1. Ginipai Fugo Mbori ayugoho furani?

ANI RENGBE arengba ka susa rogo ai kpakarapai yo​—bambiko Yekova nga gaani Bakerepa Bayugupai. (Yes. 30:20, 21) Fugoko nayugo agu apai dunduko furani nga gu ani aidaha tipa ka “du ziazia” na “aũ manga wene apai dunduko ki du” berani. (2 Tim. 3:17) Ho ani araka ni kuti agu ayugopai nga ga Baibiri, ani nada ni airatatamana kisusi agu aboro naya furani ani raki kuti “gu tatamana nga ga gi zegino re.”​—1 Kor. 3:19; Tam. 119:97-100.

2. Ginipai ani nika wisigoho rogo gi kekeapai re?

² A wa ani nika bihe, gu tatamana nga ga zegino naye na agu apai dedede nangba kina ti bororani. Sidu, si ima rengba kadu furani ni kpakarakpakaraha ka sovura kuti agu aberãpai gbiati mangaapai nga ga aboro zegino. Si rẽarẽ nga Ziazia Kekeapai nape gupai nga: “Oni bánda tironi, gu boro ka gbarasa roni na gani nyemu tatamana na kungba nangahe, wa du pa aboro.” (Koro. 2:8) Rogo gi kekeapai re, ani nika wisigopai tipa wai aboro atona ka ida kuti anangahe ue nga gu Satana ayugoho. Rogo agi apai re dunduko, ani nika bi ndu gupai du gu tatamana nga ga zegino ti ni nipa mungo na wai du gu tatamana nga ga Fugo Mbori na nyanyakipaha gbe ki susi ai guhe rengbe zegino ka fuhe.

3-4. Gini aˈariapai nga ga bipai tipa kodaba namangi Amerika yo rogo 20 kama agarã?

³ Ho 20 kama agarã atona atona ni, ga aboro bipai tipa kodaba aˈariatihe ni bakerehe gbe Amerika yo. Mbata kusayo, dungu aboro aidi kuti gupai nga kodaba fu kina arogotise sa na si aidanga i naapeka paha dagba aboro te. Ono gu bipai re ago kusayo na agu abipai arunga ya ki gbandaka dagba aboro.

 ⁴ Ga aboro bipai gbiati mangaapai nibipa kodaba aima ariatihe ni bakerehe rogo biata bawe agarã nga ga 20 kama agarã. Kura nawetekeapai sa aya, “Gene dia asura, ambaro, abia, avidio, gbiati abuku atona kaa yugo badungu apai nibipa kodaba.” Rogo agu agarã re dunduko, gu gene aboro atona kaa do gbere ngbaha anaasa aboro i naaberã kina pa kodaba na aboro atona voda agu aroko adunga ni iriirihe ya. A wa Ziazia Kekeapai afura kumbatayo tipa yangara areme, aboro nika du ni “akpí nyemu sangba borose” bakere gbe. ​—2 Tim. 3:4.

5. Ginipai ninaamanga tipa gu bipai nga ga zegino nibipa kodaba naatona kina rogo gu garã nangia 1960?

⁵ Rogo agu agarã naatona tifuo 1960, agu apai du wa kumba na dee naaraka sa zanga manga rogatise, koda kumba ba na kurani, gbiati mbutise aima du ni bakerehe gbe. Badungu aũngbarago atona kaa yugo kina pa kodaba. Sangbana agi apai re dunduko ningia gine? Kura nake abuku sa ape gupai nga badungu gbegberẽ asangbanapai nakura ho aboro ambu pekafuo agu arugapai ni du tipa kodaba. Ni kpiapai, si nakusa agu asangbanapai du wa kparaka arogotise watadu gindigo boro gani badiarogatise na awirini, duni fudifudise berãseyo gbiati nye gu sino kuti boro nga ga bi agu ahe nayugo kpia kundiri aboro. Agu akaza boro adiaha rogo kodaba wagu nga, AIDS, nga pai sa dagba agu apai yo nayugo gupai nga sunge ti gu tatamana nga ga Zegino te.​—2 Pet. 2:19.

6. Wai du du ga zegino bipai tipa kodaba ni gupai Satana akpinyemuhe?

⁶ Gu bipai du zegino na ni tipa kodaba nga kina boro gupai Satana akpinyemuhe. Kango ti ni te nga, ko na ngbarago ka bi aboro i nimangi kodaba ngba gu gene Mbori akpinga nyemuhe ya na kini yugu zanga irisa tipa gu gamahe nga ga rogatise Mbori afuhe fu aboro. (Ef. 2:2) Ho aboro amanga wasiwasi kodaba ni, i nayugo gupai nga i na irisa tipa gu gamahe nga ga vunga agude Mbori afuhe fu aboro te. Gipai re ima rengba ka sa gupai a nga i zanga nyenye unga.​—1 Kor. 6:9, 10.

7-8. Tipagine du gu bipai nga ga Ziazia Kekeapai tipa kodaba ti ni ni wenehe kisusi gu bipai nga ga zegino?

⁷ Agu aboro naida na gu tatamana nga ga zegino nasawia agu arugute asawia nga ga Ziazia Kekeapai, kini pe gupai nga si arunga te. Ngbatunga agu aboro re ima rengba kaa sanahe nga, ‘Tipagine ka Mbori arengbe ti ni ka kusa rani na gu nyemupai nga ga kodaba kini ru berewe kaa ya furani ka ani mbisinga ha ya?’ I nasana  gu sanahe re bambiko gupai nga i na gu iraira berãpai nga si naida aboro naamanga ai gupai du yo na nyemu mangaha. Ono Ziazia Kekeapai nape gupai du kia. Si nayugo gupai furani nga ani ima rengba ka sovura kuti gu gaani nyemuapai du ni irairaha. (Koro. 3:5) Kurigure, Yekova aima fu gu gamahe nga ga rogatise, nga gu mbakadapai aboro narengbe ka mbisa gu gayo nyemupai nga ga kodaba rogoho ngba iriiri gene. (1 Kor. 7:8, 9) Rogo gi gene re, arogotise rengbe ka gbia ngbarago ti kodaba zanga gu biratise gbiati abakabangirise wasiwasi kodaba ninaaye na ni dedede.

⁸ Ziazia Kekeapai kia ti gu tatamana nga ga gi zegino re, si nayugo ruru bipai furani tipa kodaba. Si nape gupai nga kodaba ima rengba kadu ni gupai naye na ngbarago. (Snz. 5:18, 19) Ono tie, Ziazia Kekeapai naya: “Oni ini pa [du na zatise nibipa] bororoni tigaoni wa du oni ni ba sa sa ni ziazia pai na irisa, ni gu kpinyemuse nga ga gbagaura, a wa agu aGendiria aina nga Mbori ya te.”​—1 Tesa. 4:4, 5.

9. (a) Wai du i angarasi gu ga Yekova aboro naadu ti tonatona 20 kama agarã tipa i pekefuo gu tatamana nga ga Fugo Mbori? (b) Gini wene rugute du rogo 1 Yoane 2:15, 16? (d) A wa duhe rogo ARomo 1:24-27, gini gbegberẽ mangaapai si aida ani nehe?

⁹ Ho 20 kama agarã atona ni, agu aboro “susi ina pa he” aananganga ga Yekova aboro na gayo bipai te. (Ef. 4:19) I aˈasadi ka kakuti ga Yekova arugute sirisiri. Gu Ngbaõbambu Sinziri nangia ga Merekoko 15, 1926, ape gupai nga, “si naida kumba watadu dee du ni iriiri ni na ni ziazia ni rogo gani aberã gbiati mangaapai, gbe ho ni amangapai ni na gu boro angianga gani badiarogatise ya.” Ga Yekova aboro napekafuo gu tatamana nga ga Fugo Mbori zanga bipa agu apai namanga pati yo. (Oni gedi 1 Yoane 2:15, 16.) Nairiwo gu tambuahe du ani na ni tipa Fugo Mbori! Ani na tambuahe a tipa gupai nga Yekova nafu riahe furani nga ga toro ti regboho tipa si undo rani ka gu tatamana nga ga zegino nangingo rani na gu bipai duhe na ni tipa kodaba ya. *​—Oni gedi ARomo 1:24-27.

10-11. Ginipai Ziazia Kekeapai apehe nga si nika manga ti yangara arame?

¹⁰ Ziazia Kekeapai aima pe gupai nga ti yangara arame, aboro nikaa kpi “kina nyemu tiyo.” (2 Tim. 3:1, 2) Si airiwongo te nga zegino nangarasapa gupai nga ga kpinyemu tise. Kura buku sa ape gupai nga rogo agu agarã natona tingbafuo 1970, “agu abuku du tipa boro undo tiní na ni nisani aima tona kaa nge ni kerehe.” Gu kura agi abuku re “aangarasa agedihe nga i ini tiyo, ki idi na tiyo na kidu na ngbarago tipa tiyo.” Ni kpiapai oni bingo gupai i apehe rogo buku sa dagba agu abuku re nga: “Mo kpinyemu tiro bambiko mo nga yangara bawene boro kisusi dagba agu aboro yo dunduko naraki.” Gu buku re aape gupai nga “boro du si aida ni diberã tipa wai kaa mangaapai, na kini mangi ai gupai ni abihe nga si ni ruruhe na ni gupai rẽarẽ.”

¹¹ Ya mo mo aginga ngbatungapai wa gure mbata? Satana angarasi Eva ri mangipai wa kina gure. Ko aya furi wẽ ri nika du “wa kina Mbori, niini wenepai na gbegberẽpai.” (Bam. P. 3:5) Areme, badungu aboro nabi tiyo na payo kuari gbe, na i nabihe nga boro ho rengbe ka pe gupai fuyo du ni ruruhe na ni irairaha te, zavura kina Mbori vurũ. Ni kpiapai, gu bipai re ima du ziazia rogo gu gene aboro abi rogatise ngbaha.

12. Gini bipai tipa rogatise zegino angarasa paha?

¹² Baibiri naruga arogotise nga i irisi tiyo dagbatiyo na kini irisi gayo mozunga nga ga rogatise. Si nangarasa arogotise i diberã kaa  raka kina sa, nipehe gupai nga: ‘Boro ahe bani na nani, ki ka kuti diani, i ki du wa boro sa.’ (Bam. P. 2:24) Ono tie, agu aboro du gu tatamana nga ga zegino na maapai kurii yo na gu bipai du kia, i nape gupai nga kumba naamaa berãko gbe kina tipa agu apai du ko na zingoho na diako kini moiberã ri a gbe kina tipa agu apai du ri na zingoho. Kura buku sa nga gu nafura tipa mbutise aya, “Ti rago gu kura apumbo nga ga rogatise, gu mozunga nga ga rogatise nga gu ninaaya ‘a wa ani kaa raka kindi,’ i naaˈariaha na gu mozunga nga gu du kina tipa bete regbo gbua nga gu naya ‘a wa ani kaa kpinyemu tirani kindi.’ ” Ngbatunga gu bipai tipa rogatise re ima kparaka badungu riiakporo na ki ima ye na bakere imisiri. Zanga kapa, gu bipai du zegino na ni tipa rogatise nga mumungo bipai.

13. Gini ndupai sa Yekova asoga agu aboro nakiiso patiyo ti ni?

¹³ Baibiri nagumba gupai nga: “Agu aboro dunduko nakiisa pa tiyo nga kere gbegberẽ aboro bangiri Yekova.” (Snz. 16:5) Tipagine du Yekova aidanga agu aboro nakiiso pa tiyo ti ni ya? Ndupai sa nga, agu aboro nasonosa pa gu sino nga ga kpinyemu tise bakere gbe na kini ngarasi he naye kada ni aira rukö wakina Satana. Mo bingo gupai nga, Satana aidi gupai nga Yesu​—nga guko Mbori amangisunge na ko tipa ka kusa ahe dunduko​—kuku fuko sande tipa ka irisoko! (Mt. 4:8, 9; Koro. 1:15, 16) Agu aboro du na gu sino nga ga kaa bi tiyo na nyanyakipa yo nayugo gupai nga gu tatamana nga ga zegino, si nga mumungopai bangiri Mbori.

14. Waigu ARomo 12:3 aundo rani ani du na ruru bipai tipa tirani?

¹⁴ Baibiri naundo rani ani du na ruru bipai tipa tirani. Si nape gupai nga, si rẽarẽ kadu na bete nyemuse tipa tise. Yesu ape gupai nga: “Mo kpi nyemu kuaro wa mo akpi nyemu tiro,” gere nayugo gupai nga si naida aida ani naamaaberã rani tipa agu apai du tipa rani. (Mt. 19:19) Ono tie, Ziazia Kekeapai ayugongo gupai furani nga ani naabi tirani nga parani ima nyaka ki susi gu kura aboro te. Kuba gure, si  nape gupai nga: “Ka oni mángi nga pai na vura na ruka wa sa ya, ono gu ni bérẽ pa kura ni rogo umbasi gani berã ya ni ngba susi ni.”​—Frp. 2:3; oni gedi ARomo 12:3.

15. Tipagine du mo abihe ti ni nga gu rugute Baibiri afuhe tipa pa bi tise na nyanyaki paha, si ni wenehe?

¹⁵ Areme, badungu agu aboro i aya i nga airatatamana nasawia gu rugute asawia Baibiri afuhe tipa pa bi tise na nyanyakipaha. I nape gupai nga ka mo aabi kura aboro nga i nyaki payo ki susi ro, aboro nika bi ba wia tiro. Ono asangbana gu bipai ga Satana zegino adigi ningarasi paha ningia gine? Ginipai mo nabihe? Ya mo agu aboro nakpi kina nyemu tiyo na ngbarago? Ya mo gayo aborokporo na ngbarago? Ya mo ndikidi abakure beyo? Ya mo i na mbembedi pagume na Mbori? Ringbisihe kuti gupai mo nabihe, ginigu naye na wene asangbanapai​—pekafuo gu tatamana nga ga zegino watadu gu tatamana du rogo Fugo Mbori yo?

16-17. Ginihe si aida ani du na tambuahe tipaha na tipagine?

¹⁶ Agu aboro napekafuo gu rugute nga ga agu aboro zegino abiyo ni airatatamana, i wakina gu boro nasana kura ni nga guni i nandu na ni ka bi gu rago i aadanga rogoho mbata ya tipa ni yugo gene fuyo ho i naingi ni. Yesu ape gupai nibipa agu akumba naadu ni “airatatamana” ti rago ko nga: “I nga angbembatayo fu aboro ni airavurari. Ka iravurari ngbe mbata yo fu kura iravurari, i tiwi atiwa ku due yo ue.” (Mt. 15:14) Nirengo, gu tatamana nga ga gi zegino re nga mumungopai bangiri Mbori.

¹⁷ Gu wene arugute du rogo Baibiri yo aima digo niyugu gupai ti aregbo dũ nga si “rengbe tipa yugopai, tipa zapai, tipa ruga aboro, na tipa raba aboro rogo rurupai.” (2 Tim. 3:16.) Ani na ngbarago nga Yekova nabanda rani vurube gako riigbu be gu tatamana nga ga zegino! (Ef. 4:14) Gu riahe nga ga toro ko akusaha nafu gu ome furani ani aidaha tipa ka pekafuo agu arugute du rogo Fugoko yo. Nairiwo gu pa momu nga ha kadu ni agu aboro gu wene tatamana du rogo Fugo Mbori yo angbe fuyo kumbatayo!