1-2. (a) Ginipai Yekova ninaabihe ho amirioni aboro naadunguratiyo ni tipa Ga Gbia Riahe? (Oni bi gu sura duti kpotoho.) (b) Ginipai ani nika sakapai tipaha rogo gi kekeapai re?

MO BERẼNGA pa gupai Yekova ninaabihe ho amirioni aboro rogo zegino dunduko naadunguratiyo ni tipa Ga Gbia Riahe. Anga ko naabi kina gu badungu aboro sa ninaadunguratiyo te, ono ko naabi agu aboro ni basasa dunduko a ninaaye. Ni kpiapai, ko naabi agu aboro dunduko ninaaye tipaha na agarã dunduko. Agu aboro ninaaye ima rengba kadu nga agu aboro nagbiatiyo na kere arungosiro. Agu akurayo kinaho ninaayengo dedede tipa kura adunguratise ya, ono i nabi Tingida Pakpio Yesu ni gu nyanyakipa pai si aidanga i kpa ha ya. Yekova ninaabi agu aboro abi a ni naaye tipa Tingida Pakpio Yesu ni bambata regbo, isoke mbiko gupai nga i naida ka inopai tipaha.

² Nirengo, Yekova na ngbarago ka bi gupai nga badungu aboro ninaaye kadu pati Tingida Pakpio Yesu. (Rk. 22:19) Ono tie, anga gu bambatapai nyakipaha fu Yekova nga gu bange aboro ninaaye tipa Tingida Pakpio Yesu te. Gupai nyakipaha fu Yekova gbe nga ndu gupai i naaye ti ni. Rogo gi kekeapai re, ani nika sakapai tipa gu nyanyakipa sanahe nga: Tipagine ani naandunga sa tipa kina Tingida Pakpio Yesu nga gu ninaamanga rogo garã yo bara sa ya, ono tipa agu adunguratise a ninaamanga na aposo dunduko nga gu Yekova ambakadaha tipa agu aboro nakpinyemuko?

3-4. (a) Tipagine ani naandu ti ni tipa adunguratise? (b) Ginipai gaani du pati adunguratise ayugoho tipa rani? (d) Ringbisihe kuti gupai 1 AKorindo 11:23-26 apehe, tipagine si aidanga ani kpa Tingida Pakpio Yesu ti ni ya?

³ Gu nyanyakipa ndupai kisusi ani naandu ti ni tipa adunguratise nga si nga papara gaani irisombori. Ani ninaandu tipa adunguratise a mbiko gupai nga Yekova nayugopai furani ho du  ani ni pati ni. Aboro rukö aidanga kuti gupai nga si naida aida i yugupai fuyo te. (3 Yo. 9) Ono tipa rani tigaani, ani na nyemu gupai nga Yekova gbiati gu riigbu ko amangasunge na ni yugupai furani.—Yes. 30:20; Yo. 6:45.

⁴ Gaani du pati adunguratise nayugo gupai nga ani nga aboro umbasitise—na ani na nyemu gupai nga i yugupai furani. Rogo gu nyemu ningia ga Tingida Pakpio Yesu, ani ninaandunga tipaha mbiko gupai gbua nga si nga gu tindiro i nafuhe furani te ono ani ninaandu a mbiko gupai nga ani nairisa gu rugute ni umbasitise nga: “Oni ta manga gere nitingidi pa re.” (Oni gedi 1 AKorindo 11:23-26.) Gu dunguratise re ninaanyakasa gaani maabangirise tipa kumbatayo na si naatingida rani na pa gu bakere nyemuse du Yekova na ni koyo du ani ni. Ono tie, Yekova ima ino gupai nga si naida ani naagbia ngarasaro gbiati nyakasaro dedede angianga kina bara sa gbua rogo garã yo ya. Sidu, ko naambakada adunguratise furani na aposo dunduko na ko nangarasa rani nga ani naadu pati ni. Umbasitise ninaafõ ngbaduraniyo ani gisangbako kini ndu tipaha. Ani ninaadia dungu asa na aposo dunduko kaa mbakada agu adunguratise re na kini ndu tipaha.

5. Tipagine aboro umbasitise adia ga Yekova yambahe ti ni kugume?

⁵ Rogo agarã dunduko ni basasa, Yekova ninaayamba aboro tipa ka yugupai fuyo, na badungu aboro umbasitise ninaadia gi gako yambahe re kugume. (Yes. 50:4) I naagbia ngbarago ti du yo pati Tingida Pakpio Yesu, na fuo gure, i ki tona ye tipa kura adunguratise. (Zek. 8:20-23) Agurani dunduko du rogo rengo yo kodihe na gi vovo aboro re na bakere ngbarago tipa gupai nga Yekova nga, “[gaani] mounda nga [batasi rani]” nayugopai furani na kini ngbembatayo furani. (Tam. 40:17) Gini kurapai duho nzunzu rengbe ka fu bakere ngbarago fu boro watadu rengbe kadu na nyanyakipaha gbe funi kisusi ida gupai nga Yekova yugupai funi gbiati Yesu nga gu Wiriko ko naima kpinyemuko?—Mt. 17:5; 18:20; 28:20.

6. Wai du umbasitise aundo kura kumba sa ko ndu tipa Tingida Pakpio Yesu?

⁶ Rogo agarã dunduko ni basasa, ani ninaamanga bakere asadatise tipa ka yamba badungu aboro wa rengbe omerani na ni tipa i du pati Tingida Pakpio Yesu. Badungu aboro umbasitise aima gbia undo mbiko dia yo gaani yambahe kugume. Oni bingo gi kpiapai re. Bete agarã kusayo, wirina afu waraga yambahe tipa Tingida Pakpio Yesu fu kura kumba sa, ono gu kumba re aya fu gu wirina re wẽ ko adunga na rengba ka ye tipaha te. Ono tie, ti regbo Tingida Pakpio Yesu, ngba gu wirina re aima zera ka bi gu kumba re ko nirimi ku Bambu Kindo yo. Iriwoapai aima ti ni kerehe ti gu kumba re ka bi wai awirina adiko kugume wenengai, na si ki sa gupai nga ko tona nduge tipa gu gaani adunguratise ninaamanga na aposo dunduko. Rogo gu garã nangbefuo gure, ko akpa adunguratise gbua bara biata. Ginipai naundo ko ko diberã kaa ndu tipa adunguratise dunduko? Bakere umbasitise naasa ko ko saberã ko. Gu wirina nayambu ko re aya kusa wẽ, “Ko ima du na bakere umbasitise tiko.” Zaka kapa, Yekova du naagbe gi kumba re ku rogo Gako irisombori, na ko awere ni gu boro naima zio bapatiza.—2 Sam. 22:28; Yo. 6:44.

7. Waigu rengbe agu apai ani awirikaha ti regbo adunguratise na agu apai ani agedaha rogo Ziazia Kekeapai yo ka undo rani ani du na umbasitise?

⁷ Agu apai ani awirikaha ti regbo adunguratise na agu apai ani agedaha rogo Ziazia Kekeapai yo naundo rani ani du na umbasitise. Rogo agu aposo nidu mbata fu Tingida Pakpio Yesu, gaani adunguratise ninaasakapai gbe dedede tipa gu kpiapai nga ga Yesu gbiati gu umbasitise ko ayuguhe ni fuko ungako ni motumo. Na rogo agu aˈuru nidu mbata fu Tingida Pakpio Yesu, i naangarasa rani nga ani gedi agu apangbanga du tipa agu apai namangi ti gu regbo Yesu akpi na gu regbo ko azingi be kpio. Agu apai ani naawirikaha  ti regbo agu adunguratise re na agu apai ani naagedaha rogo agu apangbanga nga ga Ziazia Kekeapai re ninaakiiso gaani tambuahe tipa gu motumo Yesu afuhe tipa rani. Na si naafõngbaduraniyo ani wiriki gako umbasitise na kini mangi gupai Yekova akpinyemuhe, zavura ho si naima mbu ni ani mangihe wo.—Rk. 22:41, 42.

8. Wai du Yesu ayugu wingbaduse?

⁸ Ani naˈasada a ka wirika Yesu ni yugo ani wingbaduse. Oni berãnga pa gu wingbaduse ko ayuguhe rogo agu aˈuru naadu mbata fu kpiko. Ko aima ino gupai wenengai nga avurako aandu ka wasi ko, ka ta ko, na ka imoko barambeda. (Mt. 20:17-19) Ono wa si avura duwo, ko aima futiko ka kpi. Ho regbo ada ni, ko aya fu gu ruru apefuoko naadu na ko Getesemane yo wẽ: “Oni gúari, ani ndú. Oni ngére, gu ni nikakusa re ni mbedi.” (Mt. 26:36, 46) Na ho ndurumo aboro-zuũ aye ni ka zioko, ko andu kumbatayo, ki yugu tiko na ki pe gupai fu abanzengere nga i mbu gako amokedi i ndu. (Yo. 18:3-8) Nairiwo gu bakere wingbaduse Yesu ayuguhe re! Areme, mbedimbedi aKristano na kura akandoro namanga nyanyaki asadatise ka wirika Yesu ni yugoyo wingbaduse. Wai du i amanga gipai re?

9. (a) Tipagine rengbe ani ka i da wingbaduse ti ni tipa kaa ndu tipa adunguratise dedede? (b) Waigu rengbe gaani kpiapai kadu na maapai kurii agu awirinarani du bambukiso yo tipa gayo idapase?

⁹ Tipa kaa ndu tipa adunguratise dedede, si ima rengba kadu nga si naida ani yugu wingbaduse ho ani agbiatirani ni na akpakarapai. Kura awirinarani kinaho nandu tipa adunguratise i ki vura kadu vurũ rogo imisiri, gberãrago, watadu na akakaza. Kura aguyo kinaho nandu tipa adunguratise i ki vura kaa gbiatiyo vurũ na bakere sogote be gayo aborokporo watadu airangbii. Oni berẽnga tooni kurii wai du gaani kpiapai na maapai kurii agu awirinarani du bambukiso yo tipa gayo idapase. (Eb. 13:3) Ho i agia gupai ni nga ani nairiso Yekova kindi ani ki vura kaa gbiatirani vurũ na aˈasada, i nagbia nyakasaro tipa ka kakuti gayo idapase, wingbaduse, gbiati padu ni ruruse. Kina gu bangisapai re naadu tipa gu mokedi nangia Pauro. Ho ko adu ni bambukiso yo Roma yo, ko anaangi angi ho ko anaagia pa awirinako ni nga i nairiso Mbori ni ruruyo. (Frp. 1:3-5, 12-14) Ngbutuko mbata fu i kusi Pauro watadu nibasa fuo kusayo ko, ko ake gako waraga fu aEbere. Rogo gu waraga re, ko angarasi gu ruru aKristano re nga ‘nyemu awirina nye dagbayo’ na ka i mbunga dunguratiyo sa ya.—Eb. 10:24, 25; 13:1.

10-11. (a) Ada si aida ani yambu yo tipa Tingida Pakpio Yesu? (b) Gini ndupai AEfeso 1:7 afuhe tipa mangaha wo?

¹⁰ Ani nayugo wingbaduse ho ani ayamba agumerani, agu aboro ani amangasunge na yo gbiati gaani amurakporo ni tipa Tingida Pakpio Yesu. Tipagine ani ayamba gu ngbatunga aboro re ti ni? Ani na bakere tambuahe tipa gupai aYekova na Yesu namangihe furani, si du nasarani ani yambu kura aboro tipa i ye kadu pati Tingida Pakpio Yesu. Ani naida gupai nga i wiriki wai rengbe yo a ka gbia undo ti ga Yekova “undahe” vurube motumo tumorii.—Oni gedi AEfeso 1:7; Yugo. 22:17.

 ¹¹ Ho ani ayugo wingbaduse ni nidungura ani tirani sa, ani nayugo gu kura wene sino a, nga gu sino Mbori na Wiriko ayugoho rogo bakere agene yo.

12. (a) Waigu gaani adunguratise akiiso gaani nyemuse tipa aYekova na Yesu? (b) Ginipai 2 AKorindo 5:14, 15 angarasa rani ani mangihe ni wirika ani Yesu?

¹² Gaani nyemuse tipa Yekova na Yesu nafõngbaduraniyo ani naandu tipa adunguratise. Gupai ani awirikaha ti regbo adunguratise nanyakasa gaani nyemuse tipa Yekova na Wiriko. I naatingida rani dedede ti regbo adunguratise na pa gupai i namangihe furani. (Rom. 5:8) Tingida Pakpio Yesu natingida rani na pa wai kii gu nyemuse nga ga Yekova gbiati Wiriko, zavura tipa agu aboro ata ruganga tiyo na wai nyakipa motumo tumorii ya. Ani nayugo gaani tambuahe ni asada ani ka wirika Yesu rogo gu gene yo ani araka ngbaha na aˈuru dũ. (Oni gedi 2 AKorindo 5:14, 15.) Kurigure, kpotoraniyo nasarani ani tambua Yekova tipa fuko motumo tumorii furani. Gene sa rengbe ani ka tambuako ngbaha nga ni fu ani agu akaragapai naye kina boro ngbaduraniyo ti regbo gaani adunguratise.

13. Waigu rengbe ani ka yugo bakio gaani nyemuse tipa Yekova na Wiriko? Oni sakinga rogo yo.

¹³ Ani rengbe ka yugo bakio gaani nyemuse tipa aYekova na Yesu nidu ani na nyemu ka mbupa kura gaani apai tipa yo. Dedede, si naida ani naambupa kura gaani dungu apai tipa ka ndu tipa gaani adunguratise. Badungu adungurati ninaamanga gu dunguratise nga ga bebere poso nyemu fuo yego ani ba gaani asunge yo ti gu regbo si awira gupai nga ani ima mbu. Na gu kura dunguratise ninaamanga ti digido poso ti gu regbo badungu aboro aongoda. Ya mo Yekova ninaaino gupai nga ani naandu tipa gaani adunguratise si ki vura du vurũ nga ani ima mbu? Nirengo, ko naaino ho aino! Yekova nabi rani abi na agu aome ani amangaha tipa kaa du pati adunguratise, na ko nabihe na nyanyakipaha.—Mk. 12:41-44.

14. Wai du Yesu amoi kpiapai furani ni yugoko gu nyemuse nasa boro ni mbupa kura gani apai?

¹⁴ Yesu amoi kpiapai furani ni yugoko gu nyemuse nasa boro ni mbupa kura gani apai. Ko amangi gipai re nidu ko na nyemu ka kpi tipa gako abawiriki na ka maa pa agu apai i akpinyemuhe mbatayo fu gako rogo gako raka yo na aˈuru dũ. Ni kpiapai, ko anadia regbo adia na apefuoko zavura ho ko anidu ni na mbugo watadu ni fudifudi ko gbe  berãko yo. (Rk. 22:39-46) Na ko anaamaa berãko gbe tipa gupai ko anirengbe ka mangaha fuyo, angianga gu i anirengbe ka mangaha fuko ya. (Mt. 20:28) Ho du gaani nyemuse ni ni bakerehe wa gure tipa Yekova na tipa awirinarani, ani namanga ai gupai rengbe ani ka mangaha tipa kadu pati Ga Gbia Riahe na pati gaani adunguratise dunduko nga ga dungurati.

15. Ada du ani na nyemu ka undo yo gbe?

¹⁵ Ani rogo gu riigbu du na agu awirina rogoho nga ndikidi aKristano. Ono tie, ani na nyemu gupai gbe nga ka undo agu aboro du ani na yo rogo “idapase yo” ono nga aguyo naima zera rogo toro yo. (Gara. 6:10) Ani nayugo gaani nyemuse tipa yo ni ngarasa ani yo i naadu pati adunguratise, na gbe pati Tingida Pakpio Yesu. Wakina aYekova na Yesu, ani na bakere ngbarago ho agu aboro naima zera rogo toro yo ayego ni fuo Yekova, nga gu Barani du na nyemuse na kingia Babanda akandoro.—Mt. 18:14.

16. (a) Waigu rengbe ani ka nyakasa tirani dagba tirani, na ginipai gaani adunguratise nika mangaha furani? (b) Tipagine du gi regbo re ti ni ni wene regbo nga ga garã ka tingida agu afugo Yesu du rogo Yoane 3:16?

¹⁶ Rogo agu aposo naye kumbatayo, oni yambu badungu aboro wa rengbe omeroni na ni tipa i ye tipa Tingida Pakpio Yesu Rago Bisue nyemu, rogo Zerekpe 19, 2019. (Oni bi gu sanduki nga “ Ya Mo Oni Ayamba Yo?”) Rogo gu garã naaba naye, ani mangingo ai gupai rengbe ani ka mangaha ka nyakasa tirani dagba tirani nidu ani pati agu adunguratise dedede Yekova ambakadaha tipa rani. Wa digido gi zegino re ambeda, gaani adunguratise nika undo rani ani nye ni aboro umbasitise, wingbaduse, gbiati nyemuse. (1 Tesa. 5:8-11) Ani yugungo wai ayugo na kpotoraniyo dunduko ani abi aYekova na Wiriko tipa kpiyo nyemu rani ni bakerehe gbe!—Oni gedi Yoane 3:16.