1. Gini nyanyakipa pai Yesu afura tipaha na gako abawiriki rogo gako yangara yuru?

ROGO gu yangara yuru Yesu adu na gako abawiriki, ko afura tipa nyemuse mbembedi kuti bara 30. Ko agumba gupai fu gako abawiriki nga si naida i ‘nikpi nyemu akurayo.’ (Yo. 15:12, 17) Si adu nga gayo nyemuse tipa akurayo nika du ni bakerehe gbe si ki sa gupai nga aboro iniyo ni ndikidi apefuo Kristo. (Yo. 13:34, 35) Anga gi nyemuse re nga kungba nyemuse gbua te. Yesu aafura tipa gu bakerepa sino nga gu nyemuse zanga gbangbati. Ko aya: “A nga boro sa du na bakere nyemuse susi gi nga, boro bagi kpioni tipa abadiangbani te. Ka oni amanga agu apai mi arugu roni kuti ni, abadiangbare nga oni.”—Yo. 15:13, 14.

2. (a) Ginipai ani abihe dagba ga Mbori amoyambu? (b) Gini asanahe ani nika karagapai kutini rogo gi kekeapai re?

² Aboro ini ga Yekova amoyambu areme ti gayo ndikidi nyemuse nga gu adunga na gbangbati ya gbiati gayo kodatise. (1 Yo. 3:10, 11) Ani na ngbarago nga ga Kristo nyemuse ima du dagba ga Yekova amoyambu areme zanga bipa gayo aringara, angbatungayo, afugoyo, watadu agu apai du tipa yo! Ani ima rengba ka bakabangirani  nga: ‘Tipagine nyakipa nyemuse ti ni areme? Waigu aYekova na Yesu anyakasa rani rogo nyemuse yo? Waigu rengbe ani dunduko ni basasa ka yugo ga Kristo nyemuse nga gu “nanyakasa boro”?’—1 Kor. 8:1.

3. Wai du du gi ‘gbegberẽ arago’ re na maapai kurii aboro?

³ Ani naraka rogo “gbegberẽ rago” nga gu hi be “mbusa na irairapai.” (Tam. 90:10; 2 Tim. 3:1-5) Mbiko gipai re, badungu aboro na nyemu ka raka berewe te. Vuru asekonde yo 40, aboro naima susa 800,000 naimo tiyo na agarã dunduko. Si nipa gberãrago nga, zavura bete aKristano kinaho naima gbiatiyo na gu ngbatunga fudifudiapai re na i ki ima imo tiyo.

4. Gini aboro rogo Ziazia Kekeapai yo naadu na nyemu ka kpi?

⁴ Bakuru kusayo ti agu aregbo i aakeka Ziazia Kekeapai ti ni, kura ruru airisimbori adu na gberãrago mbiko gayo akpakarapai na i ki idi ka kpi. Ni kpiapai, igirã asa Eyobo ko pe gupai ni gberãrago nga: “Mi mbu pa ungare, mi akpi nga nyemu ka du ni ungare kindi te.” (Eyo. 7:16; 14:13) Yona adu na gberãrago na ko ki ya: “Ako Yekova, mi zungadi ro awere, mo di ungare ti re, bambiko kpio ngba ti re ti nye mi ni ungare.” (Yona 4:3) Berewe a, gu ruru nebi nangia Eriya abi tiko nga maabangirise ho berewe tipa ko te na ko ki ya: “Ako Yekova, pai di be re; mo di ungare ti re awere.” (1 Aba. 19:4) Wa si avura duwo, Yekova aabi gi ruru airisiko re kindi na nyanyakipa yo na ko kini idi i niraki kindi. Kuba gupai nga ko saringbanga yo tipa wai i adu, ko aundo yo i zambuasi gayo nyemupai tipa kaa raka kindi na ko anyakasi yo rogo nyemuse yo tipa wa ka i aandu kindi kumbatayo kaa irisoko ni ruruyo.

5. Tipagine awirinarani aida na gaani nyemuse ti ni awere gbe?

⁵ Areme, badungu awirinarani nasovura kuti dungu akpakarapai na i kini idi na gaani nyemuse. Agu akurayo nahi arungosiro gbiati sawiahe. Agu akurayo nagbiatiyo na bisirahe watadu gumba rimo ba gayo asunge yo. Watadu i nambu be mangasunge ni bakerehe ki kuru gii regbo yo. Berewe a, agu akurayo nagbiatiyo na kere akpakarapai rogo gayo ramukporo, isoke i nagbiatiyo na bisirahe be gu gayo abadiarogatise adunga ni airisi Yekova ya. Mbiko gi kpakaraapai re gbiati agu akuraha, badungu aboro rogo dungurati nabi tiyo nga ome tiyo berewe te na i kini tona kaa kapa singia i berewe na nyanyakipa yo. Da rengbe ka undo agu aboro du na gberãrago tipa i nindu kindi kumbatayo?

6. Waigu Yekova anyakasa gako amoyambu rogo nyemuse yo?

⁶ Yekova nanyakasa airisiko ni kidoko yo na pa gako bangabanga nyemuse. Si aima du ni pa ngarasaro fu agu aYisaraere naadu ni ruruyo ka gia fugo Yekova nga gu naaya: “Mo ni kikiipa he bangire, ni irisiirisi ro, nga gu mo mi akpi nyemu ro. . . . Ka mo gúnde nga ya, mbiko mi du na mo”! (Yes. 43:4, 5) Wangia mo boro sa dagba ga Yekova amoyambu yo, mo ima rengba kadu na gu kido nga Yekova ima kpinyemu ro gbe. * Fugo Mbori nakido agu aboro namanga ndikidi irisombori nga: “Iranyaka nafu diabese fu aboro; ko angí mbiko ro na ngbarago.”—Zef. 3:16, 17.

7. Ngba gini gene du ga Yekova nyemuse wakina ga nagude? (Oni bi gu sura duti tonatonaha.)

⁷ Ka ga Yekova aboro vura kaa gbiatiyo na  kina gini fudifudiapai vurũ, ko nakidohe nga ko nika undoyo aundo na ki fu wasa fuyo. “I atíkita roni ri kpakpu mboso. Wa gu boro nani angárãsa ni, wo mi ka angárãsa roni.” (Yes. 66:12, 13) Mo berẽnga pa gu ngbarago rengbe gude kadu na ni ho nai atinda ru ni ri kpakpu mboso ri na kini ngi mbaro na u! Gipai re nayugo pa gu dudunguro nyemuse du Yekova na ni koyo du ndikidi airisiko ni. Ka mo kapa nga kuti gupai nga pa ro ima nyaka bangiri Yekova ya.—Yere. 31:3.

8, 9. Waigu rengbe ga Yesu nyemuse ka fu ome furani?

⁸ Gu kura ndupai gere nga gu nasarani ani ini gupai nga Yekova ima kpinyemu rani: Ko “akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” (Yo. 3:16) Ga Yesu motumo tumorii nayugo gupai nga ko ima kpinyemu rani na gi nyemuse re nanyakasa rani! Fugo Mbori nakidohe nga zavura “rungo, nunga” ka si ‘kpara nga rani ti ga Kristo nyemuse te.’—Rom. 8:35, 38, 39.

⁹ Ti kura aregbo ani nagbiatirani na agu akpakarapai narungburasi rani rogo borose yo watadu berãrani yo na si ki di gaani ngbarago rogo iriso Yekova kusayo. Ono ka ani tingidi pa wai Kristo nakpinyemu rani, si nika fu ome furani tipa ani hipai. (Oni gedi 2 AKorindo 5:14, 15.) Ga Yesu nyemuse na ome ti ni tipa ka undo rani, na ka sa rani ka omerani bati nga ya, zavura ho ani agbiatirani ni na aʹasada wa gu nga, gu gberãngo naye be gu mangapai nga ga ome zegino, rungosiro, gberãrago, watadu bakabangirise.

10, 11. Ada du du na gu tindiro beyo nga ga fu nyakasaro fu agu aboro du na gberãrago? Oni sakinga rogoyo.

¹⁰ Gene sa nga gu Yekova anyakasa rani ngbaha rogo nyemuse yo nga vurube gu dungurati nga ga aKristano. Wa du ani dunduko ni basasa, ani rengbe ka yugo gaani nyemuse ni kpi ani nyemu akuarani aidipase angianga kina rogo toro yo sa ya ono rogo borose yo a. (1 Yoane 4:19-21) Gu mokedi nangia Pauro azungodi aKristano nga: “Oni zúngadi tironi na akuaroni, ki ninyakasi tironi dagba roni yo, a wa oni namanga a.” (1 Tesa. 5:11) Nirengo, aboro dunduko rogo dungurati angianga kina abaakumba sa ya rengbe ka wirika aYekova na Yesu ni fu yo  wasa gbiati nyakasaro fu awirinayo.—Oni gedi ARomo 15:1, 2.

¹¹ Gu kura aboro kina rogo dungurati nambu be bakere gberãrago watadu bakabangirise nga gu naida kina gu undo nga ga wene amunganga. (Rk. 5:31) Abaakumba gbiati awirina rogo dungurati ima ino gupai nga i nga amunganga te, ono gu undo i afuhe gbiati gayo afugo wasa na nyanyakipaha. Aboro dunduko rogo dungurati rengbe ka ‘nyákasa agu yo nawo ka sóngoda agu yo narungbura, ka hi pai ni gbanga ha fu aboro dunduko.’ (1 Tesa. 5:14) AKristano dunduko si aida i yugu nunga gbiati hipai fu agu aboro du na gberãrago na kini fura fuyo wenengai tipa ka nyakasayo. Ya mo mo nga mburu wasa na ngarasaro fu aboro? Ngbatunga gu undo re rengbe kadu na wene sangbanaha ka mo ini wai ka fu he.

12. Oni funga kpiapai nga ga gu boro gu nyemuse nga ga dungurati anyakasi ni.

¹² Waigu rengbe gaani nyemuse ka nyakasa agu aboro nagbiatiyo na kereapai? Wirinarani ni dee Putu yo aya: “Ti kura aregbo mi naaberãpa imo tire aberã. Ono wene mbakadapai kinaho ninaaundo re. Gu dungurati du mi rogoho ima batasa ungare. Agu awirina du yo ti aregbo dunduko ninaafu ngarasaro na kidu na nyemuse. Wa vura duhe nga bete aboro gbua ini gupai nga mi nambu be bakere gberãrago, dungurati kinaho fere ti aregbo dũ. Gu kura arogotise sa wakina agu avungure nga ga toro yo. I nangerafuo re na i na mi ti aregbo dunduko.” Rengo ngaha nga, anga aboro dunduko rengbe ka undo kina sa te. Ono ani ni basasa ima rengba ka undo awirinarani. *

13. Ginipai si aidaha ka ani aida ka nyakasa kura aboro?

¹³ Mo du ni gu boro nadegatuni wenengai. (Yak. 1:19) Ka degatue ni nunga nga mangapai nga ga nyemuse. Mo ima rengba ka sanahe ni tatamana na ni nunga tipa ka ino agu apai namanga gu wirina du na gberãrago. Si nika undo ro mo yugu nunga na ki nyakasi wirinamo. Si naida kpakpuro yo yugu gupai ayugo nga mo naberãpa ni aberã. Ka gu Kristano re idi ka gumba agu apai foro futufutu namanga ni, mo du na hipai na ki zanga defugo ngba ni. Ni dega mo turo ni hipai, mo nika ino gani berãpai aino. Si nika undo ni ni du na kido kutiro na si ki sa gupai nga ni degetuni wenengai kuti gupai mo nika gumbaha wa mo nikaa manga ome ka nyakasa ni. Ho mo nika yugo gupai ni nga mo naberãpa ni aberã, si nika fu wasa fu ni.

14. Tipagine si aida ani ne gu toro ti ni nga ga bisirahe?

¹⁴ Mo ne gu toro nga ga bisirahe. Rago ima rengba ka gberã berewe ni kerehe ti gu boro du na bakere gberãrago ka ni bi gupai nga mo nabisirapa ni. Na si rengbe ka saha ni mbumbuhe tipa mo undo ni. “Gu boro kina ho nagba sa fugo wa kina baso sa rũ he, ono mirã iratatamana nafu husa.” (Snz. 12:18) Si nirengo nga ani arengbanga ki ta ino aino kini “rũ” gu boro du na bakere gberãrago na iigirã afugo te. Ono tie, ka si vura du nga ani “rũ” ni na fugo zanga ani inihe aino, sangbanaha ima rengba kadu ni iigirãha gbe. Tipa ka nyakasa kura aboro rogo nyemuse yo ni ngarasa ani yo, si naida ani du na nunga, kini moi tirani ku rogo agu apai yo i andu rogoho wa rengbe omerani na ni.—Mt. 7:12.

15. Gini nyanyakipa ũsunge duho rengbe ani ka mangasunge na ni tipa ka nyakasa aboro rogo nyemuse yo?

 ¹⁵ Oni mangisunge na Fugo Mbori tipa ka fu wasa fu aboro. (Oni gedi ARomo 15:4, 5.) Ziazia Kekeapai nga mburu wasa. Ziazia Kekeapai aye be “gu Mbori nga ga zera ko na wasa.” Kupati gu nga ka mangasunge na Ziazia Kekeapai tipa ka fu wasa fu aboro, badungu ahe kina berani nga gu naundo rani ani gi rogo Ziazia Kekeapai yo. Ani ima rengba ka mangasunge na Watch Tower Publications Index gbiati Research Guide for Jehovah’s Witnesses. Agi ahe re nika undo rani ani ini agu averesi gbiati agu awaraga rengbe ani ka mangasunge na ni tipa ka fu wasa gbiati ngarasaro fu awirinarani.

16. Gini asino si aida ani du na ni ho ani angarasa gu Kristano ni du na bakere gberãrago?

¹⁶ Mo du na weneringise kidu ni bayee ro. Gere nga nyanyakipa papara gu nyemuse adu nga na gbangbati ti ni ya ani ayugoho ho ani angarasa boro ni na kini nyakasi ni. Yekova ni tiko nga “Ba gaani Gbia Yesu Kristo, nga Ba inaapai, nga Mbori wasa dunduko,” na ko nayugo “weneringise” fu gako amoyambu. (Oni gedi 2 AKorindo 1:3-6; Rk. 1:78; Rom. 15:13) Pauro amoi wene kpiapai rogo gi bangiriba re, si du ko aya ti ni wẽ: “Ani adu ni bayee aboro dagba roni yo a wa de namanga pa awiriri; a wo, ani nikpi nyemu roni akpi, fu kina ga Mbori wene pangbanga fu roni angba nga ti rani sa te, ono mbisimorani a, bambiko oni aye ka ngba ti rani gbe.” (1 Tesa. 2:7, 8) Ho ani ayugo weneringise ni na kidu ni bayee rani wakina Yekova, ani ima rengba ka fu gu wasa wirinarani amanga kparakpee tipaha.

17. Gini ruru bipai tipa awirinarani rengbe ka undo rani ani nyakasi yo rogo nyemuse yo?

¹⁷ Ka mo idinga gupai nga awirinamo du ni rengberengbeyo ya. Mo du na ruru bipai tipa akuaro aidipase. Iraira bipai du nga ka berã gupai nga awirinamo du ni rengberengbe yo na si ima rengba ka ye na gberãrago foro. (Batu. 7:21, 22) Mo tingidi gupai nga, Yekova na kina ruru bipai nibipa agu apai ko aidaha be gako amoyambu. Ka ani wiriki gako kpiapai, si nika mbakada rani tipa ani hi agu azangarengba nga ga kura aboro. (Ef. 4:2, 32) Kuba gupai nga kaa yugo gupai fuyo nga i amanganga pai rengbe arengba te, si naida ani nitambua yo. Si rengbe ka ngarasayo. Pa fu ani ndikidi tambuahe fu kura aboro nika nyakasa yo rogo nyemuse yo na kidu ni mburu gupai ka i “tambua” tiyo mbiko ho rogo gayo ziazia sunge yo. Mangaha wo ngba ti ringbisa ani yo na kura aboro.—Gara. 6:4.

18. Gini ndupai du berani tipa ka nyakasa akuarani rogo nyemuse yo?

¹⁸ Ga Yekova akandoro dunduko du na nyanyakipa yo bangiriko na bangiri Yesu nga gu ko nafu motumo tumorii. (Gara. 2:20) Ani ima kpinyemu akuarani aidipase wenengai. Na ani naida ka yugo weneringise fuyo gbiati wesewese nyemuse. Tipa kadu ni mburu wasa, si naida ‘ani peke kina agu apai namanga zereda, na agu apai ka ani sonosi akuarani na ni.’ (Rom. 14:19) Nairiwo wai ani dunduko angera kumbatayo tipa gu regbo ani nikaa dunga na gberãrago berewe ya! Akaza, avura, kpio, rungosiro, akpakarapai nga ga ramukporo, gbiati gberãrago adunga berewe te. Ho agarã kutu nika susa ni, ngbatunga aboro dunduko nika da ni rengberengbe yo. Agu aboro dunduko nika nye ni ruru yo ti regbo yangara asada, Yekova nika dia yo ni agu awiriko nga ga kpotosende yo na i ki gbia “gu taarimo nga ga awiri Mbori.” (Rom. 8:21) Wa du ani dunduko, ani naandunga andu kindi kumbatayo kaa yugo gu nyemuse nanyakasa boro na kini undo akuarani i bati ki rimi ku rogo ga Mbori bawene vovo zegino.