1. Tipagine kura aboro arengbanga ka manga wisigopai nisase ti ni ya?

AREME, badungu aboro namangasunge nyanyaki tipa ka gbia marã nga gu rengbe ka undo yo rogo raka yo. Badungu awirinarani namangasunge tipa dungu asa ka gbia agu ahe si aidaha tipa si undo gayo aborokporo. Badungu aguyo nadia badungu asa na aˈuru dũ kuti nduge ku basunge yo na gate ku kporo yo. Badungu aguyo a naundo tiyo ni manga yo nyanyaki sunge. Ho uru ati ni, agi awirinarani namangasunge nyanyaki re nadu na mbugo! Ho i ambu ni wa gere, ome berewe tiyo ka manga wisigopai nisase te.

2. Gini regbo mo naamanga wisigopai ti ni?

² Ono tie, gu rengo duho nga si naida ani naagbia regbo agbia tipa kaa manga ndikidi wisigopai nisase rogo Fugo Mbori yo na rogo gu gaani awaraga yo nga ga aKristano. Gaani pagume na Yekova gbiati pa gbia ani nyenye unga naruriipa manga ani he wo! (1 Tim. 4:15) Gu Kura aboro ninaazinga ngbatutu wiso na aˈuru dũ kaa manga wisigopai ho adunga pai ni ka gbeberã yo kusayo ya na ho du berãyo ni ni zezeredihe tingbafuo zinga yo rame yo. Agu akurayo ninaadia bete aminiti ho uru ati ni kaa manga wisigopai na kini berẽkurii gupai i awisigoho.

3-4. Gini aˈariapai i namangihe nibipa bakio agu ahe i akusaha rogo awaraga na rogo gaani bangiriba nga ga Internet, na tipagine?

³ Si nawira gupai nirengo nga, mo ima ida kuti gupai nga si ni nyanyakipa pai ka gbia regbo tipa wisigopai. Ono ginipai si aida ani naawisigoho? ‘Mo ima rengba ka ya,’ badungu apai duho si aida boro gedihe. ‘Si ima mbu fere mi gedi agu apai duho dũ.’ Kura aboro kinaho du na rengba ka gbia bakere undo ti agu apai dunduko nga ga toro, ono agu akurayo kinaho si naima mbu fuyo i gbia regbo tipa ka gbia bakere undo ti ni. Riigbu Bipasunge ima inopai tipa gipai re. Mbiko gipai re, i afu rugapai bambeda kusayo tipa ka  umbasi bete agu ahe i akusaha rogo awaraga na rogo gaani bangiriba nga ga Internet.

⁴ Ni kpiapai, ani akusanga gu buku berewe nga Yearbook of Jehovah’s Witnesses te, bambiko gupai nga badungu wene apangbanga ima duho rogo gaani bangiriba nga ga Internet nga jw.org^® na rogo JW Broadcasting^® a, nga gu nakura na adiwi dũ. Awere, i nakusa gu Ngbaõbambu Sinziri du tipa aboro dũ gbiati Awake! bara biata rogo garã yo. I amanganga agi aˈariapai re tipa gupai nga ani du na bakere regbo berani tipa kura apai te. I mangihe tipa gupai nga ani du na rengba ka maaberã rani gbe tipa agu “apai . . . nangba” watadu agu apai du na nyanyakipaha. (Frp. 1:10) Ani furanga tipa wai mo narengbe ka maa agu apai du na nyanyakipaha mbatayo na ki gbia bakere undo ti gamo wisigopai nisase.

5-6. Gini awaraga si aida ani naawisigoho wenengai?

⁵ Gini apai si aida ani peresipaha mbatayo? Si naida ani naadia regbo na aˈuru dũ kuti geda Fugo Mbori. I ima zogosa namba agu averesi du tipa gedaha rogo gu geda Ziazia Kekeapai yo nga ga poso dungurati naamangaha tipa gupai nga bakere regbo du berani tipa berãkurii gupai ani agedaha na tipa manga kura awetekapai. Si aidanga gaani sásá du nga ka geda kina gedigedi agu averesi gbua du tipa gedaha vuru poso yo te, ono si naida ani mbu gu pangbanga nga ga Ziazia Kekeapai si zi ngbaduraniyo na ki mbedisi rani gbe na Yekova.​—Tam. 19:14.

⁶ Gini kurapai berewe si aida ani wisigihe wenengai? Si naida ani naambakada gu Ngbaõbambu Sinziri du tipa wisigoho gbiati gu waraga i awisigoho ti regbo Gu Wisigo Ziazia Kekeapai Nga ga Dungurati gbiati gu kuraapai nga gu du tipa gu dunguratise nga ga bebere poso. Si naida a ani naageda agu aNgbaõbambu Sinziri gbiati Awake! dunduko i akusaha.

7. Ya mo si naida aida rago gberẽ tirani ka si du nga ani abingo watadu ani agedanga agu apai dunduko du rogo gaani bangiriba nga ga Internet na rogo JW Broadcasting te?

⁷ Mo ima rengba ka ya ‘kina rengo du, ono na agu apai dunduko du rogo gaani bangiriba nga ga internet nga jw.org, gbiati agu du rogo JW Broadcasting? Si ima kio ni kerehe!’ Mo bingo gi kpiapai re: Badungu wene ariahe ni bakiakia rengbe kadu ba baga riahe yo. Agu aboro nangbe riahe rogo gu ba baga riahe re arengbanga ka asada agu ariahe dunduko duho te. Sidu, i nasia kina bete agu ariahe duho tipa ka rihe. Wakina gure a, ka si du nga rengba bero ka bi watadu ka geda agu apai dunduko du rogo gaani bangiriba nga ga internet te, ka rago gberẽnga tiro ya. Mo gedi watadu mo bi kina gu rengbe omero na ni. Ani sakingo pai awere tipa gupai wisigopai akodaha gbiati wai rengbe ani ka gbia bakere undo ti gaani wisigopai.

8. Gini adiandue rengbe ani ka diaha ho ani awisigo Ngbaõbambu Sinziri ni, na waigu rengbe manga mo agu adiandue re ka undo ro?

⁸ Ka wisigopai nga ka gedapai kini moiberãse fuo gupai mo agedaha tipa ka wirika gupai du na nyanyakipaha. Anga si nga ka geda gupai gbua ni ipo du tipa gedaha na kini gbakihe tii akaragapai te. Ni kpiapai, ho mo ambakada gu Ngbaõbambu Sinziri ni du tipa wisigoho, mo tonaha na geda gupai nasakapai tipa agu apai du rogo gu kekeapai re. Fuo gure, mo gedi rii gu kekeapai re na ki berẽkuriihe, gbiati umba riiapai na asanahe nga ga fugöpai. Fuani, mo gedi gu kekeapai re wenengai yee. Mo moiberãro sa gu genefugo nape gupai foro genewaraga afura tipaha, nga gu nidu ti aregbo dunduko ti tonatona genewaraga. Genefugo naundo ro dedede mo ini gupai genewaraga asakapai tipaha. Wa mo nikaa geda gu kekeapai re, mo berẽpa gu gene agenewaraga dunduko asongoda umba riiapai ngbaha gbiati gu memepai gu kekeapai re afura tipaha.

9. (a) Tipagine si aida ani moiberã rani ti ni gbe fuo averesi ho ani awisigo Ngbaõbambu Sinziri ni, na wai du rengbe ani ka mangaha wo? (b) A wa duhe rogo Yosua 1:8, ginipai si aida ani mangihe kupati gu nga ka geda averesi?

 ⁹ Ho ani awisigo Ngbaõbambu Sinziri ni, si naundo rani ani girogo Ziazia Kekeapai yo. Sidu, mo moiberã ro wenengai fuo agu averesi du rogo gu kekeapai du tipa wisigoho, gbe agu i nika gedaha ho dungurati nikaa wisigoho ni. Mo moiberã ro gbe tipa wai gu bangua afugo du rogo averesi asongoda gupai i agumbaha rogo genewaraga. Kurigure, mo di regbo ka berãkurii agu averesi mo agedaha, na ki berẽkurii wai mo narengbe nitiro ka mangapai kutini rogo gamo raka yo.​—Oni gedi Yosua 1:8.

10. Ringbisihe kuti AEbere 5:14, tipagine si aida avunguagude naadia regbo ti ni ti regbo gu irisombori nga ga aborokporo tipa ka yugo wai ka manga wisigopai gbiati wetekapai fu awiriyo?

¹⁰ Si nirengo nga, avunguagude ninaaida gupai nga awiriyo naagbia ngbarago ti gayo Irisombori Nga ga Aborokporo. Ono tie, wa vura duhe nga si naida avunguagude duadu ti aregbo dũ na gupai berãyo yo i nika wisigoho ti regbo gu irisombori nga ga aborokporo, ndupai ho tipa i naabihe nga i duwa ka i aamanga kparakpara ambakadapai na aposo dunduko tipaha te. I ima rengba ka manga gu irisombori nga ga aborokporo ni biyo JW Broadcasting watadu ni mangayo gu kurapai wa gu nga manga kpia ga Noa kurungba, na berewe a, si ima du ni nyanyakipa pai tipa ka yugo wai fu agude rengbe yo ka manga wisigopai nisase. Si naida i wiriki wai ka mbakada agu adunguratise nga ga dungurati watadu wai ka manga wetekapai tipa pai nga gu kuru sukuru yo. (Oni gedi AEbere 5:14.) Ka i adia regbo kuti manga wisigopai kporo yo, si nika du fuyo taata i moiberãyo fuo agu apai du ti regbo agu adunguratise nga ga dungurati na ti regbo bakere adunguratise, nga gu arengbanga kadu ti aregbo dũ na vidio rogoho ya. Rengo ngaha nga, bagizo gu regbo si aidaha tipa wisigopai na agude naruriipa garã agude na riipa wai du yo.

11. Tipagine duhe ti ni ni nyanyakipa pai ka yugo wai fu agu aboro ani awirika Baibiri na yo rengbe yo ka manga wene wisigopai nitiyo?

¹¹ Si naida agu aboro ani awirika Ziazia Kekeapai na yo ini wai aino a rengbe yo ka manga wisigopai. Ho i atona wisigo Ziazia Kekeapai atona ni, ani nidu na ngbarago ka biyo i nigbaki he tii gayo akaragapai tipa ka mbakadatiyo tipa gayo wisigo Ziazia Kekeapai watadu tipa agu adunguratise nga ga dungurati. Ono si naida ani yugu wai ayugo fuyo rengbe yo ka manga wetekapai na wai ka manga wisigopai nisase gbe. Rogo gu gene re, ka akpakarapai kuru, i nika ino wai aino i narengbe ka gbia gupai rengbe ka undoyo ni mangayo wetekapai rogo gaani awaraga yo kuba gupai nga ka ndu ni ipo fuo aboro rogo dungurati tipa undo.

12. Gini asásá rengbe ani kadu na ni berãrani yo ho ani amanga wisigopai ni?

¹² Ka si du nga mo nga gu boro angbanga wisigopai ti ni ya, mo ima rengba ka berãha nga ka mo gbianga ngbarago ti wisigopai te. Ono tie, mo ima rengba ka gbia ngbarago. Mo rengbe ka tonaha ni manga mo wisigopai tipa guru regbo, fuo gure, mo kini tona kiiso gu regbo yeeye mo adiaha kutini. Mo du na sásá berãro yo. Gu sásá nyakipaha gbe kisusi si aida ani du na ni nga ka mbeda gbe na Yekova. Gu sásá rengbe ani kada ti ni ni ipo ima rengba kadu nga ka karagapai kuti sanahe nga gu boro nasanaha watadu ka manga wetekapai tipa gu kpakarapai ani agbia tirani na ni.

13. (a) Mo sakingo pai tipa agu adiandue rengbe paranga boro ka diaha tipa ka songodapai ku bara gani aida yo sukuru yo. (b) Waigu rengbe mo ka mangapai kuti gu rugute du rogo AKorosaio 4:6?

¹³ Ni kpiapai, ya mo paranga boro nga mo nga guni nandu ku sukuru yo? Agu akuaro du mo na yo dunduko rogo riko sa ima rengba ka ida kuti gupai nga ahe akuru nisaha. Mo ima rengba kadu na nyemu ka songodapai ku bara gu yugopai yo nga ga Ziazia Kekeapai, ono mo kini bihe nga mo arẽnga ka mangaha te. Sidu, si naida mo mangi wisigopai! Mo ima rengba kadu na nduapai bero ue tipa manga mo ho wo: (1) ka nyakasa gamo idapase kuti gupai nga Mbori nakusi ahe dunduko (2) ka ino wai mo narengbe ka songoda rengo wenengai. (Rom. 1:20; 1 Pet. 3:15) Mo ima rengba ka sana tiro mbata na agu asanahe nga, ‘Agu aboro du mi na yo rogo riko naya ginipai nasayo i idi kuti gupai nga ahe akuru nisaha?’ Fuo gure, mo mangi wisigopai wenengai ni manga mo sunge na gaani awaraga. Songodapai ku bara gamo aida yo arengbenga kadu ni mbumbuhe wa gu mo aberãha te. Badungu aboro idi kuti gupai nga ahe akuru nisaha mbiko gupai gbua nga gu boro i abi ni na irisa du naaya fuyo rengo du nga ahe akuru nisaha. Ka mo bi rengo sa watadu arengo ue nga gu rengbe mo ka yugoho fuyo, mo ima rengba ka undo gu boro naida nzunzu ka ino rengo.​—Oni gedi AKorosaio 4:6.

14-16. (a) Waigu rengbe mo ka rugatiro wenengai na gu buku nga ga Ziazia Kekeapai mo ata ruganga tiro na ni wenengai ya? (b) Ni manga mo sunge na agu averesi keyo paha, mo sakingo pai tipa wai mo narengbe ka rugatiro wenengai na gu buku nga ga Amosa. (Oni bi gu sanduki a nga, “ Mo Sa Agu Apangbanga du Rogo Baibiri si du wa Gupai Namanga Awere!”)

¹⁴ Na ka si du nga ti regbo gu gaani dunguratise nga ga dungurati naye kumbatayo, i mangi mbakadapai tipa ani wisigi sangbanebi sa dagba gu guruguru asangbanebi yo du rogo Baibiri, isoke, gu sangbanebi gu nebi ani ainidonga tirani wenengai na ni ya akehe. Gu bambata diandue rengbe mo ka mangaha nga ka sonosa gamo nyemupai tipa ka ino gupai gu nebi re akehe. Wai du rengbe mo ka manga gipai re?

¹⁵ Bambatapai nga, mo sananga tiro nga: ‘Ginipai iningo mi he tipa bake gi buku re? Da nangia ko, wari ko aaraka ni, na gini sunge ko anaamangaha?’ Ka ani wirikipai wenengai tipa bakehe, ani ima rengba ka rugatirani wenengai na ndu agu apai ko amangisunge ti ni na agu afugo du rogoho gbiati agu akpiapai ko amangisunge na ni. Ho mo ageda Ziazia Kekeapai ni, mo ngere tipa agu afugo nika undo ro mo inipai tipa ngbatunga gu boro nangia bake gu buku re.

¹⁶ Fuo gure, mo nika bihe nipa undo ka ino gu regbo i ake gu buku re ti ni. Mo rengbe ka manga gipai re ni ngera mo tii gu kekeapai du na rimo agu abuku rogoho nga ga Ziazia Kekeapai nga gu du gii gu Baibiri yo nga New World Translation of the Holy Scriptures. Kurigure, mo rengbe ka bi gu sura nayugopa anebi na abakindo rogo gu wiri buku nga Mounda Tipa Wisigo Fugo Mbori, kpewaraga 14-17. Ka si du nga gu buku nga ga Ziazia Kekeapai mo awisigoho re nga buku nga ga sangbanebi, si adu ni wenepai ka mo wirikipai tipa wai raka adu na aboro ti gu regbo i ake gu buku re ti ni. Gini gbegberẽ abipai watadu mangaapai gu  nebi re adu na maabangirise ka undo aboro i mbuhe? Ada naraki ti rago ni? Tipa ka rugatiro na gupai re wenengai, gupai rengbe mo ka mangaha nga ka ndu ku rogo gu kura abuku nga ga Ziazia Kekeapai. Ni kpiapai, tipa ka rugatiro wenengai na gupai naamanga ti rago gu nebi nangia Amosa, mo rengbe ka gbia undo ni geda mo 2 Abakindo na 2 Pekapai, nga gu i nake paha nga si nafura tipa Amosa 1:1 rogo New World Translation of the Holy Scriptures. Kurigure, mo rengbe ka fugö gu kekeapai nga ga Osea, nga guko si awira gupai nga ko araki ti rago Amosa. Agi apai re dunduko nika undo ro mo rugutiro na wai raka adu ti rago Amosa.​—2 Aba. 14:25-28; 2 Peka 26:1-​15; Osea 1:1-11; Amosa 1:1.

17-18. Ni manga mo sunge na agu akpiapai du rogo agenewaraga watadu gamo kpiapai nitiro, mo yugungo wai pa maaberãse fuo gu futufutuapai nga ga Ziazia Kekeapai narengbe ka sa geda Ziazia Kekeapai ni gupai boro agbia ngbarago ti ni.

¹⁷ Ho ani ageda Ziazia Kekeapai ni, si naida ani du na bakere nyemu ka ino kura dungu apai. Ni kpiapai, aniyanga mo nageda gu sangbanebi du rogo Zekaraya kapita 12, nga gu nafura kumbatayo tipa pakpio Yesu. (Zek. 12:10) Ho mo ageda veresi 12 ni, si nape gupai nga “ga Natana aborokporo” nika rungo bakere gbe tipa pakpio Masiya. Kuba gupai nga ka geda gupai re gbua ni kina boro ipo kini susi riihe, mo runga tooni ki sana tiro nga: ‘Gini ngbanya du dagba ga Natana aborokporo na Masiya? Ya mo gene ho rengbe mi ka ino kura apai ngbaha tipa gipai re?’ Sidu, wiri sunge kinaho si aida mo mangihe tipa ka ino kura apai. Ni kpiapai, mo rengbe ka bi gu kura kekeapai nga gu nafura tipa gupai du rogo Zekaraya 12:12 rogo New World Translation of the Holy Scriptures. Kekeapai ho ue nafura tipaha. Bambataha du rogo 2 Samuere 5:13, 14, nga gu nape gupai nga Natana angia boro sa dagba awiri Davide yo. Uehe gu du rogo Ruka 3:23, 31, nga gu nayugo gupai nga Yesu angia ndikidi tita Natana, nga guko Maria aye rogo ngbatungako yo. (Oni bi gu Ngbaõbambu Sinziri nangia ga, Buza 2017, kpe. 32, genewa. 4.) Nibasa, mo ye ka bi gupai nga mo ima  du awere na nyemu gupai mo agedaha! Mo aima ino gupai nga i aima pe gupai kumbatayo nga Yesu nika ngia tita Davide. (Mt. 22:42) Ono tie, Davide adu na akumbagude beko naima susa 20. Nirengo, gu ndupai Zekaraya ape gupai ti ni nga ga Natana aborokporo nika rungo tipa pakpio Yesu ima du ziazia.

¹⁸ Oni bingo gu kura kpiapai berewe. Rogo gu bambata kapita nga ga Ruka, ani nageda gupai nga gu maraika nga Gaburere aye fuo Maria ki gumba gupai tipa gu gude ri aandu ka vunga ru nga: ‘Ko adú ni bahe, i ayá ti ko Wiri Mbori nga Bahe; Gbia Mbori amáa ko ni bakindo a wa titako adu nangia Dawidi, ko ki zogo ngbatunga Yakoba azoga kindi; gako ngbi adíga nga te.’ (Rk. 1:32, 33) Ani rengbe ka gbe berãrani gbe kina kuti bambata afugo Gaburere nga gu nape gupai nga i nika ya ti Yesu “Wiri Mbori nga Bahe.” Ono Gaburere aima gumba gupai a nga Yesu nika ‘zogarago’ ni bakindo. Sidu, ani rengbe ka bakabangirani nga gini bipai du Maria adu na ni tipa agu afugo Gaburere re. Ya mo ri aabihe nga agu afugo Gaburere re aayugo gupai nga Yesu du nika dia ba Bakindo Erode watadu nika dia ba agu aboro nika zogarago tingbafuo Erode? Ka Yesu ada ni bakindo, ka Maria ada ni na bakindo, na gari aborokporo kini raki kua bakindo yo. Ono tie, pai ho nayugo gupai nga Maria adu na agu aberãpai re riri yo te, na pai ho a ani agedaha rogo Ziazia Kekeapai yo nga gu nayugo gupai nga Maria asanahe tipa bangiriba rogo zogarago wa gu ga Yesu abawiriki amangihe te. (Mt. 20:20-23) Gipai re nayugo gupai berewe wenengai furani nga Maria angia gu boro naadu na bakere umbasitise tini!

19-20. A wa i napehe rogo Yakoba 1:22-25 na 4:8, gaani asásá nga gine ho ani amanga wisigopai ni?

¹⁹ Si naida ani tingidi gupai nga, gu bangua ndupai ani ageda Fugo Mbori ti ni gbiati agu awaraga nga ga aKristano nga ka mbeda gbe na Yekova. Si naida a ani bi “gu ngbatunga boro” nga ani wenengai gbiati agu aˈariapai si aida ani mangihe tipa ka fu ngbarago fu Mbori. (Oni gedi Yakoba 1:22-25; 4:8.) Sidu tie, ho ani aida ka tona wisigopai ni, si naida ani sana Yekova mbata tipa gu undo nga ga gako toro. Si naida ani zungodi ko tipa ko undo rani ani gbia bakere undo ti gupai ani awisigoho na kini bi tirani wa gu ko abi rani.

²⁰ Wa du ani dunduko, ani dunga adu wakina gu ga Mbori boro bake papara Atambuahe apepa ni ki ya: ‘Gani ngbarago du rogo gu rugute nga ga Yekova, ni namakia pa gako rugute uru na yuru. . . . Gu pai ni amanga, si adu na wenepia.’​—Tam. 1:2, 3.