1. Gini sangbanapai rengbe gu toro nga ga zegino kadu na ni kurii gaani umbasitise?

TIPAGINE duhe ti ni ni mbumbuhe ka manga gupai ani awirikaha rogo Fugo Mbori yo? Ndupai sa nga, si naida na umbasitise tipa ka manga rurupai. Rogo gi “kusa rago” re, ani na agu aboro pati rani “du ni airakpinyemumarã, airaruka, airarekangose, agberẽngba yo,” na “airazanga rugatise.” (2 Tim. 3:1-3) Wa du ani ni ga Yekova amoyambu, ani ima ino gupai nga gi mangaapai re ni gbegberẽhe, ono ti kura aregbo, si rengbe kaa ngera wa ka i ya agu aboro namanga agi apai re na diabese rogo raka yo na i nagbia ngbarago rogo gayo raka yo. (Tam. 37:1; 73:3) Boro ima rengba kaa baka bangirini nga: ‘Ya mo ndupai ho tipa mi namaa gu nyemupai nga ga kura aboro mbatayo fu gimi? Ka mi aamangapai ni umbasitise, ya mo mi nika zanga gu irisa nga ga boro?’ (Ruka 9:48) Pa mbu ani gu toro nga ga zegino si du na ome kurirani ima rengba ka gbarasapa gu gaani wene pagume du rogo dungurati gbiati agu asino i aino rani ti ni ni aKristano. Ono ho ani awirikapai ni tipa gu ga Mbori amoyambu naadu na  umbasitise na ki niwiriki yo, si naye na wene sangbanapai.

2. Ginipai rengbe ani ka wirikaha be gu ga Mbori ruru amoyambu naadu mbata?

² Ka ani aida kadu wakina gu ruru amoyambu naadu mbata, si naida ani wisigipai tipa ginipai i amangihe tipa ka gbia wene sangbanapai. Waigu i aru kadu na pabakure na Mbori na ko ki idi na gayo pai, na wari gu i agbia ome ni tipa ka digiso gupai ko akpinyemuhe? Pa wisigo ani pai wa gere rengbe ka nyakasa gaani idapase.

3, 4. (a) Waigu ani agbia agu arugapai nga ga toro? (b) Tipagine rengbe ani ka ya ti ni wẽ, gu riahe nga ga toro nakoda kura apai susi gu gbua nga ka gbia inohe?

³ Ani nagbia dungu arugute na rabahe rogo Ziazia Kekeapai yo, rogo agu abuku yo nga ga aKristano, rogo gaani bangiriba nga ga Internet nga jw.org, rogo JW Broadcasting, na ti regbo gaani adunguratise gbiati bakere adunguratise. Ono ringbisihe kuti agu afugo Yesu du rogo Yoane 4:34, gu riahe nga ga toro abingo kina pa gupai sa gbua nga ka gbia inohe te. Gini apai si akodaha? Yesu aya: ‘Gi riahe nga manga kina gu pai gu ko akpi nyemu he nakedi re, mi nyasi gako sunge.’

⁴ Tipa Yesu tigako, gu riahe nga ga toro nakoda mangapai kuti ga Yekova arugapai. Ngba gini gene du gipai re wa riahe? Kina wai pa ri ani wene riahe asa kpotorani si du ni wenehe, kinawo a pa manga ani gupai Mbori akpinyemuhe anyakasa gaani idapase. Ni kpiapai, ya mo mo andunga tipa gu dunguratise nga ga tungusapai ho du mo ni na mbugo—ono fuo tungusapai mo kidu na ngbarago gbiati wasa?

5. Gini mosoro du ti mangapai ni tatamana?

⁵ Ho ani amanga gupai ni Yekova aida ani mangihe, ani nadu ni airatatamana. (Tam. 107:43) Na dungu weneapai namanga fu agu aboro du na tatamana. “Boro ngbarago nga gu ni ini tatamana, na gu boro du na rugatinapai, . . . si ngba ki susi ti ngungungu ambia fongahe, he ho mo akpi nyemu he, ka rengbe na ni te. Si nga ngua unga fu agu yo zadi he; ngbarago du fu agu yo dunduko ka kuti ni nyanyaki.” (Snz. 3:13-18) Yesu aya: “Ka oni ini agi apai re, rago ngba angba ti roni ka oni amanga ha.” (Yo. 13:17) Ga abawiriki ngbarago arengbe kadu ni gbangaha ka i aamanga gupai Yesu aruguyo i mangihe. Si aaida i sa gako ayugopai gbiati gako kpiapai ni gene gayo raka.

6. Tipagine si aida ani naandu kumbatayo ti ni kindi kaa manga gupai ani awirikaha?

⁶ Areme, si naida ani naandu kindi kumbatayo kaa manga gupai ani awirikaha. Ni kpiapai, bainipai tipa makana ima rengba kadu na aũsunge beni, gbiati inohe. Ono ni rengbe ka gbia undo gbe ti agu ahe re kinagu ka ni mangisunge na ni. Ka si du nga ni aima mangasunge mbata kusayo ki ima gbia bete inohe, si naida ni naandu kindi kumbatayo kaa manga gupai ni awirikihe tipa ka banda gani inohe na kadu ni wene bambakadi amakana. Wakina gure a, ani ima rengba kadu na diabese ti tonatonaha mbikopa peka ani fuo gupai ani agedaha rogo Ziazia Kekeapai yo. Ono tie, tipa ka gbia nyenye ngbarago, si naida ani naaraka kuti ga Yekova arugute na aʹuru dunduko.

7. Waigu si aida ani mangipai kuti agu akpiapai du rogo Ziazia Kekeapai yo tipa ka sonosa tatamana?

⁷ Ani wisigingo bete abangiriba nga gu rengbe gaani umbasitise kadu ngba asada rogoho na ki bi wai gu ruru aboro naadu mbata asusi rogo ngbatunga aʹasada wakina gure. Nyaka rogo toro yo ayengo gbua mbiko du ani na inohe tipa apai te. Sidu, mo berãpa wai rengbe mo ni tiro ka manga agu apai re ni basasa rogo gamo raka yo na mo ki mangipai kutini zanga keesa.

8, 9. Ginipai gupai du ni kekehe rogo Amokedi 14:8-15 ayugoho tipa gu umbasitise nangia ga gu mokedi nangia Pauro? (Oni bi gu sura duti tonatonaha.)

⁸ Gupai Mbori akpinyemuhe nga “aboro bati dunduko, ki ye sa gu inahe nga ga rengo.” (1 Tim. 2:4) Wai du mo naabi agu aboro ata wirikanga rengo ya? Wa si avura du nga gu mokedi nangia Pauro aata rogo abambutiria tipa agu aboro naima inopai tipa Mbori, si nirengo nga ko aagbatanga kina aYudo sa te. Tungusapai fu agu aboro naairiso kungbo ambori amoi gako umbasitise ngba asada yo.

⁹ Ni kpiapai, ti gu regbo Pauro andu gako bambata nunguro ni mokedi, aboro Rukaonia aabi ko na Barunaba wakina kere abaworimo na kini yambu yo na arimo gu gayo ambori nangia Zeu na Ereme. Ya mo aPauro na Barunaba abitiyo nga payo ima nyaka ni kerehe? Ya mo i aabi gipai re nipa wasa be agu arungosiro i agbiatiyo na ni rogo gu kura agbata i andu ku rogoho? Ya mo i aabihe nga gipai re nika undo yo i tungusi wene pangbanga ni bakerehe? Wagusa te! I azingi nibasa na ki poi kuari fu rimbasa aboro nga: “Oni mangi agi apai re tipagine? Ani nga aboro a, ringirani wa kina gaoni.”—Amo. 14:8-15.

10. Ngba gini gene aPauro na Barunaba abitiyo nga i adu sa na aboro Rukaonia?

¹⁰ Ho aPauro na Barunaba agumba gupai ni nga i angia kina kpakpa aboro a, anga gupai i aagumbaha nga gayo gene irisombori adu kina sa na ga agu apagano re te. Mbori du nakedi aPauro na Barunaba ni amokedi. (Amo. 13:2) I aima mbeda yo na ziazia toro na i adu na wene maabangirise. Ono anga gure angia ndupai tipa i kiisipa tiyo te. I arugutiyo na gupai nga ka agu aboro re di wene pangbanga kugume, i ima rengba ka gbia gu maabangirise nga ga ngbangbaturũ.

11. Ho ani atungusapai ni, waigu rengbe ani ka wirika ga Pauro kpiapai nga ga umbasitise?

¹¹ Waigu rengbe ani ka wirika ga Pauro kpiapai nga ga umbasitise? Bambatapai nga, si aidanga ani naakiiso pa tirani mbiko gaani tungusapai watadu agu apai Yekova aundo rani ani du na diabese rogoho te. Ani ni basasa dunduko si aida ani sana tirani nga: ‘Waigu mi abi agu aboro mi atungusapai fuyo? Ya mo mi naayugo kparakaro koyo du kura ngbatunga aboro ni?’ Si ni wenepai nga, aDezire Yekova rogo zegino dunduko ninaasada ka gbata agu aboro rengbe ka gia wene pangbanga. Ti kura aregbo, gipai re rengbe ka ida gupai nga boro wiriki afugo gbiati asino agu aboro kura aboro abiyo na payo kusende. ADezire Yekova ninaabingo tiyo nga i kiipa yo kisusi agu aboro i atungusapai fuyo te. Kuba gure, i naagbata gene ka rugatiyo na gupai du tipa aboro ni basasa tipa ka rimiso gu pangbanga nga ga Kindo ku ngbaduyo yo.

12. Waigu Epafura ayugu gupai nga ko aaberãpa kura aboro aberã?

¹² Gu kura gene ani ayugo gupai ngbaha nga ani na umbasitise nga kaa manga kparakpee tipa “agu yo nadi kikipa idapase wa gaani wa sa na ani.” (2 Pet. 1:1) Wo Epafura anaamangaha. Ziazia Kekeapai fura tipa ko bara biata gbua rogo gu kekeapai yo ga Mbori toro adu ku gii Pauro ko kehe. Ho Pauro adu ni ni ziziko ku kporo Roma yo, ko akepai fu agu aKristano naaraka Korosai yo nga, Epafura ‘anaazungadi he ni gako kpe tipa yo gbe.’ (Koro. 4:12) Epafura aima ino agu awirina re wenengai, na ko anaaberã payo bakere gbe. Padu ko ni “kisikisi boro” wa sa na Pauro aakisongo bangiriko ti gu zingo nga ga toro kura aboro aaidaha te. (Frm. 23) Na ko anaamangapai tipa ka undo yo. Ya mo anga gere nga mangapai nga ga zanga gbangbati te? Manga ani  kparakpee tipa agu aboro ani airiso Yekova na yo ima rengba ka undo, gu susi asusa gbe nga ho ani atingida payo ni ni basasa dunduko ti arimo yo.—2 Kor. 1:11; Yak. 5:16.

13. Waigu rengbe mo ka wirika gu kpiapai nga ga Epafura rogo gamo akparakpee yo?

¹³ Mo berẽnga pa agu aboro rengbe mo ka manga kparakpee tipa yo ki yambu rimoyo ayamba rogo gamo kparakpee yo. Wakina Epafura, badungu awirina ninaamanga kparakpee tipa agu aboro du rogo gayo dungurati na tipa agu aborokporo du na bakere tindiro beyo watadu aguyo nagbiatiyo na nyanyaki adiaberã watadu a’asada. Dungu aboro ninaamanga kparakpee tipa agu awirina du rimoyo rogo gu kekeapai du rogo gaani bangiriba nga ga Internet nga jw.org. * Kurigure, si naida ani naatingidapa agu aboro zanga gayo aboro rogo kpio yo, agu aboro susi awere rogo gberãngo na vura, gbiati agu aboro du rogo bakere zingo marã. Si tie ziazia nga, dungu awirinarani du ho naida na gaani kparakpee na rengbe ka gbia undo ti ni. Ho ani amanga kparakpee ni tipa agi aboro re, ani nayugo na ni nga ani naberã pa gu nyemupai nga ga kura aboro kisusi gaani. (Frp. 2:4) Yekova nadega tuko adega kuti ngbatunga agu akparakpee re.

14. Waigu du Yekova ni wene kpiapai nga ga degatue?

¹⁴ Gu kura gene nayugo gaani padu na umbasitise nga wai ani adegaturani fu aboro. Yakoba 1:19 nagumba gupai nga, si naida ani ‘ipisi tirani ka gia pai.’ Yekova nitiko namaa wene kpiapai rogo gipai re. (Bam. P. 18:32; Yos. 10:14) Mo berẽnga kurii gupai rengbe ani ka wirikaha ti gu sakapai du ni kekehe rogo Gate 32:11-14. (Oni gedihe.) Wa vura duhe nga pai ho si aaida Moize gumbaha te, Yekova afu momu fuko tipa ko gumba gako berãpai. Ya mo mo rengbe ka degaturo fu gu boro mangi ingahe na ki pekefuo gani aberãpai? Ono tie, Yekova nadegatuko na zerangbaduse koyo du agu aboro ni nakpara fuko rogo idapase yo.

15. Waigu rengbe ani ka wirika Yekova rogo fu ani irisa fu kura aboro?

¹⁵ Ani ni basasa dunduko si aida ani sana tirani nga: ‘Ka si du nga Yekova naumbasi tiko ka mangapai na aboro na kini degetuko fuyo wa gu ko amangihe na Abarayama, Raere, Moize, Yosua, Manoa, Eriya, gbiati Izikiya, ya mo mi rengbe ka fu irisa fu awirinami ni dega mi ture fuyo na kini mangipai kuti gu gayo aberãpai du ni wenehe? Ya mo boro ho awere rogo gimi dungurati watadu vurukporo kpure si aida mi dege ture fu ni? Ginipai si aida mi mangihe tipa gupai re? Ginipai mi nika mangaha tipa gupai re?’—Bam. P. 30:6; Abasa. 13:9; 1 Aba. 17:22; 2 Peka 30:20.

16. Waigu Bakindo Davide amangipai ho Simi amangi ko ni tipa ko zingi?

¹⁶ Umbasitise naundo rani a tipa ani yugu zatise ho boro amanga rani ni ani zingi. (Ef. 4:2) Bawene kpiapai tipa gipai re gudu rogo 2 Samuere 16:5-13. (Oni gedihe.) Davide na gako amoyambu ahi sengahe na zubohe be Simi, nangia gume Bakindo Saura. Davide ahi agi apai re wa si avura du vurũ nga ko adu na kina ome beko ka nyasa rii paha. Ginipai naundo Davide ko du na gu toro nga ga zatise? Ani rengbe ka rugatirani na ni ni wisigo ani Atambuahe namba biata.

17. Ginipai naundo Davide ko yugu zatise, na waigu rengbe ani ka wirika ko?

¹⁷ Davide ake Atambuahe namba biata ti  gu regbo wiriko nga Abisaroma aida ka imo ko.” Ti gi kere regbo re du Simi azubo Davide, ono Davide agbia ome ki ongo zezeredi. Waigu ko agbia ome? Rogo Atambuahe 3:4, ani nageda afugo Davide yo nga: “Mi nakpara fu Yekova ni fugore, ko ki nikaraga pai fere rogo gako kparakpara ziazia bagangara yo.” Ani ima rengba ka manga kparakpee wakina gure ti gu regbo ka ani gbia tirani na kerepai. Ni sangbanaha, Yekova nafu gako ziazia toro, nga gu rengbe ka undo rani ani hipai. Ya mo mo rengbe ka yugo zatise na mbupai ho boro amanga ro ni gbegberẽ? Ya mo mo na gu kido nga Yekova ima rengba ka bi gu gbegberẽpai i namangi ro na ni re ki fu maku foro?

18. Wai du ani nika gbia undo ka ani aamangapai kindi kina kuti ga Yekova arugapai?

¹⁸ Manga ani gupai ani nainihe nga si ni ruruhe naye na dungu amaku. Si airiwongo te nga Asanza 8:11 nagumba gupai nga “agu ahe dunduko ka oni akpi nyemu he i aringbisa nga ha na tatamana te”! Wa vura duhe nga tatamana naru rii inohe, si gbe nakodapa agu adiaberã ani amangaha angianga ka ino kina arengo gbua tipa pai ya. Zavura angbari nayugo tatamana ayugo. Ami nayugo gu tatamana Mbori akusi ra na ni ni mbakada ami ga ami riahe kitö. (Snz. 30:24, 25) Kristo, “nga ga Mbori tatamana,” namanga kina agu apai ngba ti Bako waragoagira. (1 Kor. 1:24; Yo. 8:29) Mbori ima ino gu kparakparapai du ti manga ruru siapai na mangapai kuti ni. Na ko nafu maku fu agu aboro nayugo umbasitise na hipai na aguyo namanga gupai i nainihe nga si ni ruruhe. (Oni gedi Matayo 7:21-23.) Sidu tie, mo naamanga ome tipa ka sa dungurati si du ni gu ba rengbe aboro ka sungo na umbasitise rogoho. Manga gupai ani nainihe nga si nga rengo nadia regbo adia, ono manga ani he wo nayugo gupai nga ani na umbasitise na si nandu na ani sa ngbarago awere na nyeanye kindi.