1-2. Tipagine Yesu adu ti ni ni fudifudiko?

ROGO ga Yesu yangara uru ni boro auru kpotosende, ko adu ni fudifudiko. Gbegberẽ aboro aandu ka rungosiko na ka imoko barambeda. Ono Yesu aadunga ni fudifudiko sa kina mbiko gupai nga ko aandu ka kpi te. Ko aima kpinyemu Bako gbe na ko aaida ka fu ngbarago fuko. Yesu aima ino gupai nga ka ko nye ni ruruko rogo gu kere asada yo ko aandu ka gbiatiko na ni, ko nika undo na dia gbarasarimo kusayo ti rimo Yekova. Yesu aima kpinyemu aboro a, na ko aima ino gupai nga gaani maabangirise tipa nyenye unga kumbatayo aaru riipa nye ko ni ruruko auru kpotosende da ti kpioko.

² Wa si avura du nga Yesu adu ni fudifudiko gbe, ko aduadu rogo zereda. Ko aya fu gako amokedi wẽ, “Gi zereda mi afu fu roni.” (Yo. 14:27) Ko aima du na “gu zereda nga ga Mbori,” nga gu zereda naye mbiko du boro na wene pagume na Yekova. Gu zereda re aundo Yesu ko du zezeredi berãko yo na kpotokoyo.​—Frp. 4:6, 7.

3. Ginipai ani nika wisigoho rogo gi kekeapai re?

³ Boro ho dagbarani yo nika gbia ti ni na gu ngbatunga fudifudiapai Yesu ahi te, ono agu aboro dunduko napekafuo Yesu nika gbiatiyo agbia na akpakarapai. (Mt. 16:24, 25; Yo. 15:20) Na wakina Yesu, ani nika duadu ni fudifudi rani ti kura aregbo. Ginipai rengbe ani ka mangaha tipa ka bakabangirise funga rii omerani na ki di gaani zereda nga ga berãseyo kusayo ya? Ani wisigingo apai biata nga gu Yesu amangihe ti regbo gako sunge auru kpotosende na ki bi wai rengbe ani ka wirikako ho ani agbiatirani ni na aˈasada.

4. Ringbisihe kuti 1 ATesaroniko 5:17, oni funga akpiapai nga gu nayugo gupai nga Yesu amangi kparakpee bara dunguhe rogo gu yangara uru ko adu ni ungako auru kpotosende.

⁴ Oni gedi 1 ATesaroniko 5:17. Rogo gu yangara uru Yesu adu ni ungako auru kpotosende, ko amangi kparakpee bara dunguhe. Ho ko asigira pa tingida pakpioko ni, ko amangi kparakpee kurii kpakuto gbiati imekakue. (1 Kor. 11:23-25) Mbata fu ko guari rogo gu ba i amangi Pumbo Susiri rogoho, ko amangi kparakpee na gako abawiriki. (Yo. 17:1-26) Ho ko ada ni na gako abawiriki Getesemane yo, ko amangi kparakpee bara dunguhe. (Mt. 26:36-39, 42, 44) Na gu yangara afugo Yesu agumbaha mbata fu kpiko angia kina kparakpee. (Rk. 23:46) Yesu amangi kparakpee fu Yekova tipa agu apai dunduko namangi rogo gu yangara uru ko adu ni ungako auru kpotosende re.

5. Tipagine ga amokedi wingbaduse arungbura ti ni?

⁵ Ndupai sa Yesu arengbe ka hi gu asada ti ni ko adu rogoho angia ko aakido kuti Bako rogo kparakpee yo. Ono tipa gako amokedi tigayo, i azanga ka kpatagara kuti kparakpee rogo gu yuru re. Ni sangbana gipai re, gayo wingbaduse arungbura ho i agbiatiyo ni na asada. (Mt. 26:40, 41, 43, 45, 56) Ho ani agbiatirani ni na aˈasada, ani rengbe ka nye ni rururani kina gu sa ka ani pekefuo ga Yesu kpiapai “ki nikpari” kindi. Ginipai rengbe ani ka manga kparakpee tipaha?

6. Waigu idapase nika undo rani ani nye rogo zereda?

⁶ Ani ima rengba ka kpara fu Yekova tipa ko “kíisi gaani idapase.” (Rk. 17:5; Yo. 14:1) Ani naida bakere idapase bambiko Satana nika asada agu aboro dunduko napekafuo Yesu. (Rk. 22:31) Waigu idapase nika undo rani ani nye rogo zereda zavura ho ani agbiatirani ni na akpakarapai ti mburu kuraha? Ho ani namangi  agu apai ni dunduko ani narengbe ka mangaha tipa ka diabe kpakarapai, idapase nika fõngbaduraniyo ani mbu gupai re ku bee Yekova. Bambiko gupai nga ani ima du na kido nga ko ima rengba ka mangapai tipa pai kisusi gu rengbe ani ka mangaha, ani na zereda berãraniyo gbiati kpotoraniyo.​—1 Pet. 5:6, 7.

7. Ginipai mo nawirikihe ti afugo Robert?

⁷ Kparakpee naundo rani ani banda gaani zereda nga ga berãseyo, ka ani vura kaa gbiatirani na kina gini akpakarapai vurũ. Oni bingo gu kpiapai nga ga Robert, nga guko du ni bakumba rogo dungurati, na garãko naima susa 80. Ko aya: “Gu rugute du rogo AFiripoio 4:6, 7 ima undo re mi sovura kuti dungu aˈasada rogo gimi raka yo. Mi aima gbia tire na akpakarapai nga ga marã. Na mi ki ima zanga gimi momu nga ga mangasunge ni bakumba tipa bete regbo.” Ginipai undo Robert ko banda zereda nga ga berãseyo? Ko aya, “Mi naamanga kparakpee nibasa ti gu regbo mi atona kadu ni fudifudi re. Mi ima ida kuti gupai nga ho mi amanga kparakpee ni dedede na ni bakerehe, mi nadu rogo bakere zereda.”

8. A wa duhe ni kekehe rogo Yoane 8:29, gini kurapai berewe naasa Yesu ko du na zereda nga ga berãseyo?

⁸ Oni gedi Yoane 8:29. Zavura ho i aarungosi Yesu ni, ko aima du na zereda nga ga berãseyo bambiko ko aima ino gupai nga ko aasa ngbarago ti Bako ni nye ko ni ruruko. Ko anye ni boro giasangba ho si adu ni fuko ni mbumbuhe ka mangaha wo. Ko aima kpinyemu Bako na ki moi iriso Yekova ni nyanyakipa pai kisusi rogo gako raka yo. Mbata fu ko ye ku auru kpotosende, ko angia ga Mbori “bangbasia boro sunge.” (Snz. 8:30) ga Mbori bangbasia boro sunge. Na ho ko adu ni auru kpotosende, ko atungusipai tipa Bako zaaza fu aboro. (Mt. 6:9; Yo.  5:17) Gu sunge re afu bakere ngbarago fu Yesu.​—Yo. 4:34-36.

9. Waigu rengbe pa fu ani tirani sa sunge tungusapai ka undo rani ani banda gaani zereda nga ga berãseyo?

⁹ Ani rengbe ka wirika Yesu ni gia ani sangba Yekova na ki “nimángi ga Gbia sunge zaza dedede.” (1 Kor. 15:58) Ho [“ani afu tirani ni nyanyaki,”NW] sa sunge tungusapai, si nasarani ani du na ruru bipai tipa gaani akpakarapai. (Amo. 18:5) Ni kpiapai, agu aboro ani agbiayo gene tungusapai yo nagbiatiyo dedede na akpakarapai kisusi wai ani agbiatirani na ni. Ono tie, ho i awirika ka kpinyemu Yekova ni na kini mangipai kuti gako arugute, gayo raka nada ni wenehe na i kidu na bakere ngbarago. Ai gu regbo ani abi gipai re si nimangi, ani nadu na bakere kido nga Yekova nangera angera fuo rani. Na gu kido re naundo rani ani banda gaani zereda nga ga berãseyo. Wirina nga guri nidu na bakere gberãrago rogo gari raka yo naabaha na kini bi tiri nga sunge tiri te bi gupai ni rengo nga ho ani afu tirani ni sa sunge tungusapai, ani nadu na bakere zereda nga ga berãseyo. Ri aya, “Ho mi afu tire ni sa sunge tungusapai, si nasa re mi du zezeredi gbe berãre yo na kidu na ngbarago. Mi nabihe nga si wo mbiko gupai nga ho du mi ni gene tungusapai yo, mi nabi tire nga mi mbembedi gbe na Yekova.”

10. Ginipai mo nawirikihe ti afugo Brenda?

¹⁰ Oni bingo kura kpiapai a nga ga kura wirina du rimori nga Brenda. Kere kaza azi ri gbiati wiiri nga degude. Ka Brenda ndunga ngba nduri te, ri nata na kina ngbagida gbarĩgbarĩ aboro na ome tiri gbe te. Ri naatungusapai atungusa kporo na kporo ho du rengba ni beri, ono ri naamanga dezirepai gbe ni keka ri awaraga. Ri aya: “Ho mi arugu tire ni na gupai nga mi ahunga be gimi kaza rogo gi zegino du awere re te, si asa re mi moiberãre gbe sa sunge tungusapai. Manga dezirepai nasa re ka mi naaberãnga kuriipa gimi akpakarapai ya. Kuba gure, si nasa re mi moiberãre gbe sa undo agu aboro mi atungusapai fuyo rogo gu dagbarago nga ga gaani dungurati. Na si natingida re ti aregbo dunduko na pa gu maabangirise du mi na ni tipa kumbatayo.”

11-13. (a) Wai du amokedi gbiati kura aboro ayugu gupai nga i angia ndikidi abakurea Yesu? (b) Abakurea Yesu asako ko du wai?

¹¹ Ti regbo ga Yesu tungusapai dunduko, amokedi aima yugo gupai nga i angia ndikidi abakureako. I angia gu ngbatunga abakure Ziazia Kekeapai afura tipa yo ki ya: “Kura [bakurea] boro kina ho ka ni kuti ni ki susi wirinani.” (Snz. 18:24) Yesu anaabi gu ngbatunga abakure re na nyanyakipa yo. Ti regbo gako sunge tungusapai, boro ho dagba awirinako yo naadu na idapase kutiko te. (Yo. 7:3-5) Ti kura regbo sa, zavura agumeko aberẽ gupai nga ko ima popo. (Mk. 3:21) Ono tie, Yesu agumba gupai fu gako ruru amokedi rogo gu yuru naadu mbata fu kpiko nga: “Oni nga agu yo naadu na mi ho i aasadi re ni.”​—Rk. 22:28.

¹² Amokedi anaaba gberãrago aba ti Yesu ti kura aregbo, ono ko anaamaanga berãko fuo gayo aingahe te, ko aima ino gupai nga i aima du na idapase kutiko. (Mt. 26:40; Mk. 10:13, 14; Yo. 6:66-69) Rogo gu yangara yuru Yesu adu na gi ruru akumba re mbata fu kpiko, ko aya fuyo: “Mi yambu roni ni abadiangba; bambiko agu apai dũ mi agi ngba Buba mi yugu he fu roni.” (Yo. 15:15) Zanga kapa, abakurea Yesu aima ngarasako bakere gbe. Gu undo i afuhe fu Yesu ti regbo gako sunge tungusapai aima ye na bakere ngbarago ku kpotokoyo.​—Rk. 10:17, 21.

¹³ Kupati amokedi, Yesu aima du na kura abakure beko, ni akumba na adee, nga aguyo naundo ko rogo sunge tungusapai yo na rogo kura agene yo. Agu akurayo adu kinaho nanaayamba ko ku kpuyo yo tipa riahe. (Rk. 10:38-42; Yo. 12:1, 2) Agu akurayo kini ndu anunguro na ko na kini fuku ahe fuko. (Rk. 8:3) Yesu  adu na wene abakure beko, bambiko ko angia wene bakure fuyo a. Ko anaamanga wene apai fuyo na ko anaaidanga gupai nga i mangi gupai i aadunga na rengba ka mangaha ya te. Yesu angia rengberengbe boro, ono ko aima du na tambuahe tipa agu aundo agu abakureako naangianga rengberengbe aboro ya afuhe fuko. Na zanga kapa, i aima undo ko ko banda gako zereda nga ga berãseyo.

14-15. Waigu rengbe ani ka manga wene abakure, na waigu rengbe yo ka undo rani?

¹⁴ Wene abakure nika undo rani ani nye ni rururani fu Yekova. Na gu bawene gene kisusi rengbe boro ka manga wene abakure ngbaha nga kadu ni wene bakure. (Mt. 7:12) Ni kpiapai, Ziazia Kekeapai nangarasa rani nga ani mangisunge na gaani regbo gbiati ome tipa ka undo kura aboro, gbe agu aboro ‘zingo ahe’ amanga yo. (Ef. 4:28) Ya mo mo rengbe ka berãpa boro rogo gamo dungurati nga guni rengbe mo ka undo ni? Ya mo mo rengbe ka ndu ka ngbeka ahe fu gu boro arengbanga ka guari kporo ya be gbinza watadu kaza? Ya mo mo rengbe ka fu riahe fu riikporo nga gu du rogo zingo marã? Ka si du nga mo ima ino wai ka mangasunge na gaani bangiriba nga ga Internet nga jw.org^® gbiati JW Library^® app, ya mo mo rengba ka undo kura aboro rogo gamo dungurati tipa i ini wai ka mangasunge na ni? Ho ani afu tirani ni gbe kaa undo kura aboro, si nawira gupai gbe nga ani nika duadu na ngbarago.​—Amo. 20:35.

¹⁵ Agu aboro ani azio bakure na yo nika songoda rani ho du ani ni rogo aˈasada, na ki undo rani ani banda gaani zereda nga ga berãseyo. A kina wai Eriu adegetuko ho Eyobo aafura ni tipa gako aˈasada, abakurearani naundo rani ni dega  yo tuyo ni zerangbaduse ho ani apeka pa gaani akpakarapai ni fuyo. (Eyo. 32:4) Si aidanga ani idi gupai nga abakurearani naamanga adiaberã furani te, ono si ni patatamana ka ani degeturani kuti gu gayo arugute du mburuhe rii Ziazia Kekeapai. (Snz. 15:22) Na kina wai Bakindo Davide adi gu undo kugume ni umbasitise abakureako afuhe fuko, si naida ani du na umbasitise ki di gu undo kugume abakurearani afuhe furani ho ani aidaha ni. (2 Sam. 17:27-29) Nirengo, ngbatunga gu wene abakure re nga gamahe be Yekova.​—Yak. 1:17.

16. Ringbisihe kuti AFiripoio 4:6, 7, gini bangisa gene rengbe ani ka gbia zereda ngbaha? Oni sakingo rogoyo.

¹⁶ Oni gedi AFiripoio 4:6, 7. Tipagine Yekova ape gupai ti ni furani nga gu zereda ko afuhe, ani rengbe ka gbiaha “rogo Kristo Yesu yo”? Bambiko ani rengbe ka gbia nyenye zereda berãrani yo na kpotoraniyo kina gu sa ka ani rugutirani na ga Yesu bangiriba rogo gu ringbisapai yo nga ga Yekova, na kidu na idapase kutini. Ni kpiapai, gaani aingapai dunduko rengbe yo ka mbupai furani ti ni vurube ga Yesu motumo tumorii. (1 Yo. 2:12) Nairiwo gu wasa pa berãkurii gipai re aye na ni furani! Nidu Yesu ni bakindo ga Mbori Kindo, ko nika nyasariipa gu gbegberẽ apai dunduko Satana gbiati gako zegino naye na ni kuti rani. (Yes. 65:17; 1 Yo. 3:8; Yugo. 21:3, 4) Nairiwo gu wene maabangirise tipa kumbatayo gipai re afuhe furani! Na ka si vura du vurũ nga Yesu fu nyanyaki sunge furani ani mangihe, ko na kina rani, na ko nasongoda rani asongoda rogo gi yangara arame re. (Mt. 28:19, 20) Nairiwo gu wingbaduse gipai re asa rani ani du na ni! Wasa, maabangirise, gbiati wingbaduse nga gu nyanyakipa apai si aida ani du na ni tipa kadu na zereda berãseyo.

17. (a) Waigu rengbe Kristano ka banda zereda nga ga berãseyo? (b) A wa duhe rogo Yoane 16:33, ginipai ani nika du na rengba ka mangaha?

¹⁷ Waigu tie rengbe mo ka banda gamo zereda nga ga berãseyo ho du mo ni rogo kere aˈasada? Mo rengbe ka mangaha wo ni manga mo agu apai Yesu amangihe. Bambatapai nga, mo mangi kparakpee na ki kpatagara kutini. Uepai nga, mo gisangba Yekova na kini tungusipai zaaza zavura ho duhe ni ni mbumbuhe ka mangaha wo. Na biatapai nga, mo kido kuti abakureamo tipa i undo ro rogo aˈasada yo. Ka mo mangihe wo, gu zereda nga ga Mbori nika banda berãro na kpotoroyo. Na wakina Yesu, mo nika diabe ai asada.​—Oni gedi Yoane 16:33.