Rogo 2 AKorindo 12:2, 3, Pauro afura tipa kura kumba sa nga guko “i atuka [ko] ku ari dati biata ngbangbaturũ.” Da du nangia gu kumba re? Ho Pauro ake waraga ni fu gu dungurati naadu Korinda yo, ko anyakasi gupai nga Mbori aamangasunge na ko ni mokedi. (2 Kor. 11:5, 23) Fuo gure, ko kini pepa “yuguyugupai na ayugoti nga ga Gbia.” Pauro aapenga pa awirina tigu regbo ko aafura re te. Sidu, si nirengo nga ko aafura tipa tiko ni gu boro naabi yuguyugupai gbiati Yugoti.​—2 Kor. 12:1, 5.

Sidu, Pauro du nangia gu boro “i atuka ni ku ari dati biata ngbangbaturũ” na “ku paradiso yo.” (2 Kor. 12:2-4) Ko amangisunge na gu fugo nga “yugoti,” nga gu nayugo gupai nga i apepa gupai fuko nika manga kumbatayo.

Ginihe Pauro abihe nangia “biata ngbangbaturũ”?

Rogo Ziazia Kekeapai yo, “ngbangbaturũ” ima rengba kadu nga gu ngbangbaturũ ani abihe abi. (Bam. P. 11:4; 27:28; Mt. 6:26) Ono i namangasunge amanga a na gu fugo nga “ngbangbaturũ” rogo gu kura agene yo. Ti kura aregbo, ngbangbaturũ ima rengba kadu nga gu zogarago nga ga aboro. (Dan. 4:20-22) Watadu si ima rengba kadu nga gu zogarago nga ga Mbori.​—Yugo. 21:1.

Pauro abi ‘biata ngbangbaturũ.’ Ginipai du ko aaida ka pehe? Ti kura aregbo, Ziazia Kekeapai nape pai bara biata tipa ka nyakasaha. (Yes. 6:3; Yeze. 21:27; Yugo. 4:8) Si nawira gupai nga ni fura Pauro tipa ‘biata ngbangbaturũ,’ ko aanyakasapa gu zogarago paha naima nyaka​—nga gu Kindo nga ga Yesu Kristo gbiati agu aboro 144,000 ko nika zogarago na yo. (Oni bi Insight on the Scriptures, Vol. 1, kpe. 1059, 1062.) A wa gu mokedi nangia Petero akehe, ani napido “vovo angbangbaturũ” mbiko ga Mbori kidohe.​—2 Pet. 3:13.

Na ho Pauro apepa “paradiso” ni?

Gu fugo nga “paradiso” ima rengba kadu na dungu arogoyo ti ni: (1) Nibipa gu ba i ambakadihe fu aboro ho rago aenge ni, “paradiso” ima rengba kadu nga gu Paradizo nika du kumbatayo auru kpotosende. (2) Si ima rengba kadu nga gu kparakpara ba nga ga zereda Yekova afuhe fu gako aboro, nga gu i nika du rogoho rogo vovo zegino. (3) Kurigure, si ima rengba kadu nga gu weneapai du ngbangbaturũ yo, nga gu “ga Mbori Paradiso” i nape paha rogo Yugoti 2:7.​—Ono bi gu Ngbaõbambu Sinziri nangia ga, Bamburu 15, 2015, kpe. 8. genewa. 8.

Si ima rengba kadu nga Pauro aafura tipa agi apai re dunduko biata rogo 2 AKorindo 12:4 ho ko aafura tipa gupai namangi fuko.

Ka pepai ni guruhe:

Gu “biata ngbangbaturũ” i nape paha rogo 2 AKorindo 12:2, si nawira gupai nga si nga gu Kindo nga ga Yesu Kristo gbiati agu aboro 144,000 ko nika zogarago na yo, nga gu i ayambaha nga “vovo angbangbaturũ.”​—2 Pet. 3:13.

I nayambaha nga “biata ngbangbaturũ” bambiko si nga gu Kindo paha naima nyaka gbe.

Si nawira gupai nga gu “paradiso” i “atuka” Pauro ku rogoho, si nga (1) gu Paradizo nika du kumbatayo auru kpotosende, (2) gu paradizo nga ga toro nika du ti gu regbo re, nga gu nika du ni bakerehe kisusi gu paradizo nga ga toro du awere, na (3) gu “ga Mbori Paradiso” du ngbangbaturũ yo nga gu nika du ti kina bangisa regbo sa rogo vovo zegino.

Na ngbanya kuti gipai re, vovo angbangbaturũ du kodihe na vovo kpotosende nika ngia vovo zegino. Si nika ngia vovo mbakadapai, kodihe na gu Kindo nga ga ngbangbaturũ gbiati ngbatunga aboro dunduko nga aguyo nikaa iriso Yekova rogo paradizo kpotosende.