ROGO zegino dunduko, abaakumba ima kpinyemu gu sunge i amangaha dagba ga Mbori aboro. Nga gi wene gamahe be Yekova furani! Ono tie, bete agarã kusayo, i amangi ariapai. I aya fu sosono abaakumba i fu kura gu rõrõi atindiro du beyo fu paranga abaakumba. Rogo gini gene?

Gu vovo mbakadapai re nga si naida ababi adungurati gbiati agu abayugupai nayugopai ti regbo agu asukuru gaani riigbu amangaha rugusi gu sunge re ho garãyo ada ni 70. Berewe a, agu abaakumba du garãyo 80 nambu dungu kura asunge fu paranga abaakumba, wa ngbatunga gu nga kadu ni barii gu Rondo Nga ga Be-Basunge watadu kadu ni barii gu rondo nga ga abaakumba rogo dungurati. Wai du gi sosono abaakumba re namangipai kuti gu ariapai re? I ima yugo gayo padu ni ruruse fu Yekova na gako riigbu!

Ken namangisunge ni barii gu Rondo Nga ga Be-basunge tipa agarã 49 agumba gupai nga: “Mi aidi kuti gi diaberã re na ngbadureyo dunduko. Rogo gu wiso zaatu mi agi gupai re, mi aima manga kparakpee fu Yekova, kini sanako nga si naida paranga wirina mangisunge ni barii gu Rondo Nga ga Be-basunge.” Agi afugo Ken re nga gu sa dagba afugo gu ruru sosono aboro du rogo zegino dunduko. Kina rengo ngaha nga,  wa i aima kpinyemu mangasunge fu awirina yo, i aduadu na bete gberãrago ti tonatonaha.

Esperandio naadu ni barii gu rondo nga ga abaakumba rogo gako dungurati aya: “Rago aima gberã tire tooni.” Ono ko aya, “Mi aaida regbo tipa ka ngerafuo kpotore mbiko gimi kaza aasona kina kumbatayo.” Sidu, Esperandio andu kumbatayo na mangasunge fu Yekova ni ruruko na ki fu bakere undo fu aboro rogo gako dungurati.

Na ginipai du tipa agu ababiapai ninaata ata nga aguyo naima manga ariapai kuti kura ngbatunga sunge? Allan, namangisunge ni gu babiapai ninaata ata tipa agarã 38 aya, “Apai aima nyasa tire ho mi aye ka inoho ni.” Wa si avura duwo, ko abi gu wene sangbanapai duti raba paranga akumba tipa sunge, na ko ki ndu kumbatayo na manga gako sunge ni ruruko.

Russell, namangisunge ni gu babiapai ninaata ata na ni bayugupai rogo agu asukuru nga ga siokrasia tipa agarã 40, agumba gupai nga ti tonatonaha, rago aima gberã tiko na diako. “Ani aima kpinyemu gaani sunge ni kerehe na ani aabi tirani nga kpotorani na berãrani wenengai tipa ka ndu kumbatayo na sunge.” Russell na diako namangasunge na gu rabahe i agbiaha gbiati gayo inohe kaa undo rogo gayo dungurati, si kini fu ngbarago fu agu abatungusipai namangasunge na yo.

Ka si vura du nga apai tipa ro wa ga agu aboro ani nafura tipa yo kusayo re te, gu pangbanga du rogo 2 Samuere ima rengba ka undo ro mo rugutiro na wai agu aboro re abi tiyo.

Mo berẽnga kusayo kuti gu regbo wiri Bakindo Davide nangia Abisaroma asamungu kuti ko. Davide aoro Yerusarema yo ku Manaima yo pavuru gu di nga Yaradene ku uroyo. Ho i adu ni yo, Davide na gako akumba aaida na bete ahe tipa si songodi gayo raka. Ya mo mo natingida gupai namangi?

Akumba biata rogo gu dagba rago re aye na abarame, ariahe, gbiati gu kura ahe i aaidaha. Baruzirai nangia boro sa dagba agi aboro re. (2 Sam. 17:27-29) Ho ga Abisaroma samungu anyasi ni, si aidi Davide karaga tiko ku Yerusarema yo, na Baruzirai ki gasi ko ku Yaradene yo. Davide azungodi ko tipa ko karaga tiko na ko ku Yerusarema yo. Bakindo agumba gupai fu Baruzirai nga ko nikaa fu riahe fuko, wa si avura du vurũ nga “bakere boro nangia ko” na ko aazingongo tipa riahe te. (2 Sam. 19:31-33) Si nangera wa Davide aaida Baruzirai du patiko mbembedi Yerusarema yo tipa wa ka ko aagbia undo ti gako wene arugute gbiati gu inohe ko adu na ni mbiko Baruzirai aima mangasunge tipa dungu agarã. Nirengo, si aima rengba kadu ni wene momu kaa raka na kini mangisunge kua bakindo yo!

Ni du Baruzirai na ruru bipai gbiati umbasitise, ko agumba gupai nga garãko ima da 80. Fuani ko ki ya: “Mi rengbe ka ina wenepai na gu ngba?” Ginipai ko aaida ka gumbaha na gipai re? Si nirengo nga Baruzirai aima gbia tatamana vuru gu gbanga regbo yo ko araki tipaha re. Na ko arengbe kindi ka fu wene arugute, wakina gu “gbinza akumba” afuhe kusa fu Bakindo Rabama. (1 Aba. 12:6, 7; Tam. 92:12-14; Snz. 16:31) Sidu, si rengbe kadu nga agu afugo  Baruzirai du tipa ino wenepai na gu ngba aayugo pa agu apai gbinza aka na gene beko ti mangaha. Ko ape gupai nga gbinza ima gbandaka nyemu riahe kusayo tiko na ki sa tuko ka si naagianga pai berewe wenengai ya. (Batu. 12:4, 5) Sidu, Baruzirai azungodi Davide tipa ko ndu na gu paranga kumba nangia Kimama ku Yerusarema yo, nga guko si awira wa ko angia wiri Baruzirai.—2 Sam. 19:35-40.

Gu ariapai i amangihe nibipa garã boro nga gu ani nifura tipaha ti tonatona gi kekeapai re nayugo gu bipai du wakina gu Baruzirai ayuguhe. Ani ima rugatirani na gupai nga, ti gi gaani regbo re, agu apai si aaida i berẽpaha aadunga gbua nga agu apai du tipa ni na gani ome mangaapai wa gu naadu tipa Baruzirai te. Si aaida i wisigi gupai nzunzu rengbe kadu ni wenehe fu agu abaakumba namangasunge ni ruruyo rogo zegino dunduko.

Gi sosono aKristano du na umbasitise re aima bi gupai nga, ga Yekova riigbu nika nyaka tipa ka undo na gu sona kumbayo nika du kumbatayo ka si du nga paranga awirina nikaa manga agu asunge i aima digo ni ngerefuoho. Rogo dungu apai yo, sosono awirina du naraba gu paranga yo, wakina gu si awira wa Baruzirai araba wiriko na wagu gu mokedi nangia Pauro amangihe na Timoteo. (1 Kor. 4:17; Frp. 2:20-22) Gi paranga awirina re ima yugo gupai nga i awere nga ‘gamahe fu aboro,’ nga aguyo rengbe na “sonosa boro Kristo”—Ef. 4:8-12; oni ringbisinga ha na Pa Geda Aboro 11:16, 17, 29.

Dungu aboro rogo agu adungurati nga ga ga Mbori aboro rogo zegino dunduko, nga aguyo naima zoga kura atindiro nga ga sunge awere na momu ka mangasunge na kura vovo amomu nga gu nakura ti ngba ga Yekova sunge.

Marco namangisunge ni babi adungurati tipa agarã 19 aya: “Agu apai du tipa re awere nafu momu fere tipa mi undo agu akumbakuadee du kina adiayo ni aDezire Yekova rogo gaani dungurati.”

Geraldo namangisunge tipa agarã 28 ni gu babiapai ninaata ata agumba gupai nga: “Gaani vovo asasa nakoda undo agu aboro naima zera rogo toro yo na ka wisigo Ziazia kekeapai na dungu aboro.” Ko agumba gupai nga ko gbiati diako awere nawisigo Ziazia kekeapai na aboro 15 na badungu agu aboro naaima zera rogo toro yo naye awere tipa adunguratise.

Allan, fugoko nidu kusayo aya: “Ani awere na amomu tipa ka fu tirani wenengai tipa agene tungusapai ni basasa. Ani nagbia ngbarago ti mangasunge tungusapai gbaiga, tungusapai babagaahe yo, na tungusapai fu gaani amurakporo, aguyo ue ima ye ku Bambu Kindo yo.”

Ka si du nga mo nga ngangarã wirina kidu ni ruru ro na mo ima gbia vovo sunge dagba ga Mbori aboro, kura kparakpara gene kinaho rengbe mo ka fubee ngbaha. Mo rengbe ka songoda ga Yekova sunge niyugo mo gu badungu apai mo nainihe fu gu paranga akumba du rogo dungurati. Russell, fugoko ni du kuari aya: “Yekova nafu rabahe na kini mangisunge na gi wene tatamanatatamana aparanga re. Awirina rogo zegino dunduko nagbia undo ti gayo zaaza yugopai gbiati gu gene i angerafuo akandoro ngbaha!”—Oni bi gu sanduki nga, “ Oni Undo Paranga Akumba Tipa I Rẽ.”

Ka si du nga mo tona ka manga kura ngbatunga sunge awere kia, mo du kindi na wene bipai. Mo ima undo badungu aboro vurube gu gamo sunge mo aamangaha na ngbaduroyo dunduko, na mo ima rengba kaa mangaha kindi kumbatayo. I aima digo ni kpinyemu ro na i ni kaa kpinyemu ro kindi.

Gu nyakipaha anyaka gbe nga, mo ima manga gupai nika sa ngbarago ku kpoto Yekova yo nyeanye kindi. ‘Bangiriko ago nga ti gamo sunge te, na ti gu nyemuse mo ayugu ti rimoko, na ti gu pai mo amangaha fu gako aboro, a wa mo amanga pa yo awere kindi.’ (Eb. 6:10) Agi afugo re nafu gu kidohe fu agi aboro re dunduko nga gako kidohe ima kio kisusi gu sunge i namangihe. Anga pa ro taata fu Yekova rengbe bangiriko  ka go ti gupai mo amangihe kusayo na gu ome mo amangaha kindi kaa sa ngbarago tiko te!

Na ka si du nga, mo aagbianga ariapai rogo gamo sunge wagu ani nafura tipaha kuari re te? Gipai re kindi ima rengbe kadu na ome kurii ro. Rogo gini gene?

Ka si du nga mo namangasunge awere na sosono wirina nga guni nagbia ariapai rogo gani sunge, mo ima rengba ka gbia undo ti gu inohe du ni na ni gbiati gu badungu agarã ni namangihe kuti ngba sunge. Mo sana ni tipa arugute. Mo sana ni tipa gani aberãpai. Na mo bi wai ni amangasunge ni ruruhe wenengai awere na gani inohe rogo gu vovo sunge du ni rogoho.

Singia mo nga gu sosono wirina namangasunge awere ngba vovo gene watadu mo nga gu wirina rengbe ka gbia undo be agi aboro re, mo tingidi gupai nga Yekova nabi gu padu ni ruruse nga ga agu aboro naima mangasunge fuko tipa gbanga regbo na kini ndu kindi kumbatayo kaa mangaha na nyanyakipaha.