1-2. (a) Wai du gu pangbanga du rogo Yesaya 41:10 adu na maapai kurii wirinarani rimori angia Yoshiko? (b) Ada rengbe ka gbia undo ti gu pangbanga Yekova akehe rogo Yesaya 41:10?

RURU wirinarani rimori angia Yoshiko agi gbegberẽ pangbanga. Gari munganga agumba gupai nga ri nye gbua na bete adiwi tipa ka raka. Ginipai ri amangihe? Yoshiko atingidipa veresi sa rogo Ziazia Kekeapai yo nangba tiri nga, Yesaya 41:10. (Oni gedihe.) Fuo gure, ri kini gumba gupai fu gari munganga zezeredi nga ri agundenga te, bambiko Yekova nasongoda ri. * Agu afugo wasa du rogo gu veresi re aundo wirinarani tipa ri moi gari kido nabaha kuti Yekova. Gu veresi re ima rengba a ka undo rani ani nye zezeredi ho du ani ni rogo kere aˈasada. Tipa ani rugutirani na wai si narengbe ka undo rani, gu bambatapai si aidaha nga ani ini ndu gupai Yekova afu gu pangbanga re ti ni fu Yesaya.

² Ti tonatonaha, Yekova amangisunge na Yesaya ko ke agu afugo re tipa si fu wasa fu agu aYudo si adu nga i nika ga na yo ku Babera yo ni ziziaboro. Ono tie, Yekova amangisunge tipa i banda gu pangbanga re tipa gu undo nga ga airisiko dunduko da ti gi gaani regbo re angianga fu kina agu aYudo sa si adu nga i nika ga na yo ni ziziaboro ya. (Yes. 40:8; Rom. 15:4) Areme, ani naraka ti “gbegberẽ aregbo,” na ani naida gu ngarasaro du rogo gu buku nga ga Yesaya kisusi gu nidu mbata.—2 Tim. 3:1.

3. (a) Gini akidohe ani abihe rogo Yesaya 41:10, nga gu veresi nga ga gu garã nga 2019? (b) Tipagine ani aida agi akidohe re ti ni?

³ Rogo gi kekeapai re, ani nika sakapai tipa ga Yekova akidohe biata nga gu rengbe ka undo rani ani nyakasi gaani idapase, nga gu du ni kekehe rogo Yesaya 41:10: agu akidohe re nga (1) Yekova nika du na ani, (2) ko nga gaani Mbori na (3) ko  nika undo rani. Ani naida aida na agi akidohe re * bambiko ani nagbiatirani na aˈasada rogo raka yo wakina Yoshiko. Ani nagbiatirani agbia a na akpakarapai mbiko gu gbegberẽ apai namanga rogo zegino. Agu akura rani nahi arungosiro be agu abazogo du na ome tiyo. Ani sakingo pai tipa agi akidohe du biata re ni basasa.

4. (a) Gini bambata kidohe ani nika sakapai tipaha? (Oni bi rukutu kekeapai a.) (b) Yekova naberãpa rani ngba gini agene? (d) Gini maapai du afugo Mbori na ni kuriro?

⁴ Yekova nakido rani nibambataha na agu afugo nga: ‘Ka mo gúnde nga ya, mbiko mi du na mo.’ * Yekova nayugo gupai nga ko na ani ni maa ko berãko wenengai tipa rani na ni yugo ko nyemuse koyo du ani ni. Oni bingo wai Yekova ayugo gako wesewese nyemuse koyo du ani ni. Ko naya: ‘Wa du mo ni kikiipa he bangire, ni irisiirisi ro, nga gu mo mi akpi nyemu ro.’ (Yes. 43:4) Pai ho rogo zegino rengbe ka sa Yekova ko mbu kpinyemu agu aboro nairiso ko te; he ho ka wo ti du ko ni ruruko furani te. (Yes. 54:10) Gako nyemuse gbiati gako pabakure nangarasa rani ni bakerehe. Ko nika banda rani abanda areme a kina wai ko abanda Abarama (Abarayama) nangia bakureako. Yekova aya fuko: “Abarama, ka mo gúnde nga ya, Mi nga ga vurakube.”—Bam. P. 15:1.

5-6. (a)Wai du ani aino gupai nga Yekova naida ka undo rani ho du ani ni rogo akpakarapai? (b) Ginipai rengbe ani ka wirikaha ti ga Yoshiko kpiapai?

⁵ Ani ima ino gupai nga Yekova ima du na nyemu ka undo rani rogo gaani akpakarapai bambiko ko nakido gako aboro nga: ‘Ho mo ka asusa ni rogo aime mi adú na mo; na rogo adi, si afú nga ri ro te; ho mo ka ata ni rogo we mo agbí nga te, mirãwe arita nga ro a te.’(Yes. 43:2) Ginipai agu afugo re ayugoho?

⁶ Yekova ambunga agu akpakarapai du tirani si furii ome rani na ki sa rani ani mbu iriso ko watadu si gbarasi parani nyeanye kindi te. Ko nakido rani nga ko nika duadu na ani, ko nika undo rani aundo ani ‘susi’ rogo agu akpakarapai re. Ginipai Yekova nika mangaha? Ko nika undo rani ani mbu gunde  tipa wa ka ani banda gaani padu ni ruruse koyo du ko ni, ka si vura du vurũ nga ani gbiatirani na kpio. (Yes. 41:13) Yoshiko, i nifura tipa ri kusayo, aima bi gipai re nga si nga rengo. Wiiri aya: “Kina ngbarani nazere ka bi wai Nina adu zanga gunde. Ani aima bi gupai nirengo nga Yekova aima fu gu zereda nga ga berãse yo furi. Nina anaafura tipa Yekova gbiati gako akidohe fu agu amunganga naangera fuori gbiati agu aboro kaza naadu na ri dati kina gu uru ri akpi.” Ginipai ani awirikaha ti ga Yoshiko kpiapai? Ho ani akido ni kuti gu ga Mbori kidohe nga “mi du na mo,” si nangarasa rani a na ki fu ome furani tipa ani hi aˈasada.

7-8. (a) Gini ue kidohe ani nika sakapai tipa ha, na ginipai si ayugoho? (b) Tipagine Yekova ape gupai ti ni fu agu aYudo naadu ni ziziaboro nga: ‘Ka oni kío nga ya’? (d) Gini afugo du rogo Yesaya 46:3, 4 naaundo ga Yekova aboro tipa ka i gundenga ya?

⁷ Oni bingo gu ue kidohe Yesaya akehe nga: “Ka mo kío nga ya, mbiko mi nga ga Mbori.” Ginipai gi fugo du tipa kio re ayugoho? Gu fugo nzunzu sayo ho nga ka “kío,” si naye na gu berãpai nga “kaa ngera dedede ni giiro bambiko mo nagunde agunde nga kerehe watadu kere boro ima rengba ka manga ro gbegberẽhe” watadu si ima rengba kadu nga “ka gunde wa gu boro du rogo kerepai yo.”

⁸ Tipagine Yekova aya ti ni fu agu aYudo si adu nga i nika du ni ziziaboro Babera yo ka i “kío nga ya”? Bambiko ko aima ino gupai nga aboro gu ringara re nika gunde agunde. Ginipai narengbe ka ye na gu gunde re? Si adu nga gu nyanyaki abanzengere nangia ga Amadio na aParaso yo nika ye na vura kuti Babera mbembedi kuti digido gu garã 70 aYudo amangihe ni ziziaboro ku Babera yo. Si adu nga Yekova nika mangasunge na agi abanzengere re tipa ka kusa gako aboro kusayo be gu zio nangia ga aBabero. (Yes. 41:2-4) Ho aBabero gbiati gu rikaaboro naaraka ti gu regbo re aini gupai ni nga avurayo nambeda, i aˈasadi ka banda gayo wingbaduse ni gumba yo gupai dagbatiyo nga: “Oni ngárãsi tironi!” I aima mbakada dungu kungbo ambori a, kidu na gu maabangirise nga agi ambori re du nika banda yo. (Yes. 41:5-7) Ono tie, Yekova azeresi ngbadu agu aYudo naadu ni zizi yo ni gumba ko gupai fuyo nga: “Ono mo, Yisaraere, gi moyambu [mo wa ga mo amurakporo te] . . . Ka mo kío nga ya, mbiko mi nga ga Mbori.” (Yes. 41:8-10) Oni bi gupai nga Yekova aya: ‘Mi nga ga Mbori.’ Ni manga Yekova sunge na agu afugo re, ko akido gako ruru amoyambu nga bangiriko aagonga tiyo te—ko adu kindi ni gayo Mbori, na i kidu kindi ni gako aboro. Ko aya fuyo: “Mi . . . atínda roni ki batasi roni.” Zanga kapa, agu afugo wasa re aima nyakasa agu aYudo naadu ni ziziaboro re.—Oni gedi Yesaya 46:3, 4.

9-10. Tipagine adunga ndupai ti ni ho tipa ani gunde ya? Oni funga kpiapai.

⁹ Awere, badungu agu aboro du pati rani nagunde kisusi gu niidu mbata, mbiko wai apai agbera kina kumbayo rogo zegino. Rengo ngaha nga, ani nambu ambu a be gu bangisa akpakarapai re. Ono ndupai ho si aida ani gunde ti ni te. Yekova nape gupai furani nga: ‘Mi nga gaoni Mbori.’ Tipagine du agu afugo re ti ni ni gu nyanyakipa ndupai si aida ani nye ti ni zanga gunde?

¹⁰ Oni bingo gi kpiapai re: Aparanga ue nga aJim na Ben rogo tiyara [avion], nga gu nandu rogo bakere wege. Wa wege afõka tiyara, bakama tiyara gumba gupai fu agu aboro dunduko du rogo tiyara nga: “Oni vo gaoni giri dimose nga ga basungo nyanyaki. Ani nika ndu andu rogo gi kere yaya wege re tipa bete regbo.” Jim tona kaa  bakabangiriko ni kerehe. Ono bakama tiyara pe gupai berewe nga: “Mi du nga gaoni bakama tiyara nafura furoni, apai dunduko wenengai, ka oni gundenga ya.” Fuo gure, Jim migi riko ki pe gupai nga, “Wai rengbe bakama tiyara ka ya apai dunduko wenengai?” Ono tie, ko bi gupai nga Ben agundenga kandara tooni te. Jim sanako nga: “Tipagine mo agunde nga ti ni ya?” Ben momu tingba ko ki pe gupai fuko nga: “Bambiko mi ima ino gu bakama tiyara re wenengai. Buba du nga ko!” Fuo gure, Ben pe gupai nga: “Mi gumbanga pa buba foro. Mi na kido nga ho mo nika ino buba ni na ki ini wai ko akama tiyara wenengai, mo agundenga berewe te.”

11. Gini apai rengbe ani ka wirikaha ti gu kpiapai nga ga aparanga ue tiyara yo?

¹¹ Ginipai rengbe ani ka wirikaha ti gi kpiapai re? Wakina Ben, ani agundenga te bambiko ani ima ino gu Barani du ngbangbaturũ yo nga Yekova wenengai. Ani ima ino gupai nga ko nika undo rani aundo ani hi gu kere akpakarapai du rogo gi zegino re. (Yes. 35:4) Ani ima rengba ka nye zanga gunde bambiko ani nakido kuti Yekova, baraho du agu aboro du rogo gi zegino re ni na bakere gunde. (Yes. 30:15) Ani namangapai a wakina Ben ho ani ayugo gu nduapai ni fu gaani amurakporo si aida i du ti ni na kido kuti Mbori. I ima rengba kadu a na gu kido nga ka i vura kaa gbiatiyo na kina gini akpakarapai vurũ, Yekova nika songoda yo asongoda.

12. (a) Gini biata kidohe ani nika sakapai tipa ha? (b) Gu fugo nga ‘be’ Yekova natingida rani na pa gini rengo?

¹² Oni makianga gu biata kidohe Yesaya akehe nga gu naya: “Mi anyákasa ro, mi aúnda ro.” Yesaya aima sakapai tipa wai Yekova nika nyakasa gako aboro, ko aya: ‘Mbori naye na tandu apai dũ, kina beko nikazoga rago fu ko.’ (Yes. 40:10) Ziazia  Kekeapai namangasunge dedede na gu fugo nga ‘be’ tipa ka yugo pa ome. Sidu, gu fugo nga “[be Yekova] nikazoga rago” natingida rani na gupai nga Yekova nga gu Bakindo du na ome ti ko. Ko amangisunge na gako bakere ome tipa ka songoda gu gako amoyambu naadu mbata na ka banda yo, na ko nandu kindi kumbatayo kaa nyakasa agu aboro nakido kuti ko areme na kini banda yo.—Pa Rug. 1:30, 31; Yes. 43:10.

13. (a) Ti gini regbo gbe Yekova akakuti gu gako kidohe nga ko nika nyakasa rani? (b) Ginipai nga gu nafu ome gbiati kido furani?

¹³ Gbe, ho avurarani arungosi rani ni, Yekova naka kuti gu gako kidohe nga: “Mi anyákasa ro.” Rogo gu kura apapara zegino areme, avurarani namanga nyanyaki asadatise tipa ka rugusa gaani sunge tungusapai watadu ka rugusa gaani riigbu. Wa vura duhe wo, ani agundenga ni bakerehe be gu ngbatunga zubohe re te. Yekova ima gumbapai nga gu nafu ome gbiati kido furani. Ko kido rani nga: ‘Gu ũvura i ka mbakada ha kuti roni si adía nga be roni wa sa te.’ (Yes. 54:17) Gu fugo re natingida rani na pa arengo biata.

14. Tipagine si airiwongo ti ni tirani nga avura Mbori nasovura kuti rani ya?

¹⁴ Bambatapai nga, wa ngia ani apefuo Kristo, ani ima ino gupai nga aboro nika soga rani asoga. (Mt. 10:22) Yesu aima gumba gupai kumbatayo nga i nika rungosi gako abawiriki ni kerehe ti yangara arame. (Mt. 24:9; Yo. 15:20) Uepai nga, gu sangbanebi nga ga Yesaya aima gumba gupai kumbatayo nga avurarani asoganga kina sogo sogo rani sa te ono i nika manga dungu apai susi gure; i nika mangasunge na dungu aũvura ni bakiakia tipa ka sovura kuti rani. Agu aũvura re nakoda gu nangahe naye ka ani ainongo ya, agu aziree ani naima ino paha, gbiati kere arungosiro. (Mt. 5:11) Yekova arugusanga avurarani ti mangayo sunge na agi aũvura re tipa ka sovura kuti rani te. (Ef. 6:12; Yugo. 12:17) Ono si aidanga ani gunde te. Tipagine?

15-16. (a) Gini biata rengo si aida ani tingidihe, na wai du Yesaya 25:4, 5 asongoda gipai re? (b) Wai du Yesaya 41:11, 12 asakapai tipa gu sangbanapai agu aboro nasovura kuti rani nika gbiaha?

 ¹⁵ Oni bingo gu biata rengo si aida ani tingidihe. Yekova agumba gupai nga, “ũvura” ho i nika mangasunge na ni kuti rani nika ‘día be rani,’ te. Kina wai bambu naabanda rani be bakamikami wege, kinawo a Yekova abanda rani be “gu iiriwo pai” gbegberẽ aboro amangaha. (Oni gedi Yesaya 25:4, 5.) Avurarani adunga na diabese tipa ka gbarasa rani nyeanye kindi te.—Yes. 65:17.

¹⁶ Yekova nanyakasa gaani kido kutiko nipe ko gupai furani napido agu aboro ‘nazinga’ kuti rani kumbatayo. (Oni gedi Yesaya 41:11, 12.) Ka avurarani vura sovura aso kuti rani wai vurũ na ka gu vura re vura faa afaa wai vurũ, sangbanaha nika du kina sa nga: Avura ga Mbori aboro dunduko ‘adú nga ni he te, i akpíka akpika.’

17-18. (a) Waigu rengbe geda Ziazia Kekeapai ka nyakasa gaani kido kuti Yekova? Oni funga kpiapai. (b) Waigu pa berã ani kurii gu veresi sia yo ho tipa gu ga garã nga 2019 aundo rani?

¹⁷ Ani nanyakasa gaani kido kuti Yekova ni asada ani ka inoko wenengai. Na gu yangara gene rengbe ani ka ino Mbori ngbaha wenengai nga geda ani Ziazia Kekeapai na kini berẽkurii gupai ani agedaha. Ziazia Kekeapai na gu ndikidi apangbanga rogoyo nayugo wai Yekova abanda gako aboro mbata kusayo. Agu pangbanga re nafu gu kido furani nga ko nika ngera angerafuo rani.

¹⁸ Oni bingo gu wene afugo Yesaya amangisunge na ni tipa ka yugo kpia wai Yekova abanda rani. Ko aya tipa Yekova wẽ ko nga babanda akandoro na gako amoyambu kingia wiri akandoro. Yesaya aya tipa Yekova wẽ: “Ko adúngura wiri akandoro ku beko, ki nitindi ra ti ngbaduko.” (Yes. 40:11) Ho ani ageda gupai ni nga Yekova natinda rani beko, si nasa rani ani bihe nga ani ni bandabanda rani na ka ani agundenga ya. Tipa ka undo rani ka ani gunde ya ka ani vura kaa gbiatirani na akpakarapai vurũ, ruru kangara moyambu sia Yesaya 41:10 ni gu veresi nga ga gu garã nga 2019, si naya, “Ka mo kío nga ya, mbiko mi nga ga Mbori.” Oni berẽkurii agi afugo kidohe re. Si nika nyakasa roni wa oni nika gbiatironi na agu akpakarapai du kumbatayo.