1, 2. Wa ani asona kindi rogo toro yo, ginipai ani awirika ka mangaha? Oni funga kpiapai.

MO BERẼNGA gupai nga boro fu gamahe fu tooni gude. Avunguru kini ya fu ru, “Mo ya tambuahe.” Gu tooni gude re fu tambuahe mbiko gupai nga i ni ya aya furu u fuhe. Ono wa gu gude re nikaa sona, u nika tona kaa ino ndu gupai avunguru aida u naafu tambuahe ti ni ho kura aboro amanga wenepai ni furu. Fuo ino u gipai re, u kini tona kaa fu tambuahe kina boro ngbaduruyo. Tipagine? Bambiko fu tambuahe ima da ni papara ga u berã ni tiru.

² Wakina gure a, ho ani atona wirika rengo ni, ani aini nyakapa manga gupai Yekova aidaha berani. Ono wa ani asona kindi rogo toro yo, ani nawirika dungu apai tipa wai Yekova aberã, naida ka ya, ka wirikapai tipa agu apai ko akpinyemuhe, agu ko asogaha, na wai ko abi apai. Ho ani ambu ga Yekova berãpai ni si du na maapai kurii gaani asiapai na gaani mangaapai, gure nga ani nasa gako aberã ni gaani.

3. Tipagine rengbehe kadu ti ni ni kpakarakpakaraha ka sa ga Yekova aberã ni gaani?

³ Wa vura duhe nga wirika ani wai ka berã wa Yekova nga pa ngbarago, si ima rengba a kadu ni kpakarakpakaraha. Ti kura aregbo, gaani zangarengba ima rengba ka saha ni mbumbuhe. Ni kpiapai, ani ima ino wai Yekova abi wasiwasi kodaba, nyemu aũzegino, sunge tungusapai, dia kure kuti kpotose yo, gbiati gu  kuraapai. Ono si ima rengba kadu ni kpakarakpakaraha furani ani rugutirani na ndu gupai ko abihe ti ni wa gure. Ginipai rengbe ani ka mangaha? Waigu rengbe ani kaa manga sonakumbatayo kindi tipa kaa sa ga Mbori aberã ni gaani? Na waigu gipai re nika undo rani ani mangi wene adiaberã awere na kumbatayo?

4. Rogo gu ga Pauro rugute yo nga, ani ‘mbakadi berãrani berewe’ nga gine?

⁴ Oni gedi ARomo 12:2. Gu mokedi nangia Pauro asakipai rogo gi veresi re tipa gupai si aida ani mangihe tipa ka wirika wai kaa bi apai wa gu Yekova abihe. Gu kekeapai naadu mbata fu gere aundo rani tipa ani rugutirani na gupai nga tipa ka ne ‘ríngbisa tirani na gi zegino re,’ si naida ani ka agu aberãpai gbiati abipai nga ga zegino. Ono Pauro ape gupai a nga si naida ani ‘mbakadi berãrani berewe.’ Gipai re nakoda wisigo Fugo Mbori tipa ka ino gako aberãpai, kini berẽkuriihe, na kini mangi asadatise tipa kadu na gako bipai tipa apai.

5. Oni sakingo pai tipa gu kparakparapai du dagba kungbo gedapai na wisigopai.

⁵ Anga wisigopai gbua nga ka geda pangbanga ni ipo watadu ka gbakahe tii akaragapai kuti asanahe te. Ho ani awisigopai ni, si naida ani berẽpa gupai gu kekepai re ayugoho furani tipa Yekova, tipa gako agene mangaapai, na tipa wai ko aberã. Si naida ani asadi ka ino ndu gupai Mbori aida ani mangi kuraapai ti ni na kini ne agu akuraha. Si naida aida a ani berẽ tipa agu aˈariapai si aida ani mangihe rogo gaani raka yo na rogo gaani aberã yo. Wa vura duhe nga ani arengbanga ka berãkurii agi apai re dunduko ti ai gu regbo ani amanga wisigopai te, ani nagbia undo agbia ni dia ani regbo isoke bebere gu regbo ani adiaha kuti wisigopai tipa ka berãkurii gupai ani nagedihe.—Tam. 119:97; 1 Tim. 4:15.

6. Ginipai namanga ho ani aberãkurii ga Yekova aberã ni?

⁶ Ho ani aberã ni kurii Fugo Mbori dedede, pai kinaho ni bawenehe namanga. Ani naye ka ida kuti gupai nga ga Yekova aberã ni rengberengbehe. Ani natona kaa rugatirani na wai ko abi apai na ani ki dakuti gako bipai. Sidu, ani ‘nambakada berãrani berewe,’ na ki tona kaa berã ngba vovo gene. Ani natona kaa sa ga Yekova aberãpai ni gaani yeeye.

7, 8. (a) Waigu Yekova abi aũzegino? (Oni bi agu asura duti tonatonaha.) (b) Ka ani abi aũzegino wa gu Yekova abihe, ginipai nika du na nyanyakipaha furani?

⁷ Anga gaani aberãpai na maapai sa kina kurii wai ani abi apai te, ono si a na maapai kurii agu apai ani amangaha. (Mk. 7:21-23; Yak. 2:17) Ani bingo bete akpiapai nga gu rengbe ka sarani ani rugutirani na gipai re wenengai. Ni kpiapai, Akitabu Wene Pangbanga nayugo wai ayugo ziazia furani Yekova abi aũzegino. Mbori nitiko asia aYosefa na Maria tipa i sonosi Wiriko wa si avura du vurũ nga i aadunga na bakere aũkumuko beyo te. (Pa Mot. 12:8; Rk. 2:24) Ho i avungu Yesu ni, Maria ‘apigi ko rogo ga anya sanduki riahe yo, bambiko ba aadunga sinziri yo tipa yo te.’ (Rk. 2:7) Ka Yekova aaida i vungu Wiriko rogo bawene ba, ka ko aima manga ai pai tipa i vungu ko rogo gu ba du ni bawenehe. Ono Yekova aaida i sonosi ko rogo gu ngbadimo kporo naamaa pa irisombori mbatayo fu apai dunduko, si nangia gupai paha anyaki fu Yekova.

⁸ Ani ima rengba ka rugatirani na ga Yekova bipai ti gu pangbanga du tipa batika yo Yesu rogo Ziazia Kekeapai yo. Gu kura avunguagude naida awiriyo du na bawene aũzegino beyo, ka si vura du vurũ nga si nika sa ga awiriyo pagume na Yekova ka si dunga wenengai ya. Ono si ziazia tie nga, Yekova nabi agu apai nga ga toro na nyanyakipaha  kisusi. Ya mo mo idi na ga Yekova bipai tipa gipai re? Gamo mangaapai nayugo ginipai?—Oni gedi AEbere 13:5.

9, 10. Waigu rengbe ani ka yugo gupai nga ani nabi kotosa aboro wakina gu Yekova abihe?

⁹ Gu kura kpiapai berewe nga, wai Yekova abi gu boro nakotosa kura aboro, nga gu ni nasa kura aboro i ingipai watadu i mbu iriso Yekova. Yesu aya: “Gu ni ka manga gu ni sa dagba gi rukutu yo re idi pa re, ni koto, si ka ngba tipa ni i vo kikii mbia sa ahe kuti gorõni ki ba ni ku baime yo.” (Mk. 9:42) Agu afugo re nga nyanyaki afugo! Wa duhe nga Yesu ayugu agu asino teketeke duti Bako, ani ima rengba kadu na gu kido nga rago angbanga ti Yekova na gu boro gani gbegberẽ mangaapai akotosa apefuo Yesu te.—Yo. 14:9.

¹⁰ Ya mo ani nabi kotosa aboro wakina gu aYekova na Yesu abihe? Ya mo ani sa gayo aberã ni gaani? Ginipai gaani mangaapai ayugoho? Ni kpiapai, ani ima rengba ka kpinyemu kura gene vo roko watadu kura gene mbakadatise. Ono ginipai rengbe ani ka mangaha ka si du nga gu ngbatunga vo roko re watadu gu gene mbakadatise re ima rengba ka ba gberãrago ti kura aboro rogo dungurati watadu ka sa kura aboro i du na wasiwasi aberã? Ya mo gaani nyemuse tipa awirinarani asa rani ani ne ngbatunga gu vo roko na mbakadatise re?—1 Tim. 2:9, 10.

11, 12. Waigu rengbe ani ka bandatirani ti gbegberẽ mangaapai ka ani wiriki kaa soga gupai Yekova asogaha na kini sonosi zatise?

¹¹ Biata kpiapai nga: Yekova ima sogo irairapai. (Yes. 61:8) Wa vura duhe nga ko ima ino gupai nga ti kura aregbo si ni mbumbuhe furani ka manga gupai du ni ruruhe mbiko gaani zangarengba, ko nangarasa rani nga ani sogo irairapai. (Oni gedi Atambuahe 97:10.) Pa berã ani kurii ndu gupai Yekova asoga gbegberẽpai ti ni nika undo rani tipa ani sa gako abipai ni gaani, na si nika fu ome furani tipa ani sogo ai gupai ko asogaha.

¹² Ka ani sonosi ga Yekova bipai tipa irairapai, si nika undo rani ani ini gu kura mangaapai du ni gbegberẽhe ka si vura du vurũ nga i afuranga tipaha rogo Fugo Mbori yo te. Ni kpiapai, kura ngbatunga gbegberẽ do gbere gu duho naima kio awere rogo zegino i ayambaha nga Lap dancing, nga gu aboro adoho kpotoyo kini gbiatihe agbia. Gu kura aboro nabihe nga gu gbere re sa na manga kodaba te. * Ya mo gu ngbatunga mangaapai re nayugo ga Mbori berãpai nga guko nasoga ngbatunga gbegberẽ apai dunduko? Sidu, si naida ani du tuturũ ti gbegberẽ mangaapai ni sonosa ani zatise na ni soga ani gupai Yekova asogaha.—Rom. 12:9.

13. Tipagine si aida ani berẽ ti ni kuriipa wai Yekova abi apai awere tipa wa ka ani mangi wene adiaberã kumbatayo?

¹³ Ho ani amanga wisigopai ni, si naida ani berẽpa ga Yekova bipai tipa apai, bambiko mangaha wo rengbe ka undo rani ani mangi wene adiaberã kumbatayo. Rogo gi gene re, ka ani gbiatirani na gupai naida ani mangi diaberã tipaha ni ipiipihe, ani nika du ni mbakadimbakadi rani na ani ki ima ino gupai si aida ani mangihe. (Snz. 22:3) Ani bingo bete akpiapai rogo Ziazia Kekeapai yo.

14. Ginipai ani awirikaha ti wai Yosefa aká fu dia Potifaro?

¹⁴ Ho dia Potifaro aasadi ka sosoda Yosefa ni ko kodiba na ri, ko aima ká ni ipo. Si tie ziazia nga Yosefa aima berãkuriipa wai Yekova abi padu ni ruruse fu badiarogatise. (Oni gedi Bambata Pai 39:8, 9.) Kurigure, gu  karagapai ko afuhe fu dia Potifaro nga: “Waĩ tie ka mi mangi gi bakere gbigbitapai re, ki ingi pai kuti Mbori?,” si nayugo gupai nga ko aima sa ga Mbori aberãpai ni gako. Na ginipai tigaha du tipa rani? Ginipai rengbe mo ka mangaha ka si du nga gamo badiasunge tona kaa ba nyemuni tiro? Ginipai rengbe mo ka mangaha ka si du nga boro kedi agu apai foro ku rogo gamo terefuni nafura tipa kodaba watadu sura kundiri boro? * Si rengbe kadu furani taata tipa ani ruru nyanyaki kina gu ka si du nga ani aima ino ga Yekova bipai tipa ngbatunga agu apai re ani ki ima manga diaberã tipa gupai rengbe ani ka mangaha.

15. Waigu rengbe ani ka nye ni rururani fu Yekova wakina agu aEbere naadu biata?

¹⁵ Ani bingo gu kpiapai a nga ga agu aEbere naadu biata nangia Sadaraka, Mesaka, na Abedenego. Ho Bakindo Nebukadenesara azinahe ni fuyo nga i irisi gu kpiahe ko amangihe, i aima ká nyanyaki. Gu karagapai i afuhe fu bakindo aima yugo gupai nga i aima berãkurii gupai si aaida i mangihe tipa ka nye ni ruruyo fu Yekova. (Gate 20:4, 5; Dan. 3:4-6, 12, 16-18) Ginipai rengbe mo ka mangaha ka si du nga gamo bairasunge sanaro tipa mo fu gamahe tipa pumbo naye kumbatayo nga gu du na ngbanya dagbaha na ziree irisombori? Kuba gupai nga ka pido ngbatunga gipai re apido mbata si mangi, si adu ni wenepai ka mo berẽ kina awere tipa wai Yekova abi ngbatunga apai wa gure. Sidu, ka ngbatunga apai wa gure mangi, si nika du taata foro mo mangi gupai watadu mo gumba gupai du ni ruruhe wakina wai agu aEbere naadu biata re amangihe.

16. Waigu rengbe pa rugatise na ga Yekova berãpai ka undo rani ani mbakaditirani tipa gu regbo kaza narengbe ka so rani si kini idi i husi rani ni ipiipihe?

¹⁶ Pa berã ani kurii ga Yekova aberã ima rengba ka undo rani a ani nye ni rururani fuko ti gu regbo kaza aso rani si kini idi i husi rani ni ipiipihe. Wa vura duhe nga ani ima manga nyanyaki diaberã ka zanga dia kure watadu gu kikindigi apapara kure du biama kuti kpotorani yo, gu kura husa akaza kinaho naida na kina kure nga gu naida na gupai nga Kristano mangi gani diaberã ni tini rii mburu Ziazia Kekeapai nga gu nayugo ga Yekova berãpai. (Amo. 15:28, 29) Nirengo, anga gu wene regbo si aida ani berẽkurii gipai re nga ho du ani ni bambungua yo, nga gu regbo du ani rogo igirã na tii sosodahe tipa ka manga ipiipi diaberã te. Awere nga wene regbo tipa  ani mangi wetekapai, na ki hiisi gu waraga nga ga amunganga nga gu nayugo gupai ziazia ani aidaha, na ki fura na munganga tipaha. *

17-19. Tipagine duhe ti ni ni nyanyakipa pai ani ini gu berãpai du Yekova na ni tipa apai kina awere? Oni funga kpiapai nga ga gupai si aida ani mbakaditirani tipaha kumbatayo.

¹⁷ Ni yangaraha, oni makianga pa gu ipiipi karagapai Yesu afuhe fu Petero ho Petero afu iraira rugute ni fuko ki ya: “Si turũ atura ti ro, Gbia.” Si nawira gupai nga Yesu aima berã gbe kurii gupai Mbori aakpinyemuhe tipa ko na kurii agu averesi naafura tipa gako raka gbiati pakpio ko auru kpotosende. Gu inohe re aima nyakasa gu diaberã ko amangihe ka nye ni ruruko na ki fu ungako ni motumo tipa rani dunduko.—Oni gedi Matayo 16:21-23.

¹⁸ Areme, Mbori nakpinyemu gupai nga ani sonosi pagume na ko na kini mangi gako sunge ni bakerehe wa rengbe omerani na ni. (Mt. 6:33; 28:19, 20; Yak. 4:8) A wa si adu tipa Yesu, agu aboro duadu na wene bipai tipa rani ima rengba ka zarani ka ani mangingo gupai re ya. Ni kpiapai, na ka si du nga gamo baira sunge fu wene sunge foro nga gu mo nikaa gbia bakere marã ti ni kisusi gu nidu mbata, ono regbo gu sunge re kini gberesi pa gu gamo apai agberesa nga ga toro? Watadu na ka si du nga mo sukuru yo, mo kini gbia momu ka guari kporo tipa ka ndu ku rogo kura ba ka wirikapai berewe ni bakerehe. Ka gupai re mangi, ya mo mo ini gupai ka mo mangihe? Ka mo sungungo asungo ngbatungapai wa gure mangi amanga mbata mo kini ru ka manga kparakpee, ka manga wetekapai, ka sana gamo aborokporo gbiati abaakumba tipa gupai si aida mo mangihe ya. Kuba gure, mo mangi agi apai re awere tipa ka ino wai Yekova abi agu apai re na mo ki sa gako aberã ni gamo. Sidu, ka amomu wa gure kuru foro ti kura regbo, mo abingo ho ni aˈasada nzunzu te. Mo nika ino gupai aino ziazia si aida mo mangihe, bambiko mo ima diaberã ka maa berãro kuti mangasunge fu Yekova.

¹⁹ Mo ima rengba ka berãpa gu kura apai nga gu rengbe ka kura ni ipo ka mo ainongo aino ya. Rengo ngaha nga, ani arengbanga ka mbakadatirani tipa ai gupai rengbe ka kura te. Ono ka ani aaberã kurii ga Yekova berãpai ti regbo wisigopai nisase, si nawira gupai gbe nga ani tingidi gupai atingida ani nawirikihe na ki mangisunge na ni ka manga wene adiaberã ho ai pai akura ni. Sidu tie, ho ani amanga wisigopai ni nisase, si naida ani ngere tipa gu berãpai du Yekova na ni tipa apai, ki sa gako berãpai ni gaani, na ki berẽpa wai gipai re narengbe ka undo rani ani mangi wene adiaberã awere na kumbatayo.

20, 21. (a) Tipagine ani nika gbia ngbarago agbia ti ni rogo vovo zegino ti gu ranirii du na ngbandaha ti ni? (b) Waigu rengbe ani ka gbia bete gu ngbarago re awere?

²⁰ Ani nangera kumbatayo na omerani dũ tipa vovo zegino. Badungu rani nangera kumbatayo tipa nyenye unga rogo paradizo kpotosende. Tii gu zogarago nga ga Kindo, ngbatunga aboro dunduko nika zereda be agu aigirã gbiati arungo nga ga gi zegino re. Na rogo vovo zegino, ani nika duadu a na ranirii ka manga gaani asiapai ringbisihe kuti agu apai ngba tirani na agu ani akpinyemuhe.

²¹ Ono gu ranirii re nika duadu na ngbandaha ti ni. Ho bayee aboro nikaa manga siapai ni bangbanda gupai du ni ruruhe na gu du ni irairaha, i nikaa manga adiaberã ringbisihe kuti ga Yekova andiko gbiati gako berãpai. Gipai re nika duadu ni wenehe, na si nika ye na bakere ngbarago gbiati zereda kpaima. (Tam. 37:11) Wa du rago re tie, ani ima rengba kadu na bete gu ngbarago re wa ani asa ga Yekova aberã ni gaani.