1-2. (a) Gini agene Satana nanangi aboro ngbaha? (b) Ginipai ani ka sakapai tipaha rogo gi kekeapai re?

SATANA, nga ‘ba’ ziree aima digido ni nangi aboro naatona kinaho aboro aenge aenga ni. (Yo. 8:44) Kura gako aziree nakoda ziree ayugopai nibipa kpio gbiati raka tingbafuo kpio. Agu ayugopai re nga mburu gu badungu asino gbiati sangbaatoro du areme. Ni sangbana gipai re, kura awirinarani ‘nasovura zaaza tipa idapase’ ho boro akpi ni rogo gayo ngbadimokporo watadu rogo gayo dagbarago.​—Yuda 3.

² Ka mo gbiatiro na ngbatunga aˈasada wa gure, ginipai rengbe ka undo ro mo ru nyanyaki tipa gupai Ziazia Kekeapai ayugoho tipa kpio? (Ef. 6:11) Waigu rengbe mo ka fu wasa gbiati nyakasaro fu kuaro Kristano nga guni si narengbe kadu nga i nasosoda ni ni rimisi tiní ku rogo agu asino naba gberãrago ti Mbori? Gi kekeapai re nika sakapai tipa gu undo Yekova nafuhe furani. Ni bambatapai, ani sakingo pai tipa gupai Baibiri apehe tipa kpio.

3. Sangbana bambata ziree angia gine?

³ Ga Mbori ringbisapai aadunga nga aboro nikpi te. Tipa gupai nga aAdamu na Eva raki nyeanye kindi, si aaida i gisangba Yekova, nga guko naafu gu taata zinahe fuyo nga: ‘Gu ngua nga ngua ina wenepai na gbegberẽpai ka oni rí nga zuzuhe ya, bambiko ni gu rago ka oni ri zuzuhe oni akpí akpi ni rengo.’ (Bam. P. 2:16, 17) Fuo gure, Satana arimisi tiko ku rogo gupai re. Ko afura rogo wo yo fu Eva ki ya: “Oni akpí nga wa sa te.” Si nafu kina gberãrago nga, ri aidi kuti gu ziree re na ki ri gu zuzungua re. Kusa, kumbari aye ki ri gu zuzungua re a. (Bam. P. 3:4, 6) Rogo gi gene re, ingapai gbiati kpio kini rimi ku dagba aboro.​—Rom. 5:12.

4-5. Waigu Satana andu kindi kumbatayo kaa nanga aboro?

 ⁴ AAdamu na Eva akpiki, kina wai Mbori agumbaha. Ono Satana aambunga gumba ziree tipa kpio te. Fuo bete regbo kusa, ko atona kaa kusa kura aziree. Ziree sa dagba agu aziree re nga gu yugopai nga ho boro akpi ni, boroni nakpi, ono toro ni kini raki kindi, isoke rogo ngbii atoro. Gi ziree re aima digo ninangi badungu aboro rogo dungu agene yo dakuti gi gaani regbo re.​—1 Tim. 4:1.

⁵ Tipagine badungu aboro aida ti ni kuti ga Satana aziree? Satana ima inopa wai aboro abi kpio na ko namangasunge na gipai re tipa ka nanga yo. Wadu he nga i akusi rani ani raki nyeanye kindi, ani aidanga ka kpi te. (Batu. 3:11) Ani nabi kpio ni vurarani.​—1 Kor. 15:26.

6-7. (a) Ya mo Satana na diabese wa ko aˈasada ka igo gu rengo du tipa kpikpi aboro? Oni sakingo rogoyo. (b) Waigu Ziazia Kekeapai aundo rani tipa ka ani naagundenga be kpikpi aboro ya?

⁶ Wa vura duhe nga Satana namanga bakere ome tipa ka igo gu rengo du tipa kpio be aboro, gu rengo re ni igiigihe te. Nirengo, badungu aboro awere ima ino gupai Ziazia Kekeapai ayugoho tipa kpikpi aboro gbiati gu maabangirise du tipa yo, na i natungusa gipai re fu kura aboro. (Batu. 9:5, 10; Amo. 24:15) Agi arengo re nafu wasa furani na kini banda rani be gunde gbiati kapa tipa gupai namanga ho boro akpi ni. Ni kpiapai, ani agundenga be kpikpi aboro te, na ani agundenga a nga gbegberẽpai nika manga yo te. Ani ima ino gupai nga i arakanga te, na i arengbanga ka manga boro gbegberẽ te. I wa agu aboro du rogo dudunguro rame. (Yo. 11:11-14) Ani ima ino gupai a nga kpikpi aboro ainongo pa susa regbo te. Sidu, ti regbo zingabekpio, zavura agu aboro naima kpi tipa akama agarã nika bihe wa ka i ya wiri guru regbo du gbua susi wakina mabangirise.

⁷ Ya mo mo aidanga kuti gupai nga gu rengo du tipa kpikpi aboro ima du ziazia, ni taataha na ni gupai boro agia tiní agia na ni te? Si kia ti ga Satana aziree nga gu du ni vunduvunduhe! Kupati gu nga ga nanga aboro, agu aziree re nayugo gupai tipa Bakusirani angianga rengo ya. Tipa gupai nga ani rugutirani wenengai na pa gu imisiri Satana naye na ni, ani nika wisigo agu asanahe nga: Waigu ga Satana aziree nayugu gupai tipa Yekova angianga rengo ya? Waigu si nasa aboro i du na gu berãpai nga ndupai ho tipa boro idi kuti ga Kristo motumo te? Waigu si nakiisi gu imisiri gbiati rungo nga ga aboro?

8. A wa duhe rogo Yeremaya 19:5, wai du ga Satana aziree ayugo gupai tipa Yekova angianga rengo ya?

⁸ Ga Satana aziree tipa kpikpi aboro nayugo  gupai tipa Yekova angianga rengo ya. Agu aziree re nakoda gu ziree yugopai nga kpikpi aboro nambu rogo gbigbi we. Agu ayugopai re nayugo gupai tipa Mbori angianga rengo ya! Wai du duhe wo? Agi ayugopai re nasa aboro i naabihe nga gu Mbori nga ga nyemuse ko nga gbegberẽ boro wakina Bakitingbanga. (1 Yo. 4:8) Gupai re nasa ro mo du wai? Gu nyakipaha gbe nga, si nasa Yekova ko du wai? Ka pe rengo, ko ima soga ngbatunga gbegberẽ apai dunduko.​—Oni gedi Yeremaya 19:5.

9. Wai du ga Satana aziree asa gupai nga ka aboro idinga kuti gu ga Kristo motumo saki yo pai tipaha rogo Yoane 3:16 na 15:13 ya?

⁹ Gu ga Satana aziree du tipa kpio nasa aboro i du na gu berãpai nga ndupai ho tipa boro idi kuti ga Kristo motumo te. (Mt. 20:28) Gu kura ga Satana ziree nga aboro na gu mbisimo tiyo akpingo ya. Ka i niya rengo du nga gupai re, aboro dunduko kaa raka nyeanye kindi. Ka Kristo afunga ungako ni motumo tipa rani tipa ani gbia nyenye unga te. Oni moi gupai ku berãroni yo nga, ga Kristo motumo nga gu bakere mangapai kisusi nga ga nyemuse kura boro aamanganga ha mbata fu aboro ya. (Oni gedi Yoane 3:16; 15:13.) Oni berẽnga pa wai du aYekova na Wiriko ho i abi agu ayugopai ni nasa gu nyanyakipa gamahe re ni guhe paha anyakanga ya!

10. Waigu ga Satana aziree nibipa kpio nakiisi gu imisiri gbiati rungo nga ga aboro?

¹⁰ Ga Satana aziree nakiiso gu imisiri gbiati rungo nga ga aboro. Ho gude akpi ni, i rengbe ka pe gupai fu avunguru nga Mbori du di ru, isoke tipa u du ni maraika ngbangbaturũ yo. Ya mo gi ga Satana ziree re nazogosa bete gayo imisiri watadu si nakiisoho? Aboro aima mangasunge na gu ziree yugopai nga ga we-iferno tipa ka yugo gupai nga rungosi boro ruaru, kodihe na zo agu aboro kuti ngua natikango na agu ayugopai nga ga Kanisa. Ringbisihe kuti kura buku sa nga gu nafura tipa gu ba gumba-ngbanga nanaarungosi agu aboro nanaatikango na agu ayugopai nga ga kanisa, si ima rengba kadu nga bete agu aboro nanaamanga gi kere gbegberẽpai nga ga zo aboro re adu na gu berãpai nga, gupai i anaamangaha gbua na agi aboro re angia ka “yugo wai fuyo du we-iferno” tipa i saberã mbata fu kpiyo na ki bati be we-iferno. Rogo kura aringara, aboro namanga riahe fu agu atitayo naaima kpiko na kini fu amotumo tipa ka irisa yo watadu ka gbia bandahe beyo. Kura aboro nazungodi agu atitayo naaima kpiko tipa ka i funga mbusa fuyo ya. Si nafu kina gberãrago nga, agu aida du mburuhe rii ga Satana aziree ayengo na ndikidi wasa te. Kuba gure, si naye na kina bakere bakabangirise watadu gunde.

11. Waigu rengbe agumerani watadu abakurearani ka sosoda rani ani mangi gupai adunga mburuhe rii Ziazia Kekeapai ya?

¹¹ Nyemuse tipa Mbori gbiati Fugoko nanyakasa rani ani gisangba Yekova zavura ho agu agumerani watadu abakurearani duadu na wene bipai aˈasada ni ka sosoda rani ani rimisi tirani ku rogo gu mangaapai yo du tipa kpikpi aboro adunga mburuhe rii Ziazia Kekeapai ya. I ima rengba ka asada ka sarani zee zi rani, isoke, ni peyo gupai nga ani akpingo nyemu gu boro kpi te, watadu ani abingo ni na irisa te. Watadu i ima rengba ka pe gupai nga gaani mangaapai nika sa gu boro kpi ni imisi agu aboro du ni ungayo rogo kura gene yo. Waigu rengbe ani ka songoda gu rengo nga Baibiri? Mo bingo wai rengbe mo ka mangapai kuti agi abangua rengo nga ga Baibiri re.

12. Gini asino nabipa kpikpi aboro si naima du ziazia nga mburuhe rii Ziazia Kekeapai te?

¹² Oni diberã ka ‘kpara’ tironi kusayo ti agu aida gbiati asino adunga mburuhe rii Ziazia Kekeapai ya. (2 Kor. 6:17) Rogo gu rago nga Caribbean, badungu aboro na gu ida nga fuo kpio boro, “toroni” ima rengba ka nye ho kindi tipa ka mbusa agu aboro nanaambusa ni. Kura buku sa ape gupai nga, “toroni” ima rengba kaa “fuda aboro rogo dagbarago.” Rogo kura aba vuru Afirika,  si nga sino aboro kaa dada abitirobi rogo gu kporo boro nakpi rogoho na kini sa asura ni si naangera kuti vuro bambu. Ndu manga gipai re nga gine? Kura aboro nape gupai nga si aidanga kpikpi aboro naabi tiyo te! Wangia ani ga Yekova amoyambu, ani aidanga kuti agu apai watadu manga agu apai nasongoda ga Satana aziree te!​—1 Kor. 10:21, 22.

13. Ka si du nga sino kinaho mo ainongo rengo tipaha nzunzu ya, ginipai si aida mo mangihe, a wa peyo ho rogo Yakoba 1:5?

¹³ Ka si du nga sino kinaho mo ainongo rengo tipaha nzunzu ya, mo mangi kparakpee fu Yekova ki sanako tipa gako tatamana. (Oni gedi Yakoba 1:5.) Fuo gure, mo mangi wetekapai rogo gaani awaraga yo. Mo sana agu abaakumba du rogo gamo dungurati ka mo bihe nga si rẽarẽ wo. I agumbanga gupai foro si aida mo mangihe te, kuba gure, i rengbe ka yugo bara agu abangua arengo foro nga ga Baibiri, wa agu i nasakipai tipaha rogo gi kekeapai re. Ho mo nika manga agu apai re ni, mo nika raba gamo “berã” nga ga wisigopai na si ki undo ro mo kpara ‘wenepai ti gbegberẽpai.’​—Eb. 5:14.

14. Gini agene rengbe ani ka ne kotosa aboro ngbaha?

¹⁴ ‘Oni mángi apai dunduko sa taasa rimo Mbori. Ka oni moi nga ũkota fu boro ya.’ (1 Kor. 10:31, 32) Ho ani adiaberã ni singia ani naida ka rimiso tirani ku rogo gu sino yo nga ga aboro watadu sino atitase, si naida aida a ani berẽpa gupai rengbe gaani diaberã ka mangaha na gu sangbakpotoseyo nga ga kura aboro, gbe akuarani aKristano. Si aidanga ani kotosi boro te! (Mk. 9:42) Berewe a, si aidanga ani naaba gberãrago ti agu aboro angianga aDezire Yekova ya te. Nyemuse nika fõngbaduraniyo ani fura fuyo rogo irisa yo, na mangapai wa gure nataasarimo Yekova. Si aidanga ani naapaa na aboro watadu kaa sawia gayo asino te. Oni tingidi gupai nga nyemuse na ome ti ni! Ho ani ayugoho ni ngba wene gene na rogo irisa yo, ani ima rengba ka zeresa ngbadu agu aboro yo nasoga rani.

15-16. (a) Tipagine duhe ti ni ni patatamana ka sa aboro i ini pa gamo aida? Oni funga kpiapai. (b) Wai du agu afugo Pauro du rogo ARomo 1:16 abi rani?

¹⁵ Mo sa aboro i ini ro ni Dezire Yekova rogo gu rago mo araka rogoho. (Yes. 43:10) Si nawira gupai nga ka boro kpi dagba gamo aborokporo, agumero gbiati amurakporo ima rengba ka zinga mbiko sino kinaho mo arimisongo tiro ku rogoho ya. Si ima rengba kadu foro taata mo mangipai kuti gupai re ka si du nga mo aima sakapai tipa gamo aida fuyo mbata fu regbo. Francisco, nga guko naraka Mozambike yo akepai ki ya: “Ho ani  awiriki rengo ni na diare nga Carolina, ani agumba gupai fu gaani aborokporo nga ani airisongo kpikpi aboro berewe te. Gaani diaberã aye kadu ngba asada yo ho unvura Carolina akpi ni. Gupai ninaamanga rogo gu rago re ho boro akpi ni nga, i nazunda kangba ni ti regbo irisombori. Fuo gure, mbembedi gume gu boro kpi re duwa ka ni ra tipa rame biata rogo gu ba i nauka gu ime ku rogoho i azundu kangba na ni. I namanga agi apai re tipa gupai nga ka zungodi toro gu boro kpi. Ga Carolina aborokporo aaberã gupai nga ri du nika ra rogo gu ba i auka gu ime ku rogoho i azundu kangba na ni re.”

¹⁶ Wai du Francisco na diako amangipai kuti gipai re? Francisco aya: “Bambiko gupai nga ani ima kpinyemu Yekova na ani naida ka fu ngbarago fuko, ani aka ka rimiso tirani ku rogo gupai re. Ga Carolina aborokporo aima zinga ni kerehe. I ape gupai nga ani airisanga kpikpi aboro te na i ayengo berewe ku kpurani watadu ka undo rani te. Wa ani aima sakapai tipa gaani aida mbata fuyo, ani aasakanga pai na yo ho i adu ni na zinga te. Gu kura agume aima songodapai ku bara rani yo, ki pe gupai nga ani aima sakapai tipa gaani aida. Fuo bete regbo kusa, ngbadu agume Carolina atona kaa zera, na ani kidu na rengba ka manga zereda na yo. Zavura agu akurayo aima ye ku kpuraniyo tipa ani fu gaani awaraga fuyo.” Ka zee ya zingo rani mbiko gu diaberã ani adiaha ka songoda gu rengo du tipa kpio ya.​—Oni gedi ARomo 1:16.

17. Ginipai rengbe ka undo rani ani du ni badia ngbanya fu gu kuarani Kristano gani boro nakpi?

¹⁷ Ho kuarani Kristano azanga gani boro ni rogo kpio yo, si naida ani mangi bakere asadatise kadu ni ‘badia ngbanya na ni wirina tipa ka unda ni rago gberãngbi.’ (Snz. 17:17) Waigu rengbe ani kadu ni “badia ngbanya,” gbe ka si du nga i nasosoda gu wirina narungo tipa kpio gani boro ni mangi agu apai adunga mburuhe rii Ziazia Kekeapai ya? Oni bingo abangua arengo ue nga ga Baibiri nga gu rengbe ka undo rani ani fu wasa fu gu boro gani boro nakpi.

18. Tipagine Yesu akpari ti ni, na ginipai rengbe ani ka wirikaha ti gako kpiapai?

¹⁸ “Oni kpari na agu yo nakpara.” (Rom. 12:15) Si ima rengba kadu ni mbumbuhe furani ani ini gupai rengbe ani ka pehe fu gu boro narungo ni bakerehe tipa kpio gani boro. Ti kura aregbo, ka ani kpari na ni, si ima rengba ka fu bakere  wasa funi kisusi agu afugo ka ani gumbaha. Ho bakurea Yesu nangia Razaro akpi ni, Maria, Marata, gbiati kura aboro akpari tipa ko. Ho Yesu ada ni fuo arame biama kusa, ko aima “kpara ni aume” a, wa ko avura ino nga ko aandu ka zingisa Razaro barambeda. (Yo. 11:17, 33-35) Ga Yesu aume aayugopa gu bipai Bako adu na ni tipa kpio Razaro. Ami aima yugopa ga Yesu nyemuse a tipa agume Razaro, na zanga kapa, gipai re aima fu wasa fu aMaria na Marata. Wakina gure a, ho awirinarani aino gupai ni nga ani nakpinyemu yo na kini berẽpa yo, si nasayo i ini gupai nga i nisayo te, ono i na agu abakure pati yo naberãpa yo na kini songodi yo.

19. Wai du rengbe ani ka mangasunge na Batungusipai 3:7, ho ani afu wasa ni fu gu kuarani Kristano narungo tipa pakpio gani boro?

¹⁹ “Rago onga kii, na rago fura.” (Batu. 3:7) Gu kura gene rengbe ani ka fu wasa ngbaha fu gu kuarani Kristano narungo tipa kpio gani boro nga ni dega ani turani funi wenengai. Si naida mo mbu wirinamo ni kusuko agu apai du ngbaduniyo, na si aidanga rago gberẽ tiro be gani afugo “aura” te. (Eyo. 6:2, 3) Si ima rengba kadu nga ni ni fudifudi ni berewe mbiko gu sosodahe nga ga agu agumeni angianga aDezire Yekova ya. Sidu, mo mangi kparakpee na ni. Mo zungodi “gu ko ninagia kpetambuahe” ko fu ome funi gbiati zereda ku berãni yo. (Tam. 65:2) Ka rengba du, oni gedi Ziazia Kekeapai sa na ni. Watadu oni gedi gu kekeapai rẽarẽ rogo gaani awaraga yo, wa gu nga agu apangbanga du tipa ga aboro raka nga gu rengbe ka ngarasa boro.

20. Ginipai ani ka sakapai tipaha rogo gu kekeapai ngbefuo gere?

²⁰ Nairiwo gu momu du ani na ni ka ino gu rengo du tipa kpikpi aboro gbiati gu wenepai napido agu aboro kumbatayo du rogo amurö! (Yo. 5:28, 29) Sidu, ani songodi gu rengo nga ga Ziazia Kekeapai na kini tungusihe fu kura aboro ni wingbaduse ti agu aregbo dunduko du momu berani. Gu kekeapai ngbefuo gere nika fura tipa gu kura gene nga sangbaatoro Satana aˈasada ka zio aboro ngbaha ku rogo gu bitimo nga ga toro. Ani nika bi ndu gupai si aida ti ni ani ne gu mangaapai gbiati aũngbarago du na ngbanya dagbaha na gu ga adaimona gbina re.