1. Ginipai ga Mbori amoyambu dunduko aida ka mangaha, na tipagine? (Oni bi gu sura duti kpotoho.)

YESU KRISTO azinahe fu apefuoko nga i “ndú, . . . ki sa arikaaboro dunduko ni abawiriki.” (Mt. 28:19) Ga Mbori ruru amoyambu dunduko naida ka wirika wai rengbe yo ka ‘digiso’ gi sunge i nafuhe fuyo i mangihe re wenengai. (2 Tim. 4:5) Gu kurapai berewe nga, gi sunge re na nyanyakipaha kisusi ai sunge rogo raka yo, na si naida i mangihe niˈipiˈipihe kisusi asunge dunduko. Ono tie, si ima rengba kadu ni mbumbuhe ka dia bakere regbo kuti sunge tungusapai wa gu ani akpinyemuhe.

2. Gini akpakarapai ani agbiatirani na ni wa ani adigiso gaani sunge fu Mbori?

² Kura nyanyakipa asunge kinaho si aida ani di regbo kutini na ki fu omerani tipaha. Si ima rengba kadu nga ani namangasunge marã tipa dungu asa ka gbia marã tipa agu ahe ani na gaani aborokporo aidaha tipa kaa raka. Si ima rengba kadu ni mbumbuhe furani ani mangi agu asunge dunduko si aida ani mangihe rogo gaani ngbadimokporo, watadu ani ima rengba kaa woka, kadu rogo bakere gberãrago watadu kadu rogo agu aigirã naye mbiko gbinza. Waigu rengbe ani ka digiso gaani sunge fu Mbori wenengai ani ki vura du vurũ rogo gu ngbatunga akpakarapai re?

3. Agu afugo Yesu du rogo Matayo 13:23 nasarani ani da kuti gini digisopai?

³ Ka si du nga agu apai du tipa rani nasa gupai nga ka ani dinga bakere regbo kuti ga Yekova sunge ya, si aidanga rago gberẽ tirani te. Yesu aima ino gupai nga anga aboro dunduko nikaa kusa gu zuzuhe nga ga Kindo kina kubani sa te. (Oni gedi Matayo 13:23.) Yekova nabi agu apai dunduko ani amangaha wa rengbe omerani na ni tingba gako sunge na nyanyakipaha gbe. (Eb. 6:10-12) Ono tie, ani ima rengba ka bihe nga agu apai du tipa rani ima rengba ka mbugene furani ani mangisunge fu Yekova bakere gbe. Rogo gi kekeapai re, ani nika wisigopai tipa wai rengbe ani ka sa ga Mbori sunge si du ni nyanyakipa  pai kisusi rogo gaani raka yo, wai rengbe ani ka sa gaani raka ni taataha, na wai rengbe ani ka mbakada gaani gene tungusapai gbiati yugopai. Ono tie, rogo gupai yo nga ka digiso gaani sunge wenengai nga gine?

4. Rogo gupai yo nga ka digiso gaani sunge wenengai nga gine?

⁴ Ka digiso gaani sunge wenengai nga ka manga gaani sunge tungusapai gbiati yugopai ni bakerehe wa rengbe omerani na ni. Ono digiso gaani sunge wenengai abingo kina pa gu regbo sa ani adiaha kuti tungusapai te. Gu ndupai ani atungusapai ti ni na nyanyakipaha fu Yekova. Ka ani atungusapai bambiko gupai nga ani ima kpinyemu Yekova gbiati akuarani, ani nikaa manga gaani sunge nga ga aKristano na ngbaduraniyo dũ. * (Mk. 12:30, 31; Koro. 3:23) Rogo gupai yo nga ka mangasunge fu Yekova na ngbadurani yo dũ nga ka fu tirani, kini mangisunge na gaani ome ni bakerehe gbe tingba gako sunge wa rengbe omerani na ni. Ho ani arugatirani ni na gupai nga pa momu du ngaha ka mangasunge tungusapai, ani naˈasada ka tungusa wene pangbanga fu badungu aboro wa rengbe omerani na ni.

5-6. Oni funga kpiapai nga gu nayugo pa wai rengbe gu boro du regbo beni tooni ka maa sunge tungusapai ni gupai paha nanyaki kisusi rogo gani raka yo.

⁵ Oni berẽnga pa paranga kumba nga guko ta manzigo naima ngba tiko. Ko nakpinyemu kaa ta manzigo ti ai gu regbo ko aida ka taha ti ni. Sidu, ko bi sunge nga ga ta manzigo ti digido aposo fu aboro rogo kura babaga riahe sa. Ono tie, gu marã ko agbiaha ti manzigo arengbanga tipa agu ahe dunduko du ko na zingoho te. Sidu, ko tona sunge bagaahe fu boro nga gu ko amangaha tona Rago Sa Sunge ku rago Bisue. Wa vura duhe nga ko nadia bakere regbo kuti sunge bagaahe, ta manzigo nga gupai ngba tiko kisusi. Ko na nyemu ka kiiso gako birĩ ino ta manzigo tipa gupai nga tabia da ni gu sunge marã ko amangaha ti aregbo dũ. Ono wa vura duhe wo, ko nagbata amomu tipa kaa ta manzigo, ka si vura du nga ko nataha tipa wiri guru regbo vurũ.

⁶ Wakina gure a, si ima rengba kadu nga mo adianga bakere regbo kuti sunge tungusapai wa mo akpinyemuhe te. Ono wa vura duhe wo, si nga gu sunge ngba mangaha tiro. Mo naˈasada ka mbakada gamo gene tungusapai tipa gupai nga ka rimiso wene pangbanga ku ngbadu aboro yo. Ono mbiko gupai nga badungu apai duho si aida mo mangihe, mo ima rengba kaa bakabangiro tipa wai  rengbe mo ka sa sunge tungusapai si du ni gupai nyakipaha kisusi rogo gamo raka yo.

7-8. Waigu rengbe ani ka wirika gu bipai Yesu adu na ni tipa ga Mbori sunge?

⁷ Yesu amoi bawene kpiapai rogo gu gene yo ko aabi mangasunge fu Mbori ngbaha. Gupai paha anyaki kisusi fuko rogo raka yo angia tungusapa ga Mbori Kindo. (Yo. 4:34, 35) Ko anaandu anunguro nga akama amairo tipa ka tungusapai fu badungu aboro wa omeko arengbe na ni. Ko anaagbata amomu ti aregbo dũ tipa ka fura fu aboro rogo akpuyo na rogo ai kura ba. Yesu amoi mangasunge fu Mbori ni nyanyakipa pai kisusi rogo gako raka yo.

⁸ Ani rengbe ka wirika Kristo ni gbata ani amomu tipa ka tungusa wene pangbanga fu aboro ti ai gu regbo rengbe ani ka tungusaha ti ni na rogo ai gu ba rengbe ani ka tungusaha rogoho. Ani na nyemu ka mbupa kura gaani weneapai tipa ka mangasunge tungusa wene pangbanga. (Mk. 6:31-34; 1 Pet. 2:21) Kura aboro kinaho rogo dungurati du na rengba ka mangasunge ni kparakpara abazakigene, abazakigene, gbiati amoundo abazakigene. Gu kura aboro ima wirika kura fugo watadu ima ga ku rogo gu ba du na zingo abatungusipai rogoho. Ono tie, agu aboro namanga bakere sunge tungusapai nga agu abatungusipa Kindo adunga rengba beyo ka manga agu apai re ya, ono i natungusapai ni bakerehe wa rengbe omeyo na ni. Singia ginigu nga ginigu, Yekova ayanga furani ani mangi gupai arengbanga na omerani ya te. Ko naida gupai nga ani dunduko gbia ngbarago ti gaani ziazia sunge fuko wa ani atakapande “gu wene pangbanga . . . nga ga gu taarimo nga ga betedi Mbori.”​—1 Tim. 1:11; Pa Rug. 30:11.

9. (a) Waigu Pauro amoi sunge tungusapai ni nyanyakipa pai kisusi rogo gako raka yo zavura ho ko anaamangasunge marã ni? (b) Ginipai Amokedi 28:16, 30, 31 ayugoho nibipa gu bipai Pauro adu na ni tipa gako sunge fu Mbori?

⁹ Gu mokedi nangia Pauro amoi wene kpiapai ni maa ko sunge tungusapai ni nyanyakipa sunge kisusi rogo gako raka yo. Ho ko adu ni Korinda yo ti regbo gako ue nunguro ni mokedi, marã adu beko tooni, na si ki sa gupai nga ko mangisunge mbakada bamburoko tipa bete regbo. Ono tie, Pauro aabingo sunge mbakada bamburoko ni gu sunge paha anyaki kisusi rogo gako raka yo te. Ko anaamangasunge tipa ka undo tiko tingba ga Mbori sunge tipa gupai nga ko rengbe ka takapande wene pangbanga “gbua” fu aKorindo. (2 Kor. 11:7) Wa si avura du nga Pauro anaamanga sunge marã amanga, ko anaamaa sunge tungusapai kindi ni nyanyakipa pai kisusi rogo gako raka yo, na ko anaatungusapai na arago Sabiti dũ. Tingbafuo agu apai naadu tipa Pauro ariatihe, ko aye kadu na rengba ka maaberãko gbe fuo sunge tungusapai. Ko “atona ka fu tiko nyanyaki sa tungusapai, kini yugu gupai fu aYudo nga Yesu nga Kristo.” (Amo. 18:3-5; 2 Kor. 11:9, NW) Kusa, ho Pauro adu ni niziziko ku kporo Roma yo tipa agarã ue, ko anaamanga dezirepai fu agu aboro nanaandu kaa biko na ko anaakeka awaraga a. (Oni gedi Amokedi 28:16, 30, 31.) Pauro adiberã ka zanga mbu ai pai si gberesipa gako sunge fu Mbori. Ko akepai ki ya: “Wa du ani na gi [sunge] re tie . . . , ani arungbura nga te.” (2 Kor. 4:1) Wakina Pauro, ani ima rengba ka sa gu sunge nga ga Kindo si du ni nyanyakipa pai kisusi rogo raka yo, si ki vura du vurũ nga ani nadia regbo kuti mangasunge marã.

10-11. Waigu rengbe ani ka digiso gaani sunge fu Mbori wenengai si ki vura du vurũ nga ani na kaza kpotose?

¹⁰ Ka si du nga ani na rengba ka tungusapai ni bakerehe kporo na kporo wa ani akpinyemuhe te mbiko gbinza watadu mbiko gupai nga kpotorani wenengai te, ani ima rengba ka tungusapai rogo kura agene yo. Agu abatungusi wene pangbanga naadu rogo bambata sa kama agarã anaatungusapai fu aboro rogo ai gu ba i anidu rogoho. I anaamangasunge na ai gu momu i anigbiaha tipa ka fura tipa rengo​—kporo na kporo, gbaiga, gbiati ho i anaambakadanga tiyo ambakada ni tipaha ya​—sidu, i anaatungusapai rogo ai gu ba i “anaagbia” aboro rogoho. (Amo. 17:17; 20:20) Ka si du nga rengba berani ka ndu tipa gbanga regbo te, ani ima rengba ka sungo rogo gu ba badungu aboro andu  rogoho, tipa ka tungusapai fu agu aboro nasusa pati rani. Watadu ani ima rengba ka manga dezirepai ho ani ambakadanga tirani ambakada ni tipaha ya, ka manga dezirepai ni keka awaraga, watadu ka manga dezirepai rogo terefuni. Badungu agu abatungusipai adunga na rengba beyo ka tungusapai kporo na kporo ya mbikopa zanga du kpotoyo wenengai watadu mbiko kura akpakarapai ima rengba ka gbia bakere ngbarago ti ngbatunga agi agene tungusapai re.

¹¹ Mo ima rengba ka digiso gamo sunge fu Mbori wenengai ka si vura du vurũ nga kpotoro wenengai te. Oni bingo gu kpiapai berewe nangia ga gu mokedi nangia Pauro. Ko aya: “Mi rengbe na manga apai dunduko rogo gu ko nanyakasa re.” (Frp. 4:13) Pauro aima ida gu nyakasaro re ti gu regbo ko ati na kaza ko nindu kura nunguro sa ni mokedi. Ko ape gupai fu aGaratio nga: “Mi atungusi wene pangbanga fu roni ni bambata ha mbiko kaza kpotore.” (Gara. 4:13) Wakina gure a, gamo kaza kpotose ima rengba ka fu amomu foro mo tungusi wene pangbanga fu kura aboro, wa fu amunganga, agu aboro nangerafuo aborokaza, gbiati gu kura aboro nangerafuo ro. Badungu agi aboro re nidu basunge yo ho abatungusipai atungusapai ni kporo na kporo.

12. Rogo gupai yo nga ka mbu bangirani “ni ruru he” nga gine?

¹² Yesu aya: “Ima boro nga kina bangirise. Were ka bangiro du ni ruru he, kpotoro yo ki hi be imarago dunduko.” (Mt. 6:22) Ginipai du ko aaida ka pehe? Gupai ko aaida ka pehe nga si naida raka rani du ni taataha watadu si naida ani moiberãrani sa bangisa sásá ki zanga mbu kurapai si gbeberã rani kusayo ti ni. Yesu nitiko aima maa kpiapai rogo gipai re yo ni maa ko berãko gbe sa ga Mbori sunge rogo gako raka yo, na ko ayugu gupai fu gako abawiriki nga i moiberã yo gbe sa iriso Yekova gbiati Gako Kindo. Ani rengbe ka wirika Yesu ni  maa ani gaani sunge nga ga aKristano ni bambatapai rogo gaani raka yo, kini “gbáta [ga Mbori Ngbi] mbata, na gako rurupai.”​—Mt. 6:33.

13. Ginipai rengbe ka undo rani ani moiberã rani gbe sa gu gaani sunge nga ga aKristano?

¹³ Gene sa rengbe ani ka maaberã rani ngbaha sa gaani sunge fu Mbori nga ni sa ani raka rani si du taata, tipa wa ka ani rengbe ka dia bakere regbo kuti undo aboro i ye ka ino Yekova na ki kpinyemuko. * Ni kpiapai, ya mo ani rengbe ka aria regbo gaani sunge marã tipa gupai nga ka dia bakere regbo kuti sunge tungusapai vuru poso yo? Ya mo ani rengbe kaa dia regbo tooni kuti agu aũzambuasitise rengbe kaa dia bakere regbo berani?

14. Gini aˈariapai kura arogotise sa amangihe tipa gupai nga kaa dia bakere regbo kuti sunge tungusapai?

¹⁴ Gere nga gupai kura bakumba sa rogo dungurati du rimoko nga Elias amangihe na diako. Ko aya: “Ani aadunga na rengba ka mangasunge abazakigene nibasa te, ono apai adu kinaho ani arengbe ka mangaha tipa kaa dia bakere regbo kuti sunge tungusapai. Sidu, ani amangi rukutu apai tipa gupai nga ka dia bakere regbo kuti sunge tungusapai. Ni kpiapai, ani ambu ngbeka badungu ahe, ki mbu dia bakere regbo kuti zambuasitise, na ki sana gaani abairasunge i aria gaani regbo sunge tipa gupai nga bakere regbo du berani tipa tungusapai. Ni sangbana gipai re, ani adu na rengba kaa manga dezirepai nyemu, kaa wirika Ziazia Kekeapai na badungu aboro, na zavura kini ndu tipa tungusapai bebere poso bara ue vuru diwi yo. Nairiwo gu pa ngbarago nangiaha re!”

15-16. Ringbisihe kuti 1 Timoteo 4:13, 15, waigu rengbe ani kaa mbakada gaani agene tungusapai kindi wangia ani abatungusi wene pangbanga? (Oni bi gu sanduki a nga “ Agu Asásá Rengbe ka Undo Re Mi Digisi Gimi Sunge fu Mbori Wenengai.”)

¹⁵ Gu kura gene rengbe ani ka digiso gaani sunge ngbaha wenengai fu Mbori nga ni mbakada  ani gaani agene tungusapai. Kura asunge kinaho si aida i naaraba agu aboro araba namangaha dedede tipa i kiisi gayo inohe gbiati birĩ-sunge. Kina gu bangisapai re a du tipa abatungusipa Kindo. Si naida ani naandu kumbatayo kaa wirika wai rengbe ani kadu na inohe gbe tipa wai ka tungusapai wenengai.​—Snz. 1:5; oni gedi 1 Timoteo 4:13, 15.

¹⁶ Ono waigu tie rengbe ani kaa manga sonakumbatayo kindi rogo gaani sunge tungusapai? Ni maa ani berãrani gbe fuo agu arugapai ani agbiaha ti regbo gu Dunguratise Nga ga Gaani Raka na Sunge, nga gu namanga na aposo dũ. Gi dunguratise re na wene rabahe rogoho nga gu rengbe ka undo rani ani mbakadi gaani agene tungusapai. Ni kpiapai, ho basungu-rii-kiti afu rugute ni fu agude sukuru, ani rengbe ka ngera tipa agu aberãpai rengbe ka undo rani ani mangi sonakumbatayo rogo gaani sunge tungusapai yo. Ani rengbe ka maa agu aberãpai re ku rogo mangapai yo ti gu regbo ani ka tungusa wene pangbanga berewe fu boro. Ani ima rengba ka sana gaani bangerekurii badona nga ga tungusapai tipa undo watadu ani ima rengba ka kura na ko gene tungusapai yo, watadu ani ima rengba ka tungusapai na gu batungusapai du na inohe, bazakigene, watadu babi adungurati. Wa ani nika ino wai ka mangasunge wenengai gbe na agu aũsunge dunduko du dagba agu Aũsunge Nga ga Yugopai, ani nikaa gbia bakere ngbarago ti gaani sunge tungusapai gbiati yugopai.

17. Gini sangbanapai mo nika gbiaha ka mo aadigiso gamo sunge wenengai fu Mbori?

¹⁷ Nairiwo gu bakerepa momu Yekova nafuhe furani nga ani du ni gako “abadiasunge”! (1 Kor. 3:9) Ka mo ‘idipa agu apai nangba’ watadu agu apai du na nyanyakipaha, na ki moiberã ro sa gu sunge nga ga aKristano, mo nikaa ‘mánga pa Yekova na ngbarago.’ (Frp. 1:10; Tam. 100:2) Nidu mo ni bamangisunge fu Mbori, mo ima rengba kadu na gu kido nga ko nika fu gu ome afu foro mo aidaha tipa ka digiso gamo sunge, ka mo vura kaa gbiatiro na kina gini akpakarapai vurũ. (2 Kor. 4:1, 7; 6:4) Singia agu apai du tipa ro nasa ro mo naamanga dezirepai tooni watadu ni bakerehe, mo ima rengba ‘kadu na gupai ka mo tambua tiro’ watadu ka mo ngi mbikoho ho mo amangasunge ni fu Mbori na ngbaduroyo dũ. (Gara. 6:4) Ho mo adigiso gamo sunge ni wenengai fu Yekova, mo nayugo gamo nyemuse tipa ko na tipa akuaro. Ka mo ‘aamangaha wo, mo nika bátasa tiro na aguyo nagiapai ngba ro.’​—1 Tim. 4:16.