1, 2. (a) Gini sunge Yesu amoihe ni banguapai rogo gako raka yo? (b) Ginipai si aida ani mangihe tipa kadu na diabese ni “ga Mbori abadiasunge”?

YESU KRISTO adu ni basekengua na ni bayugupai. (Mk. 6:3; Yo. 13:13) Ko aima ino wai ka manga agu asunge re dunduko ue wenengai. Ni du ko ni basekengua, ko awiriki wai ka mangasunge na agu aũsunge du tipaha ni basasa tipa ka kusa wene ahe rogo ngua yo. Wa ko adu ni bayugupa wene pangbanga, ko amangisunge ni tatamana na gako inohe nga ga Ziazia Kekeapai tipa ka undo aboro i rugutiyo na gu rengo du rogo Fugo Mbori yo. (Mt. 7:28; Rk. 24:32, 45) Ho Yesu ada ni na garãko 30, ko ambu sunge sekangua ki da ni bayugupai mbiko ko aima ino gupai nga gi sunge re naadu na nyanyakipaha. Ko agumba gupai nga pa takapande gu wene pangbanga nga ga ga Mbori Kindo nga ndupai sa Mbori akedi ko ti ni ku auru kpotosende. (Mt. 20:28; Rk. 3:23; 4:43) Yesu amoi sunge tungusapai ni banguapai rogo gako raka yo, na ko aaida kura aboro mangi kina gu bangisapai re a.​—Mt. 9:35-38.

² Si rengbe kadu nga ani nga abasekengua te, ono ani nirengo nga abatungusi wene pangbanga. Gi sunge re na nyanyakipaha mbiko Mbori kina rogoho; i nayamba rani nga “ga Mbori abadiasunge.” (1 Kor. 3:9; 2 Kor. 6:4) Ani ima rugatirani na gupai nga “[ga Yekova] apai nga kina ku rengo dunduko.” (Tam. 119:159, 160) Si nga ndu gupai si aida ani ‘naayugo ga rengo pai nzunzu’ ti ni rogo gaani sunge tungusapai yo. (Oni gedi 2 Timoteo 2:15.) Sidu, ani naasada tirani nyanyaki tipa ka ino wai ka mangasunge wenengai na Ziazia Kekeapai, nga gu bangua ũsunge ani amangasunge na ni ka yugo rengo tipa Yekova, na tipa Yesu gbiati Kindo. Tipa ani du na diabese gene gaani sunge tungusapai yo,  ga Yekova riigbu ima kusa aũsunge nga gu si aida ani inidi tirani na ni wenengai. Agi ahe re dagba agu Aũsunge Nga ga Yugopai.

3. Ginipai si aida ani moiberãrani tipaha ti gi yangara regbo nye berani ka manga dezirepai re, na waigu Amokedi 13:48 aundo rani ani mangi gipai re?

³ Mo rengbe ka bakabangiro nga tipagine du i ayambaha ti ni nga Aũsunge Nga ga Yugopai angianga Aũsunge Nga ga tungusapai ya. Ka “tungusapai” nga ka takapande pangbanga; ono ka “yugopai” nga ka sakarogopai yo tipa si rimi ku berã boro yo na ku ngbadu ni yo, si ki sa ni ni mangipai kuti gupai ni nawirikihe. Rogo gi yangara regbo nye berani tipa ka manga dezirepai re, si naida ani moiberãrani gbe tipa tona wisigo Ziazia Kekeapai na aboro na kini yugu rengo fuyo. Gere nayugo gupai nga si naida ani naangera tipa agu aboro dunduko “i aima ringbisa yo sa nyenye unga” na kini undo yo i da ni aidipase.​—Oni gedi Amokedi 13:44-48.

4. Waigu rengbe ani ka ino agu aboro “i aima ringbisa yo sa nyenye unga” na waigu rengbe ani ka biyo?

⁴ Waigu rengbe ani ka ino agu aboro “i aima ringbisa yo sa nyenye unga”? A wa si adu rogo bambata kama agarã, gene sa rengbe ani ka ino agu aboro re ngbaha nga ka tungusapai fuyo. Sidu, si naida ani mangipai kina wai Yesu arugu rani, ko aya: “Gu bakporo na gu kporo oni ka rima ku rogo, oni gbáta gu boro du ho rengbe na dia roni ku gume.” (Mt. 10:11) Ani agbatanga agu aboro nga airabiriki, airarukö watadu agu yo akpinga nyemu agu apai nga ga toro ya te. Ani nagbata agu aboro du na umbasitise na kidu na gomoro nga ga rengo. Ani rengbe na ringbisa gipai re kuti gupai Yesu anaamangaha mbuko ni basekengua. Si aaida ko gbata wene ngua mbata ko kini ru ka mbakada agu ahe du wa ngbadimo, gonga, watadu kura ahe. Bara sa ko anigbia gu ngua du ni wenehe, ko ani rogo gako aũsunge, ki mangisunge na gako birĩ-sunge, na ki mbakadi gu he re. Kinagu bangisapai re si aida ani mangihe areme wa ani amanga asadatise nyanyaki ka sa agu aboro ni abawiriki du na ruru ngbaduyo yo.​—Mt. 28:19, 20.

5. Ginipai si aida ani inihe tipa agu aũsunge du rogo gaani Aũsunge Nga ga Yugopai? Oni funga kpiapai. (Oni bi gu sure duti tonatonaha.)

⁵ A wa duhe tipa kura aũsunge, aũsunge namanga ngbatunga asunge ni bakiakia. Ani dinga kpiapai kuti agu aũsekangua Yesu aamangasunge na ni. * Ko aaida aũsunge tipa ka bi bagizo ngua, ka gbahe ti ni; ka kataha, ka koraha, ka sehe, ka kpe kpotoho, na ka gbigbia angua kuti akuraha. Wakina gure a, agu ahe du rogo gaani Aũsunge Nga ga Yugopai na asunge ni basasa si amangaha. Sidu, ani bingo agu ahe du dagba gaani aũsunge yo na ki bi wai rengbe ani ka mangasunge na gi wene aũsunge i nafuhe furani re.

6, 7. (a) Waigu mo namangisunge na akarte? (b) Asunge awaraga yambahe tipa adunguratise nga gine?

⁶ AKARTE. Si ni wiri toonihe ono kidu ni wene aũsunge nga gu rengbe ani ka mangasunge na ni tipa ka yugo pa tirani fu aboro na ka yugo bara gaani bangiriba nga ga Internet fuyo, nga gu ba rengbe yo ka wirika badungu apai tipa rani rogoho na zavura ka sanahe tipa wisigo Ziazia Kekeapai. Bange agu aboro sanahe tipa wisigo Ziazia Kekeapai rogo gaani bangiriba nga ga Internet nga jw.org ima susa 400,000, na akama aboro nasanahe na aˈuru dunduko! Mo ima rengba ka rogoda bete agi akarte re ku rogo gamo mangu tipa kaa mangasunge na ni ka fura fu agu aboro mo agbiayo gene gamo asunge yo.

⁷ Awaraga Yambahe. Gi waraga yamba aboro tipa dunguratise re naya: “Ani nayamba ro mo ye ka wisigo Ziazia Kekeapai na ADezire Yekova.” Fuoho, si nayugo agu agene ani amangaha ngbaha nga “ba gaani irisombori yo” “watadu na Dezire Yekova sa.” Sidu, gi ũsunge re ayugongo kina pa ada nga ani sa te, ono si a na yambahe rogoho fu “agu aboro inipa gu gayó azingo nga ga toro,” na kini kpinyemu ka wisigo Ziazia Kekeapai na ani. (Mt. 5:3, NW) Si nirengo nga, aboro dunduko rengbe ka ye tipa gaani  adunguratise singia i nakpinyemu ka wisigo Ziazia Kekeapai na ani watadu i akpingo nyemuhe te. Ka i ye tipa gaani adunguratise, i nika bi gu dungu apai rengbe yo ka wirikaha rogo Ziazia Kekeapai yo.

8. Tipagine duhe ti ni ni nyanyakipa pai tipa aboro ye kandara ku pati dunguratise sa dagba gaani adunguratise yo? Oni funga kpiapai.

⁸ Si ni nyanyakipa pai tipa ani naayamba aboro ayamba kindi tipa i ye kadu pati gaani adunguratise kandara bara sa. Tipagine? Bambiko ho i aye ni ku pati ni, i nabi gupai nga aDezire Yekova nayugo gu rengo du rogo Ziazia Kekeapai yo na kini undo aboro i ini Mbori, nga gupai ziree apambori amanganga ha ya. (Yes. 65:13) Kura arogotise sa Amerika yo du rimoyo nga Ray na Linda aima bi gipai re bete agarã kusayo. I adiberã nga si naida i tona nduge ku kanisa yo. I aima ida kuti Mbori na i kini idi gupai nga ka inoko wenengai, sidu, i kini tona nduge ku rogo agu akanisa dunduko ni basasa naadu rogo gu gbata i adu rogoho. Badungu akanisa na ariigbu nga ga apambori naadu rogo gu gbata re. Ni bambatapai, agu arogotise re adiberã tipa apai ue nga gu i aaida ka bihe rogo gu kanisa rengbe yo ka ga ku rogoho. Gu bambatapai i aaidaha angia ka wirikapai ti regbo irisombori, na uehe ki ngia ka bi gupai nga aboro kanisa navo tiyo wa agu aboro nairiso Mbori. Tifuo dungu agarã, i aima ndu ku rogo agu akanisa dunduko naadu rogo gayo gbata, ono i aabingo rurupai te. Wiripai ho i awirikihe te, na gu vodatise nga ga agu aboro kanisa re adu ni gbegberẽhe. Tifuo i ndu ku rogo yangara kanisa, Linda andu ku ba gari sunge yo na Ray kini karaga tiko ku kporo yo. Ho ko aagani ku kporo yo, ko asusi pati Bambu Kindo na ki berẽ gupai nga, ‘Mi ndunga ku rogo gi ba re tipa ka bi gupai i naamangaha yo.’ Rengo nga ha nga, ko abi weneapai rogo gi ba re! Aboro dunduko Bambu Kindo yo adu zaaza na kini di aboro kugume na i avo tiyo ni iriirihe. Ray asungu mbatayo na ko aima kpinyemu gupai ko awirikihe! Si wakina gupai gu mokedi nangia Pauro agumbaha tipa gu boro naye tipa gaani dunguratise nga ga aKristano ti bambata regbo na ki gumba gupai nga: “Mbori du dagba roni yo nirengo.” (1 Kor. 14:23-25) Tifuo gure, Ray atona nduge na Rago aPoso dunduko tipa adunguratise, na ko anaandu rogo aposo dunduko tipa gu dunguratise nga ga bebere poso. Linda atona kaa ye tipa adunguratise a, na ho i ada ni na garã yo 70, i aidi ka wisigo Ziazia Kekeapai na i ki zi bapatiza.

9, 10. (a) Tipagine du atrakte ti ni taata tipa mangasunge na ni? (b) Oni sakingo pai tipa wai ka mangasunge na gu trakte nga Ga Mbori Ngbi Nga Gine?

⁹ Atrakte. Ani na atrakte berani muambe nga agu naima du taata tipa mangasunge na ni na kidu wenengai tipa tona fugo na boro. Naatona ti gu regbo i atona mangasunge na agi atrakte re ti gu regbo i akusihe rogo 2013, bange agu i nakusihe ima du wa abirioni bisue! Gu bawenepai du tipa agi aũsunge re nga ho mo aino ni ka mangasunge na gu sa dagbaha yo, mo ima rengba ka mangasunge na yangara akuraha dunduko bambiko agu apai du tipaha kina sa. Wai du rengbe mo ka mangasunge na trakte tipa ka tona fugo na boro?

¹⁰ Si ima rengba kadu nga mo sia ka mangasunge na gu trakte nga Ga Mbori Ngbi Nga Gine? Gupai si aida mo mangihe nga ka yugo gu sanahe du ti kpotoho fu boro na ki sana ni nga: “Ya mo mo abakingo bangiro nga ginihe nga ga Mbori Ngbi? Ya mo mo rengbe ka ya si nga . . . ?” Fuo gure, mo sana ni nga gini karagapai dagba agu akaragapai du biata re rengbe ni ka siaha. Na zanga mo gumba gupai nga gani karagapai ni ruruhe watadu ni irairaha, mo zaraha ku vuruhe yo kuti gu riipai nga “Gupai Ziazia Kekeapai apehe” na ki gedi agu averesi i nakehe yo nga, Daniere 2:44 na Yesaya 9:6. Ka rengba du, mo ki saki pai na ni berewe kumbatayo. Ni yangaraha, mo sana gu sanahe du giihe yo nga “Mo berẽnga kurii gipai re”: “Raka nika du wai rogo ga Mbori ngbi?” Gere nika maa mburu gupai oni nika ye berewe ka fura tipaha na gu boro re. Ho mo nika karaga tiro ni berewe, mo pepa kapita 7  nga ga gu burosua nga Gu Wene Pangbanga Naye be Mbori, nga ũsunge sa dagba agu aũsunge yo ani amangasunge na ni ka tona wisigo Ziazia Kekeapai na aboro.

11. I nakeka gaani amagazini tipa si mangi ginipai, ono gipai si aida ani inihe tipaha?

¹¹ Amagazini. Ngbaõbambu Sinziri na Awake! nga agu awaraga i nakusihe na ki saha gbe ku rogo dungu afugo yo rogo zegino kisusi! Wa duhe nga, aboro rogo aringara ni bakiakia nageda agi amagazini re, i nake gu kekeapai du ti kpotoho tipa si ngba ti aboro rogo arago dunduko. Si naida ani mangisunge na agi aũsunge re tipa ka undo aboro i moiberãyo tipa gupai nyakipaha rogo raka yo. Tipa ka fu agi amagazini re fu agu aboro nzunzu duhe tipa yo, si naida ani ini gini aboro gi magazini re afura ni basasa tipa yo.

12. (a) I nakusa Awake! tipa gini aboro, na gaha bangua ndupai nga gine? (b) Gini weneapai mangi foro mbiko manga mo sunge na gi ũsunge re?

¹² I nakusa Awake! tipa agu aboro nageda gaani awaraga nga aguyo du na bete inohe nga ga Ziazia Kekeapai. Si rengbe kadu nga wiri inohe ho du yo na ni tipa agu ayugopai nga ga aKristano te, na si rengbe kadu nga i aima zanga gayo kido kuti apambori, watadu i ainongo gupai nga Ziazia Kekeapai na nyanyakipaha te. Gu bangua ndupai i akusa Awake! ti ni nga ka sa agu aboro nagedaha tipa i idi kuti gupai nga Mbori kina ti ni. (Rom. 1:20; Eb. 11:6) I nakusa a tipa si undo agu aboro nagedaha tipa i sonosi idapase kuti gupai nga Ziazia Kekeapai nga “ga Mbori pai . . . ni rengo.” (1 Tesa. 2:13) Gu riiapai biata du ti kpoto agu aAwake! nga ga 2018 nga: “The Way of Happiness,” na “12 Secrets of Successful Families,” gbiati “Help for Those Who Grieve.”

13. (a) Ada i akusa gu Ngbaõbambu Sinziri du tipa aboro dũ tipa yo? (b) Gini weneapai mangi foro mbiko manga mo sunge na gi ũsunge re?

¹³ Ngbaõbambu Sinziri, nga gu du tipa aboro dunduko nafura gbe tipa agu apai nga ga toro fu agu aboro du na irisa tipa Mbori na Fugoko. Wa vura duhe nga i na bete inohe tipa Ziazia Kekeapai, i aruganga tiyo nzunzu na gaha ayugopai te. (Rom. 10:2; 1 Tim. 2:3, 4) Gu riiapai biata du ti kpoto agu aNgbaõbambu Sinziri nga ga 2018 nakaragapai kuti agu asanahe nga: “Ya mo Ziazia Kekeapai Kindi na Nyanyakipaha Areme?,” na “Ginipai Nika Manga Kumbatayo?,” gbiati “Ya mo Mbori Naberã Paro?”

14. (a) Sunge agu avidio du biama dagba gaani Aũsunge Nga ga Yugopai yo nga gine? (b) Gini weneapai mangi foro mbiko yugo mo agi avidio re fu aboro?

¹⁴ Avidio. Ti rago Yesu, abasekengua anaamangasunge na kina agu aũsunge sa nga ga bee. Ono tie, ti gi gaani regbo re, abasekengua namangasunge amanga a na agu aũsunge du wa musiara (la scie), gazua, ũkpengua, bande, na agu akuraha nga gu namangasunge na karaba. Ku pati agu awaraga i akusaha, ani na dungu avidio berani rengbe ani ka yugoho fu aboro​—si ho biama dagba gaani aũsunge nga ga Yugopai yo: Gupai Si Aida Mo Wiriki Ziazia Kekeapai Ti Ni, Wai Du I Naawirika Ziazia Kekeapai?, Ginipai Ninaamanga Bambu Kindo Yo?, na ADezire Yekova​—Ada Nga Ani? Ani ima rengba ka yugo agi avidio du bagizoho kusende ti aminiti ue re fu aboro ti gu bambata regbo ani andu fuo yo. Ani rengbe ka yugo agu avidio du ni gbangaha fu agu aboro ani akaraga tirani fuoyo gbiati agu aboro du regbo beyo ni bakerehe. Gi wene aũsunge re ima rengba ka fõngbadu aboro yo tipa i wisigi Ziazia Kekeapai na ki ye tipa gaani adunguratise.

15. Oni funga agu akpiapai nayugo gu sangbanapai rengbe kadu ka aboro bi vidio sa dagba gaani avidio yo rogo fugoyo yo.

¹⁵ Ni kpiapai, ho kura wirina sa agbia dee ni nga guri naaima guari rogo gari ringara nga Maikronisia na nga gu ri gari bambata fugo angia pa aboro gu kisanga nga Yap, gu wirinarani re ayugu gu vidio furi nga Gupai Si Aida Mo Wiriki Ziazia Kekeapai Ti Ni? rogo fugori yo. Ho gu dee re atona bi gi vidio re ni, ri aya: “Pa re du re. Kina ngbare zere! Fugoko nayugo gupai ayugo nga ko kina rogo gu kisanga mi aye rogoho. Pare du ko afura rogoho re!” Tifuo gure, ri agumba gupai nga, ri nika geda agu awaraga dunduko du rogo  fugo ri yo rogo gaani bangiriba nga ga Internet nga jw.org na ki bi agu avidio dunduko du yo. (Oni ringbisinga ha na Amokedi 2:8, 11.) Gu kura kpiapai berewe nga ga kura wirina sa Amerika yo nga gu ri nakedi pa gu bangisa vidio re ku gii ngbii yo fu wiri kawiiri rogo fugo ko yo. Ko abiki agu avidio re na ki ke gupai furi nga: “Gu paparaha nafura tipa padu zegino ni zogozogoho be gbegberẽ ko aima zio ngbadu re yo. Mi aima sanahe tipa wisigo Ziazia Kekeapai.” Ko naraka rogo gu ringara i aidanga pa gaani sunge tungusapai rogoho ya!

16. Tipagine i akusi agu aburosua ti ni nga: (a) Oni Degeturoni fu Mbori Tipa ka Raka Nyeanye Kindi. (b) Gu Wene Pangbanga Naye be Mbori (c) Ada Namanga Gupai Yekova Akpinyemuhe Areme?

¹⁶ Aburosua. Waigu rengbe mo ka yugo rengo fu gu boro ainongo wai ka gedapai wenengai ya watadu adunga awaraga ho rogo gani fugo ya? Ani rengbe ka mangasunge na gu burosua nga, Oni Degeturoni fu Mbori Tipa ka Raka Nyeanye Kindi. * Gu bawene ũsunge ngba kisusi tipa ka tona wisigo Ziazia Kekeapai na aboro nga gu burosua nga Gu Wene Pangbanga Naye be Mbori! Mo rengbe na yugo gu riiapai 14 du gii gu burosua yo re na ki sana ni tipa gu pai ni aida ka inopai gbe tipaha. Fuoho, mo ki tona wisigopai rogo gu kapita re na ni. Ya mo mo aˈasadingo gipai re ti gu regbo mo naakaraga tiro fuo aboro? Ada Namanga Gupai Yekova Akpinyemuhe Areme? nga gu biata ũsunge du dagba gu gaani aũsunge yo nga ga yugopai. I akusihe tipa si undo abawiriki Ziazia Kekeapai i iniditiyo na gaani riigbu. Tipa ka wirika wai ka mangasunge na gi burosua re ti regbo wisigo Ziazia Kekeapai, oni bi gu Gaani Raka Nga ga AKristano na Gaani Sunge​—Waraga Dunguratise nangia ga Marungu 2017.

17. (a) Tipagine i akusi agu abuku du tipa wisigopai na aboro re ti ni? (b) Ginipai si aidaha be agu aboro dunduko nazio bapatiza, na tipagine?

¹⁷ Abuku. Tifuo tona mo wirikapai na boro rogo burosua, mo ima rengba ka aria wirikapai ti ai regbo ku rogo gu buku nga Gini Apai Rengbe Baibiri ka Yugoho Furani? Gi ũsunge re nika kiiso gu inohe nga ga agu abangua ayugopai nga ga Ziazia Kekeapai du gu boro re na ni. Tifuo nyasa wirika mo gu buku re na boro na ka si du nga gu bawirikipai re namanga sona kumbatayo rogo toro yo, mo tona wirika gu buku na ni nga, Wai ka Nye Rogo ga Mbori Nyemuse Yo. Gi ũsunge re nika undo gu bawiriki Ziazia Kekeapai re ni ini wai ka mangapai kuti agu abangua arengo nga ga Ziazia Kekeapai rogo gani raka yo na aˈuru dunduko. Oni tingidi gupai nga, zavura tifuo zio bapatiza, si naida vovo aboro naawirikapai kindi daho i nika nyasa wirika agi abuku re ni dunduko. Gere nika undo yo i rũ tarã yo ku rogo rengo yo.​—Oni gedi AKorosaio 2:6, 7.

18. (a) Ginipai 1 Timoteo 4:16 angarasa rani ani mangihe wa du ani ni ayugu rengo, na gini sangbanapai rengbehe ka ye na ni? (b) Ginipai si aida si du ni gaani sásá wa ani amangasunge na gaani Aũsunge Nga ga Yugopai?

¹⁸ Wangia ani aDezire Yekova, i ima fu gu sunge furani nga ga yugo “gu wene pangbanga du ni rengo” nga gu rengbe ka ndu na aboro sa nyenye unga. (Koro. 1:5; oni gedi 1 Timoteo 4:16.) Tipa ka undo rani ani mangi gipai re, i ima kusa Aũsunge Nga ga Yugopai nga gu naima hi be agu ahe ani aidaha. (Oni bi gu sanduki nga “ Aũsunge Nga ga Yugopai.”) Ani mangingo sunge amanga na agi aũsunge re wenengai kisusi wa rengbe omerani na ni. Batungusipai ni tini rengbe ka sia gu waraga dagba gaani aũsunge yo ni aida ka mangasunge na ni tipa ka yugopai fu gu boro du na nyemupai na gu regbo ni aida ka mangasunge na ni ti ni. Ono oni tingidi gupai nga, gaani sásá gbua nga ka fu awaraga fu aboro te; watadu ka mbu gaani awaraga fu agu aboro adunga na nyemu gaani pangbanga ya te. Gaani sásá nga ka sa agu aboro ni abawiriki du na ruru ngbaduyo yo, na umbasitise, na nga agu aboro du na gu zingo nga ga toro​—nga aguyo “i aima ringbisa yo sa nyenye unga.”​—Amo. 13:48; Mt. 28:19, 20.