe.​—Tam. 116:1, 2.

6. Ringbisihe kuti Atambuahe 94:17-19, waigu rengbe gu kparakpee naye kina boro kpotoroyo ka undo ro?

⁶ Mo naamanga kparakpee dedede. Mo makianga pa tooni kumbagude nga guko bako nadungo ko ni nyemuse. Wa bako nadungo ko, ko agundenga ka fura fu bako tipa gu wene apai gbiati gbegberẽ apai nimangi fuko sukuru yo te. Mo ima rengba kadu na gu ngbatunga pagume re ka mo aambeda na Yekova rogo kparakpee yo naˈauru dũ. (Oni gedi Atambuahe 94:17-19.) Wa mo nikaa kpara fu Yekova, “mo uka kpotoro yo wa ime” na mo pekepa gamo agunde gbiati abakabangirise fu gu Bamo nga boro nyemuse. (Kpe 2:19) Sangbana gipai re nika ngia gine? Mo nika gbia guhe Ziazia Kekeapai ayambaha nga “gu zereda nga ga Mbori nagasi rugatinapai dunduko.” (Frp. 4:6, 7) Ka mo aamanga kparakpee wa gere dedede, mo nika ye kadu mbembedi gbe na Yekova.​—Rom. 8:38, 39.

7. Tipagine si aida mo du ti ni na gu nyanyaki kido nga ga Mbori akidohe nika daada ti rengo?

⁷ Mo du na gu kido nga agu amaku nga ga ga Mbori Kindo nika da ada ti rengo. (Geda 23:19) Ka mo aadunga na gu kido nga ga Mbori akidohe nika da ada nzunzu ti rengo ya, si nika du taata fu Satana gbiati agu aboro du tiibeko i gundesi ro. (Snz. 24:10; Eb. 2:15) Waigu rengbe mo ka nyakasa gamo idapase kuti ga Mbori Kindo awere? Mo di regbo ka wisigo gu ga Mbori akidohe duho tipa gako Kindo na ki wisigipai tipa gu nduapai mo narengbe kadu na gu kido ti ni nga si nika daada ti rengo. Waigu gipai re nika undo? Mo bingo gu kpiapai nga ga Stanley Jones, nga guko i aziko ku bambukiso yo tipa agarã nga saba tipa gako idapase. * Ginipai naaundo ko ko  hipai ki nye ni ruruko? Ko aya: “Gi idapase adu ni nyanyakihe bambiko gupai nga mi aima inopai tipa ga Mbori Kindo na agu apai si nika mangaha, na mi aadunga na kapa tipaha te. Sidu, boro ho narengbe ka sare mi mbu Yekova te.” Ka mo du na nyanyaki idapase kuti ga Mbori akidohe, mo nika mbeda na Yekova gbe na mo ambunga gunde si rugusi ro ti irisiko te.​—Snz. 3:25, 26.

8. Gu bipai du ani na ni tipa du pati adunguratise nayugo ginipai? Oni sakingo rogoyo.

⁸ Mo naandu tipa agu adunguratise nga ga aKristano dedede. Adunguratise naundo rani ani du mbembedi gbe na Yekova. Gu bipai du ani na ni tipa du pati adunguratise nayugoho singia ani adiabe arungosiro kumbatayo. (Eb. 10:24, 25) Tipagine duhe ti ni wo? Ka ani aambu rukutu akpakarapai si naaká na ani ti du pati adunguratise awere, ginipai nika manga kumbatayo ka si du nga si naida ani moi raka rani ngbapai yo tipa ka kodatirani na akuarani aidipase? Sidu, ka ani mangi nyanyaki diaberã awere tipa kaa du pati adunguratise, ani ambunga du pati ni ka asogorani asadi ka rugusa rani ti dunguratirani te. Awere nga wene regbo tipa ani sonosi nyemu gaani adunguratise. Ka nyemu du pati adunguratise du tirani, sogote ho nika rugusa rani ti giasangba Mbori susi ga aboro te, zavura ka irangbii vura rugusa gaani sunge Kindo vurũ.​—Amo. 5:29.

9. Tipagine du zio averesi ku rise yo ti ni ni wene gene ka mbakadatise tipa arungosiro?

⁹ Mo zi agu averesi kuriro yo ngba tiro gbe. (Mt. 13:52) Berãro arengbanga kadu ni rengberengbehe te, ono Yekova ima rengba ka mangasunge na gako ziazia toro du na ome ti ni tipa ka ye na agu averesi re ku berãro yo. (Yo. 14:26) Kura wirina sa nga guko i aziko ku bambukiso yo East Germany yo na ko kidu rogo bambukiso nisako aya: “Si aima du ni pa maku nga ti gu regbo re, mi aima zio dungu akama averesi kurire yo! Wa si avura du nga mi adu ni sare, mi anaaberã kurii badungu averesi nga gu nafura tipa agu apai du mburuhe rii Ziazia Kekeapai.” Agu averesi re aima undo gu wirinarani re ko nye mbembedi na Yekova na ki hipai ni ruruko.

10. Tipagine si aida ani zi abia ti ni kurirani yo?

¹⁰ Mo zi agu abia kuriro yo natambua Yekova na kini bihe. Ho i azi aPauro na Sira ni ku bambukiso yo Firipoi yo, i aabi agu abia nga ga toro i azihe kuriyo yo. (Amo. 16:25) Wakina gure a, ho i andu ni na agu awirinarani naadu rogo gu ringara naadu mbata nga Soviet Union ku Siberia yo, waigu i anyakasi tiyo? Wirina du rimori nga Mariya Fedun aya: “Ani anaabi agu abia dunduko ani ainihe rogo buku bia.” Ri ape  gupai nga agu abia re angarasi yo dunduko na ki undo yo i naabihe nga i mbembedi gbe na Yekova. Ya mo mo naagbia nyakasaro ho mo abi agu abia ni nga ga toro ngba tiro gbe? Sidu, ka singia mo naagbia nyakasaro agbia, mo zi agu abia re awere kuriro yo!​—Oni bi gu sanduki nga, “ Mo Fu Wingbaduse Fere.”

11-12. (a) Ringbisihe kuti 1 Samuere 17:37, 45-47, tipagine Davide adu ti ni na wingbaduse? (b) Gini nyanyakipa pai ani awirikaha ti ga Davide kpiapai?

¹¹ Tipa ka diabe arungosiro, si naida mo du na wingbaduse. Ginipai rengbe mo ka mangaha ka mo bihe nga mo na gu sino re tiro te? Mo tingidi gupai nga ndikidi wingbaduse arunga riipa bakio ro, gu ome du mo na ni watadu gamo tandu mangaapai te. Mo bingo gu kpiapai nangia ga paranga Davide ti gu regbo ko asovura na Goriata. Goriata adu ni iiriwo ko, ono Davide kidu tigako ni tooni ko, ni rurungbura ko, na ni gu boro naambakadanga tini wenengai tipa vura ya. Basape aadunga be Davide te. Ono wa si avura duwo, ko adu na bakere wingbaduse. Davide andu ni wingbaduse ka sovura na gu iiriwo kumba nangia boro rukö re.

¹² Tipagine Davide adu ti ni na wingbaduse wa gure? Ko aima ida kuti gupai wenengai nga Yekova adu na kina ko. (Oni gedi 1 Samuere 17:37, 45-47.) Davide aamaanga berãko kuti wai Goriata adu ni ba iiriwo ko kisusi ko te. Kuba gure, ko amoiberãko kuti wai Goriata adu ni umba ko ti Yekova. Ginipai ani awirikaha ti gi pangbanga re? Ka ani du na gu kido nga Yekova na kina rani, na asogorani ni umbayo ti gu Mbori Du na Tanduapai Dũ, ani nika du na wingbaduse. (2 Peka 20:15; Tam. 16:8) Waigu rengbe ani ka kiiso gaani wingbaduse awere mbata fu arungosiro da ti rani?

13. Waigu rengbe ani ka sonosa wingbaduse awere? Oni sakingo rogoyo.

¹³ Ani rengbe ka kiiso gaani wingbaduse awere ni tungusa ani pai fu aboro tipa ga Mbori Kindo. Tipagine duhe ti ni wo? Bambiko tungusapai nayugopai furani ani kido kuti Yekova na ki zanga gunde be aboro. (Snz. 29:25) A kina wai agbaga rani naanyaka ho ani amanga mangonvo ni, kinawo a gaani wingbaduse anyaka ho ani atungusapai ni kporo na kporo, rogo agu aba du na badungu aboro rogoho, ho ani ambakadanga tirani ambakada ni tipaha ya na rogo ababagaahe. Ka ani sonosi wingbaduse awere tipa kaa tungusapai, ani nika du ni mbakadimbakadi rani kaa tungusapai kindi, zavura ti gu regbo ka i irangbii rugusi gaani sunge Kindo.​—1 Tesa. 2:1, 2.

14-15. Gini apai rengbe ani ka wirikaha ti gu kpiapai nangia ga Nancy Yuen na Valentina Garnovskaya?

 ¹⁴ Ani ima rengba ka wirikapai ni bakerehe ti gu kpiapai nga ga kura ruru awirina ue ni adee, nga aguyo naadu na bakere wingbaduse. Nancy Yuen adu ni guru ri, ono ri aagundenga te. * I aya furi ri mbu tungusa wene pangbanga tipa ga Mbori Kindo, ono ri ki ima ká ka mbuhe. Ni sangbana gipai re, i abari ku bambukiso yo tipa agarã naima susa 20 China yo. Agu abanyaki naasasana ri aya ri angia “yangara boro nyakarii kisusi” rogo gayo ringara.

¹⁵ Wakina gure a, i azi Valentina Garnovskaya ku bambukiso yo bara biata rogo gu ringara naadu mbata nga Soviet Union tipa agarã nga 21. * Tipagine i azi ri ti ni? Ri adiberã kaa tungusapai kindi si ki sa gupai nga abanyaki ya tipa ri wẽ ri nga “kere boro tiandika.” Ginipai naasa agi awirina ue re i du na wingbaduse wa gure? I adu na gu kido nga Yekova adu na kina yo.

16. Ginipai si aida ani mangihe tipa kadu na ndikidi wingbaduse?

¹⁶ A wa ani nabihe, tipa ka kiiso wingbaduse, si aidanga ani moiberã rani kuti gaani ome gbiati tandu mangaapai te. Kuba gure, si naida ani idi kuti gupai nga Yekova na kina rani na ko nasovura tipa rani. (Pa Rug. 1:29, 30; Zek. 4:6) Mangaha wo nika undo rani ani du na ndikidi wingbaduse.

17-18. A wa duhe ni kekehe rogo Yoane 15:18-21, ginipai Yesu atingidi rani na ni? Oni sakingo rogoyo.

¹⁷ Ani nidu na ngbarago ho aboro airisa rani ni, ono ho aboro akpingo nyemu rani ni ya, si aidanga ani berẽ gupai nga ani na nyanyakipa rani te te. Yesu aya: “Aboro [ngbarago] nga oni, ho aboro ka soga roni ni, na ho i ka kpara roni ni ti yo, ki nisenge roni, ki ba rimoroni ku sa yo wa gbegberẽ he, tipa rimo Wiri boro.” (Rk. 6:22) Ginipai du Yesu aaida ka gumbaha?

¹⁸ Anga gupai ko aaida ka gumbaha nga aKristano nikaa gbia ngbarago ho i nikaa sogayo ni te. Kuba gure, ko aatingida rani na pa gupai rengbe ka manga rani. Aboro zegino nga ani te.  Ani naraka ringbisihe kuti ga Yesu ayugopai, na ani natungusa gu pangbanga ko atungusihe. Ni sangbana gipai re, aboro zegino nasoga rani. (Oni gedi Yoane 15:18-21.) Ani naida ka fu ngbarago fu Yekova. Ka aboro asoga rani mbiko gupai nga ani ima kpinyemu Barani nga Yekova, gure nabiyo.

19. Waigu rengbe ani ka wirika gu kpiapai nangia ga amokedi?

¹⁹ Ka mo mbunga ai gupai aboro agumbaha watadu aboro mangaha si saro zee zi ro mbiko du ni Dezire Yekova ya. (Mika 4:5) Ani rengbe ka wirika wai ka diabe gunde be aboro ni wisigo ani gu kpiapai agu amokedi naadu Yerusarema yo amoihe nibasa tingbafuo kpio Yesu. I aima ino wai ga aYudo abarumbatayo rogo pambori anaasoga yo. (Amo. 5:17, 18, 27, 28) Ono wa si avura duwo, i anaandu kindi ku yekaru yo na kini yugu tiyo gbaiga ni ga Yesu abawiriki. (Amo. 5:42) I aambunga gunde si rugusi yo te. Ani ima rengba a ka diabe gunde ni yugo ani tirani dedede ni aDezire Yekova gbaiga basunge yo, sukuru yo, na rogo gu dagbarago ani araka rogoho.​—Amo. 4:29; Rom. 1:16.

20. Tipagine amokedi adu ti ni na ngbarago si ki vura du vurũ nga i aasoga yo?

²⁰ Tipagine amokedi adu ti ni na ngbarago? I aima ino ndu gupai i aasoga yo ti ni, na i anaabihe ni pa irisa ho i anaasoga yo ni tipa manga gupai Yekova akpinyemuhe. (Rk. 6:23; Amo. 5:41) Gu mokedi nangia Petero ake gupai kusa nga: “Ono ka oni vura hi apai ahi mbiko rurupai, [aboro ngbarago] nga oni.” (1 Pet. 2:19-21; 3:14) Ka ani rugatirani na gupai nga i nasoga rani tipa manga rurupai, ani mbunga gu sogote nga ga aboro si gundesi rani te.

21-22. (a) Ginipai mo nadiberã ka mangaha tipa ka mbakadatiro tipa arungosiro? (b) Ginipai ani nika wisigopai tipaha rogo gu kekeapai ngbefuo gere?

²¹ Ani ainongo gu regbo aboro nika rungosi rani watadu airangbii nika rugusa gaani sunge nga ga Kindo ti ni te. Ono tie, gupai ani nainihe nga ani rengbe ka mbakadatirani awere ni nyakasa ani gaani pagume na Yekova, ni sonosa ani gaani wingbaduse, na ni wirika ani wai ka diabe gu sogote nga ga aboro. Gu mbakadatise ani amangaha awere nika undo rani ani ru nyanyaki kumbatayo.

²² Ono na ka si du nga i rugusi gaani irisombori? Rogo gu kekeapai ngbefuo gere, ani nika wisigopai tipa abangua arengo nga ga Ziazia Kekeapai nga gu rengbe ka undo rani ani naandu kindi kumbatayo na iriso Yekova zavura ho i narugusi gaani irisombori ni.