1, 2. (a) Wai du Yekova amangapai kia na gako aboro ti wai gu wiri aboro du na pagbia beyo amangapai na aboro? (b) Gini apai ani nika fura tipaha rogo gi kekeapai re?

DEDEDE, agu aboro du na pagbia beyo “namanga [kura aboro] a wa i nakpi nyemu he” watadu zavura kini rungosi yo. (Mt. 20:25; Batu. 8:9) Ono Yekova tigako wo te! Wa vura duhe nga ko na Tanduapai Dũ, ko naberãpa kpakpa aboro aberã gbe. Ko na wenesino tiko na ko naberãpa aboro aberã. Ko naberãpa wai aberã du ani na kini moiberãko tipa agu ahe du ani na zingoho. Mbiko gupai nga “ko natingida pa rani ya nvutu sende nga ani,” ko asananga rani ani mangi gupai susi omerani te.—Tam. 103:13, 14.

² Ziazia Kekeapai na dungu akpiapai rogoho nga gu nayugopa wai Yekova aberãpa gako amoyambu. Ani furanga tipa akpiapai biata. Bambataha nga, gu wene gene Mbori aundo tooni Samuere ngbaha ko takipande pangbanga sapangbanga fu gu gbiamotumo nangia Eri; uehe nga, gu gene mangapai nga ga hipai Yekova ayuguhe fu Moize ho ko abihe ni nga ko arẽnga kadu ni barumbatayo fu aYisaraere te; na biataha nga, gu gene Yekova ayugu gupai ngbaha nga ko aaberãpa aYisaraere aberã ho ko aakusa yo ni kusayo Ezipeta yo. Wa ani nikaa berãkurii agi akpiapai re, ani bingo gupai  si ayugoho furani tipa Yekova na ki bi agu apai rengbe ani ka wirikaha.

3. Gini iiriwopai namangi fu Samuere rogo kura yuru sa, na gini sanahe gipai re akusaha? (Oni bi gu sura duti tonatonaha.)

³ Samuere atona kaa ‘manga pa Yekova’ banye yo mbuko kindi tooni. (1 Sam. 3:1) Rogo kura yuru sa ho Samuere andu ni ka ra, pai aye ka manga nga gu naadu ni iiriwoho. * (Oni gedi 1 Samuere 3:2-10.) Ko agi fugo si niyambu ko ti rimoko. Samuere aberẽ gupai nga gu fugo re angia fugo gu gbinza gbiamotumo nangia Eri, sidu, ko kini zubo koyo du ko ni na ki ya fuko: “Mi du re, wa yambu mo re.” Eri ape gupai fuko nga ko naayambanga ko te. Ho kina gu bangisapai re amangi ni berewe bara ue, Eri aini gupai nga Mbori du naayamba Samuere. Sidu, ko kini pe wai fu Samuere si aida ko karagapai, na Samuere ki mangi kina gupai ko apehe fuko. Tipagine Yekova aayugongo tiko ti ni fu Samuere vurube gako maraika ti gu bambata regbo ko ayambu ko ya? Ziazia Kekeapai afuranga tipaha te, ono nibipa wai apai amangi, si nawira gupai nga Yekova amangi apai wa gure mbiko gupai nga ko aaberãpa Samuere aberã. Wai du duhe wo?

4, 5. (a) Wai du Samuere amangipai kuti gu sunge Mbori afuhe fuko, na wai du apai amangi fuo giro rago? (b) Ginipai gu pangbanga re ayugoho furani tipa Yekova?

⁴ Oni gedi 1 Samuere 3:11-18. Ga Yekova aNdiko aape gupai nga si naida agude naairisa sosono aboro, gbe agu aboro naadu na pagbia beyo. (Gate 22:28; Pa Mot. 19:32) Ya mo ka Samuere arengbe ka ndu wiso fuo Eri ka gumba ga Mbori pangbanga sapangbanga fuko zanga gunde? Wagusa te! Nirengo, gu pangbanga du tipa gipai re nape gupai furani nga Samuere ‘aagunde agunde ti yugo pa gu yuguyuguhe re fu Eri.’ Ono tie, Mbori aima yugo gupai fu Eri ziazia nga Ko du naayamba Samuere. Ni sangbana gipai re, Eri arugu Samuere nga ko pe gupai fuko Yekova nigumbaha. Eri aya fuko wẽ, “Ka mo [okonga] gu pai sa ti re dagba agu apai yo dunduko nga gu ko nigumba pa ha foro” ya. Samuere agisangbako na ki “gumba kinaku rengo fu ko dunduko.”

⁵ Ga Samuere pangbanga aadunga ni gu pangbanga iriwoho aima ti ni kerehe ti Eri te. Bambiko mbata kusayo, “ga Mbori Kumba” aima gumba ngbatunga pangbanga wa gure fu gu gbiamotumo re. (1 Sam. 2:27-36) Gi pangbanga du tipa Samuere na Eri re nayugo wai furani du Yekova ni gu boro naberãpa aboro aberã na kidu na tatamana.

6. Gini apai rengbe ani ka wirikaha ti gu gene Mbori aundo tooni Samuere ngbaha?

⁶ Ya mo paranga boro nga mo? Kangia wo duhe, gu pangbanga du tipa tooni Samuere nayugo gupai nga Yekova ima rugatiko na agu akpakarapai mo agbia tiro na ni na wai si asa ro mo du. Isoke mo nga boro zee na si foro ni mbumbuhe ka tungusa gu pangbanga nga ga Kindo fu kuru aboro watadu kadu kia dagba akuaro. Mo du na gu kido nga Yekova naida aida ka undo ro. Sidu, mo kusuko kpotoroyo fuko rogo kparakpee yo. (Tam. 62:8) Mo berẽkurii agu akpiapai nga ga paranga aboro du rogo Ziazia Kekeapai yo wa gu nga ga Samuere. Na mo naafura na akuaro aKristano—paranga yo na sosono yo—nga aguyo si narengbe kadu nga i ima diabe ngbatunga agu akpakarapai mo agbia tiro na ni. Nirengo, i ima rengba ka peka pa agu aregbo foro Yekova aundo yo ti ni, isoke rogo agu agene yo i aaberãnga paha ya.

7, 8. Wai du Yekova ayugu gupai nga ko aaberãpa Moize aberã gbe?

⁷ Ho Moize adu ni na garãko 80, Yekova afu kere nyanyaki sunge fuko. Si adu nga Moize kusi aYisaraere kusayo tii gu sunge kanga  naadu Ezipeta yo. (Gate 3:10) Si nawira gupai gbe nga pa gbiako gi sunge re aima iriwo tiko, bambiko ko amangi sunge ni bangerefuo akandoro tipa agarã 40. Ko aya, “Da nga mi, ka ndu koyo du Faro ni, ka kusa awiri aYisaraere Ezipeta yo?” Mbori akido Moize ki ya: “Mi adu na mo ni rengo.” (Gate 3:11, 12) Ko akido ko a berewe nga: Abaakumba nga ga aYisaraere yo “adéga tuyo ka gia sangbaro.” Ono tie, Moize akaragapai ki ya: ‘Ono na ka i adéga nga tuyo sa sangbare ya?’ (Gate 3:18; 4:1) Si nawira gupai nga Moize aape gupai nga gupai Mbori agumbaha ima rengba kadu ni irairaha! Ono Yekova aahipai kindi fu Moize. Na zavura ko ki fu ome fuko tipa ko mangi iiriwoapai. Moize zaatu nangia gu bambata boro rogo Ziazia Kekeapai yo kadu na gu ome re.—Gate 4:2-9, 21.

⁸ Zavura fuo manga agi apai re dunduko, Moize afu kina kura ndupai berewe, ko aya ko ainongo wai ka fura wenengai te. Mbori akaragapai fuko ki ya: “Mi adú na ngbaro, ki yugu gu pai foro mo ka gumba ha.” Ya mo gipai re asa Moize ko idipa gu sunge re ni yangaraha? Oó, ko asana Mbori ni umbasitise nga ko kedi kura boro kia. Gipai re asa Yekova ko zingi kutiko. Ono ko aaberãpa Moize kindi. Ko aye ki moi Arona ko naafura kuba Moize.—Gate 4:10-16.

9. Wai du ga Yekova mangapai nga ga hipai gbiati weneringise aundo Moize rogo gako sunge yo?

⁹ Ginipai gi pangbanga re ayugoho furani tipa Yekova? Nidu ko ni gu Mbori du na Tanduapai Dũ, ko aima rengba ka gundesi Moize tipa ko gisangbako ni ipo. Kuba gure, Yekova adu na hipai gbiati weneringise, na ko amangi ome ka kido gako moyambu naadu na umbasitise nga ko nika duadu na ko. Ya mo gi gene Yekova amangipai ngbaha re asa Moize ko gisangbako? Ii! Moize ada ni wene bangbembatayo nga guko naasada kaa mangapai na aboro ngba wene gene kina wai Yekova amangipai na ko.—Geda 12:3.

10. Wai du ani agbia undo ho ani aberãpa aboro ni wakina Yekova?

¹⁰ Agu apai rengbe ani ka wirikaha: Ka si du nga mo nga kumbakudee, vungugude, watadu bakumba rogo dungurati, mo na kina bete pagbia bero kurii kura aboro. Mbiko gipai re, si ni nyanyakipa pai foro mo wiriki Yekova  nidu mo ni gu boro naberãpa aboro, kidu na weneringise gbiati hipai ho mo amangapai ni na agu aboro du kutii gamo pagbia. (Koro. 3:19-21; 1 Pet. 5:1-3) Ka mo mangi nyanyaki asadatise ka wirika Yekova gbiati Bakere Moize nga Yesu Kristo, si nika du taata fu aboro i ye fuoro na mo nika du ni gu boro nafu wasa fuyo a. (Mt. 11:28, 29) Mo nika maa wene kpiapai nga gu rengbe aboro ka wirikaha.—Eb. 13:7.

11, 12. Waigu Yekova asa aYisaraere i bihe nga i ni bandabanda yo ho ko aakusa yo ni kusayo Ezipeta yo?

¹¹ Ho aYisaraere aguari ni Ezipeta yo rogo gu garã nangia 1513 Mbata fu Batikayo Kristo, bangeyo aima rengba ka susa amirioni biata. I adu na rukutu agude dagbayo gbiati sosono aboro, na si nawira gupai nirengo nga, aguyo adu kinaho na akakaza tiyo watadu ni gbarĩgbarĩ yo. Si aaida gu bangbembatayo du na weneringise gbiati rugatinapai kusi ndurumo aboro wa gure kusayo ringara Ezipeta yo. Na Yekova aima du ni ngbatunga gu bangbembatayo re vurube Moize. Ni sangbana gipai re, aYisaraere adu ni bandabanda yo ho i aakura ni kusayo rogo gu yangara ba i ainihe.—Tam. 78:52, 53.

¹² Wai du Yekova abanda gako aboro? Gene sa dagba agu akuraha nga, ko ambakadi aYisaraere i kuru kusayo rogo ringara Ezipeta “ringbisi he na kina gayo arimbasa aborovura.” (Gate 6:26) Ngbatunga gu mbakadapai re nirengo aima fu gu kido fu aYisaraere nga gayo Mbori aangbembatayo fuyo. Berewe a, Yekova ayugu padu ko na yo gbaiga fuyo “uru rogo dubo” yo na “yuru sasasa na ima we.” (Tam. 78:14) Gure adu wa ka i ya Yekova aaya fuyo: “Ka oni gundenga ya. Mi na oni ka nungusa roni na ka banda roni.” Nirengo, aYisaraere aaida ngbatunga gu kidohe re mbiko gupai namangi fuo gure!

13, 14. (a) Wai du Yekova ayugu gupai Zamba Baime yo nga ko aaberãpa aYisaraere aberã? (b) Wai du Yekova ayugu gupai nga gako ome aima susa ga aEzipeto?

¹³ Oni gedi Gate 14:19-22. Mo berãnga patiro nga mo sa na aYisaraere. Gu riivura nga ga Ezipeta gudu gii roni yo, na zamba Baime kidu mbatayo furoni. Fuani, Yekova kini mangipai. Gu bakamikami dubo nidu mbatayo furoni ima ga kugii bataya yo, si ima kiso aEzipeto kusayo na ki mbuyo rogo bitimo. Ono tie, gaoni bataya na iiriwo imarago rogoho! Fuo gure, oni bi Moize ko natai beko rii baime, na bakere wege ye uroyo ki kpara rogo baime yo, na ki zaki bagene rogoho. Mo na gamo aborokporo gbiati gaoni zogozogo anya na kura yangara aboro nasi ti gene roni ti gu bagene re. Nibasa, oni bi pai nga gu du ni iiriwoho. Gu iiriwopai re nga oni nandu rii ugu sende nga gu adunga na dogoro rogoho ni zezerenge ya. Ni sangbana gipai re, zavura agu aboro nandu yee ni kerehe ima si ku mbitiyo zanga pai mangi yo.

¹⁴ Oni gedi Gate 14:23, 26-30. Ti kina gu regbo re, Faro nga guko du na rukö tiko ni mumungo ko tona dofuo roni ni kerehe. Moize tai beko berewe rii baime. Bara gere, baime gbiatihe kubaha ki imi Faro na gako riivura. Boro ho dagbayo bati te!—Gate 15:8-10.

15. Ginipai gi pangbanga re ayugoho foro tipa Yekova?

¹⁵ Ani nabi gupai rogo gi pangbanga re nga Yekova nga gu Mbori namanga gako apai ti genehe, na gu sinoko re naundo rani ani bihe nga ani ni bandabanda rani. (1 Kor. 14:33) Yekova nayugo tiko a ni wene babanda akandoro nga guko nangerafuo gako aboro rogo mangimangipai yo. Ko nabanda yo be avurayo. Gipai re nafu kido furani gbiati wasa bakere gbe wa ani ambeda kuti digido gi zegino re!—Snz. 1:33.

16. Waigu rengbe ani ka gbia undo ti fugö ani gu gene Yekova abatasi aYisaraere ngbaha?

¹⁶ Areme a, Yekova nangerafuo gako aboro  ni badona, rogo toro yo na rogo borose yo. Ko nikaa mangaha wo kindi ti regbo bakere gberãngbi nga gu naima mbeda gbe. (Yugo. 7:9, 10) Sidu, singia ga Mbori aboro ni paranga yo, ni sosono yo, na kpotoyo ni wenehe, watadu na akakaza, i agundenga ti regbo bakere gberãngbi te. * Zaatu i nika manga gupai nika du kia! I nika tingida agu afugo Yesu Kristo nga: “Oni ngére ku ari yo, ki tumba rironi; bambiko rago tumo roni nambeda.” (Rk. 21:28) Zavura ho Gogo nga gu kodikodi arikaaboro naima du na ome kisusi Faro nika zubo ga Mbori aboro ni, i nika duadu na gu kido nga Yekova nika batasa yo abatasa. (Yeze. 38:2, 14-16) Tipagine i nika du ti ni na gu kido re? Bambiko i ima ino gupai nga Yekova aʹarianga tiko te. Ko nika yugo tiko ayugo berewe ni gu boro du na weneringise na kidu ni Batasi.—Yes. 26:3, 20.

17. (a) Waigu rengbe ani ka gbia undo ti agu apangbanga du rogo Ziazia Kekeapai yo nibipa gu gene Yekova aberãpa gako aboro ngbaha? (b) Gini apai ani nika sakapai tipaha rogo gu kekeapai ngbefuo gere?

¹⁷ Agu akpiapai du rogo gi kekeapai re nga bete gu dungu akpiapai gbua nayugopa gu wene gene Yekova aberãpa gako aboro ngbaha, kini nungusi yo na kini batasi yo. Wa mo nikaa berãkurii ngbatunga apangbanga wa gure, mo asadi ka wirika vovopai tipa Yekova ni ngera mo tipa agu apai si narengbe kadu nga mo aainongo pai tipaha mbata te. Wa mo nikaa wirika badungu apai tipa ga Yekova wene asino, gamo nyemuse tipa ko gbiati gamo idapase kutiko nika du ni nyanyakihe. Gu kekeapai naye fuo gere nika sakapai tipa agu agene rengbe ani ka wirika Yekova ngbaha ni du ani ni agu aboro naberãpa kura aboro. Ani nika wirikapai tipa wai rengbe ani kaa berãpa aboro rogo gaani ngbadimokporo, rogo dungurati, na gene tungusapai yo.