1-3. (a) Ringbisihe kuti Atambuahe 5:4-6, wai du Yekova abi gbegberẽ apai? (b) Tipagine rengbe ani ka ya ti ni wẽ gu mangapai nga ga wasi agude, ngbanya dagbaha na “ga Kristo rugute” te?

YEKOVA MBORI ima soga ngbatunga gbegberẽ apai dunduko. (Oni gedi Atambuahe 5:4-6.) Ko ima soga gu mangapai nga ga manga boro wasiro na gude tipa ka mbiisa gani nyemu kodaba, nga gupai naima du ni kere gbegberẽhe gbe! Mbiko gupai nga ani nga aDezire Yekova, ani nawirika Yekova ni soga ani gu mangaapai nga ga wasi agude na ki zanga mbuhe si naamanga rogo gu dungurati nga ga aKristano.​—Rom. 12:9; Eb. 12:15, 16.

² Ai gu mangaapai nga ga wasi gude na ngbanya dagbaha na “ga Kristo rugute” kandara tooni te! (Gara. 6:2) Tipagine rengbe ani ka pehe ti ni wo? A wa ani awirikihe rogo gu kekeapai naadu mbata fu gere, ga Kristo rugute du nga agu apai dunduko Yesu ayuguhe rogo gako afugoyo gbiati rogo kpiapai yo, mburuhe rii nyemuse na si nasongoda ruru sarangbanga. Mbiko gupai nga aKristano nairisa gi rugute re, i namangapai na agude ngba gu gene nasayo i naabihe nga i ni bandabanda yo na aboro ima kpinyemuyo. Ono wasi agude nga mangapai nga ga gbangbati, na kingia gbegberẽpai, na si nasa gude u naabi tiru nga u nibanda banda ru te, na aboro akpingo nyemu ru te.

³ Si nafu kina gberãrago nga, gu mangapai nga ga mangapa wasiro na agude ima du rogo zegino dunduko, na ndikidi aKristano nagbiatiyo agbia na gi gbegberẽpai re a. Tipagine duhe ti ni wo? Bambiko “gbegberẽ aboro . . . na airanangahe” nange kina kumbatayo, na kura aguyo ima rengba ka rimo ku rogo dungurati. (2 Tim. 3:13) Kurigure, gu kura aboro nga aguyo namanga tiyo  nga i kina rogo dungurati ima mbu gu gayo nyemuahe nga ga borose si dibeyo na si ki sayo i wasi agude ni kodayo ba na yo. Ani sakingo pai tipa ndu gupai du gu mangapai nga ga mangapa wasiro na agude ti ni ni kere ingapai. Fuo gure, ani nika sakapai tipa wai abaakumba naamangapai ho boro amanga kere ingapai ni, kodihe na gu mangapai nga ga wasi agude, na wai avunguagude narengbe ka banda awiriyo. *

4-5. Wai du du gu mangapai nga ga mangapa wasiro na gude ni ingapai kuti gude?

⁴ Gu mangapai nga ga wasi agude nafuda aboro tipa gbanga regbo. Si naye na imisiri kuti agu agude i awasi yo gbiati gayo aborokporo na awirinayo rogo dungurati. Gu mangapai nga ga wasi gude nga kere ingapai.

⁵ Mangapa wasiro na gude nga ingapai kuti gu gude i namangi ru na ni. Ingapai du nga ka imisa aboro na ka sayo i rungo. A wa ani nika bihe rogo gu kekeapai ngbefuo gere, gu boro namangapa wasiro na gude naye na imisiri kuti gude rogo kere gbegberẽ agene yo. Ni nadia gu kido nga ga gude kusayo, kini sa ru ka u dunga ni bandabanda ru ya. Si naida ani banda agude ti gu gbegberẽ mangapai re, na agu agude aboro namangi pa wasiro na yo naida wasa gbiati undo.​—1 Tesa. 5:14.

6-7. Wai du du mangapa wasiro na gude ni ingapai kuti dungurati na kuti airangbii?

⁶ Mangapa wasiro na gude nga ingapai kuti dungurati. Gu boro du rogo dungurati mangipa wasiro na gude nagbarasa rimo dungurati. (Mt. 5:16; 1 Pet. 2:12) Si arunga ka pe gupai nga gu dungurati nga ga aKristano nambu gu mangapai nga ga mangapa wasiro na gude rogo dungurati te, bambiko amirioni ruru aKristano namanga nyanyaki asadatise tipa kaa manga apai ngba gu gene nafu taarimo fu Yekova! (Yuda 3) Agu aboro asanga berãyo ti gayo gbegberẽ mangaapai ya na nga aguyo nagbarasa rimo dungurati, ani ambunga yo i nye rogo dungurati te.

⁷ Mangapa wasiro na gude nga ingapai kuti airangbii. Si naida aKristano ‘naara fu abaira tandu’ watadu airangbii. (Rom. 13:1) Ani nayugo gupai nga ani nara fu airangbii ni irisa ani agu andiko nga ga ringara. Ka gu boro du rogo dungurati kuo ndiko, wa gunga ka manga pa wasiro na gude, ni naingapai kuti airangbii. (Oni ringbisihe na Amokedi 25:8.) Abaakumba na gu pagbia beyo nga ga fu mbusa fu agu aboro kuo ndiko te. Ono tie, i abandanga gu boro mangipa wasiro na gude ti gu mbusa irangbii afuhe fu boro ho ni amanga gu ingapai re ni te. (Rom. 13:4) Gu boro ingapai re nake kina guhe ni arũhe.​—Gara. 6:7.

8. Ho boro aingapai ni kuti kurani, Yekova nabihe wai?

⁸ Gu gberẽ agberã gbe nga, mangapa wasiro na gude nga ingapai kuti Mbori. (Tam. 51:4) Ho boro ainga ni kuti kurani, ni nainga ainga a kuti Yekova. Oni bingo kpiapai rogo agu aNdiko yo Mbori afuhe fu aYisaraere. Agu aNdiko re aape gupai nga ka boro tukahe be kurani watadu ka nanga ni ka dihe beni, ni nati “ndika kuti Yekova.” (Pa Mot. 6:2-4) Nirengo, gu boro du rogo dungurati ka mangipa wasiro na gude, kini sa gupai nga ka gu gude re dunga ni bandabanda ru ya, ni nati ndiko kuti Yekova. Gu boro re naye na gbarasarimo kuti rimo Yekova. Mbiko gi ndupai re, si naida ani naabi mangapa wasiro na gude ni kere gbegberẽpai na ni kere ingapai kuti Mbori.

9. Gini apai du mburuhe rii Ziazia Kekeapai ga Yekova riigbu nafuhe vuru agu agarã yo ninaasusa, na tipagine?

 ⁹ Vuru agu agarã yo ninaasusa, ga Yekova riigbu ima kusa badungu apai nga gu du mburuhe rii Ziazia Kekeapai nibipa gupai nga ga mangapa wasiro na gude. Ni kpiapai, kekeapai rogo aNgbaõbambu Sinziri na Awake! ima fura tipa wai rengbe agu aboro i namangipa wasiro na yo ka mangapai kuti gu imisiri du yo na ni, wai kura aboro narengbe ka undo yo na ka ngarasa yo, na wai avunguagude narengbe ka banda awiriyo. Abaakumba ima gbia rabahe nga gu du mburuhe rii Ziazia Kekeapai nibipa gupai si aida i mangihe ho boro namangipa wasiro ni na gude. Riigbu nandu kindi kumbatayo kaa fugo gu gene adungurati amangapai ngbaha kuti gupai nga ga mangapa wasiro na gude. Tipagine? Tipa gupai nga gaani gene mangapai kuti gupai re du na ngbaya dagbaha na gu rugute nga ga Kristo.

10-12. (a) Ho abaakumba amangapai ni kuti ai pai nga gu nabipa manga kere ingapai, ginipai i amaaha ku berãyo yo, na gini nyanyakipa asásá du yo na ni? (b) Ringbisihe kuti Yakoba 5:14, 15, ginipai abaakumba naasada ka mangaha?

¹⁰ Ho abaakumba amangapai ni kuti ai gupai nabipa kere ingapai, i namaa gupai ku berãyo yo nga gu rugute nga ga Kristo nape gupai nga i naamangapai na rimbasa akandoro ni nyemuse na kini mangi gupai du ni ruruhe bangiri Mbori. Ni sangbana gipai re, i naberã wenengai kurii badungu apai ho i aino gupai ni nga boro mangi kere ingapai. Gu nyanyakipa sásá kisusi du abaakumba na ni beyo nga ka banda rimo Mbori ni gigirihe. (Pa Mot. 22:31, 32; Mt. 6:9) Gu kurapai berewe nga i naberã aberã gbe tipa gu du wenengai rogo toro yo nga ga awirinayo rogo dungurati na i naida ka undo ai guni gbegberẽpai namangi ni.

¹¹ Kurigure, ka si du nga gu boro mangi gbegberẽpai nga boro sa rogo dungurati, i naˈasada ka undo gu boro re ni mbakadi gani pagume na Yekova. (Oni gedi Yakoba 5:14, 15.) Ho gbegberẽ nyemupai adia ni be Kristano ni kini mangi kere ingapai, ni nawoka awoka rogo toro yo. Ni berewe na wene pagume na Yekova te. * Ka pepai ngba kura gene, abaakumba nga amunganga rogo toro yo. I naˈasada ka husa “gu ni nakaza [naida ka ya, gu boro mangi ingapai] tipa ni da kubani wenengai.” Gu rugute i afuhe funi du mburuhe rii Ziazia Kekeapai ima rengba ka undo ni ni mbakadi gani pagume na Mbori, ono gipai re rengbe ka manga kina gu sa ka ni mangi ndikidi saberã.​—Amo. 3:19; 2 Kor. 2:5-​10.

¹² Si tie ziazia nga, nyanyakipa sunge dube abaakumba. I naberãpa gu rimbasa akandoro aberã gbe Mbori naˈasiapa ra fuyo. (1 Pet. 5:1-3) I naida gupai nga awirinayo naabihe nga i ni bandabanda yo rogo dungurati. Mbiko gu ndupai re, i namangapai ni ipo ho i aino ni nga boro mangi kere ingapai, kodihe na mangapa wasiro na gude. Oni bingo agu asanahe duti tonatona  genewaraga 13,  15, na  17.

13-14. Ya mo abaakumba nairisa agu andiko nga ga airangbii nibipa tingidapa mangapa wasiro na gude? Oni sakingo rogoyo.

 ¹³ Ya mo abaakumba nairisa agu andiko nga ga airangbii nibipa tingidapa mangapa wasiro na gude fu airangbii? Ii. Agu arago du agu andiko nga ga airangbii rogoho nibipa tingidapa mangapa wasiro na gude, abaakumba nairisa agu andiko re airisa. (Rom. 13:1) Agu andiko re atagbaganga tihe na ga Mbori andiko te. (Amo. 5:28, 29) Sidu, ho abaakumba agia gupai ni nga boro mangipa wasiro na gude, i namangapai ni ipo tipa ka ino gu rugapai  duho nibipa irisa agu andiko nabipa tingidapaha.

¹⁴ Abaakumba nafu gu kido fu agu agude i namangipa wasiro na yo, avunguyo gbiati agu aboro inipai tipa gupai re nga i ima du na rengo beyo ka tingidaha fu airangbii. Ono na ka si du nga gu boro mangipa wasiro na gude i atingida pani fu airangbii re nga boro sa rogo dungurati na aboro kini inipai tipaha rogo dagbarago? Ya mo si naida gu Kristano tingidi gupai re naabihe nga ni ima ye na gbarasarimo kuti rimo Mbori? Oó. Gu boro mangi ingapai re du ye na gbarasarimo kuti rimo Mbori.

15-16. (a) Ringbisihe kuti 1 Timoteo 5:19, tipagine si aida adezire duho mbata ue ti ni abaakumba kini ru ka kusa rondo sarangbanga tipa pai? (b) Ginipai abaakumba amangaha ho i aino gupai ni nga boro rogo dungurati mangipa wasiro na gude?

 ¹⁵ Tipagine si aida adezire duho ti ni kandara ue mbata fu abaakumba kusi rondo sarangbanga tipa pai rogo dungurati? Bambiko rurupai du ngaha ringbisihe kuti Ziazia Kekeapai. Ho boro akusanga ingapai ni ya, si naida adezire gupai re duho ue mbata fu abaakumba kusi rondo sarangbanga tipaha. (Pa Rug. 19:15; Mt. 18:16; oni gedi 1 Timoteo 5:19.) Ya mo gere nayugo gupai nga si naida adezire duho mbata ue i kini ru ka tingidapa mangapa wasiro na gude fu airangbii? Oó. Si aidanga adezire ue du mbata ho abaakumba watadu kura aboro kini ru ka tingidapa kuo ndiko fu airangbii te.

¹⁶ Ho abaakumba aino gupai ni nga boro sa rogo dungurati mangipa wasiro na gude, i namanga ome ka irisa ai gu ndiko nga ga airangbii duho nibipa tingida gupai re, na fuani, i kini ru ka wisigo gupai re ringbisihe kuti Ziazia Kekeapai. Ka gu boro re tikango gupai re, abaakumba nasana adezire gupai re. Ka aboro ue pe gupai nga gu boro re aima mangapa wasiro na gu gude re watadu na kura gude mbata kusayo, abaakumba nadu na bakere ndupai beyo ka kusa rondo sarangbanga tipa gupai re. * Ka dezire duho gbua sa, si ayugongo gupai nga ziree du ni apehe nga pai amangi wa gure te. Ka si vura du nga abaakumba agianga pa gupai re ngba adezire ue te, i ima ino gupai nga si ima rengba kadu nga gu boro re aima manga kere ingapai, nga gu naima ye na bakere imisiri kuti aboro. Abaakumba nandu kindi kumbatayo kaa fu wasa gbiati undo fu ai gu boro gupai re naye na imisiri kuti ni. Kurigure, abaakumba nadu na rubangirise na gu boro mangipa wasiro na gude re tipa gupai nga ka banda dungurati be ni.​—Amo. 20:28.

17-18. Oni sakingo pai tipa gu sunge rondo sarangbanga amangaha.

 ¹⁷ Sunge rondo sarangbanga nga gine? Gu fugo nga “sarangbanga” ayugongo gupai nga abaakumba du namanga sarangbanga watadu nadiaberã singia airangbii fu mbusa fu gu boro mangipa wasiro na gude te. Abaakumba arimisongo tiyo ku rogo agu apai yo nabipa agu andiko nga ga ringara te; i nambu agu apai nga ga tiandika fu airangbii. (Rom. 13:2-4; Tito 3:1) Kuba gure, abaakumba nadiaberã singia boro rengbe ka nye rogo dungurati watadu ni arengbanga ka nye rogoho te.

¹⁸ Ho abaakumba akusa rondo sarangbanga ni, i nasarangbanga nibipa agu apai nga ga toro. I namangasunge na Ziazia Kekeapai tipa si undoyo i ini singia gu boro mangipa wasiro na gude re mangi saberã watadu ni amanganga ha te. Ka si du nga ni amanganga saberã te, i nakusa ni kusayo rogo dungurati, na ki mangi tingidapai nga gaha fu dungurati. (1 Kor. 5:11-​13) Ka ni saberã ni, ni ima rengba ka nye rogo dungurati. Ono tie, abaakumba nape gupai funi nga si ima rengba kadu nga ni arẽnga berewe  tipa ai momu watadu bangiriba rogo dungurati te. Bambiko gupai nga abaakumba naida gupai nga agude du ni bandabanda yo, i nape gupai fu agu avunguagude du rogo dungurati ni gbuko nga, si naida i du na rubangirise ho du awiriyo ni pati gu boro re. Ho abaakumba ape gipai re ni fu avunguagude, si aidanga i pepa agu aboro fuyo gbiatiyo na gu kerepai re te.

19-22. Gini apai avunguagude narengbe ka mangaha tipa ka banda awiriyo? (Oni bi gu sura duti kpotoho.)

¹⁹ Ada du du na gu tindiro beyo nga ga banda agude be kerepai? Avunguagude du. * Awironi nga gaoni gamahe be Mbori, i nga “gu ũkumbo naye be Yekova.” (Tam. 127:3) Gaoni sunge du nga ka banda gu gaoni ũkumbo re. Gini apai rengbe oni ka mangaha tipa ka banda awironi ka i mangingo pa wasiro na yo ya?

²⁰ Bambatapai nga, oni rugutironi na pa wai aboro amanga pa wasiro na agude. Oni rugutironi na pa gu ngbatunga aboro namanga pa wasiro na agude gbiati agu abirĩ i amangasunge na ni ka nanga yo. Oni du na rubangirise nibipa agu apai watadu aboro rengbe ka ye na kerepai kuti yo. (Snz. 22:3; 24:3) Oni tingidi gupai nga, dedede, gu boro namangapa wasiro na gude nga kina boro gu boro gu gude re naima ino ni na ki ima du na kido kuti ni.

²¹ Uepai nga, oni naafura na awironi wenengai. (Pa Rug. 6:6, 7) Gipai re nakoda dega oni turoni wenengai fu awironi. (Yak. 1:19) Oni tingidi gupai nga agu agude i namangipa wasiro na yo naagunde agunde ka pe gupai re fu boro. I naagunde nga ka i pe gupai re, aboro aidanga kutini te, watadu si ima rengba kadu nga agu aboro mangipa wasiro na yo ima gundesi yo nga ka i kusinga gupai re ya. Ka oni bi gupai nga pai kinaho arunga bangironi ya, oni sanayo na asanahe ngba wene gene na ki degeturoni ni zerangbaduse kuti gayo akaragapai.

²² Biatapai nga, oni yugupai fu awironi. Oni peke agu apai fuyo nabipa kodaba nga gu rẽ na garã yo. Oni yugu gupai fuyo si aida i gumbaha na ki mangihe ka boro asadi ka zada yo rogo gu gene yo arunga ya. Oni mangisunge na agu apai ga Mbori riigbu nakusihe nibipa wai ka banda awironi.​—Oni bi gu sanduki nga “ Oni Yugupai fu Tironi na fu Awironi.”

23. Wai du ani abi gu mangapai nga ga mangapa wasiro na agude, na gini sanahe gu kekeapai ngbefuo gere nika karagapai kutini?

²³ Wangia ani aDezire Yekova, ani nabi mangapa wasiro na agude ni kere ingapai na ni kere gbegberẽpai. Ringbisihe kuti ga Kristo rugute, ani abandanga agu aboro namangapa wasiro na agude be asangbana gayo ingapai te. Ono ginipai rengbe ani ka mangaha ka undo agu aboro i namangipa wasiro na yo? Gu kekeapai ngbefuo gere nika karagapai kuti gu sanahe re.