1-2. (a) Gini kpiapai nayugo gupai nga aboro na gu nyemupai rogoyo yo nga i fu wasa fuyo na i na rengba ka fu wasa fu kura aboro? (b) Waigu kura agude agbiatiyo na imisiri?

ABORO dunduko i avungayo na gu nyemupai rogoyo yo nga i fu wasa fuyo na i na rengba beyo kafu wasa fu kura aboro. Ni kpiapai, ho tooni gude ati ni kini mburuku ti rukusiru ba ngimbaro yo, u naora fuo nai watadu bai na kpee ngbaru. Avunguru arengbanga ka husa gu oro re te, ono i ima rengba kafu wasa furu. I rengbe ka sana ru nga ginipai nimangi, ki wege aume bangiiru yo, ki peke wene wiri zezeredi afugo furu, na isoke ki moi dawa bangiri gau oro yo watadu ki voho na ũvoda oro. Fuoho aimanga te, gude ki mbu kpee na zavura ki tona ka ngimbaro berewe. Gu oro re natona ka wi fuo bete regbo kusa.

² Ono tie, ti kura aregbo, agude nagbiatiyo na kere imisiri ngba dungu agene. Agu akurayo kinaho i amanga pa wasiro na yo. I ima rengba ka mangapa wasiro na gude bara sa watadu bara dunguhe vuru dungu agarã yo. Singia ginigu nga ginigu, gu gbegberẽpai i namangi ru na ni re ima rengba ka ye na imisiri kuti ru na gu imisiri re ima rengba kaa ndu kindi kumbatayo. Ti kura aregbo, i nazio gu boro mangi gupai re ki fu mbusa fu ni. Ono ti kura aregbo, si ima rengba kadu nga i aziongo gu boro mangi gupai re ki fu mbusa fu ni te. Ono ka si vura dunga i fu mbusa fu gu boro re ni ipiipihe, sangbana gu gbegberẽpai re ima rengba ka nye na gu gude re daho u ni ka nyaka ni.

3. A wa i nagumbaha rogo 2 AKorindo 1:3, 4, ginipai Yekova aidaha, na gini asanahe ani nika sakapai tipaha?

³ Ka si du nga gu Kristano i amangipa wasiro na ni mbu ni kindi tooni ni fudifudi ni kindi berãni yo, ginipai rengbe ka undo ni? (Oni gedi 2 AKorindo 1:3, 4.) Si tie ziazia nga, Yekova naida gupai nga gako akandoro gbia gu nyemuse gbiati gu wasa nga gu i  aidaha. Sidu, ani sakingo pai awere tipa asanahe biata: (1) Tipagine agu aboro i namangipa wasiro na yo mbuyo tooni aida na wasa ti ni? (2) Ada rengbe kafu gu wasa i aidaha? (3) Waigu rengbe ani kafu wasa fuyo?

4-5. (a) Tipagine duhe ti ni ni nyanyakipa pai ani rugutirani na gupai nga agude kia ti kuru aboro? (b) Waigu rengbe mangapa wasiro na gude kadu na maapai kurii gu rengba du u na ni ka kido kuti kura aboro?

⁴ Gu kura kuru aboro nga aguyo i amangipa wasiro na yo mbuyo kindi tooni ima rengba ka ida na wasa kindi dungu agarã ki vura ka susa vurũ. Tipagine? Tipa ka rugatirani na gipai re, ani du wa ka ani rugutirani mbata na gupai nga agude kia ti kuru aboro. Dedede, agu agene rago agberã ti agude ngbaha kia ti wai rago agberã ti kuru aboro ho i amanga fuyo ni gbegberẽ. Ani bingo bete akpiapai.

⁵ Si naida agude sonosi wene pagume dagbayo na agu aboro nasonosa yo na kini ngerefuo yo. Ngbatunga gu mbembedi pagume re nasa agude i naabitiyo nga i ni bandabanda yo na si nayugo gupai fuyo nga si naida i du na kido kuti kura aboro na kini kpinyemuyo. (Tam. 22:9) Si nafu kina gberãrago nga, dedede, i namangapa wasiro na agude kina rogo akpuyo, na mbembedi agume watadu abakure du namanga gipai re gbe. Ho boro amangapa wasiro ni na gude, si nadu furu ni mbumbuhe u kido kuti kura aboro zavura fuo dungu agarã kusa.

6. Tipagine du mangapa wasiro ti ni na gude ni kere gbegberẽpai na ni gupai naye na imisiri?

⁶ Agude arengbanga ka bandatiyo te, na mangapa wasiro na gude nga kere gbegberẽpai na si naye na imisiri. Manga agude ngbaome tipa i mangi agu apai nabipa kodaba rogo agu agarã du mbata fu i rẽ tipaha ima rengba ka ye na bakere imisiri fuyo. Mangapa wasiro na agude rengbe arengba ka gbarasapa gu bipai du yo na ni tipa kodaba, tipa tiyo, watadu tipa ai gu boro naida kadu mbembedi na yo.

7. (a) Tipagine duhe ti ni taata fu boro ni nangi gude ka mangapa wasiro na u, na waigu gu boro namangapa wasiro na gude narengbe ka manga gipai re? (b) Asangbana agu aziree re rengbe kangia gine?

⁷ Agude ata inongo wai ka wisigopai wenengai berãse yo tipa ka manga diaberã, watadu ka ino gbegberẽpai na wai ka ne he te. (1 Kor. 13:11) Sidu, si taata fu boro ni nangi gude tipa ka manga pa wasiro na u. Agu aboro namangapa wasiro na agude nape kere aziree fuyo, wa gu nga, gude du si aida i bira ru tipa gupai mangi re, ka gude gumbanga pa gu wasiro i namangi ru na ni ya, ka gude gumba gupai mangi, boro ho nika ida kutini watadu ka undo ru te, watadu gu ziree nga manga agu apai nga ga kodaba agberãnga te mbiko si nayugopa ndikidi nyemuse. Ngbatunga agu aziree re ima rengba ka vundo rii gude yo na si ki di ru na dungu agarã tipa u rugu tiru na gupai nga ziree du nangia agi apai re dunduko. Ho ngbatunga gu gude re asona ni, u ima rengba kaa biti ru nga sunge tiru te watadu u arẽnga tipa aboro fu wasa furu watadu i kpinyemu ru te.

8. Tipagine rengbe ani kadu ti ni na gu kido nga Yekova rengbe arengba kafu wasa fu agu aboro naima gbiatiyo na imisiri?

⁸ Sidu tie, si airiwongo te nga, mangapa wasiro na gude rengbe ka ye na nyenye wasiro furu. Gi tiandika re nga kere gbegberẽ ingapai! Gipai nga ga mangapa wasiro na agude nga gu namanga rogo zegino dũ re nayugo gupai ziazia nga ani naraka ti yangara arame, nga gu regbo du dungu aboro ni “airasakparakpa” na gu regbo “gbegberẽ aboro agbérã ki susi.” (2 Tim. 3:1-5, 13) Agu apai Satana ambakadaha tipa si fu imisiri furani ni kere gbegberẽhe na si nafu kina rungo ho aboro amangapai ni ngba gu gene nasa ngbarago ti Bakitingbanga. Ono tie, Yekova du na ome tiko ki susi Satana watadu agu aboro nangbe na Satana. Ani ima rengba kadu na gu kido nga Yekova ima inopai wenengai tipa agu aimisiri ani andu rogoho, na ko ima rengba kafu gu wasa furani ani aidaha. Si nipa maku furani nga ani nairiso ‘Mbori wasa dunduko; nga guko nafu wasa fu rani rogo gaani gberãngbi yo dunduko, ya ani rengbe na fu  wasa fu agu yo du rogo gberãngbi yo, mbiko gu wasa Mbori angarasi rani na ni.’ (2 Kor. 1:3, 4) Ada du tie Yekova amangasunge na yo tipa i fu wasa?

9. Ringbisihe kuti agu afugo Bakindo Davide du rogo Atambuahe 27:10, ginipai Yekova nika mangaha fu agu aboro gayo aborokporo nambu yo?

⁹ Agu aboro avunguyo abandanga yo be pa wasiro ya watadu agu aboro i namangipa wasiro na yo naida na wasa gbe. Gu bake apapara atambuahe nangia Davide aima ino gupai nga kina Yekova sa nga gu yangara boro rengbe kafu wasa. (Oni gedi Atambuahe 27:10.) Davide aima du na gu kido nga agu aboro avunguyo nambu yo, Yekova nika duadu ni bayo. Waigu Yekova amanga gipai re? Ko namangasunge na ruru airisiko. Agu aboro ani airiso Yekova na yo nga gaani aborokporo nga ga toro yo. Ni kpiapai, Yesu aya agu aboro naairiso Yekova na ko angia awirinako, adawiriko, gbiati anako.​—Mt. 12:48-​50.

10. Wai du gu mokedi nangia Pauro afura tipa gako sunge wa ko angia bakumba?

¹⁰ Rogo gi gene waraga re gbiati gu naye fuoho, ani nika bi wai dungurati narengbe kadu wa riikporo. Gu mokedi nangia Pauro adu ni gu ruru bakumba naamangasunge nyanyaki. Ko amoi wene kpiapai, na zavura ga Mbori toro adu kugiiko ko gumba gupai fu kura aboro nga i wiriki gako kpiapai wa ko aawirika Kristo. (1 Kor. 11:1) Oni bingo wai Pauro afura tipa gako sunge ti kura regbo sa wa ko angia bakumba, ko aya: “Ani adu ni bayee aboro dagba roni yo a wa de namanga pa awiriri.” (1 Tesa. 2:7.) Agu abaakumba du areme ni ruruyo ima rengba ka mangasunge wakina gure na wene afugo ho i amangasunge ni na Baibiri kafu wasa fu agu aboro naida na undo.

11. Ginipai nayugo gupai nga abaakumba nga gu yangara aboro rengbe kafu wasa te?

¹¹ Ya mo kina abaakumba sa nga gu yangara aboro rengbe kafu wasa fu agu aboro i namangipa wasiro na yo? Oó. Ani dunduko du na gu tindiro berani nga ga ‘ngarasa tirani dagbarani’ watadu fu wasa dagba tirani. (1 Tesa. 4:18) Agu awirina nga adee naima nyaka rogo toro yo ima rengba ka undo agu awirina nga adee naida na undo bakere gbe. Si ruaru tie nga Yekova aringbisi tiko kuti gu nagude nafu wasa fu wiiri ho ko aayugo kpia gu wasa ni ko afuhe fu agu aboro nambu.  (Yes. 66:13) Baibiri na agu akpiapai rogoho nga ga agu adee naafu wasa fu agu aboro naadu rogo bakere gberãrago. (Eyo. 42:11) Yekova na bakere ngbarago areme ho ko abi agu aKristano ni nga adee i nifu wasa fu agu akurayo nambu! Ti kura aregbo, abaakumba ima rengba ka sana gu wirina naima nyaka rogo toro yo ni gbuko singia ri rengbe ka undo gu wirina ni dee nambu. *

12. Ginipai si aida ani du na rubangirise ka zanga mangaha?

¹² Ho ani aˈasada ka undo kuarani Kristano ni, si aidanga ani naasana ni tipa agu apai ni aidanga ka fura tipaha ya te. (1 Tesa. 4:11) Ono ginipai rengbe ani ka mangaha fu agu aboro naida na undo gbiati wasa? Ani sakingo pai tipa agene bisue du mburuhe rii Ziazia Kekeapai nga gu rengbe ani kafu wasa fu kura aboro ngbaha.

13. A wa i nafura tipaha rogo 1 Abakindo 19:5-8, ginipai ga Yekova maraika amangihe fu Eriya, na waigu rengbe ani ka wirika gu maraika re?

¹³ Oni mangi gupai rengbe ka undo agu aboro nambu. Ho gu nebi nangia Eriya aaora ni tipa ka batasa ungako, rago aima gberã tiko ni kerehe na ko ki idi ka kpi. Yekova akedi maraika ko ndu ka bi ko. Gu maraika re afu guhe fu Eriya nga gu ko aaidaha ti gu regbo re. Ko afu fofoi riahe fu Eriya na ki ngarasi ko nga ko rihe. (Oni gedi 1 Abakindo 19:5-8.) Gu pangbanga re nayugo ndikidi rengo: Ti kura aregbo, gu taata apai rengbe ani ka mangaha fu kura aboro ima rengba kafu bakere undo fuyo. Isoke riahe, wene gamahe, watadu gu karte du na wene afugo rogoho ima rengba kafu gu kido fu gu wirina du rogo gberãrago nga ani ima kpinyemu ni na ani naberãpa ni aberã. Ka si du nga si taata furani ani fura na boro tipa agu apai nabipa ni te, ani ima rengba ka yugo gupai nga ani naberãpa ni aberã ni manga ani gu bete apai nafu undo i nafura tipaha re.

14. Ginipai rengbe ani ka wirikaha ti gu pangbanga du tipa Eriya?

¹⁴ Mo sa agu aboro du rogo bakere gberãrago i naabihe nga i wenengai na i ni bandabanda yo. Ani ima rengba ka wirika gu kurapai ti gu pangbanga du tipa Eriya. Ngba iiriwo gene, Yekova afu gu undo fu gu nebi re ko aaidaha tipa ka ndu gako gbanga nunguro kurii Bagangara Orebe yo. Isoke Eriya aima rengba ka bi tiko nga ngba ba ko angba rogo gu ba naadu ni tuturũ he re, nga gu ba Yekova amangi mokido rogoho na gako aboro bakuru kusayo. Si ima rengba kadu nga ko aabihe nga ko ima turõ ti agu aboro naaida ka imisa ko. Ginipai rengbe ani ka wirikaha ti gi kpiapai re? Ka ani aida kafu wasa fu agu aboro i namangi pa wasiro na yo, si naida ani undo yo mbata i naabi tiyo nga i ni bandabanda yo. Ni kpiapai, ho abaakumba aida ka fu wasa ni fu gu wirina nga dee, si naida i moi gupai ku berãyo yo nga gu wirina nga dee du rogo gberãrago ima rengba kaa bihe nga fu wasa furi ho du ri ni kporo yo rogo gu wiri ba du ni wenehe ngba ti fuhe furi Bambu Kindo yo. Gu kura ni ima rengba kaa bihe tigani nga Bambu Kindo yo ngba.

15-16. Degatue wenengai nakoda gini apai?

¹⁵ Mo du ni gu boro nadegatuni wenengai. Ziazia Kekeapai nafu gu ziazia rugute nga: “Aboro dunduko i ipisi tiyo ka gia pai, ki rõasi tiyo tipa gumba pai.” (Yak. 1:19) Ya mo ani nga wene agipai? Ani ima rengba ka berã gupai nga tipa kadu ni wene agipai, gupai gbua si aidaha nga kaa ngana gu boro nafura zanga fugo. Ono wene giapai nakoda kura apai susi gure. Ni kpiapai, Eriya apeke gako aimisiri fu Yekova na Yekova ki degetuko fuko wenengai. Yekova arugutiko na gupai nga Eriya adu rogo gunde, kidu nisako, na ki berẽ gupai nga agu asunge dunduko ko amangihe adu gbua. Yekova aundo ko ni nyemuse tipa ko mbu ngbatunga aberã wa gure. Ko ayugu gupai nga ko aima degatuko fu Eriya wenengai.​—1 Aba. 19:9-11, 15-18.

¹⁶ Waigu rengbe ani ka yugo nunga ho ani  adegaturani ni fu wirina? Ti kura aregbo, bete wene afugo ni tatamana ima rengba ka yugo wai ani aberã pa ni. Mo ima rengba ka ya: “Nagberẽ gupai mangi ro re! Gude ho si aida i mangi ru wa gure te!” Isoke mo ima rengba ka sana gu bakureamo du rogo imisiri re na sanahe sa watadu ue tipa ka rugatiro na gupai ni aida ka gumbaha. Mo rengbe ka sana ni nga, “Ya mo mo rengbe ka undo re mi rugutire na gupai mo aida ka gumbaha?” watadu “Ho mo nigumba gupai re ni, mi nida kuti gu digisopai nga . . . Ya mo gure nga gupai mo naida ka gumbaha?” Ngbatunga agu afugo nyemuse re ima rengba kafu gu kido fu gu boro re nga mo nadegaturo wenengai funi na mo naˈasada ka rugatiro na gupai re.​—1 Kor. 13:4, 7.

17. Tipagine si aida ani du ti ni na zerangbaduse na ‘ki rõasi tirani tipa gumba pai’?

¹⁷ Sidu tie, mo du na rubangirise ‘ki rõasi tiro tipa gumba pai.’ Ka mo denga fugo ngbani kafu rugute funi watadu ka rugusa gani berãpai ya. Na mo du na zerangbaduse! Tigu regbo Eriya akusuko agu apai naadu kpotokoyo fu Yekova, ko afura na bakere gberãrago. Kusa, tingbafuo Yekova nyakasi ga Eriya idapase, ko akusuko agu apai naadu ngbaduko yo berewe ni manga ko sunge na kina bangisa agu afugo naadu mbata. (1 Aba. 19:9, 10, 13, 14) Ginipai ani awirikaha? Ti kura aregbo, agu aboro du rogo bakere gberãrago naida ka kusuko agu apai du kpotoyo yo bara dunguhe. Wa kina Yekova, si naida ani degeturani na zerangbaduse. Kuba gupai nga ka asada ka yugo wai fu aboro si aida i mangipai kuti gayo akpakarapai, si naida ani yugu nunga fuyo.​—1 Pet. 3:8.

18. Waigu rengbe gaani akparakpee kafu wasa fu agu aboro du rogo aimisiri?

¹⁸ Mo mangi kakaka kparakpee na gu boro du rogo imisiri. Si ima rengba kadu ni mbumbuhe fu agu aboro du rogo bakere gberãrago i mangi kparakpee. Kura boro ima rengba kaa bi ti ni nga ni arẽnga ka fura na Yekova rogo kpee yo te. Ka ani aida kafu wasa fu ngbatunga gu boro re, ani ima rengba ka manga kparakpee, ni manga ani sunge na rimoni rogo gaani kpee yo. Ani ima rengba ka peka pa wai fu Yekova awirina rogo dungurati nakpinyemu gu boro du rogo bakere gberãrago  re. Ani ima rengba ka sana Yekova ko undo gu gako moyambu re ni gbia wasa. Ngbatunga kparakpee wa gure ima rengba kafu bakere wasa.​—Yak. 5:16.

19. Ginipai rengbe ka undo rani ani mbakaditirani kafu wasa fu boro?

¹⁹ Mo sia agu afugo nafu husa gbiati wasa. Mo berẽ mbata fu mo fura. Agu afugo boro aberãnga aberã mbata ka pehe ya ima rengba ka imisa boro. Wene afugo ima rengba kafu husa. (Snz. 12:18) Sidu, mo sana Yekova ko undo ro mo mangisunge na wene afugo, gbiati afugo wasa. Mo ini gupai nga kura afugo ho du na ome ti ni wa agu afugo Yekova du rogo Baibiri yo te.​—Eb. 4:12.

20. Ginipai gu kura awirina i amangipa wasiro na yo narengbe kaa berãha tipa tiyo, na ginipai si aida ani sa yo i inihe?

²⁰ Agu awirina i amangipa wasiro na yo nabi tiyo nga i ni bibiriko yo, sunge tiyo te, watadu i nabi tiyo nga aboro akpingo nyemuyo te, na zavura i nabi tiyo abi nga i arẽnga tipa aboro kpinyemu yo te. Ziree du nga agu abipai re dunduko! Sidu, mo mangisunge na Ziazia Kekeapai ka tingidayo na gupai nga Yekova nabiyo na nyanyakipa yo. (Mo bi gu Sanduki nga, “ Mo Mangisunge na Ziazia Kekeapai Kafu Wasa fu Aboro.”) Oni tingidipa wai maraika anyakasi gu nebi nangia Daniere ngba wene gene tigu regbo ko adu rogo bakere gberãrago. Yekova aaida gu wene kumba re ini gupai nga ko aabi ko na nyanyakipa ko. (Dan. 10:2, 11, 19) Wakina gure a, agu awirinarani du rogo bakere gberãrago na nyanyakipa yo bangiri Yekova!

21. Ginipai du kumbatayo napido agu aboro ingapai asanga gayo berã ya, ono ginipai si aida ani dunduko diberã ka mangaha ti gi regbo re?

²¹ Ho ani afu wasa ni fu kura aboro, ani natingida yo na pa ga Yekova nyemuse tipa yo. Na si aidanga bangirani go ti gupai a nga Yekova nga Mbori ruru sarangbanga te. Yekova ima inopai tipa agu aboro dunduko i namangipa wasiro na yo, ka si vura du vurũ nga kura aboro ainongo pai tipaha te. Yekova nabi apai dunduko, ko nika fu mbusa afu fu agu aboro ingapai asanga gayo berã ya. (Geda 14:18) Wa du rago re tie, ani mangi agu apai dunduko rengbe ani ka mangaha ka yugo nyemuse fu agu aboro i namangi fuyo gbegberẽ. Kuri gure, si ni pa ngbarago ka ino gupai nga Yekova nika fu nyenye husa afu fu agu aboro dunduko Satana gbiati gako zegino namangi fuyo gbegberẽ! Barambeda, agi aimisiri re ayengo berewe ku berãrani yo te.​—Yes. 65:17.