NAIRIWO wai rengbehe kadu nipa wasa na ni gupai nafu kido ka boro yugu gu sino nga ga mangapase! Ho ani aino gupai ni nga boro naberã parani aberã, ani nadu na tambuahe. Wa duhe nga ani ni basasa dunduko na nyemu gupai nga aboro naamanga parani amanga, waigu rengbe ani ka sonosa gi bawene sino nga mangapase re?

Mangapase nakoda du na ndikidi nyemu gupai nga kura aboro du wenengai, na boro nayugo gipai re rogo agu afugo yo nafu undo na rogo mangaapai yo. Wa duhe nga boro nayugo gi sino nga mangapase re rogo mangapai yo, si aidanga gupai nga boro yugu wene mangaapai mbiko gupai gbua nga aboro bi ni na ni te. Dudunguro nyemuse du gbiati nunga nafõngbadu boro yo ni yuguhe. Na kurigure, ngbatunga gi mangapase re nga papara zuzu ga Mbori ziazia toro nga gu si aida aKristano sonosihe. (Gara. 5:22, 23) Wa duhe nga si naida aida ani sonosi mangapase, ani wisigingo wai aYekova na Wiriko nayugu gi sino re na wai rengbe ani ka pekafuo gayo kpiapai.

Yekova namangapa aboro dunduko na kini berẽpayo kodihe na “aboro gbangbati na aboro ingapai.” (Rk. 6:35) Ni kpiapai, Yekova “nafu uru si kuru tipa agu yo nga gbegberẽ yo na agu yo nga wene yo a, ki kedi mai tipa ruru aboro na iraira yo a.” (Mt. 5:45) Sidu, zavura agu aboro aidanga kuti Yekova ni Bakusiyo ya, i nagbia undo agbia a ti agu ahe ko afuhe tipa si undo raka aboro na i ima rengba ka gbia ngbarago.

Ani nabi bawene kpiapai nga ga mangapase rogo gupai yo Yekova amangihe fu aAdamu na Eva. Ngbutuko fuo aAdamu na Eva mangi ingaapai, i ‘arũ kpe vurumo ni agbaya tipa yo.’ Ono tie, Yekova aima ino gupai nga wa i nikaa rakanga berewe ati Edene yo ya, si nika ida wene roko tipa yo, mbiko i aima tiwa kpotosende na “akiwe . . . na asakokoso.” Sidu Yekova amangipai kuti gayo zingo “ki mangi abaukadi . . . rogo kpoto anya” yo fuyo.—Bam. P. 3:7, 17, 18, 21.

Wa vura duhe nga Yekova namangapa agu aboro du ni “gbegberẽ yo na agu yo nga wene yo,” ko gbe na nyemu ka yugo mangapase fu gako ruru amoyambu. Ni kpiapai, ti rago gu nebi nangia Zekaraya, rago agbere ti maraika ho ko abi sunge bungia yekaru ni si naru Yerusarema yo. Yekova adegetuko fu gu maraika re na ki karagapai fuko “ni wene apai na wasawasa apai.” (Zek. 1:12, 13) Yekova amangipai kinawo a na gu nebi nangia Eriya. Ti kura regbo sa, gu nebi re adu na bakere gberãrago ko ki sana Yekova tipa ko imiko. Yekova aima rugatiko na wai Eriya adu ko kini kedi maraika tipa ko ngarasi ko. Kurigure, Mbori akido gu nebi re na gupai nga ko na kina ko. Tifuo Eriya gi agu afugo wasa na ki gbia gu undo ko aaidaha, ko aima gbia ome ka ndu kumbatayo na gako sunge. (1 Aba. 19:1-18) Dagba ga Mbori amoyambu yo, da ninaayugo gu ga Yekova sino nga ga mangapase kisusi?

Ti regbo ga Yesu tungusapai auru kpotosende, aboro aima ino Yesu ni gu boro nanaamanga pa aboro na kini berẽ pa yo. Ko anaamanganga pai na aboro gbagaragbagara watadu  ngbaome te. Ko agumbapai ni nunga ki ya: “Oni yé fuo re, agu roni nambu dunduko, ki du na rõrõi tindiro, mi ki fu ongoda fu roni. . . . Bambiko kii nga gi gonga te, na gi tindiro ni aakpura ha.” (Mt. 11:28-30) Mbiko gi sino naadu ti Yesu nga ga mangapase re, aboro anaapeka ko rogo agu aba dunduko ko anaandu ku rogoho. “Nungayo” azi Yesu, ko ki fu riahe fuyo, ki husi gayo akaza, na ki yugu “dungu apai fu yo” tipa Bako.—Mk. 6:34; Mt. 14:14; 15:32-38.

Yesu anidu na giarogopaiyo gbiati rugatinapai ho ko anaamangapai ni na aboro, na gipai re nayugopa bakio gako mangapase. Nirengo, zavura ti gu regbo Yesu anaaida ka ongoda, ko anaadia agu aboro dunduko nanaapeka ko “ku gume.” (Rk. 9:10, 11) Ni kpiapai, ko aazinganga kuti gu dee nazadi gako ngba roko kidu na gu kido nga ri nika hu be gu kure naaga tiri te, wa si avura du vurũ nga ri adu ni bibiriko ri. (Pa Mot. 15:25-28) Ni du Yesu na nunga tipa gi dee naima mbu tipa agarã 12 re, ko agumba gupai furi nga: “Vungu, ga idapase batasi ro; mo ndu zezeredi ki bati be ga kere kaza.” (Mk. 5:25-34) Nairiwo gu wene mangapa boro re!

Rogo gu kpiapai ani nabihe kuari re, ani nabi gupai nga ndikidi mangapase ni yuguyuguhe rogo mangaapai yo. Yesu ayugu gupai nga si naida boro mangipai amanga rogo gu sanza ko agumbaha tipa boro Somorona. Wa si avura du nga aboro Somorona na aYudo anaangbanga dagbatiyo te, gu kumba nangia boro Somorona du rogo gu sanza re adu na nunga koyo du gu Yudo ni abatuka atuka gako ahe, ki ta ko, na ki mbuko ko naima mbeda ka kpi. Mangapase afõngbadu gu boro Somorona re yo ko mangipai. Ko avo ga gu kumba re aˈaro na ki ndu na ko ku rogo bambu rame ti marã. Gu boro Somorona re atumo marã fu ira bambu tipa ko ngerefuo agu aˈaro nga ga gu kumba re na ki kido pa tumo gu kura marã kadu berewe kuriihe.—Rk. 10:29-37.

Wa vura duhe nga mangapase dedede ni yuguyuguhe rogo mangaapai yo, si ima rengba kadu ni yuguyuguhe a rogo wene afugo yo na rogo afugo ngarasaro yo. Sidu, wa duhe nga “rungo boro ku kpotoni yo nazoga ni ku sande,” Ziazia Kekeapai nagumba gu kurapai nga “wene fugo nafu ngbarago fu ni.” (Snz. 12:25) Ka ani aamanga pa aboro na kidu wenengai na yo, ani nikaa gumba afugo ngarasaro fuyo na gipai re nika undo yo i du na ngbarago. * Gaani afugo wasa nika yugo gupai nga ani naberãpa yo aberã. Ka ani ngarasi yo, si nika du fuyo taata i hi gu fudifudiapai i agbiatiyo na ni rogo raka yo.—Snz. 16:24.

Wa duhe nga i akusi aboro rogo “kpia Mbori” yo, aboro dunduko naima rengba ka sonosa gu sino nga ga mangapase. (Bam. P. 1:27) Ni kpiapai, Yurio, nangia barukurii aborovura nga ga aRomo yo, nga gu ko Pauro aguari rogo gako bambukiso ka ndu ku Roma yo, ‘amangi fu Pauro wenengaĩ ki idi he fu ko ko ndu koyo du abadiangbako ni ki nyakasi tiko’ rogo gu gbata nangia Sidona. (Amo. 27:3) Tifuo bete regbo kusa, aboro Merita amangi pa aPauro “bakere gbe” gbiati gu kura aboro bakurungba agburuwa na yo. Aboro gu kisanga re agindo we tipa agu aboro re faadihe be zere. (Amo. 28:1, 2) Gupai agu aboro re amangihe re adu ni wenehe, ono tipa ka yugo ndikidi mangapase, si aidanga ani naamanga weneapai fu kura aboro kina ti kura aregbo gbua te.

Tipa kafu ngbarago fu Mbori bakere gbe, si naida ani sonosi mangapase si ki da ni sino rani rogo raka yo. Mbiko gi ndupai re, Yekova nagumba gupai furani nga ani “úkadi” tirani na weneringise watadu mangapase. (Koro. 3:12) Si nirengo nga, dedede, si furani taata ka sa gi sino Mbori re ni sino rani te. Tipagine? Ani ima rengba ka zanga mangapa aboro mbikopa du ani na gunde, zanga kido kuti aboro, arungosiro, watadu ka gu sino du kindi rogo rani yo nga ga gbangbati. Wa vura duhe wo, ani rengbe ka diabe agu akpakarapai re ni kido ani kuti ga Mbori ziazia  toro na ni wirika ani gu gene Yekova amanga pa aboro ngbaha.—1 Kor. 2:12.

Ya mo ani rengbe ka bi agu abangiriba si aida ani mangi aˈariapai rogoho tipa ka yugo gu sino nga ga mangapase? Si naida ani sana tirani nga: ‘Ya mo mi ni gu boro ninaadega tuni fu aboro ni nunga? Ya mo mi naamaaberã re tipa agu azingo nga ga kura aboro? Gini yangara regbo mi amangipa boro nga gu ni adunga ni boro sa dagba gimi aborokporo watadu mbembedi bakureami ya?’ Sidu tie, ani ima rengba ka maa asasa wa gu nga ka ino pai gbe tipa agu aboro du pati rani, gu susi asusa gbe nga agu aboro du rogo gu dungurati nga ga aKristano. Manga ani he wo ima rengba ka sarani ani rugatirani na agu apai du tipa yo na gayo azingo. Fuo gure, si naida ani asadi ka yugo wene sino fuyo kina wai ka ani naakpinyemu gupai nga boro yuguhe furani ka si ni du nga anidu du rogo gupai du ni rogoho re. (Mt. 7:12) Ni yangaraha, ka ani sana Yekova tipa undo, ko nika fu maku kurii gu asadatise ani amangaha ka sonosa gu sino nga ga mangapase.—Rk. 11:13.

Ho gu mokedi nangia Pauro aafura ni tipa agu apai naayugo ko ni ga Mbori bamangisunge, ko akodi gu sino nga ga “weneringise” watadu mangapase ku dagbaha yo. (2 Kor. 6:3-6) Aboro aidi na Pauro mbiko gu nyemuse ko adu na ni koyo du yo ni, nga gu ko ayuguhe rogo wene mangaapai yo na rogo afugo yo. (Amo. 28:30, 31) Wakina gure a, ani ima rengba ka sa aboro i idi na rengo mbiko gaani wene sino mangaapai. Ho ani ayugo mangapase ni fu aboro dunduko, kodihe na aguyo nasoga rani, ani ima rengba ka undo yo tipa ka i dunga na bakere zinga kuti rani ya. (Rom. 12:20) Fuo bete regbo kusa, i ima rengba ka ida na gu pangbanga nga ga Ziazia Kekeapai.

Rogo gu Paradizo kpotosende naye kumbatayo, badungu agu aboro i nika zingisayo nika duadu na ngbarago ka bi wai ani ka yugo ndikidi mangapase fuyo, isoke gure nika ngia bambata regbo fuyo. I nika du na tambuahe tipa gipai re na si nika fõngbaduyo yo tipa i yugu mangapase fu kura aboro. Ai gu boro nikaa raka ti gu regbo re nga gu ni nikaa idanga ka yugo mangapase watadu ka undo kura aboro ya adunga na rengba ka raka rogo Paradizo te. Ono tie, agu aboro Yekova nika idaha fuyo i raki nyeanye kindi nikaa mangapai na akurayo rogo nyemuse yo na ngba wene gene. (Tam. 37:9-11) Nairiwo wai gu zegino re nika du ni wenehe na ni zezeredihe! Ono tie, mbata fu gu bawene regbo re da, waigu rengbe ani ka gbia undo awere ti yugo ani gu sino nga ga mangapase?

Ziazia Kekeapai naya: “Gu boro naina pai ni namanga wenepai tipa kina mbisimoni.” (Snz. 11:17) Gu boro nayugo mangapase, ni ima ngba ti aboro na ni ni gu boro aboro amanga pani a. Yesu aya: “Na gu moduka oni ka nduka he na ni, i anduka he na kina ha fu roni berewe.” (Rk. 6:38) Sidu, si taata fu gu boro nayugo mangapase ni zi wene abakure na ki banda pa gani pabakure na yo.

Gu mokedi nangia Pauro angarasi agu aboro naadu rogo gu dungurati naadu Efesa yo ki ya: “Ringironi ngbá angba fu akuaroni, yee kpotoroni yo, oni nivú akuaroni avu.” (Ef. 4:32) Dungurati nagbia bakere undo ho du agu aboro ni rogoho nayugo mangapase na kini gbata gene ka undo tiyo dagba tiyo. Agi aboro re aberãnga pa gumba gbegberẽ afugo, kere bisirahe watadu ba gbegberẽ awia te. Kuba gupai nga i mere kaa gumba kere gumba rimo, i namanga nyanyaki asadatise ka mangasunge na mirãyo tipa ka undo kura aboro. (Snz. 12:18) Ni sangbana gipai re, dungurati nadu ni nyanyakihe na kini irisi Yekova na ngbarago.

Nirengo, mangapase nga gu sino i ayugoho rogo fugo yo na rogo mangaapai yo. Ho ani ayugo mangapase ni, ani nawirika gaani Mbori nga Yekova nga guko du na dawedawe nyemuse tiko na kidu ni boro gamahe. (Ef. 5:1) Ni sangbana gipai re, ani nanyakasa gaani adungurati na ki ye na kura aboro ku rogo ndikidi irisombori yo. Aboro iningo rani aino ti aregbo dũ ni agu aboro nayugo gu sino nga ga mangapase!