Rogo gu nyemu naadu mbata fu kpi Yesu, ko arugu apefuoko nga ka i gbatanga worimo dagbatiyo ya. Ko aya fuyo wẽ: “Ga aGendiria abakindo nazoga yo azoga; agu yo nakindo yo i naya ti yo Betedi Aboro. Ono oni adú nga wo te.”—Rk. 22:25, 26.

Ada du nangia gu Betedi Aboro Yesu aafura tipa yo re? Kekeapai ti vuro ahe, zau-marã, gbiati kura kekeapai nayugo gupai nga si anidu ni sino aboro Giriki yo na Roma yo kaa fu irisa fu agu akumba rimoyo anaawo awo gbe gbiati abazogo na gu rimo nga Euergetes, watadu Betedi Boro. I anaafu gi irisa re fu agu akumba re mbiko gupai nga i anaamanga gu nyanyakipa sunge nanaaundo aboro dunduko.

Abakindo adu kinaho i anaayamba yo nga Betedi Aboro. Wa agu abakindo Ezipeta nangia, Ptolemy III na Ptolemy VIII, gbiati gu ga aRomo abazogo nangia Yurio Kaisara na Auguseto, gbiati Gu Erode Pako Akii Gbe nangia bakindo Yuda. Tipa Erode tigako, si nawira gupai nga ko agbia gu rimo re ti gu regbo ko angbe nganu rogo kura arago ka ye na ni tipa si undo gako aboro be ngbongi na ki ye na aroko fu agu aboro zingoho aamanga yo.

Gu wene bawirikipai tipa Ziazia Kekeapai ni boro Germani rimoko angia Adolf Deissmann agumba gupai nga, i anaamanga sunge na gu rimo nga Betedi Boro rogo badungu arago. Ko aya: “Si anaadunga ni mbumbuhe ka bi gu rimo re ni kekehe ti vuro ahe te, boro aima rengba ka bi bangehe naima susa kama vuru umba regbo yo gbua.”

Sidu, ginipai du tie Yesu aaida ka pehe ho ko aya ni fu gako abawiriki wẽ: “Ono oni adú nga wo te”? Ya mo ko aagumba gupai agumba fuyo nga ka i dunga na gu toro tiyo nga ga manga gu sunge rengbe ka undo agu aboro du pati yo ya? Wagusa te. Si nawira gupai nga gupai naadu berã Yesu yo angia pa gupai nafõngbadu boro yo ni fu gamahe.

Ti rago Yesu, airakumuko anidu na nyemu ka gbia wene rimo tipa tiyo ni fuyo agamahe tipa agu agbere na ambaro nanaamanga rogo aba, ni meka yo agu aba aboro anaasungo rogoho gbiati ayekaru, na ni fuyo undo tipa gu kura apai duwa kina gere a. Ono tie, i anaamanga agi apai re tipa gupai nga aboro naatambua yo, tipa rimoyo naawo, na tipa aboro naaba waraga fuyo tipa i du rogo abangiriba. Kura buku sa ape gupai nga, “Wa vura duhe nga akpiapai kinaho nayugo gupai nga agu aboro re anaafu ndikidi gamahe afu, gupai nanaafõngbaduyo yo dedede i fu gamahe angia pa gupai nga i gbia undo tipa tiyo rogo agu apai yo nga ga birĩ zogarago.” Gu ngbatunga sino nga ga du na bakere nyemu gbia undo tipa tise re du Yesu arugu apefuoko i nehe.

Fuo bete agarã kusa, gu mokedi nangia Pauro anyakasipai tipa kina gu bangisa nyanyakipa rengo re nibipa du na ruru ndupai ka fu gamahe. Ko ake gupai fu agu akurako aidipase naadu Korinda yo nga: “Aboro dunduko i nimangi wa i akpi nyemu he kpotoyo yo, ni ngbaduse te, ni dingisaro a te. Bambiko Mbori nakpi nyemu kina gu boro nagama he esuesu.”—2 Kor. 9:7.