1. A wa saki yo pai tipaha rogo AEfeso 6:10-13, gini gene sa dagba gu wene agene yo Yekova ayugo gupai ngbaha nga ko naberã parani aberã? Oni sakingo rogoyo.

GENE sa dagba gu wene agene yo Yekova ayugo gupai ngbaha nga ko naberã parani aberã wangia ani gako amoyambu nga ni undoko rani ani sovura kuti avurarani. Bambata avurarani nga Satana gbiati adaimona. Yekova nafu zahe furani nibipa agi avurarani re, na ko nafu guhe furani ani aidaha tipa ka sovura kutiyo. (Oni gedi AEfeso 6:10-13.) Ka ani aadia ga Yekova undo kugume kini kido kutiko na ngbaduraniyo dũ, ani ima rengba ka ká fu Bakitingbanga kidu na diabese. Ani ima rengba kadu na gu bangisa kido gu mokedi nangia Pauro adu na ni. Ko akepai ki ya: “Ka Mbori du fu rani, da ka du kuti rani?”​—Rom. 8:31.

2. Gini apai ani nika wisigoho rogo gi kekeapai re?

² Wangia ani ndikidi aKristano, ani amaanga berãrani gbe fuo Satana gbiati adaimona te. Ani namaa berãrani gbe fuo wirikapai tipa Yekova gbiati irisiko. (Tam. 25:5) Ono tie, si naida aida ani inipai tipa agu apai Satana amangaha. Tipagine? Tipa gupai nga ka ko nangingo rani ya. (2 Kor. 2:11) Rogo gi kekeapai re, ani nika fura tipa gu bangua gene Satana na adaimona aˈasada ka nanga aboro ngbaha. Ani nika fura a tipa wai ani narengbe ka sovura kutiyo kidu na diabese.

3-4. (a) Ginihe nga sangbaatoro? (b) Waigu badungu aboro naidi kuti gu ome nga ga sangbaatoro rogo zegino?

³ Gu bangua gene Satana na adaimona aˈasada ka nanga aboro ngbaha nga mangasunge na sangbaatoro. Agu aboro namangasunge na sangbaatoro namanga tiyo nga i ima inopai tipa agu apai ka aboro ainongo pai tipaha ya, na i namanga agu apai ka aboro  amanganga ha ya. Ni kpiapai, i naya i ima ino agu apai du kumbatayo ni manga yo sunge na soroka watadu birĩ soroka na akerekuru. Kura aguyo namanga apai wa ka i ya i nafura afura na agu aboro naaima kpiko. Aguyo kinaho namangasunge na sunge abinza watadu sunge manga ngua, na i ima rengba ka asada ka manga boro na ngua. *

⁴ Waigu badungu aboro naidi kuti gu ome nga ga sangbaatoro rogo zegino? I amangi wisigopai rogo aringara 18 Latin America yo na Caribbean yo ki bi gupai nga ka bange aboro du biata, guni sa dagbayo ima ida kuti sunge ngua gbiati sunge abinza, na badungu agu aboro du rogo agu aringara re ima ida kuti gupai nga boro ima rengba ka fura na atoro. Gu kura wisigopai kinaho berewe i amangihe rogo aringara 18 vuru Afirika. Bange aboro naima susa bebere agu aboro i amangi wisigopai tipa yo ima ida kuti sunge abinza. Rengo ngaha nga, si naida ani bandatirani be sangbaatoro rogo ai gu ba ani araka rogoho. Gu kurapai berewe nga, Satana naida ka nanga “aboro kpotosende [no] dunduko.”​—Yugo. 12:9.

5. Wai du Yekova abi sangbaatoro?

⁵ Yekova nga gu “Mbori nga irarengo.” (Tam. 31:5) Sidu, wai du ko abi sangbaatoro? Ko ima sogaha! Ko agumba gupai fu aYisaraere nga: “A nga boro sa ka du dagba roni ka ida ka fu wirini ni susi rogo we wa motumo nga kumba watadu de te, na gu ni nara fu ngua, na gu ni namanga pa soroka, na adoavure, na abinza, na abaziaboro ni birĩ a, na asana sangbaatoro, na airamangu, na agumba sangbaatoro na agu yo nagbata pai be agu yo nakpi a te. Bambiko gu ni namanga ngbatunga agi apai re, ni bangiri Yekova ni kere gbegberẽ sino boro.” (Pa Rug. 18:10-12) AKristano tii gu Ndiko Yekova afuhe fu aYisaraere te. Ono tie, ani ima ino gupai nga gako bipai tipa sangbaatoro aˈarianga tihe te.​—Mara. 3:6.

6. (a) Wai du Satana amangasunge na sangbaatoro tipa ka imisa aboro? (b) Ringbisihe kuti Batungusipai 9:5, gini rengo duho tipa kpikpi aboro?

⁶ Yekova naza rani ti sangbaatoro bambiko ko ima ino gupai nga Satana namangasunge na ni tipa ka imisa rani. Satana namangasunge na sangbaatoro tipa ka gbandaka aziree​—kodihe na gu ziree nga kpikpi aboro naraka araka rogo kura ba. (Oni gedi Batungusipai 9:5) Satana namangasunge a na sangbaatoro tipa ka gundesi aboro na ka nyaga yo kusayo ti Yekova. Gupai ko aidaha nga aboro du na kido kuti gbegberẽ atoro angianga kuti Yekova ya.

7. Ginipai Yekova apehe furani?

⁷ A wa i nipehe mbata kusayo, Yekova nape gupai furani si aida ani inihe tipa gupai nga ka Satana gbiati adaimona nangingo rani ya. Oni bingo bete adiandue nga gu rengbe ani ka diaha tipa ka sovura kuti Satana na adaimona.

8. (a) Gini bangua gene ani asovura ngbaha kuti gbegberẽ atoro? (b) Wai du Atambuahe 146:4 akusa gu ga Satana ziree ku yangura du tipa kpikpi aboro?

⁸ Mo naageda Fugo Mbori kini berẽkuriihe. Gere nga gu bangua gene ani aká agu aziree ngbaha gbegberẽ atoro agbaragaha. Fugo Mbori wakina títí basape nga gu rengbe ka kata rogo agu aziree yo Satana agbaragaha. (Ef. 6:17) Ni kpiapai, Fugo Mbori nakusa gu ziree ku yangura nga kpikpi aboro ima rengba ka fura na rakiraki aboro. (Oni gedi Atambuahe 146:4.) Si natingida rani a na gupai nga kina Yekova sa rengbe ka ino gupai du kumbatayo. (Yes. 45:21; 46:10) Ka ani aageda Fugo Mbori na kini berẽkuriihe dedede, ani nika mbakadatirani ka ká agu aziree gbegberẽ atoro aida ani idi kutini na ki sogoho.

9. Gini ngbatunga mangaapai nga ga sangbaatoro ani arimisongo tirani ku rogoho ya?

 ⁹ Mo ká ka manga ai gupai du na ngbanya dagbaha na sangbaatoro. Wangia ani ndikidi aKristano, ani amanganga sangbaatoro kandara tooni te. Ni kpiapai, ani andunga fuo abinza te watadu ani aˈasadanga ka fura na kpikpi aboro rogo ai gene yo te. A wa i asakipai tipaha rogo gu kekeapai naadu mbata fu gere, ani nane agu asino nga ga kpara boro du mburuhe rii gu ida nga kpikpi aboro naraka araka rogo kura ba. Na ani amanganga sunge na birĩ soroka na akerekuru watadu sunge abinza tipa ka ino gupai du kumbatayo te. (Yes. 8:19) Ani ima ino gupai nga kereapai du nga gu mangaapai re dunduko, na si ima rengba ka sarani ani fura were nzunzu na Satana gbiati adaimona.

10-11. (a) Ginipai kura aboro rogo bambata kama agarã amangihe ho i awiriki rengo ni? (b) Ringbisihe kuti 1 AKorindo 10:21, tipagine si aida ani wiriki gu kpiapai ti ni nangia ga agu aKristano naadu mbata, na wai du rengbe ani ka mangaha wo?

¹⁰ Mo nyasiriipa agu ahe kusayo du na ngbanya dagbaha na sangbaatoro. Kura agu aboro nanaaraka Efesa yo rogo bambata kama agarã aamanga sangbaatoro amanga. Ho i awiriki rengo ni, i amangi nyanyaki diandue. “Agu yo ni umba yo te nanasoroka i ki dungura gayo akitabu, ki zo ho azo ku bangiri aboro dũ.” (Amo. 19:19) Agi aboro re amangi agu apai dunduko i arengbe ka mangaha tipa ka sovura kuti gbegberẽ atoro. I angbeke gayo abuku soroka na bakere marã. Ono kuba gupai nga ka gama agu abuku re watadu ka bagaha fu kura aboro, i agberesipaha dunduko. I aaberãpa fu ngbarago fu Yekova kisusi pa gu bakere marã i angbeke agu abuku re na ni.

¹¹ Waigu rengbe ani ka wirika gu kpiapai nangia ga agu aKristano naadu rogo bambata sa kama agarã re? Si adu ni wenepai ani nyasariipa ai guhe rengbe kadu berani nga gu du na ngbanya dagbaha na sangbaatoro. Gere nakoda ũradatise watadu gu kura ahe aboro avodaha watadu du aboro na ni beyo tipa ka asada ka bandatiyo be gbegberẽ atoro.​—Oni gedi 1 AKorindo 10:21.

12. Gini asanahe si aida ani sana tirani na ni nibipa aũngbarago?

 ¹² Mo Wisigi Gamo Aũngbarago Wenengai. Mo sananga tiro nga: ‘Ya mo mi naageda abuku, amagazini, watadu kekeapai rogo Internet tipa sangbaatoro? Na agu amanzigo mi agiaha, agu apai mi abihe rogo terevizioni, watadu agu ambaro nga ga vidio mi angihe? Ya mo ũngbarago ho dagba gimi aũngbarago yo nga gu du na ngbanya dagbaha na sangbaatoro? Ya mo si na gu kiriso ahe rogoho nga ga sangbaatoro, kpia agu aboro naaima kpiko watadu gu kura ngbatunga ahe du wa gere? Ya mo si nasa sunge manga ngua watadu sunge mangu si naangera wa agu aũngbarago amanganga boro gbegberẽ ya?’ Rengo ngaha nga, agu aũngbarago du na agu apangbanga rogoho duwa paturẽ, anga si dunduko du na ngbanya dagbaha na sangbaatoro te. Ho mo awisigo gamo aũngbarago ni, mo mangi diaberã ka manga agu asiapai nga gu nika undo ro mo du tuturũ ti ai guhe Yekova asogaha. Si naida ani mangi ai gupai rengbe ani ka mangaha tipa ka banda ‘sangba kpotoraniyo si du ni ruru he’ barabangiri gaani Mbori.​—Amo. 24:16. *

13. Ginipai si aidanga ani naamangaha ya?

¹³ Ka mo naapekanga apangbanga tipa adaimona ya. Rogo gi bangiriba re, si naida ani wiriki gu kpiapai Yesu amoihe. (1 Pet. 2:21) Mbata fu Yesu ye ku auru kpotosende, ko aaraka ngbangbaturũ yo, na ko aima ino badungu apai tipa Satana gbiati adaimona. Ono ko anaapekanga apangbanga tipa agu apai gu gbegberẽ atoro re anaamangaha te. Yesu aaida kadu ni dezire Yekova, angianga kadu ni batakipande pa Satana ya. Ani rengbe ka wirika Yesu ni zanga ani gbandaka apangbanga tipa adaimona. Gupai  si aida ani naamangaha kuba gure nga kaa yugo gupai na gaani afugo nga ‘wenepai hiisi kpotoraniyo niuka auka,’ na gu wenepai re nga, rengo.​—Tam. 45:1.

14-15. (a) Tipagine si aidanga ani naagunde ti ni be gbegberẽ atoro ya? (b) Gini gopai duho nayugo gupai nga Yekova nabanda gako aboro abanda areme?

¹⁴ Ka mo gundenga be gbegberẽ atoro ya. Rogo zegino areme, gbegberẽ apai ima rengba ka manga rani. Béno, kaza, watadu kpio ima rengba ka ye ka ani ainongo ya. Ono si aidanga ani berẽ gupai nga gbegberẽ atoro du ye na agu apai re te. Ziazia Kekeapai naya béno watadu “agu apai boro ainongo nga si nika manga ya” rengbe ka manga ai boro. (Batu. 9:11, NW.) Tipa adaimona tigayo, Yekova ima yugo gupai nga ko ima du na bakere ome tiko kisusi yo. Ni kpiapai, Mbori aambunga Satana ko imi Eyobo te. (Eyo. 2:6) Ti rago Moize, Yekova aima yugo gupai nga ko adu na bakere ome tiko kisusi agu abinza naadu Ezipeta yo. (Gate 8:18; 9:11) Yekova afu ome fu Yesu, Yesu ki yugu gupai nga ko na bakere ome kisusi Satana gbiati adaimona ho ko ado yo ni kusayo ngbangbaturũ yo ku auru kpotosende. Na barambeda kumbatayo, i nika bayo ku rogo gu due zanga mburuhe, yo i nikaa dunga ni na rengba ka imisa aboro ya.​—Yugo. 12:9; 20:2, 3.

¹⁵ Ani nabi bakere gopai abi nga gu nayugo gupai nga Yekova nabanda gako aboro abanda areme. Oni berẽnga kurii gipai re: Ani natungusapai kini yugu rengo rogo apapara zegino dunduko. (Mt. 28:19, 20) Ni sangbana gipai re, ani nakusa gu gbegberẽ mangaapai nga ga Bakitingbanga ku yangura. Nirengo, ka i niya Satana na rengba ka rugusa gaani asunge dunduko, ka ko ima rugusaha, ono ka ko rugusinga ha te. Si aidanga ani naagunde be gbegberẽ atoro te. Ani ima ino gupai nga “bangiri Yekova naora koyo na kono auru kpotosende no dunduko, ka yugo tiko na pa nyaka fu agu yo du kpotoyo yo ziazia koyo du ko ni.” (2 Peka 16:9) Ka ani du ni rururani fu Yekova, adaimona yengo na nyenye gbegberẽpai kuti rani te.

16-17. Oni funga kpiapai nibipa gu wingbaduse si aidaha tipa ka sovura kuti gbegberẽ atoro.

¹⁶ Si naida aida ani du na wingbaduse tipa ka sovura kuti gbegberẽ atoro, gbe ho ani  agbiatirani ni na sogote be agu abakurearani gbiati agumerani nabakabangiriyo nga gbegberẽpai ima rengba ka manga rani ka ani akodanga tirani na yo ya. Ono Yekova nafu maku fu agu aboro nayugo wingbaduse. Oni bingo kpiapai nga ga wirina sa du rimori nga Erica, nga guri naraka Ghana yo. Erica adu na garãri 21 ho ri atona wisigo Ziazia Kekeapai ni. Mbiko gupai nga bari angia gu barumbatayo rogo pambori nanaamanga sunge abinza, si adu nga ri naarimiso tiri arimiso a ku rogo gu sinoyo nga ga sangbaatoro nga gu nanaakoda ri gu pasio i anaafuhe ni motumo fu ga bari ambori. Ho Erica aká ni ka ri gu pasio re, gari aborokporo abihe nga gure angia senga ambori. Gari aborokporo aidi kuti gupai nga ambori nika ye aye na akaza berã gbiati akaza kpotose kutiyo.

¹⁷ Ga Erica aborokporo aˈasadi ka manga ri ngbaome ri rimisi tiri ku rogo gu sino re, ono ri aima ká ka rimiso tiri ku rogoho, wa si avura du vurũ nga si aye ki da ti gupai nga ri guari kusayo kporo. Kura aDezire Yekova aidihe furi ri sungu fuoyo. Rogo gu gene re, Yekova afu maku fu Erica ri du na vovo aborokporo beri nga akurari aidipase, nga aguyo naaye kada furi wa awirinari. (Mk. 10:29, 30) Wa si avura du nga agume Erica aima gindigo ri na zavura ki zo gari ahe, ri anye niruru ri fu Yekova, ki zi bapatiza, na ri awere nga nazakigene. Ri agundenga be adaimona te. Na Erica ape gupai nibipa gari aborokporo nga, “Mi naamanga kparakpee na aˈuru dũ nga gimi aborokporo gbia gu maku nga ga ino Yekova na kidu na gu ranirii naye mbiko iriso gaani Mbori nyemuse.”

18. Gini amaku ani agbiaha ti kido ani kuti Yekova?

¹⁸ Anga ani dunduko nika gbiatirani na ngbatunga gu kere asada nga ga idapase re te. Ono tie, ani dunduko si aida ani sovura kuti gbegberẽ atoro na kidu na kido kuti Yekova. Ka ani mangihe wo, ani nika gbia badungu amaku, na ani nika bandatirani tipa ka Satana nangingo rani na gako aziree ya. Berewe a, ani ambunga gunde be adaimona si rugusi rani ti iriso Yekova te. Gu nyakipaha anyaka gbe nga, ani nika nyakasa gaani pagume na Yekova. Gu bawiriki nangia Yakoba akepai ki ya, “Oni fú tironi fu Mbori; ono oni ká fu bakitingbanga, ko ki oro be roni. Oni mbédi na Mbori, ko ki mbedi na oni. Oni gírisi beroni, oni nga aboro ingapai; oni mbákadi kpotoroni yo, oni nga aboro berãpai ue.”​—Yak. 4:7, 8.